Pɛɛyeen Timotiyoosuk 4 - Kuumeet Sinɔ Tɔɔnuk Ad Majaŋeeroŋk

¹ Sekaana taamɛkɛ Waakoyotoŋk, a taamɛkɛ Yeese Keresee sinɛkoy pɛrɛdɛ bɔdtaanakɛ a reteerɛ raŋk, ɓenysaakoy mɛlkiɗi ɛkoy rukeeɗ burɛ nɛɛkik,

² waasi seŋk Pɛɛni nɛɛk, ɓaŋkaawur nɔ ijaagɗikin ɓɛɛnyɔwɛ gɛɛŋk baŋɛ, kɛygun ɔɔtɛ nɛɛkɛ gayɛŋ kɛygun ki gayɛ, ɛti a koykoyɗiikin, ɛ rɔɔriyaakin ɛ ɓaŋkaawurun oolaan a rɔɔriyɔɔn.

³ Agut sinɔ mɛlkikoy ɓɛɛnyɔ sinɔkoy joop, kirɗi ɗɛyɛ tiyan Pɛɛni sinɔ laŋiiɗɛ bɔdɛɛk, mayakana tolɛrkoy rɔɔriytaana sigɔ sɛɛga, tonur any sinɛ porur sɛɛkik sinɛ marari wokɛɗak.

⁴ Ŋɔɗarkoy tiyan eekeeroŋk, ma ɗɛyɛr tiyan olaɓa jeemɛk.

⁵ Yakana seŋk ikomu ɛɛk nook olaatɛ baŋɛ, ɓaŋkaawur a boŋun rakatɛ, dusani ijaag Pɛɛni sinɔ Ɓɛlkɛɛstank, ijaag any sinɛna mɛlɛk baŋɛ, oko sinɛ iin ijaagen Waakoyotoŋkuk.

⁶ Wɔɔŋku ɔɔtɛ sinɔkɔɔ pediɗ beeɗi naakɛ ɗook raŋkiŋ.

⁷ Timaakakɔ kaarin a mentan, reerakɔ reeran naak pediya nɛɛkaak, koorakɔ Pɛɛni sinɔ Ɓɛlkɛɛstankiŋ.

⁸ Seedi son kookorkuntu dooroy mentankaatoŋk taamɛkɛ Waakoyotoŋk, aɓa ragadkunɛɛŋ. Waawuy saakoyk gaɓɛkoyta Suumi sinɛ Pɛrɛdɛ kɛ ɗɔmk, ma ɓɔrɛ joopa sigaaga ɗɛyɛr sɛɛnik baŋɛŋ.

Rɔɔriyɔn Sinɛ Pediyaak

⁹ Ari any sinɛ oolunk baŋɛ nɔ kusun son lak eetik a gorgorŋ.

¹⁰ Pakatikɔte ɛɛk Deemaas makɔ poru any ɗoo sinik, nɛkɔ ŋaar Tɛsɛlonkeya, makɔ ŋaar Kerkis Gɛlatiyaa, maɓɔrɛ ŋaar Tiito Dilmatiyaa.

¹¹ Lukaas mowan sinɛ sɛɛn a eetik. In koyowukɛɛ a Markoos agut omoŋ agut sinɔtu kɔnyɛɗ ijaagaak.

¹² Wosɛyakɔ Tikikoos Epesoona.

¹³ Seelata abii sinɛ dildilŋɔŋk sinɛkan ŋɔrka Tiroaadakeek sooy lak Karpusuk a wargatɛyɛ gaaŋk saakɔɔ kusuɗunk.

¹⁴ Arikɔta iskindir sinɛ ɓɛɛɓɛr awɛytiirk any sinɔ ŋɛɛwɛnŋɔŋk a obiiŋ, koygeeɗ koy Suumii oko ijaag nɛɛk.

¹⁵ Kooru ɓɔre ɛɛk sɛɛne agut sinɔ ɓooyiiɗ any sinɛ toniik jɛtik.

¹⁶ Saakan widikiɗa kolan naak sinɛ tuktank, ant sinaanɛ kanta daariyɗiigiɗɛɛk, nɛ kɛɛ iɗit sinɔkanti kɔnyɛk. Makanti ŋɔɗar baŋɛ nɛ ŋaararŋ, yakana ŋaada kɛ kɛɛ sɛɛga ikomiit.

¹⁷ Ɛtɛ Suumii eete jɔk nɛti ari a ɓaŋkaawuraŋ kɛnɔ waasɛɛ wosɛ nɛɛk a enyaaŋ goy naakɛk kɛnɔ tiyɛr joop sigɔ moko Ayuuduk. Nɛkɔtu ari a bɔduka ad ɗɛpɛyoŋk.

¹⁸ Ebɔdɛkɔɔt Suumii ant sinɔɔnɛ ŋɛɛwɛnŋɔŋk baŋɛ, arkɔɔt a mɛla bɔdɛɛɗ burɛya dariyoŋk. In dakɛ eemɛyɔɔn Sɛɛna nɔkoy nɔkoyk Ameen.

Digoy Sinɛ Pedtank

¹⁹ Digoyɛɛnɔta joop wɛy Pirskilaak a Akiilaak a Onesipooruk.

²⁰ Dakikikɔ Erastos Korontoose, maakɔ ŋɔrka Tiropimos Militine agut sinɔ goriɗŋɔŋk.

²¹ Waɗ son lak eetik a gorgorŋ a in kiiki mɛlɛ baŋgi. Digoyɛɛtarnɔnu Ewugilos a Pudes a Linoos, a Kilawudiya, a dooytaanak baŋɛ.

²² In Suumi Yeesee a wɛɛŋa gooŋk agut omoŋ. In wookan a iinak baŋɛ agut omoŋ.