Pɛɛyeen Timotiyoosuk 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ taapiɗiira eet Paawuloos sinɛ wosɛytan Yeese Kereseek ɗɛyaan Waakoyotoŋk, oko ŋaadiyɛ sigɛ kookoriik Wɛɛŋakoŋk sigɛɓa laŋɛɛ Yeese Kereseek,

² tɔɔna naaka Timotiyoosa sinaana porɛɛk, inna dakɛ a mentanka a maariyeet a bɔdɛ sooy lak Ɛpɛn eteŋka Waakoyok a Suumi naŋk Yeese Kereseek.

Pɔɔsiyɛ A Ɓaŋkaawurɔn

³ Pɔɔsa Waakoyo sinɛ ijaagɗigiɗa kalbii sinɔɔnɛ mentanŋɔŋk oko ɔrɛyak gaaŋkik, saani koɓukuɗa ɗanɗamɔɔn naakɛkik ɓɛɛnyɔwɛ gɛɛŋk baŋɛ kaay a waawuyk.

⁴ Koɓuka pileetak gooŋk sigɛkan kuɗeeɗink, ɛna laka ŋɔɗɔ jɛt a gunnu dɛna kɛnɔta yaa.

⁵ Koɓuka ŋaadiyɛ gooŋk sigɛ kiiɗɛ tagaykiŋ sigɛɓa ɓɛɛlɛr kaakɛŋke iinak Loyide a ŋaaŋe Ewunkeek. Nɛ ɗegera kɛ ɓɛɛlɛr sooy lak iinikiŋ.

⁶ Agut sini tonaana kɛnɔ idaawun tigi Waakoyotoŋk kɛkar sinɛkanna gaɓɛɛ, saakanne riiɓeeɗa arin gaaŋk raŋk.

⁷ Agut sinɔ gaɓɛkan tina Waakoyot wɛɛŋa ɓaŋkawukaatoŋk, a mɛyinoŋk, a ɓali ɛɛkoŋkuk, makan tina ki gaɓɛɛɗ wɛɛŋa ɓɔɔjikeenoŋk.

⁸ Kat lakin keeny waasiyɛɛka agut Suumi naŋkik. Ɛ ɓɔrɛ kat lakin keeny eete sinaanɛkanti korkoɗɛɛ agut Sɛɛnik. Yakana daki a iin kaastan rakatɛyoŋk a eet agut omoŋ agut Pɛɛni sinɔ Ɓɛlkɛɛstank ɓaŋkawukaat sinaanɛ tina gaɓɛ Waakoyotuk,

⁹ sinɛɓa tin ebɔdɛ ɛɓa tin riy beeɗita sinɔɔna geetitank kɛnɔ tin ari a joop gɛɛŋk agut ɗɛyan nɛɛk a wookan nɛɛk, ma moko agut any sinɔ mentanŋɔŋk sinɔɓa ijaagii seekik. Gaɓɛɓa tina wookan sini goy Yeese Kereseek emeyikɛ jeemɛ a inɓa kɛɛ riiɓɛɛ ɗoo.

¹⁰ Yaaŋɛkɔ tina ɛɛk wookan sini sisɔ mɛlɛɛɗ ebɔdtan naŋk, Yeese Kereseek. Lɔsɛɓa sɛŋk ɓaŋkawuka retoŋk maɓa tina yaaŋɛ Wɛɛŋa sigɛkoy nɔkoy nɔkoyk sigɛ kiiɗɛ rerk goy Pɛɛni sinɔ Ɓɛlkɛɛstank.

¹¹ Daamɛɛkanti oko sinɛ eet wosɛytan a rɔɔriytan kɛnɔ waasa Pɛɛni sini Ɓɛlkɛɛstank.

¹² Laŋka rakatɛ sini agut any sini, yakana kiigiɗɛte keeny, agut sinɔ ɗegerɗa kɛ ŋaada wooɗukuŋ. Ɗegera kɛ adarat sinɛkanta gaɓɛk oolɛ koorɛɛt mɛlɛɛɗa ɓɛɛnyɔwa saakoykuŋ.

¹³ Gaamu Pɛɛni sinɔ eekeerik sinɛkan tiyin eeteek oko rɔmɛ kɛnɔ nomɛɛɗin, nɔ beeɗin ŋaadiyɛɛkɛ a mɛyin sinɔ laŋɛɛ agut omaayikeen sinɔ lakii Yeese Kereseek.

¹⁴ Kooru adarat sinɔ mentanŋɔŋk sinɛkanna gaɓɛɛ goy Wɛɛŋa sigɔ Geetitaanakik sigɛ atu eteŋkɛɛk.

¹⁵ Laŋɛɛ joope Isiyaaak kɔɔr Piigelus a Hermogeneesiŋ, nɛ ɗegeri kɛ ŋɔɗarkanti sɛɛg baŋɛŋ,

¹⁶ In gaɓɛ Suumii maariyeet joopa wɛy Onesipooruk agut sinɔkanti gaananiɗ agut ɓɔɔkaaŋɔŋk, nɛkan kiiɗɛ keeny agut korkoɗɔn naak.

¹⁷ Maɓɔrɛ saakan kusuɗ Roomaak warɛkanti a ɓaŋkawuŋ nɛkanti laŋiŋ.

¹⁸ Inkoy gageeɗ Suumii maariyeet Ɓenysaakoyk, ɗegerin jɛt kɛ kɔnyɛkanti a ɛtɛ ɛkiŋ saakan arkiɗa Epesoonek.