Pɛɛyeen Petrosuk 1 - Kuumeet Sinɔ Tɔɔnuk Ad Majaŋeeroŋk

¹ Ege sini wargatɛ sinɔ taapiɗiira eet, Simion Petros sinɛ ijaagen ɛ wosɛytan Yeese Kereseek, joopa sigaagaɓa boŋur ŋaadiyɛ sigɔ eemɛyɛɛŋɔŋk oko sinɛɓa boŋiɗii ŋaadiyɛɛk. Laŋiiɓa ŋaadiyɛ sigi goy mentanka Waakoyo naŋk ɛ Ebɔdtan naŋk Yeese Kereseek.

² In kɔna obulur wookaan a bɔdɛ a ɗegerari Waakoyo a Suumi naŋk Yeesee.

Daaman A Tirii Waakoyotoŋk

³ Gaɓɛɓa tina ola sigɛ ɗɛyɛ wɛɛŋakak kɛnɔ beeɗii a yaa Waakoyota, ɓaŋkawukaat Waakoyotikeen nɛɛkik, agut sinɔ ɗegerɗii sɛɛnik. Nɛ tin riy eemɛyɔɔn nɛɛkɛk a mentankaat nɛɛkɛk.

⁴ Goy ola sigik gaɓɛɓa tina wookan sinɔ obii ɛ eemɛyɛɛk sinɛɓa tonu kɛ gaɓaakoy kɔnaŋɔŋk kɛnɔ bɔdɛɛr ɓɛɛlɛt kalbii sinɔɔnɛ sɔɔktank sineene ar ɗook raŋk agut koɓi sinɔ ŋɛɛwɛnŋɔŋkuk kɛnɔkoy laŋiir kalbi Suumiikeen nɛɛkik.

⁵ Agut sini in tuukeerɛ ŋaadiyɛɛka raŋana mentanka, ma mentankaata raŋana ɗegerɔn ɛɛkoŋk,

⁶ ma ɗegerɔɔna ɛɛkoŋk raŋana ikomiit ɛɛkoŋk, ma ikomiita ɛɛkoŋk raŋana ɛtɛɛ ɓaŋkaawurɔn oolaanik, ma ɓaŋkaawurɔɔna oolaanik raŋana beeɗit a gayikɛɛ a Waakoyok,

⁷ ma beeɗita a gayikɛ a Waakoyok raŋana masikikeen, ma masikikeena raŋana mɛyin.

⁸ Ɔkɔn latukari ola sigi a ɓɔɔkaaŋ, koorɛrkɔɔ kɔnu kɛnɔ kat dakɛɛr a kɔne kɛɛ taamɛ ɛ kɔne kɛɛ ijaag ɛɓɔrɛ kɛnɔ kat dakɛɛr a kiir ɗegerɔɔn Suumi naŋk Yeese Keresee.

⁹ Ma iɗit sinɔ kiiɗɛ ola sigik, mot sinɔ kiir taanta any sinɔ ar ayowɛɛɗŋɔŋk, monɗiiɗɓa sinaanɛɓa ranyjɛrkiɗɛɛ tikiyɛ gɛɛŋk sigɛɓa jeemɛkiŋ.

¹⁰ Agut sini iinak manyaakak eeta sigɛ dooytaanakik, in ɓaŋkaawurɛɛ a kaalɛ sinɛkan ɔɗɔɔkɛk kɛnɔkɔɔ ɗegerarɗɔ tiriya goŋk a daaman noŋkuk. Ɔkɔnkɔɔ ijaagiir ola sigiŋ kiirkɔɔ ɗiirin adaktan,

¹¹ nɛ agut sini gaɓɛɛkɔɔ kɔna oolan sinɔ guugunyarɗɔ enyakaat burɛya Suumi naŋk ɛ Ebɔdtan naŋk Yeese Kereseek sinaanakoy nɔkoy nɔkoyk.

¹² Nɛ kɔna koɓuka ola sigi ɓɛɛnyɔwɛ gɛɛŋk baŋɛ, kɛygun aasi ɗegerarkaayar sɛɛg ɛ ɛtɛɛr nɔ beeɗir eekeerɛ sigaagɛkan gaamiirkiŋ.

¹³ Dɛna nɛta mentan a kɔnu ebeɗa ɓɛɛnyɔwɛ gɛɛŋk baŋɛ ɔɔtɛya saakɔɔ ɓɛɛlɛɛɗa wɛɛŋakɛ sigeege taaroŋkuk.

¹⁴ Agut sinɔ ɗegera kɛ rɛɛraakɔɔ ɗook sineene raŋk kɛ gonyuŋ oko sinɛkɔta yaaŋɛɗ Suumi naŋk Yeese Kereseek.

¹⁵ Ɓaŋkaawura sisɔ kɛnɔkoy kokoɓarkɔ ola sigi saakɔɔ kɔne pakatiiɗa ɛɛk retik.

Tonu Petros Kɛ, ‘Dɛnaakan Eemɛyɔn.’

¹⁶ Nɔɓa kɔna toniɗii ɓaŋkawuka Suumi naŋk Yeese Kereseek a mɛlɛɛ nɛɛkik, kiiɓa nomɛ waasiyɛɛkɛ sigɔɔgɛɓa ijaagɛɛ ɗegerɔɔn etoŋkuk. Dɛniiɓa eemɛyɔn sinɔ obiiŋɔŋk taamɛkɛ gaŋk.

¹⁷ Agut sinɔ saaɓa mɛlageeɗ koŋgoy sinɔ tonu kɛ "Tɔɔn naak sinɛ poraak sinɛta yaa sɛɛneek sɛɛn sinik" eemɛyɔɔn Nɛɛkɛk sinɔɔnɛ obiiŋɔŋk, nɛɓa sɛŋk boŋu eemɛyɔn a muusiyɛ sooy lak Ɛpɛn etenkak Waakoyok.

¹⁸ Tiyiiɓa koŋgoy sinɛɓa kus darikiŋ, saaɓa arkiɗii a sɛɛn agut omoŋ kurkum sinaanɛ geetitank raŋk.

¹⁹ Agut sini ŋaadii Pɛɛni joop pɛrkaakoŋk kɛ eekeer a kaalɛŋ. In koorɛɛ kɛ ɗɔm Pɛɛni sini oko ɗaawan sinɔ ɗaawu nyuugur tak nɔkɔɔ aayirkiɗ kaay nɛɛkɛkik, ɛ nɔkɔɔ ɗaawiɗ bomboloot kolɛɛtoŋk ɓayɛtunɛɛkɛ goŋk takik, nɛ mentan a gun koorɛɛr Pɛɛni siniŋ.

²⁰ Any sinɛ kɔna ɗɛyɛ a degerar olaatɛ baŋɛk, pɛrka sigɛ ɓɛɛlɛrk sigɛ laŋɛɛ sɛɛg Wargatɛɛ Waakoyotoŋk ki gayɛ a wooru iɗit koɓiiɗ nɛɛkɛkiŋ.

²¹ Agut sinɔ kɛɛ pɛrka sigɔ mɛlɛrki koɓiiɗ a ɗɛyaan etoŋkuk adaktan, mayakana waasiɗi pɛrka joop sigɔ boŋurku sooy lak Waakoyok nɛ ikekeɓi sɛɛga Wɛɛŋa sigɔ Geetitaanak nɛ tonɗiiŋ.