Pɛɛyeen Timotiyoosuk 2 - Kuumeet Sinɔ Tɔɔnuk Ad Majaŋeeroŋk

Ijaagen Yeeseek Sinɔ Mentanŋɔŋk

¹ Iin tɔɔn naak Timotiyoos sinɛ porɛɛk, ɓaŋkaawur wookan sinaanɛ ar Yeese Kereseek.

² Gaɓu a adarat Pɛɛni sinɛkan tiyin eeteek joope sigɔɔgɛ waasɛr eekeerik taamɛkɛk joopa sigɔɔga ŋaadɛɛŋɔŋk, kɛnɔ rɔɔriyar joop ɔgɔ.

³ Boŋu rakatɛ a eet agut omoŋ oko amaasini Yeese Kereseek sinɔ mentanŋɔŋk.

⁴ Iɗit sinɔ amaasinik ɗɛygeeɗ a sɛɛn ragadtan kɛnɔ ari ɔɗɔwen nɛɛk beyaak a yaageeɗiŋ, ma ki gaalaat ant sinɔɔnɛ moko ijaag amaasiniyoŋkuk.

⁵ Maɓɔrɛ iɗit sinɔ ari arampɛ reeranoŋk ɔkɔn ki ariiɗ oko sinɛ ɓɛɓɛlɗi goorɛkiŋ, nɛkɔɔ ki laŋiiɗ ruukeet lɔsɛɗoŋk.

⁶ Ijaagen sinɔ ijaagɗi jɛtik ɗɛygeeɗ a porporɛ ɗama nɛɛk ɔɗɔɔkɛ.

⁷ Koɓu any sinɛna tonaak kɛ ɗɔm, agut sinɔ kɔɔna gaɓɛɛɗ Suumii ɗegerɔn olaatɛ baŋɛk.

⁸ Koɓa Yeese Keresee sinɛɓa ŋaarki reteerɛ walasak ɛ Sɛɛn komoy Daawitik. Ege sini Pɛɛni sinɔ Ɓɛlkɛɛstank sinɛna tonaak.

⁹ Laŋka rakatɛ ati korkoɗɛɛ meltikɛ awɛytiiroŋk a ito eet iɗit sinɔ sɔɔkɛ ɓɛɛlk agut Pɛɛni sini Ɓɛlkɛɛstank, mayakana kɛɛ korkoɗɔɔn Pɛɛni Waakoyotoŋk.

¹⁰ Agut sini ɓaŋkaawura ant baŋɛ agut joop sigɛɓa daam sɛɛg Waakoyotuk kɛnɔ laŋir bɔdɛ a eemɛyɔɔn sinɛkoy nɔkoy nɔkoyk sinɔ laŋɛɛ goy Yeese Kereseek.

¹¹ Ege Pɛɛni sini eekeer sinɛɓa tonu kɛ, "Ɔkɔn rɛɛrii a Sɛɛn agut omoŋ, nɛkoy beeɗii wɛɛŋakɛ a Sɛɛn agut omoŋ.

¹² Ɔkɔn ɓaŋkaawurii oolaaniŋ, nɛkoy tapaaɗanii a Sɛɛn agut omoŋ. Ɔkɔn kaadii Sɛɛniŋ, nɛkoy ɓɔrɛ tin kaadɛŋ.

¹³ Ɔkɔn seek kaadii ŋaadiyɛ gaŋkiŋ nɛkoy sɛŋk beeɗ a sɛɛn ŋaadɛɛŋ, nɛkoy Sɛŋk ki kaadɛt ɛɛk nɛɛk."

Ijaagen Sinɔ Boŋu Waakoyotuk

¹⁴ Yaaŋi sɛɛga any sini, rɔɔrɔku sɛɛga taamɛkɛ Waakoyotoŋk kɛnɔ kat ɗaaki agut pɛɛniyɛ. Kɛɛ any sinɔ kɔnyku sinik agut sinɔ sɔɔkɛ joop sigɛ tiyɛr pɛɛniyɛ palamɛyoŋkuk.

¹⁵ Ɓaŋkaawur kɛnɔ wideerin ɛɛk taamɛka Waakoyotoŋk kɛnɔnu boŋu a ito iin ijaagen sinɔ kiiɗɛ keenyk, ɛ waasin Pɛɛni eekeeroŋk kɛ ɗɔm.

