Roome 3 - Kuumeet Sinɔ Tɔɔnuk Ad Majaŋeeroŋk

¹ Anɛ sinɔ geeɗɛ iɗit Ayuuduk tɔkɔny nɛɛk jikon? Ma yawɛ lak tɔkɔny kɛ jikon?

² Obi tɔkɔny nɛɛkɛkiŋ gopakɛ sigɔɔgɛ ɓɔɔkaaŋɔŋk, jeemɛ olaatɛ baŋɛ gaɓɛɛɓa pɛɛni Waakoyotoŋk a adarat sɛɛga.

³ Ɔkɔn joop Ayuuduk a omoŋ omoŋ moko sɛɛg eekerkaanakiŋ, nɛ dakɛr eekeer kɛygun aasi ege joop baŋɛ nyonkaanakiŋ, ma sɛŋk ege Waakoyot eekerkan.

⁴ Ki gayɛ a daktan. Ege joop baŋɛ nyonkaanak, mayakana in ege Waakoyot eekerkan, oko sinɛɓa taapɛɛɗɛ Wargatɛɛ Waakoyotoŋk kɛ, "Eekerkan any sinɛ tonunk, lɔsiɗiikinkɔɔ saadi palamɗiɗɛɛŋɔŋkuŋ."

⁵ Mayakana ɔkɔn yaaŋɛr tikiyɛ gaŋk mentanka Waakoyotoŋkuŋ, anɛ tonii ɛk? Moko Waakoyot pɛrɛdɛ a liki saa tin goopɗu agut tikiyɛ gaŋkik? Tonɗiika seedi oko koɓi etoŋk.

⁶ Ki gayɛ adaktan. Ɔkɔnɓa ɓɛɛlɛ oko sinikiŋ, nɛ gunkoy pɛrɛdɛ Waakoyot joope ɗookoŋk ɛk?

⁷ Mayakana ɔkɔn yaaŋɛr nyon gaanɛ eekeer Waakoyotoŋkuŋ, a obiika eemɛyɔn nɛɛkiŋ, nɛti goop a ito eet tikitan agut jikon?

⁸ Daariɗita joop a omoŋ omoŋ a ito rɔɔririyika kɛ koy ijaagii any sinɔ ŋɛɛwɛnŋɔŋk nɔkɔɔ laŋii any sinɔ mentanŋɔŋk. Agut sini liki goopan sinɛ goopɗɛ sɛɛgik.

Ege Joop Baŋɛ Tikitaanak

⁹ Anɛ dɔɔskii eteŋk sigɛ joop Ayuuduk joope sigaagɛ moko Ayuuduk? Moko adaktan. Kɔnyɗiikaakan jeemɛ sinɔɔnɛ kɛ joop Ayuuduk kɛygun joop sigɔ moko Ayuuduk atu tikiyɛɛkɛ goyse ɗeek.

¹⁰ Agut sinɔ taapɛɛɓa Wargatɛɛ Waakoyotoŋk kɛ, "Kɛɛ iɗit sinɔ omoŋɔŋk mentan taamɛkɛ Waakoyotoŋkuk, kɛɛ aasi sinɔ omoŋɔŋk.

¹¹ Kɛɛ iɗit sinɔ lak koɓik ara, kɛɛ iɗit sinɔ ɗɛyɛ Waakoyok ara.

¹² Ŋaararkikan gopɛ Waakoyotoŋk baŋɛ, dakɛrkan a kɛɛ any sinɔ kɔnyɛrkik sɛɛg baŋɛ, kɛɛ iɗit sinɔ omoŋɔŋk ijaag any sinɔ mentanŋɔŋk, kɛɛ aasi sinɔ omoŋɔŋk.

¹³ Atutun gɛŋk ito pii sinɔkan tayɗiŋɔŋk, tonur nyon kaɗateerɛ gɛŋk, toni atutun gɛŋkik, ito marji kookowoŋk.

¹⁴ Enya atutun gɛŋk koony a ŋɛɛwɛnka.

¹⁵ Gorgoorar derak gɛŋk kɛnɔ ɓuurerki yɛrom.

