Pilimoona 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ taapiɗiir Paawuloos godeey korkoɗɔɔnoŋk agut waasiyɛ Pɛɛni sinɔ Ɓɛlkɛɛstank agut Yeese Kereseek, a sooy lak manya eteŋkak Timotiyoosuk, son lak Pilimoona sinɛ poriik sinɛ ijaagɗikii agut omoŋɔŋk,

² son lak manya eteŋka sinɛ peetik Apibiyak a son lak Arikipaa sinɛ sɛɛn iɗit kaarinoŋk Pɛɛni sinɔ Ɓɛlkɛɛstank a eteŋk agut omoŋ a ŋaadtaanaka sigaaga totoli nyaki nookɛkik.

³ In kɔna dakɛ a wookan a bɔdɛ sooy lak Ɛpɛn eteŋkak Waakoyok a sooy lak Suumi naŋk Yeese Kereseek.

Mɛyin A Ŋaadiyɛ Pilimoonaak

⁴ Pɔɔsa Waakoyo naak ɓɛɛnyɔwɛ gɛɛŋk baŋɛ saani koɓukuɗa ɗanɗamɔɔn naakɛkik.

⁵ Agut sinɔ tiyaakɔ agut iin kɛ porunnɔ joop Waakoyotoŋk baŋɛ ɛ nɔ ŋaadiɗiikin Suumii Yeesee.

⁶ Ɗanɗamaaka kɛnɔ ɓaŋkaawurun nɔ kaasin ŋaadiyɛ gooŋk ɛ kɛnɔ lakin ɗegerɔn sinɔ enyaaŋɔŋk olaatɛ sigɔɔgɛ mentaanaŋɔŋk baŋɛ sigaagɛ arkiɗiik.

⁷ Iin manya eeta, gaɓɛkɔta mɛyin nookɛ yaaka sinɔ obiiŋɔŋk a gaananit, agut sinɔ bɔdɛrkikɔ ɓayɛtun ŋaadtaanakoŋk agut iin.

Murun Anasimoosuk Son Lak Pilimoonaak

⁸ Lakakan ɓaŋkawuka Keresee sinɔ gunna sekɛɛɗa kɛnɔ arin any sinɛkɔɔ ijaagink.

⁹ Mayakana kalɛyaan sisɔ mɛyin. Ijaagɗika sini eet Paawuloos sinɛ gutarin ɛ ɓɔrɛ sisɔ eet korkortan agut Yeeseek.

¹⁰ Kalɛyaan agut tɔɔn naak ŋaadiyɛɛkoŋk Anasimoos, sinɛkan laŋa ma arka korkoɗɔɔnuk.

¹¹ Kɛɛ any sinɔ kanna kɔnyku jeemɛk, mayakana sisɔ kɔnyɛ iin maɓɔrɛ eetiŋ.

¹² Wosɛyɛɛrakɔɔ sɛɛniŋ, nɛ boŋu sɛɛn a ito ɓayɛ naak.

¹³ Saa arkiɗa seedi korkoɗɔɔn agut Pɛɛni sinɔ Bɛlkɛɛstank, nɛ gunta yaaŋ ɔkɔn sɛŋk sɛɛn a eet agut omoŋ kɛnɔtu kɔnyɛ ɔɔtɛ nookɛŋ.

¹⁴ Mayakana ar mentanka nookɛ poriiɗ ma moko direeɗ, nɛ kɛɛ any sinɔ ara ma kɔnu kii tonɗiitik.

¹⁵ Kaɗɛɛŋ pakat kɔne ɛɛk ɔɔtɛya sinɔɔna balaŋɔŋk kɛnɔkɔɔɓɔ seedi son beeɗiir a iin agut omoŋ ɓɛɛnyɔwɛ gɛɛŋk baŋɛ.

¹⁶ Moko kɔɔɓɔ beeɗ a ito sɛɛn laaŋoyen, sɛɛnɓɔ sisɔ manya eeta sinɛ porɛɛ a kaalɛ laaŋoyenk. Sɛɛn sɛŋk manya eeta sinɛ porɛɛk mayakana agut sinɔnu kɔnyɛɛɗ ijaag nɛɛkɛŋɔŋk, ɛ sɛɛn masookoy nɛ sɛɛn masookoy a kaalɛ sinɛ sɛɛn manya eetaak.

¹⁷ Ɔkɔntu ikomun a ito eet piraa nookkuŋ, nɛɓɔrɛ boŋu sɛɛn oko sinɛti boŋiiɗink.

¹⁸ Ɔkɔn lakɛ any sinɔkanni tikeeɗŋɔŋkuŋ maŋk ɔkɔn lak gatiŋ, nɛ riiɓi eete raŋk.

¹⁹ Eet Paawuloos, taapɛɛra sini ariit naakɛ kɛ, "Koyana gati nɛɛk saak." Nɛ kaa ɗɛyɛ ana koɓuka gati sinɛte lakin agut bɔdɛ nookkuŋ.

²⁰ Iin manya eeta, kalɛyaan Suumii a ɗɛya ata arin any sinɔ mentanŋɔŋk. Ari ɓayɛ naak a imiinye Keresee.

²¹ Taapiɗiirana ma laka ŋaadiyɛ sigɔ kɛ tiiɗikinŋɔŋk a ɗegera kɛ ijaaginkɔɔ a kaalɛ sinɛna tonaak.

²² Nɛ a kaalɛ sini inta ragadkuunɛ nyon imiinyoŋk agut sinɔ lakiɗa ŋaadiyɛ sigɛ kookorak kɛ laŋkan ɗanɗamɔn noŋk jumuran nɛkɔɔ mɛlɛɛra son lak iinakŋɔŋk.

Digoy Paawuloosuk Sinɛ Pedtank

²³ Digoyɛɛrnɔnu Epaapira sinɛ sɛɛn korkortan agut Yeese Kereseek a eet agut omoŋɔŋk.

²⁴ Digoyɛɛtarnɔ ɓɔrɛni Markoos, a Aristirokoos, a Deemaas, a Lukaas. Sigɛ ijaagɗikii a eet agut omoŋɔŋk.

²⁵ In wookan Suumi Yeese Kereseek a iinak agut omoŋ.