Pɛɛyeen Petrosuk 2 - Kuumeet Sinɔ Tɔɔnuk Ad MajaŋeeroŋkRɔɔriytaanak Sigɔ Nyonkaanakik 1 Mayakana emeyikɛ sigaagɛɓa jeemɛk oko sinɛɓa ɓɛɛlɛrɗi joop pɛrkaakoŋk sigɔ nyonkaanakik joope gɛɛnɛ kɔɔruk, nɛkɔɔ ɓɔrɛ iinakɛ kɔɔr ŋaararki rɔɔriytaanak sigɔ nyonkaanakkiŋ. Nɛ sɛɛk gaɓɛr rɔɔriyɔn sinɔ nyonuk sinɔ dilɗi rakatɛyaak dugeeɗ. Nɛkɔɔ ɓɔrɛ sɛɛga mɛlki rakatɛ a gorgorŋ ɔɔtɛ sinɔɔnɛkan kaadɛrɗi Suumi sinɛɓa sɛɛg ɓali yɛrom nɛɛkɛkik. 2 Nɛ joop a ɓɔɔkaaŋ nomɛrɗi gopan nɛŋk sinɔ lagiɗɛɛ keenyk. Nɛ nyɔɔnɛɛ gopan eekeeroŋkuŋ agut ijaag sinɛ boŋirki sɛɛkik. 3 Rɔɔriytaanak sigi nyonkaanakik waasɛr waasiyɛ sigɔ tukerkiŋɔŋk agut sinɔ golɛrgeeɗ wori noŋkuk. Ragadɓa sɛɛga Waakoyot pirdi ɗeeŋk, nɛ koorɛr sɛɛk sɔɔkiyɛ eekeerɛ. 4 Kirɓa aasi sanɗit Waakoyota wosɛytaanak sigɛɓa ijaagir tikiyɛɛk, nɛɓa oriir sɛɛg siioola nɛ kookorarkun ɓɛɛnyɔ sinɛkoy pirdiyoŋk utul sinaanɛ ɓukuurŋɔŋk kɔjuŋɔŋk tak. 5 Ebɔdɛɓa Waakoyot Nooh sinɛɓa waawasi agut any sinɔ mentanŋɔŋk a joop ɔgɔ a tula pɛɛy, kiigeeɗɓa sanɗit ɗoo sinɛɓa jeemɛk nɛɓa ɗɔku yeeye ɗooka sinaanaɓa beeɗirɗi tikitaanak. 6 Maɓɔrɛ goopɓa katamɛɛ Sɛdoom a Gɛmooraak a moɗɛ sɛɛg a dakɛr a taɗapu, kɛnɔ dakɛr a rɔmɛ goopanoŋk joopa sigaaga ijaagir tikiyɛɛk baŋɛ. 7 Mayakana ebɔdɛɓa Loot sinɛɓa mentan taamɛkɛ Waakoyotoŋk sinɛɓa beeɗ a ɓakɛyɗi agut tikitaanakik sigɔ ijaagir any sinɔ keerɛɛŋɔŋk. 8 Iɗit sinɛ mentanŋɔŋk saaɓa beeɗiɗ sɛɛge kɔɔruk nɛɓa ɓakɛyɗi wɛɛŋa gɛɛnɛ agut ijaag nɛŋk sinɛ ŋɛɛwɛnŋɔŋk sinɛ dɛdɛnk ɛ tiitiy ɓɛɛnyɔwɛɛkɛk. 9 Ɔkɔn sini ɓɛɛlɛ oko sinikiŋ, nɛ ɗeger Suumii kɛ ebɔdɛ joop sigɛ beeɗir ma ugumer sɛɛnak ɛk ɛ oolɛ ebɔdɛɛt nɛɛŋk, ɛɓɔrɛ kɛ goop joop sigɔ tikitaanakik ɛk ɛ koorɛ sɛɛg ɛk mɛlɛɛɗa ɓɛɛnyɔwa sinaanakoy pirdiyoŋkuŋ. 10 Kɛ ɗɔm joop sigɔ nomɛrɗi ɗɛyan taaroŋk sinɔ somkank ɛ daraayɛr ɓaŋkawuka Waakoyotoŋkuk kookor sɛɛg ɓɛɛnyɔ pirdiyoŋk. Rɔɔriytaanak sigɔ nyonkaanakik diirkaanak ɛ ɓɔŋgɔɔrɛr ɛɛk nɛŋk rakaaya, kir ɓuriit a aasi nyɔɔnar ɓaŋkawukaatak dariyoŋk. 11 Wosɛytaanak aasi kɛygun sɛɛk kaalɗiikɛ ɓaŋkawukaat a suumiikentiŋ, nɛ kir nyɔɔnɛɛ rɔɔriytaanak sigɔ nyonkaanakik saa daariyɗiɗ sɛɛgak taamɛkɛ Waakoyotoŋk. 