Omoŋ Tɛsɛlonkeek 5 - Kuumeet Sinɔ Tɔɔnuk Ad Majaŋeeroŋk

In Ragadɛɛ Ɛɛk Agut Mɛlɛɛ Suumiyoŋk

¹ Iinak manyaakak eeta, ki ɗɛyɛ a kɔna taapiɗirɛ agut emeyik a ɛyɛkeeriŋ sigɛkoy ɓɛɛlɛrɗi ola sigikiŋ,

² agut sinɔ ɗegerarɗɔ jɛt kɛ Ɓɛɛnyɔ Suumiyoŋk mɛlkikoy oko sini mɛlkiɗ agalt kaaltik.

³ Saa joop tonurɗu kɛ "Ɓɛɛlɛr olaat baŋɛ yaakaat ɛɓɔrɛ ɓɛɛlɛr bɔdɛɛɗ," makoy laŋirki rakatɛ saginoy oko sini susuwiiɗ amɗ jarti sinɔ laki amɗuk, kirkoy pordan a daktan.

⁴ Mayakana, iinak manyaakak eeta, moko atukari nyuugur tak, agut sini mokokɔɔ kɔna mɛlki ɓɛɛnyɔ nɛɛkɛ a ito agalt.

⁵ Iinak joop pɛɗɛrkaatoŋk a waawuyoŋk baŋɛ, ma moko eteŋk joop kaayoŋk a nyuuguroŋk.

⁶ Agut sini kat toŋii oko joop ɔgɔ, makoy beeɗii nɔ koorii ɛɛk naŋk nɔ beeɗii kɛ ɗɔm.

⁷ Agut sinɔ joop sigɔ toŋɛrŋɔŋk nɛ toŋɛr kaalt, maɓɔrɛ joop sigɔ pɔyarŋɔŋk nɛ pɔyar kaalt.

⁸ Mayakana agut sinɔ seek eteŋk joop pɛɗɛrkaatoŋkuk, nɛkoy beeɗii a koorii ɛɛk kɛ ɗɔm, koy kadii ŋaadiyɛ a mɛyin oko any kaarnoŋk sinɔ koldɛ kokomk, koy kadii ŋaadiyɛ sigɛ kookoriik bɔdɛɛɗoŋk oko dooroy kaarnoŋk.

⁹ Daamɓa tin Waakoyot kɛnɔ laŋii bɔdɛ goy Suumi naŋk Yeeseek, ma mokoɓa tin daam kɛnɔkoy boŋii goopan.

¹⁰ Rɛrɓa Kerese agut eteŋk kɛnɔ kɛygun bɔdii maŋk rɛɛriiŋ kɛnɔkoy beeɗii a sɛɛn agut omoŋ.

¹¹ Agut sini in iɗit omay gaananɛ mɛɛno ɛ in kɔkɔnyikɛɛ ɛkanɛɛkɛ goŋk oko sinɛ ijajagarɗɔɔ sisɔk eekeerɛk.

Rɔɔriyɔn A Digoy Sinɛ Pedtank

¹² Iinak manyaak eeta, kalayii kɔnu kɛ in eemɛyɛɛ joop sigɛ ɓaŋkawurar ijaagik iinakɛ kooruk, a oɗɔweer goŋk a joop sigɛ rɔɔriytaanak goŋkuk Suumii Yeesee.

¹³ In lakɛ eemɛyɔɔn a mɛyin sinɔ obiŋɔŋk agut ijaag nɛŋk. In ɓɔrɔ beeɗɛɛ ɛkanɛɛkɛ goŋk bɔdɛɗ.

¹⁴ Iinak manyaakak eeta, rɔɔrɔkaakii kɔna kɛnɔ koykoyɛɛ dɔɔtɛɛ, ɛ arɛɛ ɓɔɔjak a ɓaŋkaawurarŋ. In kɔnyɛɛ joop sigɛ bɔɔlaak. In ɓaŋkaawurɛɛ olaan joopa baŋɛ.

¹⁵ In iɗit koorɛ ɛɛk nɛɛk kɛnɔ kat lakɛ iɗit sinɔ jumur any sinɔ ŋɛɛwɛnŋɔŋk ant sinɔɔnɛ ŋɛɛwɛnŋɔŋk. Iinakɛ ɛkanɛ goŋk in iɗi ɓaŋkaawur nɔ ijaag any sinɔ mentanŋɔŋk joopa ɔgɔɔka.

¹⁶ In kɔna yaa ɓɛɛnyɔwɛ gɛɛŋk baŋɛ,

¹⁷ in ɗanɗamaakɛ a kat yayawi,

¹⁸ in pɔɔsɛɛ Waakoyo ant baŋɛ, agut sinɔ ege sini ɗɛyan Waakoyotoŋk son lak iinak sigɛ joop Yeese Kereseek.

¹⁹ Kat ubuŋeer ijaag Wɛɛŋa sigɛ Geetitaanakik,

²⁰ kat daraayɛ pɛrka,

²¹ in paarɛɛ ola baŋɛ, nɛ in boŋɛɛ sinɛ mentank.

²² In yowɛrkɛ ant sinɔɔnɛ ŋɛɛwɛnŋɔŋk.

²³ In kɔnu geeti Waakoyo bɔdɛɗoŋk in kɔnu ari a mentaanakari ant baŋɛ, in koorkuunɛ wɛɛŋa goŋk a wɛɛŋa goŋk sigɛ atu taarek, a buusɛyɛ goŋk a kat lakɛ any sinɔ kɔnu laaganyɗɛɛk mɛlɛɛɗa nɔkoy mɛlkiɗ Yeese Keresek.

²⁴ Eekerkan Waakoyo sinɛkan kɔnu riykik, nɛkɔɔ ijaag any siniŋ.

²⁵ Iinak manyaakak eeta, in ɓɔrɛ tina ɗanɗamaakɛɛ.

²⁶ In digogoyikɛɛ a ŋaadtaanak baŋɛ samɓoɓoy sinɔɔnɛ geetitank.

²⁷ Ariira kɔna adarat tiriyaakɛ Suumiyoŋk kɛnɔ in ambabɛɛ wosɛ sini ŋaadtaanaka baŋɛ.

²⁸ In wookan Suumi naŋk Yeese Kereseek a iinak agut omoŋ.