Pɛɛyeen Timotiyoosuk 3 - Kuumeet Sinɔ Tɔɔnuk Ad Majaŋeeroŋk

Emeyi Sigɛkoy Pediyaak

¹ Ɗegerii kɛ ɓeny sinaanɛkoy pediyaak mɛlɛrki koy emeyi sigɔ ooɗiiŋɔŋk.

² Porurkoy joop ɛkan gɛŋk, porurkoy wori, merirkoy ɛɛk, ŋaɗɛrkoy ɛɛk, nyɔɔnakoyŋ, kirkoy tiiɗit ɛmɛsaakaka a ɛpɛnaakaka, kirkoy pɔɔsiɗiit, kɛɛkoy sɛɛge geetiyɛ,

³ kɛɛkoy sɛɛge mɛyin, kiitarkoy ŋɔŋɔɗit, sɔɔkɛrkoy tiriya joopoŋk, kirkoy ikomiit ɛkan gɛŋk, kirkoy kɛkoyɛɛt joopa, kirkoy ɗɛyɛɛ any sinɔ mentanŋɔŋk,

⁴ kaadkanakkoy, kɛɛkoy sɛɛge koorɛɛt ɛɛkoŋk, enyaakoy ŋaɗɛɛkaay, porurkoy yaaka ɗookoŋk a kaalɛ pori Waakoyotoŋk.

⁵ Gayi a ugumer Waakoyota, maɓa kaadɛr ɓaŋkawuka nɛɛkiŋ, yowɛɛɗir seŋk joope sigɔɔgɛ ito sigik.

⁶ Ege sigi joop sigɔ ɓooɓonar nɛ guugunyar sinɔɔnɛ godeyikoŋk, nɛ kaŋir jartiyatɔ sigɛ sɛɛge ɓɔɔka tikiyɛɛkik, ɛ sɛɛg diile ɗɛyan sinɔ pakakataaŋɔŋk.

⁷ Barɛr jartiyatɔ sigi eekeer ɓɛɛnyɔwɛ gɛɛŋk baŋɛŋ, yakana kir oolɛ a mɛlɛr ɗegerɔɔna eekeeroŋkuŋ.

⁸ Oko sinɛɓa Iyaanes a Iyaambɛres ɓooyurɗu Muuseek, nɛ ɓɔrɛ ɓooyur joop sigi eekeer, agut sinɔɓa sɔɔkiɗiɗ kalbiyɛ gɛŋk, ɛɓa ɗiirarki gopɛ ŋaadiyɛɛkoŋkuk.

⁹ Kikɔɔ beeɗit kɛ many agut sinɔkoy yaaŋɛɛɗɛ gaagɛyikeen joop sigik, joope taamɛkɛk oko sinɛɓa ɓɛɛlɛɛɗ Iyaanes a Iyaambɛresik.

Rɔɔriyɔn Sinɛ Pediyaak

¹⁰ Yakana seŋk ɗegerin rɔɔriyɔn naak, a beeɗit naak, a sinɔ kɛ beeɗa agut jikon, a ŋaadiyɛ gaaŋk, a ɓaŋkaawurɔn oolaanik naak, a mɛyin, a ɛtɛ naakiŋ,

¹¹ dakinkan a kaastan epapay a rakatɛ naakiŋ, ɗegerin epapay sinɛkan boŋa oolaanik a any sinɛkan laŋka Ansokiyaakeek a Ikoniyooneek a Listironeekiŋ, yakanakanti ebɔdɛ Suumii olaatɛ sigeege baŋɛ.

¹² Epapayɛɛkoy joop sigɛ beeɗir oko ɗɛyan Pɛɛni Waakoyotoŋk Yeese Kereseekiŋ.

¹³ Mayakana joop sigɔ ŋɛɛwɛŋɔŋk a raamkaanak, ɛ babadar ɛ arir joop a babadar a ɛnyɛnyɛkar a kaalɛŋ, a tutuktar tikiyɛ tikiyɛɛka raŋana.

¹⁴ Yakana seŋk ɛti a ɓaŋkawuŋ eekeerɛ, sigaagɛkan barink ɛ kani kɔnyɛrk, agut sinɔ ɗegerin kɛ barkinkan sooy lak wooɗukuŋ,

¹⁵ ɛkɔ ɓɔrɛ ɗegerin Wargatɛtɛ Waakoyotoŋk a tukiɗiik tɔɔnikent nookɛŋ. Gaɓɛrkanna Wargatɛtɛ sigi ɗegerɔn, kɛnɔ laŋin bɔdɛ ŋaadiyɛɛkɛ sigaagɛ ŋaadiɗɛɛ Yeese Kereseek.

¹⁶ Taapɛɛɓa Wargatɛyɛ Waakoyotoŋk baŋɛ ikekeɓ Wɛɛŋa sigɔ Geetitaanak, rɔɔriyaaɗ eekeer, a koykoyɛ joop sigɛ babadark, ɛ isiise any sinɛkɔ tikiɗiik, ɛ dilɗi beeɗita sinɔɔna mentanŋɔŋk,

¹⁷ kɛnɔ kɔnyɗi sini sinɔɔna in iɗit Waakoyotoŋk, ɓɛɛlɛ a daktan ɛ in gayɛ ijaaga any sinɔ mentanŋɔŋk baŋɛk.