12 Rɔɔriytaanak sigi nyonkaanakik nyɔɔnar any sinɛ ooɗɛ sɛɛg ɗegerɔɔnakiŋ. Ito sɛɛg keegu sigɔɓa ɓartɛɛ sɛɛg kɛnɔ goomoyɛɛ sɛɛg kɛnɔ gooɗɛɛ sɛɛgik, ɛ beeɗir ɓɛɛlɛt nɛŋk a kɛɛ sɛɛge koɓi, nɛkoy badɛr oko sini badɛrɗi keegukuk. 13 Boŋurkoy gati tikiyɛ gɛŋkikiŋ agut sinɔ ijaagirɗi tikiyɛɛk, yaaka nɛŋk duubiyeet tɔpɔyoŋk sinɔ duubiyerɗi waawuy takik, ijaagir any sinɔ keerɛɛ a lagiɗɛɛ keenyk ɛ ijaagir ɗɛyan taaroŋk a atu wɔɔr mɛyinoŋk a iinak agut omoŋɔŋk. 14 Latu taamɛ mararɛɛt ibeɗoŋk sigɔ kirkiɗ weeriit tikiyɛɛkɛk ɛ raamɛr joop sigɔ bɔɔlaaŋɔŋk ɛ latu ɓayɛ sinɔɓa barɛ rerer woriyaak, ege sigi joop sigɔɓa sɛɛg koonyɛɛŋɔŋk. 15 Ŋɔɗarɓa sɛɛk gopan sinɔ ɓɛɛlɛ kɛ sɛmkuŋ nɛɓa babadarŋ. Nomɛrɗiɓa gopan Bɛlɛam tɔɔn Basooruk sinɛɓa popor wori sinɔ laŋɛɛ ma ijaagɛɛ any sinɔ ŋɛɛwɛnŋɔŋk. 16 Arɛɛɓa Bɛlɛam a ɛtɛ ijaag nɛɛkɛk agut tikiyɛ gɛɛŋk, kuroy sinɔɓa ki tonɗiit goorɛk tonɗiiɓa pɛɛnii etoŋk ɛ koykoyɛ ijaag maraatiyoŋk iɗit sinɛ pɛrkaakoŋkuk. 17 Joop sigi ito tunyakɔ sigɔ kɛɛ sɛɛge maawuk, ito tiimanak sigɔ diile sɛɛg wɛɛrk, koorɛ sɛɛg nyuugur sinɔ kɔju kɛ susuk. 18 Waasɛr pɛɛni sinɔ ɓɔŋgɔɔrɛrɗi ɛkan gɛŋk a pɛɛni sinɔ ɓɛɛlɛ kanysɛyaak a raamɛr joop sigɛkan ŋaararki kɛ gonyuŋ joope sigaagɛɓa badɛrk kɔɔruk a raamɛr sɛɛg ɗɛyaan taaroŋk a ruunyikent. 19 Gaɓɛr sɛɛga ŋaadiyɛ sigɛ kookorɛɛk kɛ, "Ŋaararkɔkɔɔ laaŋoy yaakataaŋ," ma sɛɛg ɔɗɔwa nɛŋk laaŋoyeer tikiyɛɛkoŋk, agut sinɔ saa lɔsɛɛɗɛɛ iɗitik nɛ sɛɛn laaŋoyen iɗit sinɛkɔ sɛɛn lɔsɛk. 20 Ɔkɔnɓa ɗegerar Suumi naŋk Ebɔdtan naŋk Yeese Keresee, ɛɓa bɔdɛrki somakɔɔkɛ ɗookoŋkuŋ, ɛ lowɛɛ sɛɛg nɛ lɔsɛɛ sɛɛg kɛkar olaatɛ sigaagɛɛŋ, nɛkoy ɓɛɛlɛt nɛŋk sɔɔka a kaalɛ sinɛɓa jeemɛk. 21 Ɔɔtɛ sinaanɛ ɗegerarɗi baŋiya sekiyɛ sigɔ geetitaanak sigɛɓa gaɓɛɛ sɛɛgak nɔ weeriiɗi baŋiyak, nɛ a kaalɛŋ dɔɔs sɛɛga a gunɓa kir ɗegerɔɔn gopan any sinɔ mentanŋɔŋkuk. 22 Eekeer sɛɛge rɔmɛ sinɛɓa tonɛɛ kɛ, "Payɛ war nɛ murku nɛ topu ɗamata tapaytaanak gɛɛŋk," "Maɓɔrɛ ɔkɔn aadiɗi kuturŋ nɛ murku nɛ dirkiya ɗokoye." |