¹⁶ Yowɛɛɗir ooyaan ɗookoŋk a sinɔɔnɛ ɓɛɛlɛ kanysɛyaak agut sinɔ ariiɗ ooyan sini joop a yowɛɛɗirar Waakoyote a kaalɛŋɔŋk,

¹⁷ ɛ bakaanyirar waasiyɛ gɛŋk a ito ŋayni sinɔ ki aaɗorɔnk. Ege joope sigeege kɔɔr ɔgɔɔk Hemenewoos a Pilatoos.

¹⁸ Ŋɔɗarkan joop sigi eekeer nɛ ŋaararŋ. Nɛ arir joop a omoŋ omoŋ a kir ŋaadit Keresee a tonur kɛ, "Ɓɛɛlɛɓa ŋaarin ret walasak jeemɛ."

¹⁹ Yakana beeɗ nyon sinɔ ɓaŋkawuŋɔŋk Waakoyotoŋk sinɔkoy ki ɓeesiɗiitik sinɔ lak dikoyk sinɔ tonu Wargatɛ Waakoyotoŋk kɛ, "Ɗeger Suumii joop sigɔ gɛɛŋkiŋ," ɛɓɔrɛ "In yowɛɛɗirar tikiyɛɛkɛ joop sigɛ riyar tiriya Suumiyoŋk baŋɛ."

²⁰ Laŋɛɛ godeey sinɔɔnɛ obiiŋɔŋk ola sigɔɓa ijaagɛɛ worke a birik, ɛ ɓɔrɛ laŋɛɛ ola sigɔɓa ijaagɛɛ kɛɛn a suɓoykuŋ. Nɛ dakɛr ɔgɔɔk ijaaga sinɔɔna eemɛyɛɛŋɔŋk, ma ɔgɔɔk dakɛr ijaaga sinɔɔna daraayɛɛŋɔŋk.

²¹ Iɗit sinɔkan pakati ɛɛk olaatɛ sigeege daraayɛɛŋɔŋk nɔ beeɗ a sɛɛn iɗit sinɔ mentanŋɔŋk, sɛɛn any sinɔ dakɛ ijaaga sinɔɔna eemɛyɛɛŋɔŋk, agut sɛɛn any sinɔ geetitan ɛ kɔnyɗi Suumiyaak ɛ ragadi ɛɛk ijaaga sinɔɔna mentanŋɔŋk baŋɛ.

²² Togon ɗɛyaan atiinyiyoŋk sinɔɔnɛ ŋɛɛwɛnŋɔŋk, nomu ant sinɔɔnɛ mentanŋɔŋk, a ŋaadiyɛɛkɛ, a mɛyin, a bɔdɛɛɗ, in iin a joop sigɛ riyar Suumi ɓayaayi sinɔɔnɛ mentanŋɔŋk.

²³ Yowɛɛɗir gaagɛyikent a palamɛɛ sinɔɔnɛ ɓɛɛlɛ kanysɛyaak agut sinɔ ɗegerɗin kɛ ɗɔkukɔɔ kaarink.

²⁴ Ki ɗɛyɛ ijaagenta Suumiyoŋk a kaarŋ, ma ɗɛygeeɗ a mentan olaatɛ baŋɛ, ma lak oolan rɔɔriyɔɔnoŋk a ɓaŋkaawurɔn oolaanik,

²⁵ ɛ isiise joop sigɛ ɓooyiɗik mentankaat. Ɔkɔn kaɗɛɛŋ gaɓɛ kɔɔ sɛɛga Waakoyot milki sinɔ weeriikiɗ tikiyɛɛkɛk a sinɔ ɗegerarɗi eekeerkiŋ,

²⁶ ɛ weeriiki ɓayɛtunɛɛka gɛŋkik oko sinikiŋ, nɛkɔɔ pordɛrki kaŋtant sinaanɛkan sɛɛg kaŋiiɗ diyabiloos sinɔɔnɛɓa gaamu sɛɛgik kɛnɔ nomɛr ɗɛyaan nɛɛkɛkik.