Omoŋ Timotiyoosuk 2 - Kuumeet Sinɔ Tɔɔnuk Ad Majaŋeeroŋk

Ikekeɓ Agut Ugumeet

¹ Agut sini ant baŋɛ ɔɗɔɔkɛ rɔɔrɔkaaka kɔna kɛnɔ kalɛyɗikari, ɛ ɗanɗamaakari joopa ɔgɔɔka, ɛ pɔɔsiɗiikari agut joop baŋɛ.

² In ɗanɗamaakɛɛ suumiyɛɛka a joopa sigaaga latu ɓaŋkawukaak baŋɛ kɛnɔ beeɗii kɛ lɔt bɔdɛɛɗ, beeɗiit sinɔɔnɛ enya ugumeet a tuɓur Waakoyotoŋk a ŋawit sinɔ mentanŋɔŋk.

³ Ege sini any sinɔ mentan ɛ yaa taamɛkɛ Waakoyo sinɛ Ebɔdtan naŋkik.

⁴ Ɗɛyɛ sɛŋk Waakoyot kɛnɔ bɔdɛr joop baŋɛ, ɛ kɛnɔ kurak ɗegerɔɔna eekeeroŋk.

⁵ Ege Waakoyot omoŋ dakɛɗa, maɓɔrɛ iɗit omoŋ dakɛɗa sinɛ ar ete a Waakoyote kɔɔrk kɛnɔ taakiɗiik. Sɛɛn Yeese Keresee sinɛ iɗitik.

⁶ Gaɓɛɓa ɛɛk nɛɛk gumaaka kɛnɔ ɓalki joop baŋɛ tikiyɛɛkɛ. Ege sini any sinɔkoy yaaŋɛ saakoy mɛlkiɗ ɔɔtɛ sinɛ likik.

⁷ Tona eekeer, ma moko tona nyon. Daamɛɛkanti a ito eet rɔɔriytan a wosɛytan kɛnɔ laaganya any sini joopa sigɔɔga moko Ayuuduk agut ŋaadiyɛ a eekeer.

⁸ Agut sini ɗɛya moojak sigɛ atu nyonitaakɛ baŋɛk kɛnɔ ɔɔyɛr ŋadi a ɗaakan, kɛnɔ ɓɔŋgɔɔrɛr arin gɛŋk sigɛ geetitaanakik kɛnɔ ɗanɗama.

⁹ Maɓɔrɛ jartiyatɔk in kadir abiyak sigɔ ɓɛɛlɛr kɛ ɗɔmk a latu keeny ɛ latu koɓi sinɔ mentanŋɔŋk, a moko ŋaɗɛr ɛkan gɛŋk a kɛnyɛ ami gɛŋk maŋk workee maŋk giɗeet sinaanɛ obi gati nɛɛkɛŋɔŋk, maŋk abiye sinɔɔnɛ obi gati nɛɛkɛŋɔŋk.

¹⁰ Mayakana jartiyatɔk sigɛ tonur kɛ ŋaadii Waakoyok in ijaagir any sinɔ mentanŋɔŋk oko sinɛ ɗɛyɛɛɗ jartiyatɔka sigɔɔga ŋaaɗir Waakoyok.

¹¹ In jartii barɛ ɛɛk a tiiɗi a beeɗ kɛ lɔt.

¹² Kaa pɛgɛdɛɛt kɛnɔ jartii rɔɔriya, maŋk kɛnɔ lak ɓaŋkawuka moojakɛ raŋk. In sɛŋk beeɗ kɛ lɔt.

¹³ Agut sinɔ riiɓɛɛɓa tuki Adam, nɛɓa saadi baŋiya riiɓɛɛ Heewan.

¹⁴ Mokoɓa raamɛɛ Adam maɓa raamɛɛ Heewan sinɛɓa sɔɔkɛ higiik.

¹⁵ Yakana ɔkɔn jartii ɓaŋkaawur ɛ beeɗ ŋaadiyɛɛkɛ a mɛyin a sɛɛn geetitan, nɛkoy bɔdɛ goy ɓartiyɛ tɔɔmɔkoŋkuŋ.