Roome 16 - Kuumeet Sinɔ Tɔɔnuk Ad Majaŋeeroŋk

Digoy Etoŋk

¹ Ɗɛya kɛnɔ ɗegerari agut manya eteŋka sinɛ peetik Pebee sinɛ ijaagen gode Sambatɛyoŋk Kinkiriyaak.

² Tona kɔna kɛnɔ boŋiir sɛɛn Suumii oko sinɛ boŋiiɗɛ dooytaanakik ɛ arirgiɗɔ tɔkɔny sinɛ ɗɛyɛ iinakɛk, agut sinɔ kɔnyɛkan joop sigɔ ɓɔɔkaaŋɔŋk a ɓɔrɛ eet agut omoŋ.

³ Digoyɛɛ nɔta Piriskila a Akiila sigɛ ijaagɗikii Yeese Keresee a eet agut omoŋɔŋk,

⁴ sigɛkan gaɓɛr wɛɛŋa gɛŋk rakatɛya agut eetik. Moko pɔɔsiɗiika sɛɛg eet dakɛɗa, mayakana ɓɔrɛ pɔɔsɛr sɛɛg dooytaanak sigɔ moko joop Ayuudukuŋ.

⁵ Digoyɛɛ nɔta dooytaanak sigɛ atu nyaki nɛŋkik. Digoyɛɛ nɔta Epanetoos sinɛ poraak sinɛkan ŋaadiɗi Keresee tuki nɛɛkɛ ɗook Isiyaak.

⁶ Digoyɛɛ nɔta Maariyam sinɛ ijaagɗi jɛt agut iinakik.

⁷ Digoyɛɛ nɔta tekaaneer gaaŋk sigɛ joop Ayuuduk Andironikoos a Yuuniyas sigɛkan korkoɗɛɛ sɛɛg a eet agut omoŋ. Nɛkan ɗegerɛɛ sɛɛg wosɛytaanakɛ kɔɔrk, ŋaadirkan sɛɛk Keresee eete ɔɗɔɔkɛ.

⁸ Digoyɛɛ nɔta Ampilyatoos sinɛ pora Suumiik.

⁹ Digoyɛɛ nɔta Urbanoos sinɛ tɔkɔnytan naŋk ijaag Kereseek. Digoyɛɛ nɔta Istakus sinɛ poraak.

¹⁰ Digoyɛɛ nɔta Apeliis sinɛkan paarɛɛ agut sinɔ sɛɛn Kereseek nɔkan ɗegerɛɛk. Digoyɛɛ nɔta sigɛ sɛɛg joop wɛy Aristobuloosuk.

¹¹ Digoyɛɛ nɔta tekaan naak Herodiyoon sinɛ iɗit Ayuuduk. Digoyɛɛ nɔta joop wɛy Narsisɛsik sigɛ ŋaadiɗi Suumiik.

¹² Digoyɛɛ nɔta Tirupayna a Tiruposaa sigɛ ijaagɗi Suumiyaak. Digoyɛɛ nɔta Persis sinɛ porɛɛk sinɛ ijaagɗi Suumiya jɛtik.

¹³ Digoyɛɛ nɔta Ruupoos sinɛkan daamɛɛk ijaag Suumiik, ɛ nɔta digoyɛɛ ɛmɛs eeta sinɛ ɛmɛs sɛɛnak.

¹⁴ Digoyɛɛ nɔta Asinkiritos, a Pilegon, a Hermees, a Patirobas, a Hermas, a manyaakak eeta sigɛ ŋaadtaanak atu a sɛɛg agut omoŋɔŋk baŋɛ.

¹⁵ Digoyɛɛ nɔta Pilologoos, a Yuliyaa, a Neriya, a manya sinɛ peetik, ɛ nɔta digoyɛɛ Olompas, a dooytaanak sigɛ sɛɛg a sɛɛn agut omoŋɔŋk baŋɛ.

