Pilipisiyoos 3 - Kuumeet Sinɔ Tɔɔnuk Ad Majaŋeeroŋk

Mentanka Taamɛkɛ Waakoyotoŋk Sinɔ Eekerkank

¹ Pediya nɛɛka, iinak manyaakak eeta, in kɔna yaa Suumii. Kiti keelɛɛt kɛygun kɔna taapɛrkaaya any sinɛkan taapɛɛra jeemɛkiŋ. Oolɛ a kolkɔnu sini badɛɛɗiŋ.

² In koorɛɛ ɛɛk joope sigɔɔgɛ ijaagir any sinɔ ŋɛɛwɛnŋɔŋk, wartunɛ sigaagɛ, a joope sigɔɔgɛ yayawar ɛkank.

³ Ugumii seek Waakoyota wɛɛŋakɛ, a moko barɛɛɗ sinɔɔnɛ dɛnɛɛ taarek, yawɛɛkan tin eekeerɛ agut sinɔ ŋaadiɗiɗii Yeese Keresee dakɛɗak.

⁴ Ɔkɔn ɗɛyɛ a merɛɛ ɛɛkiŋ, nɛ oola a mera ɛɛk olaatɛ sigɔɔgɛ ɓɔɔkaaŋɔŋk. Ɔkɔn lakɛ iɗit sinɔ meri ɛɛk barɛɛɗ sinɔɔnɛ dɛnɛɛ taarekiŋ, nɛ laka ola a ɓɔɔkaaŋ sigɔ meriiɗa ɛɛk a kaala sɛɛnik.

⁵ Yawɛɛkanti saakanti ɓartɛɛɗɛɛk ɗoŋikɛ sigɔɔgɛ tula jiitik. Eet ɓartiyɛɛkɛ gaanɛ iɗit Israeelik sinɔ komoy Biniyamuk, nɛ eet iɗit Ibirawiik kɛ ɗɔm ɔkɔnti kɔɔniyɛ agut kooriyɛ higi Ayuudukuŋ, nɛɓa eet iɗit Paarisik,

⁶ ma ɔkɔn agut nyeken higi Muusekiŋ, nɛkan epapaya joop gode Sambatɛyoŋk, ma ɔkɔn mentanka taamɛkɛ Waakoyotoŋk a koorɛɛ higiikiŋ, nɛkan beeɗa ati kɛɛ laaganyɛɛ.

⁷ Mayakana ola sigɛkan ŋaada kɛ kɔnyɗiiŋɔŋk baŋɛ ikoma sɛɛg sisɔ a kɛɛ sɛɛge ɔɔtɛ agut Keresee.

⁸ Sineene raŋk, ŋaada kɛ kɛɛ any sinɔ kaalɛ sinɛ ɗegerɗa Suumi naak Yeese Keresee, nɛ ikoma ola baŋɛ a bitak. Sanakan ola baŋɛ agut Sɛɛn. Ikoma ola baŋɛ a ito diirɛ sinɔ gaalirɛɛ godeeyk kɛnɔ laŋa Keresee.

⁹ Nɔkan ijaagiɗa sinik, kɛnɔ ŋɔɗa etɛyɛɛt naak sinɛkan tukɛɛ higiik. Kɛnɔ laŋa mentanka taamɛkɛ Waakoyotoŋk sinɛkan tukɛɛ ŋaadiyɛɛkɛ raŋk ma ŋaadiɗikɛɛ Keresee ɛ kɛnɔ eet a sɛɛn.

¹⁰ Ma omaay kɛnɔ ɗegera Keresee a ɓaŋkawuka ŋaarin nɛɛk ret walsak kɛnɔ ɓɔra laŋa rakatɛ nɛɛk, ɛ kɛnɔ gaaya sɛɛn ret nɛɛkɛk.

¹¹ Ɛɓɔrɛ ɗɛya a inkoy ŋaarka ret walasa saakoy rɛrɗakiŋ.

Reeran Mɛlɛɛɗa Keera Nɛɛkakik

¹² Moko kɛ laŋakan sini baŋɛŋ, maŋk kɛ eet daktan, mayakana ɓaŋkaawura nɔ reera ɔɗɔɔka nɔtu ari a eet nɛɛk kɛnɔkoy laŋa ruukeet sinɛkanta ragadi Yeese Keresek.

¹³ Iinak manyaakak eeta, kaa ikomiit a kɔ mɛla saanaŋ, mayakana araakɔɔ any a omoŋ, ɓaŋkaawura kɛnɔte monɗi sinɛkan baŋik nɔ gaama sinɛte ar ɔɗɔɔkɛk.

¹⁴ Reera saanakɔɔ mɛlgiɗak kɛnɔkɔɔ laŋa ruukeet naak, wɛɛŋa sigɛkoytu riyageeɗ Waakoyot goy Yeese Kerese rakaay nɔkoyta gaɓɛ sɛɛgik.

¹⁵ Sisɔ eteŋk sigɛɓa aaɗorii beeɗit wɛɛŋakɛk ɗɛyɛ tina a lakii koɓi sinɔ ito sinikiŋ. Ɔkɔn iinakɛ kɔɔr lakɛ koɓi sinɔ pakakatiiɗɔɔŋɔŋkuŋ, yaaŋɛkɔɔ kɔna Waakoyot koɓi siniŋ.

¹⁶ Mayakana, koy gaamii eekeer beeɗit sinɛkan mɛlgiɗiik.

¹⁷ Iinak manyaakak eeta, in lotɛɛ ɛɛk nɔ nomɛɛ rɔmɛɛɗ naakɛk, ɛ in mermenɛɛ kɛ ɗɔm joop sigɛ nomɛr rɔmɛɛɗ naŋkik baŋɛ.

¹⁸ Agut sinɔ oko sinɛkan kɔna toniiɗa jeemɛ agut ɓɔɔkaaŋɔŋk, ɛ oko sinɛ ɓɔrɛ tooniiɗa kɔna kɛkar a kuɗaŋɔŋk, joop a ɓɔɔkaaŋ ŋawit nɛŋk sɛɛg gumaakeer laalawutan Kereseek

¹⁹ Pedtankoy nɛŋk badɛ agut sinɔ jooh nɛŋk ɗɛyan nɛŋk taaroŋk, merirɗi ɛɛk any sinɔ lagiɗɛɛ keeny a keerɛɛŋɔŋk, koɓur ɓɛɛnyɔwɛ gɛɛŋk baŋɛ any ɗoo raŋan nɛɛkik.

²⁰ Ma sɛŋk eteŋk joop rakaayoŋk. Nɛ koorii ebɔdtan naŋk Suumi naŋk Yeese Keresee sinɛkɔɔ mɛlki sooyk a lagiɗii ŋɔɗɔ.

²¹ Weerɛkoy sɛŋk buusɛ naŋk sini daraayɛɛŋɔŋk, nɛ ari a gayi a buusɛ nɛɛk sinɛ eemɛyɛɛk. Arɗi sini baŋɛ ɓaŋkawuka sinɛ oolɛ a ari ola baŋɛ a atu ɓaŋkawukaat nɛɛkɛ goyse ɗeekik.