Omoŋ Tɛsɛlonkeek 2 - Kuumeet Sinɔ Tɔɔnuk Ad Majaŋeeroŋk

Ijaag Paawuloosuk Tɛsɛlonkeek

¹ Iinak manyaakak eeta, ɗegerari ɔɗɔwa noŋk kɛ mokokan kɔrii son lak iinakik kanysɛya.

² Oko sinɛ ɓɔrɔ ɗegerarɗɔ kɛ laŋkiikan nyɔɔna a rakatɛ saakan arkiɗii jeemɛ Pilipisiyoosekiŋ. Yakana aasi kɛygun tina mɛlaakɛ ɓooyan sinɔ obiŋɔŋkuŋ, nɛkan tina gaɓɛ Waakoyot diirikeen kɛnɔ kɔnu rɔɔriyii Pɛɛnii sinɔɔnɛ Ɓɛlkɛɛstank sinaanɛkan tina gaɓɛ Waakoyotuk.

³ Moko kɔnu rɔɔriyii rɔɔriyɔnɔ sinɔɔnɛ tikaaŋɔŋk maŋk koɓiiɗ sinɔɔnɛ ŋɛɛwɛnŋɔŋk maŋk sinɔɔnɛ ɗɛyɛɛɗii a raamɛɗii iinakik.

⁴ Yakana tonii agut sinɔkan tina gaɓɛɛɗ Waakoyot Pɛɛni sinɔ Ɓɛlkɛɛstank a adarat a tin ŋaadigeeɗŋɔŋk. Nɔkan ijaagiɗii sinik kɛnɔ yaa ɓayɛ Waakoyo sinɛ mermen ɓayɛtun gaŋkik, ma moko kɛnɔ yaa ɓayɛ etoŋk.

⁵ Ɗegerari sinɔ kɛ kii kan kɔna muuset ɛɛk nyonɛ kɛnɔ kɔne laŋii tɔkɔny, maŋk tɔkɔny naŋk maŋk ɔɔtɛ tagayoŋk. Nɛ ɗeger tin Waakoyo.

⁶ Kiikan ɗɛyɛ eemɛyɔn sinɔ laŋɛɛ iinakɛk kɛygun wooɗe.

⁷ Kɛygun aasi eteŋk nomtaanakiŋ ɔɔtɛ saagun kɔnu ooɗɛɛɗiik, nɛkan kɔne weeweriikii kɔɔr a rikitii ɛɛk oko sini lowiiɗ ɛmɛsa tɔɔna tɔɔn nɛɛkik.

⁸ Porii seek kɔnu jɛt nɛ agut sinɔ kɔnu poriiɗiiŋɔŋk nɛ kɔna waasii Pɛɛni Waakoyotoŋk sinɔ Ɓɛlkɛɛstank, moko sini dakɛɗa, eteŋk ɓɔrɛ ragadtaanak sinɔɔna kɔna gaɓɛɛɗii wɛɛŋa gaŋkŋɔŋk.

⁹ Iinak manyaakak eeta, ɗegerari kɛ ijaagɗikiikan ɛk ɛkan bɔɔlaakii ɛk, bɔɔlaakiikan ijaag kaay a waawuy saakan kɔna waasɛɛɗii Pɛɛni sinɔ Ɓɛlkɛɛstank Waakoyotoŋk, kɛnɔ kat lakɛ iɗit sinɔ dakgiɗii a diilk.

¹⁰ Ɗegerari sɔɔk ɛ ɓɔrɛ ɗeger Waakoyot kɛ beeɗiikan a eteŋk geetitaanak a tin kɛɛ laaganyɛk, saakan arkiɗii saay iinakɛ ŋaadtaanakɛ kɔɔrk.

¹¹ Iinak ɗegerari any sinɛkan ɓɔrɛ kɔna ijaagiik a omoŋ omoŋ oko sinɛ iɗit lowiiɗ tɔɔmɔk gɛɛŋkiŋ.

¹² Ɗegerar kɛ ariikan kɔna adarat a ɓaŋkaawurari ɛ kɔnu rɔɔriyii, kɛnɔ koy boŋiir Bbrɛ nɛɛk ɛ koy iinak kaastaanak eemɛyɔn nɛɛkik. Ɛ kɛnɔ beeɗiir beeɗiit sinɔ ari Waakoyo sinɛkan kɔnu riyk a yaageeɗŋɔŋk.

¹³ Ɛ ɓɔrɛ pɔɔsii Waakoyo a kii nyɛyɛ. Agut sinɔ saakan boŋurɗɔ Pɛɛni Nɛɛk sinɛɓa tiyɛɛr eteŋkɛɛk, nɔkan boŋiir oko Pɛɛni Waakoyotoŋk sinɛ ijaagɗi iinakɛ sigaagɛ ŋaadiɗikarik eekeerɛk, ma mokokan boŋiir oko pɛɛni etoŋk.

¹⁴ Iinak manyaakak eeta, gayikar a Godeyi Sambatɛyɛɛkoŋk Waakoyotoŋk sigɛ sɛɛg laŋɛ ɗook Yuudaak sigɛ atu Yeese Kereseek oko sinɛkan laŋirkiɗ rakatɛk joope Ayuuduk nɛkan ɓɔrɔ laŋirkɔ rakatɛ tekaaneerɛ goŋkuŋ.

¹⁵ Ege sigi joop Ayuuduk sigɛɓa ɓokotur Suumi Yeesee a joop pɛrkaakoŋk, ɛ ɓɔrɛ tin epapayar nɛ tin ɔɔyɛr ɗokanɛɛka. Sɛɛg joop sigɔ arir Waakoyo a ki yaaka ɓayɛ nɛɛk ɛ sɛɛg gumaakeer joop baŋɛk.

¹⁶ Ɓaarar tin kɛnɔ kat waasii Pɛɛni sinɔ Ɓɛlkɛɛstank sinɔ koy bɔdɛrɗi joop sigɔ moko Ayuuduk. Oko sinik ɛnyɛnyɛkar a tutukarki tikiyɛ tikiyɛɛka raŋana. Yakana mɛlkikɔɔ sɛɛga goopan Waakoyotoŋk pediya nɛɛkaak.

Ɗɛyɛ Paawuloos Dɛnɛɛ Joop Tɛsɛlonkeek

¹⁷ Yakana iinak manyaakak eeta saakan kɔnu pakakatiiɗii ɔɔtɛya sinɔɔna balaaŋɔŋk taarek, ma moko koɓiiɗik, nɛ paarii a ɗɛyii a kɔnu dɛnii taamt agut sinɔ kɔna lakiɗii ŋɔɗɔ jɛtik.

¹⁸ Ɗɛykaayiikan a gun kɔrii son lak iinakkiŋ. Kɛ ɗɔm eet Paawuloos paarirkaayakan ɛnyɛ son lak iinakik agut ɓɔɔkaaŋ, yakanakan tin ɓaarɗi setan.

¹⁹ Ŋaadiyɛ sigɛ kookoriik a yaaka naŋk a merii naŋk ɛɛkoŋkŋk a dooroy naŋk eemɛyɔɔnoŋk wooɗak? saakoy mɛlkiɗ Suumi naŋk Yeeseek taamɛkɛ gɛɛnɛkik Moko iinak?

²⁰ Iinak eemɛyɔn naŋk ɛɓɔrɛ iinak yaaka naŋk eekeerɛ.