¹⁶ In digogoyikɛɛ a samɓoɓoyikɛɛ masiikikent. Digoyɛɛtarnɔ kɔnu dooytaanak baŋɛ.

Rɔɔriyɔn Sinɛ Pedtank

¹⁷ Iinak manyaakak eeta sigɛ dooytaanakik, in koorɛɛ ɛɛk joope sigɔɔgɛ ɓooyur rɔɔriyɔn sinɛkan boŋiirik ɛ kone boŋurku pakakat kɔɔruk ɛ kɔna ɗɔkarki rakatɛk, in yowɛɛɗirɛɛ sɛɛge.

¹⁸ Joop sigi nomɛrɗi ɗɛyan nɛŋk sinɔ ŋɛɛwɛnŋɔŋk, ma moko ijaagɗigeeɗ Suumi naŋk Yeese Keresee, ɛ raamɛr joop sigɔ kɛɛ sɛɛge ɗegerɔnk waasiyɛɛkɛ sigɔɔgɛ yaagarŋɔŋk a sigɔɔgɛ ŋaɗɛɛɗoŋk a ito pɛɛni sinɔ mentanŋɔŋk.

¹⁹ Yaataaŋ agut sinɔ ɗegerarɗi joop baŋɛ kɛ tiiɗikari Pɛɛniya sinɔɔna Ɓɛlkɛɛstankŋɔŋk, yakana ɗɛya kɛnɔ in ɓɛɛlɛɛ a ɗegerɛɛ ɛɛk anta sinɔɔna mentanŋɔŋk, mayakana in rikitikɛɛ ɛɛk ant sinɔɔnɛ ŋɛɛwɛnŋɔŋk.

²⁰ Nɛ Waakoyo bɔdɛɛɗoŋk jaamkɔɔ kɔna setan a gorgorŋ derakɛ goŋk goyse ɗeek. In wookan Suumi naŋk Yeese Kereseek a iinak agut omoŋ.

²¹ Digoyɛɛtarnɔ kɔnu Timotiyoos sinɛ ijaagɗikii a eet agut omoŋɔŋk, a tekaaneer gaaŋk Lukiyoos a Iyasoon a Sosipatiros.

²² Digoyɛɛra kɔnu Suumii, eet Tɛrtiyoos sinɛ taapɛɛra wosɛ sinik.

²³ Digoyɛɛr nɔkɔnu Gaayiyoos sinɛkɔtu wɔɔrɛk a dooytaanak baŋɛk, digoyɛɛtarnɔ kɔnu Irastoos sinɛ gaagam wori sinɛ katamɛ nɛɛkik, a manya eteŋka Kowartos. [

²⁴ In wookan Suumi naŋk Yeese Kereseek a iinak baŋɛ agut omoŋ. Ameen.]

Ɗanɗamɔn Pɔɔsiyɛɛkoŋk

²⁵ In dakɛr pɔɔsiyɛɛk Waakoyota sinaana oolɛ a kɔnu ari a ɓaŋkaawurari pɛɛniya sinaana ɓɛlkɛɛstank Yeese Kereseek sinaana waasaak, a dɛnɛɛɗa any sinɔ dugaaŋɔŋk sinaanaɓa yomɗi emeyikɛ sigɔɔgɛ ɓɔɔkaaŋɔŋk.

²⁶ Sisɔ eekeer sigiɓa dugiɗiik dɛnɛɛkɔ sɛɛg kɛ ɗɔm wargatɛyɛɛkɛ joop pɛrkaakoŋk, kɛnɔkoy ŋaadir joop baŋɛ ɛ tiɗii Waakoyota sinaanakoy nɔkoy nɔkoyk.

²⁷ In dakɛr pɔɔsiyɛɛk mɛlɛɛɗa nɔkoy nɔkoyk Jooka sinaana laki ɗegerɔn sɛɛn mowank goy Yeese Kereseek. Ameen.