Roome 5 - Kuumeet Sinɔ Tɔɔnuk Ad Majaŋeeroŋk

Bɔdɛɛ A Yaaka

¹ Sisɔ agut sinɔ mentankiɗii taamɛkɛ Waakoyotoŋk ŋaadiyɛɛkɛɛk, nɛ lakii yaaka a Waakoyo goy Suumi naŋk Yeese Kereseek.

² Guugunyiikan goy nɛɛkɛk mɛyina a maariyeeta Waakoyotoŋk sineena ɛtɛɛɗiik, nɛ merii ɛɛk ŋaadiyɛɛkɛ sigaagɛ kookoriik sigɛ kaasɛɛɗii eemɛyɔn Waakoyotoŋkuk.

³ Moko sineene dakɛɗa, yaaɓɔrɛ tina rakatɛɛ naŋkiŋ, agut sinɔ ɗegerii kɛ laŋɛɛ rakatɛɛ ɓaŋkaawurɔɔn oolaanik,

⁴ laŋɛɛ ɓaŋkaawurɔɔn oolaanik ɛtɛɗɔ paariyɛɛkɛk, ma ɛtɛɗɔɔgɛ paariyɛkɛɛk laŋɛɛ ŋaadiyɛ sigɛ kookorɛɛk.

⁵ Kir tin ariiɗ ŋaadiyɛ sigɛ kookoriik a lakii keeny, agut sinɔ gupatɗiik kan tina mɛyin Waakoyotoŋk ɓayɛtunɛɛka gaŋk goy Wɛɛŋa sigɔ Geetitaanakik sigɛɓa tina gaɓɛɛk.

⁶ Saa inɓa eteŋk bɔɔlakik, saaɓa gayɛɗ ɔɔtɛ nɛɛkik nɛɓa rɛr Kerese agut tikitaanak.

⁷ Ooɗi jɛt laŋi iɗit sinɔ rɛr ɔɔtɛ iɗit sinɔ mentan taamɛkɛ Waakoyotoŋkuk, ma ɔkɔn kaɗɛɛŋ laŋɛɛ iɗit sinɔ rɛr ɔɔtɛ iɗit sinɔ mentanŋɔŋkuŋ.

⁸ Yakanaɓa rɛr Kerese agut eteŋk a inɓa eteŋk tikitaanak, yaaŋɛ sini mɛyin Waakoyotoŋk sinɛ lak eteŋkaak.

⁹ Ɔkɔn sisɔ mentankii taamɛkɛ Waakoyotoŋkuŋ yɛrom nɛɛkɛkiŋ, nɛ koy bɔdii goopan Waakoyotoŋk goy nɛɛkɛk eekeerɛ.

¹⁰ Nɛ a inɓa eteŋk gumaakeer a Sɛɛn, nɛɓa taakiɗiikii a Waakoyo ret Tɔɔn nɛɛkik. Agut sinɔkɔ sisɔ taakiɗiiɗii eekeerɛk, nɛkoy bɔdii wɛɛŋakɛ gɛɛnɛkiŋ.

¹¹ Moko sini dakɛɗa. Yakana sisɔ merii ɛɛk Waakoyote goy Suumi naŋk Yeese Keresee sinɛɓa laŋiiɗii taakiyɛɛk.

Adam A Keresee

¹² Agut sini mɛlɛrkiɓa tikiyɛɛk ɗooka raŋana goy iɗit sinɔ omoŋɔŋk, nɛɓa mɛlki ret agut tikiyɛ sigɛ omaanakŋɔŋk. Nɛ goy iɗit sini omoŋɔŋk ijaagirɓa joop baŋɛ tikiyɛ, nɛɓa mɛlki ret joopa baŋɛ.

¹³ A inɓa kɛɛ gaɓɛɛɗ higi, maɓa tikiyɛɛk ɓɛɛlɛr ɗook raŋk. Yakana kɛɛ ikomiit tikiyɛ nyon sinɔɔnɛ kiiɗɛ higiik.

¹⁴ Tapaaɗaaniɓa ret a tukiɗik Adame nɔ mɛlɛɛɗa Muuseya aasi joope sigaagɛɓa kir sɔɔkɛt higiik raŋk oko Adamuk. Sɛɛn sinɛɓa dakɛ a tagaytan Iɗit sinɛkoy mɛlkik.

¹⁵ Yakana moko ɛtɛ tigi nɛɛkɛ oko tikiyɛ. Agut sini ɔkɔnɓa rɛrar joop tikiyɛɛkɛ iɗit sinɔ omoŋɔŋkuŋ anɛ obi a ɛtɛ ɛk mɛyin a maariyeet Waakoyotoŋk a wookan nɛɛk sinɛɓa mɛlki mɛyin Waakoyotoŋk iɗit sinɔ omoŋɔŋk Yeese Kerese sinɛ gaɓɛ joopa sigɔɔga ɓɔɔkaaŋɔŋk a ŋaaŋayikŋɔŋk.

¹⁶ Kɛkar moko ɛtɛ any sinɛ laŋɛɛ tigii Waakoyotoŋk oko any sinɛɓa laŋɛɛ tikiyɛɛkɛ sigɔɔgɛɓa ɗɔku iɗit sinɔ omoŋɔŋk. Nomkuɗɓa pirdii tikiyɛ iɗit sinɔ omoŋɔŋk nɛɓa ɗɔku goopan, mayakanaɓa mɛlki wookaan tikiyɛɛkɛ sigɔɔgɛ ɓɔɔkaaŋɔŋk baŋiya nɛɓa ɗɔku mentanka taamɛkɛ Waakoyotoŋk.

¹⁷ Ɔkɔn tapaaɗaan ret eteŋkɛ raŋk agut tikiyɛ iɗit sinɔ omoŋɔŋkuŋ Adamukuŋ, nɛkoy ɓɔrɛ beeɗir wɛɛŋakɛ joop sigɛkan boŋur wookan a tigi Waakoyotoŋk sinɔ ŋaaŋayikŋɔŋk nɔkan mentaana taamɛkɛ Waakoyotoŋk goy iɗit sinɔ omoŋɔŋk, Yeese Kereseek.

¹⁸ Kɛkar oko sinɛɓa ɗɔkarkiɗ tikiyɛ iɗit sinɔ omoŋɔŋk goopan joopa baŋɛk, nɛɓa ɓɔrɛ ijaag iɗit sinɔ mentanŋɔŋk omoŋɔŋk ɗɔku wɛɛŋa joopa baŋɛ ɛ ari sɛɛg a mentaana taamɛkɛ Waakoyotoŋk.

¹⁹ Oko sinɛɓa joop a ɓɔɔkaaŋ tikitaanak agut iɗit sinɔ omoŋɔŋk Adam sinɛɓa ki tiiɗitik, nɛɓɔrɛ joop a ɓɔɔkaaŋ mentaana taamɛkɛ Waakoyotoŋk agut iɗit sinɛ omoŋɔŋk Kerese sinɛkan tiiɗik.

²⁰ Mɛlkiɓa higii kɛnɔ ɓɔɔka tikiyɛɛk, yakana obi jɛt a kaalɛŋ wookan Waakoyotoŋk oko sinɛ ɓɔɔkaakiɗ tikiyɛɛkik.

²¹ Nɛ oko sinɛ tapaaɗaanɛrɗi tikiyɛɛk ret baŋɛk, nɛɓɔrɛ tapaaɗaani wookan mentankaat taamɛkɛ Waakoyotoŋk kɛnɔ laŋɛɛ wɛɛŋa sigɛkoy nɔkoy nɔkoyk goy Suumi naŋk, Yeese Kereseek.