Pɛɛyeen Tɛsɛlonkeek 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ taapiɗirii eteŋk Paawuloos a Siilaas a Timotiyoosuk, ŋaadtaanaka sigaaga atu godeey Sambatɛyoŋk Tɛsɛlonkeek, sigaaga tekaaneer Ɛpɛne eteŋka Waakoyotek a Suumi naŋk Yeese Kereseek.

² In wookan a mentanka iinaka sooy lak Ɛpɛn eteŋka Waakoyok a Suumi Yeese Kereseek.

Pirdi Sinɛkoy Gaɓɛ Kereseek Mɛlɛɛɗ Pɛɛyeene Nɛɛkik

³ Iinak manyaakak eta sigɛ dooytaanakik, pɔɔsii Waakoyo ɓɛɛnyɔwɛ gɛɛŋk baŋɛ agut ɔɔtɛ noŋk, liki ɓɔrɛ pɔɔsiyɛ gaŋk agut sinɔ ɓɔlɔɔrɛrɗi ŋaadiyɛ goŋk a kaalɛŋɔŋk ɛ tutukikiɗ mɛyin noŋk ɛkanɛɛkɛ goŋk a omoŋ omoŋɔŋk.

⁴ Agut sini merii ɛɛk iinakɛ kɛygun aasi arkaayii godeyikɛ Sambatɛyɛɛkoŋk Waakoyotoŋ ɔgɔɔkɛŋ, agut sinɔkan ɓaŋkaawurarɗɔ oolan epaayan a rakatɛyɛɛkɛ sigaagɛkɔ laŋirkɔɔk baŋɛ, ɛɓɔrɛ sinaanɛ ŋaarki ŋaadiyɛɛkɛ goŋkuk.

⁵ Yaaŋɛ sini sinɔ kɛ ɓɛɛlɛ pirdi Waakoyotoŋk kɛ ɗɔmk. Ɛɓɔrɛ iinak sigɛkan laŋirkɔ rakatɛ agut sɛɛnik oko sinik, gayɛɛrkɔɔ burɛya Waakoyotoŋkuŋ.

⁶ Agut sinɔ sɛŋk pɛrɛdɛɛɗ Waakoyot a ɓɛɛlɛ kɛ ɗɔmk, nɛkoy koyɗi joopa sigaaga kɔna ɗɔkarki rakatɛk aɓɔrɛ sɛɛga ɗɔk rakatɛ,

⁷ nɛkoy kɔna gaɓɛ imiiny iinaka sigaaga laŋirkɔ rakatɛ sisɔk, ɛkoy ɓɔrɛ gaɓɛ eteŋka. Ɓɛɛlɛ koy sini saakoy mɛlkiɗ Suumi Yeese darik a wosɛytaanak Gɛɛŋk sigɛ latu ɓaŋkawukaak maɗ sinɔɔnɛ boltiɗiŋɔŋkuk.

⁸ Nɛkoy goop joop sigɛ kir ɗegerɔɔn Waakoyok, ɛ kir tiiɗit Pɛɛniya sinɔɔna Ɓɛlkɛɛstank Suumi naŋk Yeeseeking.

⁹ Pakatikɛɛ koy sɛɛk taamɛkɛ Suumiyoŋk a eemɛyɔɔn nɛɛkɛ sinɔɔnɛ obiiŋɔŋk, nɛkoy sɛɛg goopɛɛ badɛɛɗ sinaanɛ koy nɔkoy nɔkoyk.

¹⁰ saakoy mɛlkiɗi kɛnɔ eemɛyar joop gɛɛnɛ sigɛ geetitaanakik ɛ muuser joop sigɛ ŋaadirk baŋɛ. Agut sinɔ boŋurɗɔɔ waasiyɛ gaŋk nɔ ŋaadiirik ikomɛɛkoy kɔnu a sɛɛg agut omoŋ.

¹¹ Agut sini ɗanɗamaakii a kii yawɛɛɗ agut iinak. Kalɛyii Waakoyo naŋk kɛnɔ kɔnu ari a gayɛɛr beeɗita sinaanakan kɔnu riygeeɗik, ɛ kalɛyii sɛɛn kɛnɔ kɔna ruume koɓi noŋk sinɔ mentanŋɔŋk a ijaag sinɛ ijaagiir ŋaadiyɛɛkɛk baŋɛ ɓaŋkawukaat nɛɛkɛkik.

¹² Ɗanɗamaakii oko sinik kɛnɔ eemɛyɛɛ tiriya Suumi naŋk Yeeseek iinakɛ, ɛɓɔrɛ kɛnɔ konu eemɛyɛɛ ɔɔtɛ wookan Suumi naŋk Yeeseek a Waakoyo naŋkik.