Pɛɛyeen Petrosuk 3 - Kuumeet Sinɔ Tɔɔnuk Ad Majaŋeeroŋk

Mɛlɛɛ Suumiyoŋk

¹ Iinak joop sigɛti poriirik, ege sini kɔna taapɛɛra sisɔk wosɛ pɛɛyeen nɛɛk, nɔkɔ kɔna taapɛrkiɗa wosɛyɛ sigi pɛɛyk, nɛkɔ ɗɛya a kɔnu ibeɗa kɛnɔ latukari koɓi sinɔ ɓɛɛlɛ kɛ ɗɔmk.

² Ɗɛya kɛnɔ koɓurkɔɔ pɛɛni sinɛɓa tonur joop pɛrkaakoŋk, sigɔ geetitaanakik jeemɛk a sekiyɛ Suumi naŋk ɛ Ebɔdtan naŋk sinɛɓa laŋiir goy nomtaanak goŋkuk.

³ In ɗegerɛɛ sini olaatɛ baŋɛ ɔɗɔɔkɛ, mɛlɛrkikɔɔ emeyikɛ sigaagɛkoy pediyaak joop sigɔ anyaayikaanakik, sigɔ arir anyaayik sigɔ nomɛrɗi any sinɔ ŋɛɛwɛnŋɔŋkuk.

⁴ Nɛkɔɔ tonur kɛ, "Kɛɛɓato gaɓɛɛɗ ŋaadiyɛ sigɔ kookorɛɛk kɛ, 'Murkukoy nɔ Yeeseŋɔŋk?' Nɛɓɔ sisɔ ar eet? Ɗegerii soon kɛ aɓa tukiɗik ɗeeŋk saaɓa rɛrarɗi ɔrɛya goŋkuk nɛ ɓɛɛlɛ riiɓ sinɛɓa tukik baŋɛ."

⁵ Joop sigi kaadɛrɓa a ɗegerarŋ sinɔ kɛ riiɓɛɛɓa dari pɛɛnii Waakoyotoŋk ɛɓa ijaagɛɛ ɗoo maawɛ kɔɔr maawɛ pɛɛnii nɛɛkɛk emeyikɛ sigɔɔgɛ ɓɔɔkaaŋɔŋk jeemɛk.

⁶ Saadi baŋiya ɗoo sinɛɓa ɓɛɛlɛ saaɓakik lokoosɛrɓa maawu sigi nɛɓa badɛŋ.

⁷ Kookorkuunɛ joop sigɛ kir ugumeet Waakoyotak maɗ, mɛlɛɛɗa nɔkoy badɛrɗi darii a ɗoo sini bɛɛlɛ sisɔk, mɛlɛɛɗa waawuya sinaanakoy pirdiyoŋk.

⁸ Yakana kat monɗiikar ant sineene omoŋɔŋk, sooy lak Suumik waawuy sinɔ omoŋɔŋk ito emeyi kumɛ, ma emeyi sigɔ kumɛk ito waawuy omoŋ.

⁹ Pɛɛni ŋaadiyɛɛkoŋk sinɛɓa tonu Suumi Yeeseek kiirkoy gaalat kɛ many oko sinɛ koɓurɗu joop a omoŋ omoŋɔŋk kɛ gaalaarkoy kɛ manyk, ma ɗɛyɛ kɛnɔ joop baŋɛ weeriki tikiyɛɛkɛ, a kat lakɛ iɗit sinɔ badɛk nɛ ɓaŋkaawur oolaan agut iinak.

¹⁰ Yakana ɓɛɛnyɔ Suumiyoŋk mɛlkikoy saginoy a ito agalt. Saakoyk ɗoyurkoy dariyatɔ ɗooraan sinɔɔnɛ obiiŋɔŋk, ɗoo a riiɓakɔ dariyoŋk baŋɛ moɗɛɛkoy sɛɛg maɗ nɛ badɛrŋ. Moɗɛɛkoy ɗoo a ola sigɛ lak sɛɛg raŋk baŋɛ.

¹¹ Nɛ agut sini ola sigɔ ito sigik ɔkɔn badɛr oko sinikiŋ, anɛ iinak ɗɛyɛ kɔna a iinak joop sigɔ ɓɛɛlɛɛr ɛkik? Ɗɛyɛ kɔna a beeɗir a iinak geetitaanak a ugumeer Waakoyotaŋ.

¹² Saa kookorarɗɔ mɛlɛɛ ɓɛɛnyɔ Waakoyotoŋk a latuguɗɔ ŋɔɗɔk, kɛnɔ ariir a mɛlki a gorgorŋɔŋk. Saakoyk moɗɛɛkoy dari maɗ nɛkoy badɛŋ, ma riiɓakɔ dariyoŋk baŋɛ lɔɔjɛrkoy lorɛɛɗ maɗoŋk sinɔɔnɛ obiiŋɔŋk.

¹³ Yakana eteŋk kookorii ɗoo a dari sinɔ tɔɔnuk, sinɔkoy laŋiiɗɛɛ mentankak oko ŋaadiyɛ sgɛɓa tina gaɓɛɛk.

¹⁴ Agut sini iinak sigɛti poriirik, ɔkɔn ɓɛɛlɛɛr a kookorari ɓɛɛnyɔ sinɛkɔɔ gayɛɛɗi any sinik baŋɛk, nɛ in beeɗɛɛ a ɓaŋkaawurɛɛ kɛnɔkoy kɔnu laŋki Suumii a kɔnu kɛɛ laaganyɛɛ a ɓɛɛlɛɛr bɔdɛɛɗ.

¹⁵ In koɓɛɛ sinɔ kɛ oolan Suumi naŋk sinɛ kɔnu ar a bɔdɛɛrŋɔŋk, manya eteŋka Paawuloos sinɛ porɛɛk taapɛɛrkan kɔna sini oko ɗegerɔn sinɛkan gagiɗɛɛk.

¹⁶ Taapɛkan sɛŋk wosɛyɛɛkɛ gɛɛnɛk baŋɛ oko sinik agut any sini, lakɛ wosɛyɛɛkɛ gɛɛnɛk tak ola sigɔ ooɗi a kir mɛlɛɛk a omoŋ omoŋ. Joop sigɔ bitaka sɛɛge ɗegerɔn ɛɛkoŋkuk a walwaatikaanakik oko sinɛ ruruŋarɗi Wargatɛɛ Waakoyotoŋk ɔgɔɔk nɛɓɔrɛ ruruŋar ola sigiŋ, ijaagir sini nɛ diile sɛɛg badɛɛɗa nɛŋk.

Digoy Sinɛ Pediyaak

¹⁷ Agut sini, iinak sigɛti poriirik, agut sinɔkan ɗegerarkunɗɔ sini jeemɛŋɔŋk, in koorɛɛ ɛɛk kɛnɔ mokɔɔ kɔnu diiler tikiyɛɛk joop sigɔ kir tiiɗitik, kɛnɔ mokɔɔ ɗiirarkɔ saadikan ɛtɛrɗɔ a ɓaŋkawuŋɔŋk.

¹⁸ Mayakana in ɓɔlɔɔrɛɛ wookaan a ɗegerɔɔn Suumi naŋkik ɛ Ebɔdtan naŋk Yeese Kereseek. In dakɛ eemɛyɔɔn sɛɛna kɛygun sisɔ kɛygun nɔkoy nɔkoyk. Ameen.