Omoŋ Timotiyoosuk 4 - Kuumeet Sinɔ Tɔɔnuk Ad Majaŋeeroŋk

Rɔɔrɔkɔn Agut Rɔɔriytaanak Sigɔ Nyonkaanakik

¹ Tonur Wɛɛŋa sigɔ Geetitaanakik kɛ ɗɔm kɛ, "Emeyikɛ sigaagɛkoy pediyaak joop a omoŋ omoŋ ŋɔɗarkoy ŋaadiyɛ, nɛ nomɛrɗi wɛɛŋa sigɔ nyonkaanakik a rɔɔriyɔn diyabiloosuk."

² Ege sini rɔɔriyɔn sinɔ kus sooy lak joop sigɔ gayar joop sigɔ mentaanaŋɔŋk ɛ sɛɛg nyonkaanak sigɔ ito kalbiyɛ gɛŋk awɛytiir sigɔɓa moɗɛɛŋɔŋk joop sigɔɓa kilarar kalbiyɛ gɛŋk a sɛɛg kir gɔɔnyɛɛtik.

³ Joop sigi ɓaariiɗ waawan, ɛ ɓaarii kɛnɔ kat ɗamɛɛ ɗama. Mayakana riiɓiiɓa ɗama Waakoyo, nɛ agut sini ɗɛyɛ joopa sigɔɔga ŋaadtaanakik a joopa sigɔɔga ɗegerar eekeerik a ɗami a pɔɔsɛr Waakoyo.

⁴ Agut sini mentaana ola sigɛɓa riiɓe Waakoyotuk baŋɛ, nɛ ɔkɔn sini boŋɛɛ pɔɔsiyɛɛkɛŋ, nɛ kɛɛ sinɔ orɛɛk ara,

⁵ dakɛkɔɔ a geetitan Pɛɛnii Waakoyotoŋk a ɗanɗamɔɔn.

Ijaagen Sinɔ Mentanŋɔŋk

⁶ Ɔkɔn arin a koɓurku ŋaadtaana rɔɔriyɔn siniŋ, nɛkɔɔ dakin a ijaagen Yeese Kereseek sinɔ mentanŋɔŋk, sinɔ nomɛɛɗin Pɛɛnii eekeeroŋk a ɓɔlɔɔrun rɔɔriyɔɔn sinɔɔnɛ mentanŋɔŋk.

⁷ Yowɛɛɗiir korgɛɛnyakɛ sigɔɔgɛ kir kɔnyɗiitik jartiyatɔk sigɔ bɔɔlɔŋeerk, sigɔɔgɛ kiiɗɛ eemɛyɔɔn Waakoyok, bari ɛɛk nook ant sinɔɔnɛ eemɛyɗɛɛ Waakoyoŋɔŋk.

⁸ Agut sinɔ barɛ ɛɛkoŋk ɓaŋkaawurɔɔn taaroŋk tɛm tɔkɔny nɛɛkɛŋ, mayakana kɔnyɗi barɛ ɛɛkoŋk ugumeet Waakoyotak ant baŋɛ agut sinɔ lakiɗ wɛɛŋa ŋaadiyɛ sigɛ kookoriik eme sineene a eme saakoy mɛlkik.

⁹ Ege toni sini any sinɔ eekeerik, a ɗɛyɛ a in boŋur joop baŋɛk.

¹⁰ Arii ɓɔre ɗɔŋkɔɔlɛ ɛ bɔɔlaakii ijaag sineene, agut sinɔ riiɓii ŋaadiyɛ gaŋk sigɛ kookoriik Waakoyote sinaanɛ bɔdɛɛk. Sɛɛn sinɛ ebɔdɛ joop sigɛ ŋaadiɗi kɛ ɗɔm baŋɛk.

¹¹ Seki ola sigi ɛ rɔɔriyaakin.

¹² Katni daraayɛ iɗit atinyiikent nookɛk. Daki a rɔmɛ sinɔ mentanŋɔŋk dooytaanaka toniiɗ, a kalbii, a mɛyin, a ŋaadiyɛɛkɛ, a mentankaat ɛɛkoŋk.

¹³ Ɓaŋkaawur kɛnɔ ambabun Wargatɛyɛ Waakoyotoŋk, ɛ waasiɗiikin, ɛ rɔɔriyaakin ɔɔtɛya saakoy mɛlɛrkiɗaak.

¹⁴ Katni keelɛ tigi Wɛɛŋa sigɔ Geetitaanakik sinɛ ar iine takik sinɛkanna gaɓɛɛ pɛrkaakɛ saakanne riiɓerɗi arin gutarɛyɛ gode Sambatɛyoŋkuk.

¹⁵ Ɓaŋkaawuru jɛt olaatɛ sigeege, ɛ arin sɛɛg a atu ijaag raŋk kɛnɔ joop baŋɛ dɛnɛr ɓɔlɔɔrɛ nook.

¹⁶ Kooru ɛɛk nook ɛɛka nooka a rɔɔriyɔɔna nookak ɛti olaatɛ sigeege, agut sinɔ ɔkɔnkɔɔ arin oko sinikiŋ ebɔdun ɛɛk nook a joop sigɛna geleewɛrk.