Tiito 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ wosɛyɛɛrɛɛ seey lak eet Paawuloos sinɛ laaŋoyen Waakoyotoŋk ɛ wosɛytan Yeese Kereseek. Wosɛykɛɛɓati kɛnɔ kɔnya joop sigɛɓa daam Waakoyot ŋaadiyɛɛkɛ, ɛ ara sɛɛg kɛnɔ ɗegerar eekeer ŋaadiyɛɛkoŋkuk.

² Agut sini ŋaadiyɛ sigi ijaagɛɛɓa ant sinaanɛɓa tonu Waakoyotuk Wɛɛŋakɛ sigaagɛkoy nɔkoyk nɔkoyk. Kuumɗiiɓa tina Waakoyo sinɛ ki toniiɗ nyonuk emeyikɛ jeemɛ, kɛnɔkoy tina gaɓɛ Wɛɛŋa sigi.

³ Saaɓa gayɛɛɗ eme sinɛɓa gaamuk, nɛɓa Waakoyot yaaŋɛ Pɛɛnii nɛɛkɛ. Agut sinɔɓa gaɓɛɛɗɛɛ Pɛɛni sini a adarat eeta, nɛ waasa oko sekiyɛ Waakoyotoŋk sinɛ Ebɔdtan naŋkik.

⁴ Taapɛɛra wargatɛ sini Tiitowa, sinaana ito tɔɔn naak sinɛ eekerkank ŋaadiyɛɛkɛ gaŋk, sigeege eet a sɛɛnik. In dakɛ wookaan a bɔdɛ sooy lak Baabɛɛ Waakoyok a Ebɔdtan naŋk Yeese Kereseek.

Ijaag Tiitook Kɛrteese

⁵ Ŋɔrkaakanni Kɛrteese kɛnɔ ijaagɗikin nɔ isiisin ola sigɛkan kir gayɛɛk, oko sinɛ kanna sekɛɛɗak, kɛnɔ daamun gutarɛɛ gode Sambatɛyoŋkuk katamɛɛkɛ baŋɛ.

⁶ Gutarin gode Sambatɛyoŋkuk in iɗit sinɔ kɛɛ laaganyɛɛk, sinɔ lak jarti a omoŋɔŋk, in ege tɔɔmɔk gɛɛnɛk ŋaadtaanak, a kat gɔɔnyɛɛ sɛɛg agut molkotɔn maŋk agut sinɔ kirɗi tiiɗitik.

⁷ Ɔɗɔwen gode Sambatɛyoŋkuk agut sinɔ lakiɗ adarat ijaag Waakoyotoŋkuk, in iɗit sinɔ kɛɛ laaganyɛɛk, sinɔ ki meriiɗ ɛɛkik, sinɔ ki ŋadi a gorgorŋɔŋk, sinɔ ki tɔpɔyk, sinɔ ki ɗɛyɛɛ kaarink, sinɔ ki golɛ woriyaak,

⁸ mayakana iɗit sinɔ boŋu konank, sinɔ poru any sinɔ mentanŋɔŋkuk, sinɔ ikomu ɛɛk nɛɛkik, sinɔ pakattank, sinɔ beeɗ kɛ ɗɔmk pɛɛnii nɛɛkɛkik.

⁹ Iɗit sini in gaamu Pɛɛni sinɔ ŋaadɛɛŋɔŋk ɛ lalaŋi a rɔɔriyɔn sinɔ eekerkank. Nɛ oolɛ a rɔɔriy joop ɔgɔ Pɛɛnii sinɔɔnɛ mentanŋɔŋk oko sinik, a gɔɔnyɛ joop sigɛ ɓooyur Pɛɛni sinikiŋ.

¹⁰ Lakɛ joop a ɓɔɔkaaŋ sigɔ kir ɗɛyɛɛ any sinɛ tonɛɛkik, a sigɔ bɔɔla kanysɛyaak, a sigɔ raamɗiiŋɔŋk. Ege sigi kɛ ɗɔm komoy joop sigɛɓa yayawɛɛk.

¹¹ In koykoyɛ joop sigi kɛnɔ dakɛr kɛ many agut sinɔ rɔɔriyaaɗ any sinɔ moko ɓɛɛlɛ kɛ ɗɔmk nɛ sɔɔkɛr joop wɛyoŋk a rererigeeɗ wori.

¹² Iɗit pɛrkaakoŋk nɛŋk om tonuɓa kɛ, "Ege joop Kɛrteesik nyonkaanak ɓɛɛnyɔwɛ gɛɛŋk baŋɛ. Ito sɛɛg keegu sigɔ ŋɛɛwɛŋɔŋk, ɛ dɔɔtɛɛ ɛ ɓukurju amtun gɛŋk."

¹³ Agut sini ege waasiyɛ sigi eekeer. Koykoyu sɛɛg jɛt kɛnɔ ɓɛɛlɛr ŋaadiyɛɛkɛ kɛ ɗɔm,

¹⁴ ɛ kɛnɔ kat nomɛr korgɛɛnye joop Ayuuduk a sekiyɛ joop sigɔ ɓooyur eekeerik.

¹⁵ Joop sigɔ mentaanaŋɔŋk mentaana sɛɛga olaat baŋɛ, ma joop sigɔ somkaanakik ɛ kir ŋaadiɗiitik kɛɛ ara any sinɔ mentan sɛɛgak. Kɛygun koɓiɗak gɛŋk a kalbiyɛ gɛŋk ɓɛɛlɛr a somkaanak.

¹⁶ Tonur kɛ, "Ɗegerii Waakoyoŋ," mayakana kaadɛr ijaag nɛŋkiŋ ŋɛɛwɛ sɛɛkiŋ, ɛ kir tiiɗit ɛ kir oolɛ a ijaagir any sinɔ mentanŋɔŋkuŋ.