Markoos 6 - Kuumeet Sinɔ Tɔɔnuk Ad Majaŋeeroŋk

Laŋki Yeese Ɓooyan Naajireete

¹ Ŋaarkiɓa Yeese saadi nɛ mɛlɛrki ɗooka nɛɛka a nomtaanak gɛɛŋk.

² Waawuy Sambatɛyoŋk tukeɓa rɔɔriyɔn godeey tolɛɛɗoŋk Ayuuduk. Geleewɛrgeeɗɓa joop a ɓɔɔkaaŋ nɛɓa reemɗi ɓayɛtun gɛŋk. Nɛɓa tonurgeeɗ kɛ, "Laŋki iɗit sini ola sigi baŋɛ eet? Gagiɗɛɛɓa ɗegerɔn ɛɛkoŋk kɛ jikon? Ijaag sɔɔriyɛ sigi ariit ɛk?

³ A mokosu sini ijaagenkɔ kɛɛnoŋk, tɔɔn Maariyamuk? Moko manyaakak Yaykoob, a Yoosep, a Yuudaa, a Simion? Ma manyaakak sigɛ peetakik sɛɛg a eteŋk agut omoŋ seedi?" Nɛɓa darayɛr nɛ dakɛr a kir boŋiiɗ.

⁴ Nɛɓa Yeese jumur sɛɛga kɛ, "Eemɛyɛɛ iɗit pɛrkaakoŋk nyonitaakɛ ɔgɔɔkɛ baŋɛ, mayakana daraayɛɛ ɗook nɛɛkɛ a sooy lak tekaaneer gɛɛŋk a joop wɛy nɛɛkkiŋ."

⁵ Kiɓa oolɛ a ijaag sɔɔriyɛ saadiŋ. Riiɓeɓa ari nɛɛk gortaanakɛ sigɔɔgɛ tekerŋɔŋk dakɛɗa nɛ ebɔdɛ sɛɛgiŋ.

⁶ Reemɗiɓa ɓayɛ nɛɛkɛ agut sinɔ kirɗi ŋaaditik. Nɛɓa weeweri Yeese sinɔɔnɛ mɛndɛr nɛɛk baŋɛk a rɔririyiiŋ.

Wosɛyɛ Yeese Wosɛytaanak Sigɛ Aarin A pɛɛyk

⁷ Riykɓa Yeese nomtaanak sigɛ aarin a pɛɛyk son lak sɛɛnik nɛ wosɛyɛ sɛɛg a pɛɛy pɛɛy, gaɓɛɓa sɛɛga ɓaŋkawuka kɛnɔ ɔɔyɛr wɛɛŋa sigɔ somkaanakik.

⁸ Tonuɓa sɛɛga kɛ, "In diilɛɛ gumboy dakɛɗa gopɛ noŋk. Ma kat diilɛɛ ɗama, kɛygun kosɛ, kɛygun wori ɛ kɛygun teeɓɛɛ.

⁹ In gaɓɛɛ saamɛyɛ deraka, ma kat gaɓɛɛ ɛɛka abii wonoyɛtoŋk om.

¹⁰ Saakɔɔ guugunyarɗɔ godeya omaltaak, in beeɗɛɛ saadi nɔkɔɔ ŋaararkiɗɔɔ mɛndɛre saak.

¹¹ Ɔkɔn lakɛ nyon omalte iɗit sinɔ kɔnu ki boŋiiɗ maŋk ki kɔna geleewɛɛtkiŋ, nɛ in tɛntɛŋɛɛrɛ duudur sinɛ latukari derakɛk saa ŋaararkiɗɔ saadik. Dakɛkoy sɛɛga sini a misikiri rɔɔrɔkɔɔnoŋk."

¹² Nɛɓa wosɛytaanak gɛɛnɛ ŋaaraki saadi, nɛ rɔɔriyar joop baŋɛ kɛnɔ weeriik tikiyɛɛkɛ Waakoyota.

¹³ Ɔɔyɛrkiɓa wɛɛŋa sigɔ somkaanakik a ɓɔɔkaaŋ, ɛɓa ebɔdɛr gortaanak a ɓɔɔkaaŋ a ɗonyɛr sɛɛg jɛyitii.

Rer Yowanis Sinɛ A'aadiik

¹⁴ Ɗegerɛɛɓa ɔɔtɛ Yeeseek joope baŋɛ. Nɛɓa tiyɛ tapa sinɛ kɛ Herodisik agut sɛɛniŋ. Tonurɓa joop ɔgɔɔk kɛ, "Ŋaarkikɔ Yowanis sinɛ A'aadiik ret walasa. Agut sini ijaagɛɛ sɔɔriyɛ sigi baŋɛ Sɛɛne."

¹⁵ Maɓa joop ɔgɔɔk tonur kɛ, "Ege sini Eliyaas." Ma ɔgɔɔk tonur kɛ, "Ito ege sini joope pɛrkaakoŋk sigaagɛɓa jeemɛk om."