¹⁶ Lakɛ gopɛ nɛŋk sɔɔkiyɛ a rakatɛ.

¹⁷ Kir ɗegerɔɔn gopan bɔdɛɛɗoŋk

¹⁸ Kɛɛ taamɛkɛ gɛŋk ɔɗɔɔkɛ tuɓur Waakoyotoŋk."

¹⁹ Sisɔ ɗegerii kɛ tonɗi higii joopa sigɔɔga atu higii goyse ɗeekik. Nɔ ɓɛɛlɛɛɗ sinik kɛnɔ miinye atutun joop baŋɛk ɛkoy ar ɗoo sini baŋɛ pirdii Waakoyotoŋk goyse ɗeek.

²⁰ Nɛ agut sini kɛɛ iɗit sinɔ mentan taamɛkɛ Waakoyotoŋk ma dusanɛɛ ijaag higiyoŋkuk, agut sinɔ ɗegerɛ kɛ ege joop baŋɛ tikitaanak higii.

Mentanka Taamɛkɛ Waakoyotoŋk Goy Ŋaadiyɛɛkoŋk

²¹ Yakana sisɔ yaaŋɛkan ɛɛk mentanka Waakoyotoŋk higii walas, waasɛrgeeɗ aasi sɛɛna higii a joop pɛrkaakoŋkuŋ.

²² Ege sini mentanka Waakoyotoŋk sinɛ laŋɛɛ ŋaadiyɛɛkɛ Yeese Kereseek joopa sigaaga ŋaadiɗiik baŋɛ, agut sinɔ kɛɛ pakakat ara.

²³ Agut sinɔ tikiɗikan joop baŋɛ, ɛkan bitakɗi sɛɛge eemɛyɔn Waakoyotoŋk,

²⁴ mentaanirar sɛɛk taamɛkɛ Waakoyotoŋk wookaan nɛɛkɛ goy Yeese Keresee sinɛkan gaɓɛ ɛɛk nɛɛk gumakaak.

²⁵ Wideerɓa Waakoyot Yeese Keresee a uduŋeet kɛnɔ laŋir joop sigɛ ŋaadiɗi sɛɛnek baŋɛk tɔŋɔɗ tikiyɛɛkoŋk yɛrom nɛɛkɛk. Ijaagɓa Waakoyot sini ɓaŋkaawurɔɔn oolaan nɛɛkik a ŋɔɗur tikiyɛ sigɛɓa ijaagir joop ɗeeŋk a yaaŋɛ pirdi nɛɛk sinɛ likik.

²⁶ Nɔɓa ijaagiɗ sinik kɛnɔ yaaŋɛ eme sineene kɛ Sɛɛn ɔɗɔwa nɛɛka iɗit sinɔ mentan ɛ kɛnɔ ari joop sigɛ ŋaadiɗi Yeeseek a mentaana taamɛkɛ Waakoyotoŋk.

²⁷ Oolii a merii ɛɛk jikoy? Kɛɛ ara. Manɔ kiiɗii meriiɗ ɛɛkik agut jikon? Agut sinɔ tiiɗiɗii higiyaak? Moko, yakana agut higi ŋaadiyɛɛkoŋk.

²⁸ Agut sini dusanii sinɔ kɛ mentan iɗit Waakoyote ma ŋaadiɗiiŋ dakɛɗa, ma moko ijaag sinɔɔnɛ sekɛ higiik.

²⁹ Ege Waakoyot Waakoyo Ayuuduk dakɛɗa? A moko Waakoyo joop sigɛ moko Ayuuduk? Eekeerɛ ege ɓɔrɛ Waakoyot Waakoyo joop sigɛ moko Ayuuduk.

³⁰ Ege Waakoyot omoŋ, ɛ ari joop Ayuuduk a mentaanaŋ agut ɛɛk nɛɛk ŋaadiyɛ gɛŋkik. Maɓɔrɛ ari a mentaana joop sigɔ moko Ayuuduk ŋaadiyɛɛkɛ gɛŋk.

³¹ Aalii higi ŋaadiyɛɛkɛ sigegeeŋ? Moko, arii higi a ɛtɛ a ɓaŋkawuŋ.