Pɛɛyeen Tɛsɛlonkeek 2 - Kuumeet Sinɔ Tɔɔnuk Ad Majaŋeeroŋk

Iɗit Tikiyɛɛkoŋk

¹ Iinak manyaakak eeta sigɛ dooytaanakik, lakɛ any sinɔ kɔnu kalɛygiɗiiŋɔŋk, tonii kɔna agut mɛlɛ Suumi naŋk Yeeseek, ɛ agut sinɛkoy tolɗiitarkiɗii son lak sɛɛnik nɛkoy lalaŋiiɗik.

² Kat ɓeesiɗi kalbiyɛ goŋk a gorgorŋ ɛ kat ŋaatɛ agut sinɛɓa tonɛɛ pɛrkaakɛ maŋk rɔɔriyɔɔn maŋk ariir a itoɓa taapɛɛ wargatɛɛ naŋk kɛ, "Gayɛkɔ ɓɛɛnyɔ Suumiyoŋkuŋ."

³ Kat kɔnu raamɛ iɗit omaay ant omalte. A in kiiki mɛlɛ ɓɛɛnyɔ sinɛkoy kaadɛrɗi joop sigɔ ɓɔɔkaaŋɔŋk Waakoyok, ɛ a in ki yaaŋɛɛt ɛɛk iɗit tikiyɛɛkoŋk sinɛkoy gaɓɛɛ maɗak, kiikkoy ɓɛɛnyɔ sinɛ mɛlɛ.

⁴ Iɗit sini tikiyɛɛkoŋk ɓɔŋgɔɔrɛ ɛɛk nɛɛk rakaaya a kaalɛ ola sigɛ ugumɛɛ sɛɛgaak sigɛ riyɛ kɛ joohkakik. Nɛ aasi guuguny nɛ beeɗi Godeey Waakoyotoŋk sinaanɛ Geetitaank a waasɛ diirikent kɛ "Waakoyo eet".

⁵ Kirkɔ koɓiiɗ ola sigi kɛ tonakan kɔna sɛɛg, saakan eet a iinak agut omoŋɔŋkuŋ?

⁶ Ɗegerari sisɔ any sinɛ ɓaar sɛɛn nɔ kiiɗ yaaŋɛt ɛɛkikiŋ, nɔkoy yaaŋɛɛɗ ɛɛk ɔɔtɛya saaɓa gaamguɗɛɛkik.

⁷ Ijajagi ɓɔrɛ sisɔ ɓaŋkawuka iɗit sinɛ tikiyɛɛkoŋk dugeeɗ, yakana sini ijaag mɛlɛɛɗa nɔkoy ɔɔyɛɛɗɛɛ gopɛ tak iɗit sinɛ sɛɛn ɓaaɓar sisɔk.

⁸ Yaaŋɛkoy ɛɛk iɗit tikiyɛɛkoŋk ɓenysaakoyk. Yakanakoy aalɛ sɛɛn Suumi Yeese yiipok ato nɛɛkik ɛ koy ranyjɛ mɛlɛɛɗ nɛɛkɛ sinaanɛ reemɗi ɓayɛk.

⁹ Mɛlkikoy iɗit tikiyɛɛkoŋk a ijaagi sɔɔriyɛ sigɔ badɛɛɗɛɛŋɔŋk a ola sigɔ reemɗi ɓayɛk ɓaŋkawukaat setanik.

¹⁰ Ɛkoy ijaag ola sigɔ ŋɛɛwɛɛŋɔŋk a ɓɔɔkaaŋ sigɔ raamɛr joop sigɛkoy badɛrk. Nɔkoy badɛrɗi joop sigik agut sinɔkan kirɗi poriiɗ eekeer sigɔ gayɛr a ebɔdɛr sɛɛgŋɔŋk.

¹¹ Agut sini wosɛykikoy Waakoyot joopa sigaaga ŋaadiɗi nyonɛk, ɓaŋkawuka sinɔ tikaaŋɔŋk kɛnɔ ŋaadir any sinɔ nyonuk baŋɛ.

¹² Nɔ ɓɛɛlɛɛɗ sinik kɛnɔkoy goopɛɛ joop sigɛ kir ŋaadit eekeerik ɛ yaagar sɛɛga ola sigɔ ŋɛɛwɛɛŋɔŋkuk.

In Ɛtɛɛ A ɓaŋkawuŋ

¹³ Iinak manyaakak eeta sigɛ kɔnu porɛɛ Suumiik, ɗɛyɛ sɛŋk eteŋka a pɔɔsii Waakoyo agut iinak ɓɛɛnyɔwɛ gɛɛŋk baŋɛ, agut sinɔɓa kɔnu daamɗu jeemɛ kɛnɔkoy bɔdɛɛriɗ, ɛɓa kɔnu geetiɗɛɛ Wɛɛŋakɛ sigɔɔgɛ Geetitaanakik, ɛ agut sinɔ ŋaadirɗɔ eekeer gɛɛŋkik.

¹⁴ Riyɓa kɔnu Waakoyot agut sini goy Pɛɛni sinɔ Ɓɛlkɛɛstank sinɛɓa kɔna waasiik, ɛ kɛnɔ kaasɛɛr eemɛyɔn Suumi naŋk Yeese Kereseek.

¹⁵ Nɛ agut sini iinak manyaakak eeta sigɛ dooytaanakik, in ɛtɛɛ a ɓaŋkawuŋ, in gaamɛɛ rɔɔriyɔn sinɛɓa kɔna waasii ad naŋkik maŋk wosɛ naŋkik.

¹⁶ Suumi naŋk, Yeese Keresee ɔɗɔwa nɛɛka, a Ɛpɛn eteŋka Waakoyo sinɛɓa tin poru wookaan nɛɛkɛkik, ɛɓa tina gaɓɛ gaananit sinɛkoy nɔkoy nɔkoyk, goy wookan nɛɛkik a ŋaadiyɛ sigɛ kookoriik sigɛ koy nokoy nokoyk sigɛ mentaanaŋɔŋk,

¹⁷ in gaananɛ ɓayɛtun goŋk ɛ in kɔnu ari a ɓaŋkaawurariŋ kɛnɔ ariir ɛ toniir any sinɔ mentanŋɔŋk baŋɛ.