Roome 6 - Kuumeet Sinɔ Tɔɔnuk Ad Majaŋeeroŋk

Rer Tikiyɛɛkɛ Ma Bɔdɛ Keresee

¹ Nɛ agut sini tonii ɛk? Anɛ beeɗii a a'arii tikiyɛ kɛnɔ obi wookaan?

² Ki gayɛ adaktan. Rɛɛriiɓa tikiyɛɛkaaŋ, oolii a beeɗii sɛɛge tak ɛk?

³ Kiir ɗegerɔɔn eteŋk baŋɛ, sigɛkan tin aadɛɛ a Yeese Kereseek, kɛ aadɛɛɓa tin kɛnɔ eteŋk omoŋ a Sɛɛn, aadiit naŋk ɛɓɔrɛ ret nɛɛkɛ eteŋk omoŋ?

⁴ Agut sini rɛɛriiɓa aadiit nɛɓa tin kɔɔwɛɛ a sɛɛn agut omoŋ, oko sinɛɓa ŋaarkiɗ Kerese ret walasa reteerɛk eemɛyɔɔn Ɛpɛnaakik, kɛnɔkoy ɓɔre beeɗii wɛɛŋakɛ sigɔɔgɛ tɔɔmɔkuk.

⁵ Agut sinɔ ɔkɔn eteŋk omoŋ a sɛɛn agut omoŋ ret nɛɛkɛ a gaayii sɛɛniŋ, nɛkoy ɓɔrɛ eteŋk omoŋ eekeerɛ a sɛɛn agut omoŋ, ŋaarin ret nɛɛkɛ walasak a gaayii sɛɛn.

⁶ Ɗegerii kɛ laalawɛɛɓa ɛɛk naŋk sinɛɓa bɔɔlɔŋk a sɛɛn agut omoŋ, kɛnɔ aalɛ ɛɛk sinɛ tikiyɛɛkoŋk, ɛ kat dakii a laaŋoyeer tikiyɛɛkoŋk.

⁷ Agut sinɔ iɗit sinɔkan rɛrŋɔŋk ŋaarkikan tikiyɛɛkɛ yaakata.

⁸ Ɔkɔnkan rɛɛrii a Keresee agut omoŋ, nɛ ŋaadii kɛ beeɗiikoy a sɛɛniŋ.

⁹ Agut sinɔ ɗegerii kɛ ŋaarkiɓa Kerese ret walasa, a koy ki rerin kɛkar adaktan, ɛkoy kɛɛ ret ɓaŋkawuka sɛɛne raŋk.

¹⁰ Rɛrɓa sɛŋk rer, rɛrɓa sɛŋk tikiyɛɛka agut omoŋ a pedtan, yakana sɛɛn bɔdtan wɛɛŋakɛ beeɗ sɛŋk Waakoyota.

¹¹ Agut sini ikomɛɛ ɛkan goŋk a ito rɛrari tikiyɛɛka, mayakana ito iinak bɔdtaanak Waakoyota Yeese Keresee.

¹² Agut sini kat tapaaɗaanir tikiyɛɛk buusɛɛ noŋk, sinaanɛ retenk kɛnɔ tiiɗikari ɗɛyaana sinɔɔna ŋɛɛwɛnŋɔŋk.

¹³ Kat ariir kaakastaana goŋk ɛɛkoŋk, a ola ijaagoŋk any sinɔ ŋɛɛwɛnŋɔŋk nɔ wideetar tikiyɛɛka, yakana in wideerɛɛ ɛkan goŋk Waakoyota, oko joop sigɔkɔ murarki ret bɔdɛɗaak, ɛ in arɛɛ kaakastaana goŋk ɛɛkoŋk Sɛɛna, oko ola ijaagoŋk mentanka taamɛkɛ Waakoyotoŋk.

¹⁴ Agut sinɔ moko atukari higii goyse ɗeek, ma atukari wookaan goyse ɗeek, nɛ ki gayɛ a kɔnu ɓalir tikiyɛɛkiŋ.

Laaŋoyeer Mentanka Taamɛkɛ Waakoyotoŋk

¹⁵ Anɛkɔɔ ɓɛɛlɛ ɛk? Ijaagii tikiyɛ agut sinɔ arkiɗii wookaan goyse ɗeekik, a moko higii goyse ɗeekiki? Ki gayɛ a daktan.

¹⁶ A kiir ɗegerɔɔn kɛ saa wideetarkiɗɔ ɛkan goŋk eta sinaana tiiɗigiɗɔɔk kɛ, ariir ɛɛk a iinak laaŋoyeer eta sinaana tiiɗigiɗɔɔk, iinak laaŋoyeer tikiyɛɛkoŋk sigɛ dilɗi retaak, maŋk iinak laaŋoyeer tiyaanoŋk sinɛ dilɗi mentankaatak taamɛkɛ Waakoyotoŋkuk?

¹⁷ Yakana in dakɛr pɔɔsiyɛɛk Waakoyota, agut sinɔ iinakɓa jeemɛ laaŋoyeer tikiyɛɛkoŋk, yakanaɓaɓɔ tiiɗikari ɓayɛ baŋɛ eekeerɛ sigaagɛkan laŋɛɛ rɔɔriyɔɔn sinaanɛɓa boŋiirik.

¹⁸ Ŋaararkɔɔɓa tikiyɛɛkɛ yaakata, nɛɓa dakɛɛr a laaŋoyeer mentankaata taamɛkɛ Waakoyotoŋkuk.

¹⁹ Tona sini ad sinɔɔnɛ mɛlɛŋɔŋk agut sinɔ iinak bɔɔlakik. Oko sinɛɓa ijaagɗiiɗɔ a wideetar nyonitaak goŋk ɛɛkoŋk, a laaŋoyeer somikeenoŋk a ijaag sinɔ ŋɛɛwɛnŋɔŋkuk, nɛɓɔ sisɔ in wideerɛɛ sɛɛg a laaŋoyeer mentankaata taamɛkɛ Waakoyotoŋkuk a geetiyɛɛka.

²⁰ Saaɓa iinak laaŋoyeer tikiyɛɛkoŋkuk, nɛɓa kirkɔ yogiiɗ ijaag any sinɔ mentan taamɛkɛ Waakoyotoŋkuk.

²¹ Saaɓak laŋiirɓa tɔkɔny kɛ jikon ant sineene latuguɗɔ keenyk sisɔk? Laŋɛɛ ant sinaanɛ rer.

²² Yakana sisɔ ŋaararkɔɔkan tikiyɛɛkɛ yaakata, nɛɓɔ iinak laaŋoyeer Waakoyotoŋk. Taamɛ sigɛ tolɛɛrik diilerkoy kɔnu geetiyɛɛka, ege any sinɛkoy laŋiiɗɛɛk wɛɛŋa sigɛkoy nɔkoy nɔkoyk.

²³ Gati tikiyɛɛkoŋk rer, ma tigi Waakoyotoŋk wɛɛŋa sigɛkoy nɔkoy nɔkoyk goy Suumi naŋk Yeeseek.