Roome 4 - Kuumeet Sinɔ Tɔɔnuk Ad Majaŋeeroŋk

Mentanɓa Abraham Taamɛkɛ Waakoyotoŋk Ŋaadiyɛɛkɛ

¹ Tonii sisɔ ɛk agut Abraham sinɛɓa ɔrɛɛ naŋk taarek?

² Ɔkɔnɓa Abraham mentan taamɛkɛ Waakoyotoŋk ijaagiŋ, nɛ gunɓa lak any sinɔ meriiɗ ɛɛkŋɔŋkuŋ. Yakanaɓa ki oolɛ a meri ɛɛk taamɛkɛ Waakoyotoŋkuŋ.

³ Tonu Wargatɛ Waakoyotoŋk kɛ, "Ŋaadiɓa Abraham Waakoyo, nɛɓa ikomguɗɛɛ ŋaadiyɛ gɛɛŋk a mentanka taamɛkɛ Waakoyotoŋk."

⁴ Saa ijaagɗiɗ iɗik nɛ wori sinɛ koyguɗɛɛk kiigiɗɛ ikomiit a wookan, mayakana gati tɔkiyan nɛɛkik.

⁵ Kɛygun aasi iɗit kiikɛ ijaagɛ any sinɔ mentanŋɔŋkuŋ, ma ɔkɔn ŋaadi Waakoyo sinɛ ari tikitaanak a mentaana taamɛkɛ Gɛɛnɛkik, nɛ ikomguɗɛɛ a mentanka taamɛkɛ Waakoyotoŋk.

⁶ Yaaŋɛ Daawit goy nɛɛkɛ kɛ geetitan a ɛtɛ ɛk iɗit sinɛ ari Waakoyot a mentan taamɛkɛ Gɛɛnɛ, ma kiiɗɛ ijaag sinɔ mentanŋɔŋkuk, nɛɓa tonu kɛ,

⁷ "Geetitaanak joop sigɛkan ranyjɛɛrɛ sɛɛge tikiyɛ gɛŋkik, ɛ sɛɛge ŋɔɗurɛɛ ŋɛɛwɛnka nɛŋkik.

⁸ Geetitan iɗit sinɛ Suumii kiigeeɗ ikomiit tikiyɛ gɛɛŋkik."

⁹ Anɛ geet siniɓa tonu Daawitik joopa sigaagakan yayawɛɛk dakɛɗa, maŋk ɓɔrɛ joopa sigaagakan kɛɛ yawɛɛɗik? Tonii kɛ ikomɛɛɓa Abrahama ŋaadiyɛ gɛɛŋk a mentanka taamɛkɛ Waakoyotoŋk.

¹⁰ Anɛɓa ikomguɗɛɛ ɛk? Yawɛɛɗ nɛɛkɛ baŋiya, maŋk yawɛɛɗ nɛɛkɛ ɔɗɔɔkɛ? Ikomguɗɛɛɓa yawɛɛɗ nɛɛkɛ ɔɗɔɔkɛ, ma mokoɓa yawɛɛɗ nɛɛkɛ baŋiya.

¹¹ Yawɛɛɓa Abraham kɛnɔ yaaŋɛ sinɔ kɛ ikomguɗɛɛɓa ŋaadiyɛ gɛɛŋk a mentanka taamɛkɛ Waakoyotoŋkuk a inɓa kɛɛ yawɛɛɗik. Agut sini ege Abraham ɛpɛn joopa sigaaga ŋaadiɗi maɓa kɛɛ sɛɛg yawɛɛɗik a sigaaga sɛɛga ikomɛ ŋaadiyɛ gɛŋk a mentanka taamɛkɛ Waakoyotoŋkuk.

¹² Sɛɛn ɓɔrɛ ɔrɛɛ joop sigɛɓa yayawɛɛkiŋ. Nɔ sɛɛga dakɛɗ a ɔrɛɛk moko agut sinɔɓa yayawuɗɛɛ sɛɛgŋɔŋk, mayakana agut sinɔ beeɗirɗi oko beeɗit ŋaadiyɛɛkoŋkuk sinɛɓa beeɗiɗ Abraham sinɛɓa ɔrɛɛ naŋkik a inɓa kɛɛ yawɛɛɗik.

¹³ Kuumɗiɓa Waakoyot Abrahama a komoya nɛɛka kɛnɔkoy ege ɗook nɛɛk. Ijaagɛɛɓa kuumiyɛ sigiŋ moko agut sinɔɓa Abraham tiiɗiɗ higiyaak, mayakana agut sinɔɓa ŋaadiɗiiɗ ɛɓa ikomguɗɛɛ mentanka taamɛkɛ Waakoyotoŋk.

¹⁴ Ɔkɔn joop sigɛ koorɛr higiik moonɛr nyon, nɛ gunɓa kir kɔnyɗiit ŋaadiyɛɛk ma kuumiyɛ gɛɛnɛ ɓɛɛlɛr kanysɛya.

¹⁵ Agut sinɔ ɗɔku higii goopan, mayakana kɛɛ tikiyɛ nyon sinaanɛ kiiɗɛ higik.

¹⁶ Tukɛɛɓa ŋaadiyɛ sigɛ kookorɛɛk ŋaadiyɛɛkɛ raŋk kɛnɔ dakɛr kuumiyɛ sigi a kabdi mɛyin a maariyeet Waakoyotoŋk komoya Abrahamuk baŋɛ, moko joopa sigaaga tiiɗi higiyaak dakɛɗa mayakana ɓɔrɛ joopa sigaaga ŋaadiɗi oko sinɛɓa ijaagiɗ Abrahamk, agut sinɔ egeɓa Abraham ɔrɛɛ naŋk baŋɛ,

¹⁷ oko sinɛɓa taapɛɛɗɛ Wargatɛɛ Waakoyotoŋk kɛ, "Ara kɔnu a ɛpɛn joopa sigɔɔga ɓɔɔkaaŋɔŋk." Yaaŋiyɛɛkɛ sigeege Waakoyo sinɛ ŋaadik sinɛ gaɓɛ wɛɛŋa reteerak ɛ ɗɔku ola sigɔɓa kɛɛ sɛɛgik a ɓɛɛlɛrŋɔŋk.

¹⁸ Ŋaadiɗiiɓa Abraham ɛɓa lak ŋaadiyɛ sigɛ kookorɛɛk, soodi ki gayɛ a gun lakiɗɛ ŋaadiyɛ sigɛ kookorɛɛkiŋ, kɛnɔ dakɛ a sɛɛn ɔrɛɛ joop sigɔ ɓɔɔkaaŋɔŋk ɗokanɛkoŋk, oko sinɛɓa taapɛɛɗɛ Wargatɛɛ Waakoyotoŋk kɛ, "Obiikoy komoy nookɛ a ɛtɛ oko sinik."

¹⁹ Kiɓa sɛŋk bɔɔlaat ŋaadiyɛɛkɛ saaɓa dɛnɛɛɗ buusɛ nɛɛkik sinɛ itoɓa rɛr eekeerɛk agut sinɔɓa atukuɗ emeyi gɛɛnɛ sigɔɔgɛ ɗibɛk, maŋk saaɓa dɛnɛɛɗ amɗ Saaraak sinɛ tersikank.

²⁰ Kiiɗɛɓa koɓiɗak a pɛɛy nɔ ki ŋaadit ŋaadiyɛ sigɛ kookork Waakoyotoŋk, maɓa ɓaŋkaawur ŋaadiyɛɛkɛ gɛɛnɛ a gaɓɛ eemɛyɔn Waakoyota.

²¹ Sɛɛnɓa eekerkan ɓayɛ baŋɛ sinɔɔnɛ kɛ dusanɛkoy Waakoyot ŋaadiyɛ sigɛ kookork sigɛɓa gageeɗikiŋ.

²² Agut sini ikomguɗɛɓa ŋaadiyɛ gɛɛŋk a mentanka taamɛkɛ Waakoyotoŋk.

²³ Mokoɓa taapɛɛ agut sɛɛn dakɛɗa pɛɛni sinɛ tonu kɛ, "Ikomguɗɛɓa a mentanka taamɛkɛ Waakoyotoŋk."

²⁴ Yakana ɓɔrɛ ikomu koy a mentanka taamɛkɛ Waakoyotoŋk eteŋka sigaaga ŋaadii Sɛɛn sinɛɓa boŋku Suumi naŋk Yeese Kerese ret walasak.

²⁵ Gaɓɛɛɓa Sɛɛn kɛnɔ rɛr agut tikiyɛ gaŋk, ŋaarkiɓa ret walasak kɛnɔ mentankii taamɛkɛ Waakoyotoŋk.