¹⁶ Saaɓa tiyɛɗ Herodis sinik, nɛɓa tonu kɛ, "Ege sini Yowanis kan yawa ŋɔɗɔ nɛɛkik, ŋaarkikɔ ret walasa sɛɛn."

¹⁷ Agut sinɔ gaamuɓa Herodis Yowanis nɛ gaɓɛ godeya korkoɗɔɔnoŋk agut jarti manyaak Pilipoosuk Herodiyadaa.

¹⁸ Agut sinɔɓa toniiɗ Yowanis Herodisa kɛ, "Moko liki sinɛkɔ boŋiɗin jarti masookooŋkuk kɛɛɓaana pɛgɛdɛt."

¹⁹ Ŋadiɓa Herodiyada agut sini nɛɓa ɗɛyɛ a ɓokotuguɗɛɛ Yowanis, yakanaɓa kiigeeɗ gayɛ.

²⁰ Agut sinɔ dɛnɛɓa Herodis Yowanis a iɗit sinɔ mentan taamɛkɛ Waakoyotoŋk ɛ geetitank, nɛɓa ɓureŋ a koorɛŋ. Saaɓa Herodis tiyɛɗ waasiyɛ Yowanisik, nɛɓa gelewugeeɗ yaakat. Yakanaɓa waasiyɛ gɛɛnɛ ooɗɛr sɛɛniŋ jɛt.

²¹ Pediya mɛlkiɓa ɓɛɛnyɔ sinɔ mentanŋɔŋk Herodisa. Ɓeny sinaanɛɓa eemɛyɗi Herodis ɓɛɛnyɔ sinɛɓa ɓartɛɗɛɛ sɛɛnik, ijaagɓa wɔɔr suumiyɛɛka maŋgistiyoŋk a ɔɗɔweera amaasiniyɛɛkoŋk a joopa sigaaga boobɛrk ɗegerɛɛ sɛɛg ɗook Gɛlilaak.

²² Nɛɓa tɔn Herodiyadaak sinɔ peetik kɛɛ nyona wɔɔroŋk a duubuyeŋ nɛ ari Herodis a joop sigɛɓa wɔɔrɛɛk sigɛɓa sɛɛg a sɛɛnik a yaa sɛɛgaŋ. Nɛɓa tonu tapaɗ sinɛ tɔɔna sinaana kɛ, "Gaɓa kɔɔna, any sinɛ ɗɛyink baŋɛ."

²³ Nɛɓa kuumɗigeeɗ kɛ, "Gaɓakɔɔna, any sinɛkɔɔte kɔɔniyink baŋɛ, kɛygun aasi ɗoo naak gɔɔ om!"

²⁴ Nɛɓa sɛŋk kɛɛ son lak ɛmɛsik nɛ kɛɛ tongeeɗ kɛ, "Kalɛya jikon?" Nɛɓa ɛmɛsa jumurgeeɗ kɛ, "Kalɛyi ɔɗɔ Yowanis sinɛ A'aadiik."

²⁵ Nɛɓa tɔn sinɛ mur sisa a gorgorŋ son lak tapaɗ sinɛk nɛ kɛɛ tongeeɗ kɛ, "Ɗɛya ata gaɓɛɛ ɔɗɔ Yowanis sinɛ A'aadiik sise a ar lɔkɔy."

²⁶ Nɛɓa tapaɗ sinɛ reemɗi ɓayɛ nɛɛkɛ jɛt agut any sini, yakana agut sinɔɓa kuumɗiiɗ joope sigaagɛɓa wɔɔrɛɛk taamɛkɛk, kiɓa oolɛ a ɓaar ant sinaanɛɓa kalɛyikiŋ.

²⁷ Nɛɓa tapaɗ sinɛ sisa wosɛyɛ amaasini nɛɛk om, kɛnɔ kɛɛ yawuku ɔɗɔ Yowanisik nɔ ɗɔkuɗ. Nɛɓa amaasini sinɛ kɛɛ godeya korkoɗɔɔnoŋk nɛ kɛɛ yawuku ɔɗɔ Yowanisik,

²⁸ nɛ ɗɔku lɔkɔy, nɛ gaɓɛ tɔɔna sinaana, nɛ tɔn sinɛ gaɓɛ ɛmɛsa.

²⁹ Saaɓa nomtaanak Yowanisik tiyɛrɗi sinik, nɛɓa kurak diiler buusɛ nɛɛk nɛ kaar kɔwarŋ.

Gije Yeese Ɗama Joop Sigɔ Kumɛɛ Tuulk

³⁰ Murarkiɓa nomtaanak saadiɓa sɛɛg wosɛygiɗɛɛk nɛ kurak tolɗi taamɛkɛ Yeeseek, nɛ tonurgeeɗ any sinɛkɔ ijaagirk a sinɛkɔ rɔɔriyaaɗik baŋɛ.

³¹ Nɛɓa sɛŋk tonu sɛɛga kɛ, "In kɛɛɗɛ nyona omalta sinɔɔna ɓɛɛlɛ mowank iinak mowan, nɔ kɛɛɗɛ imiinyɛɛ a balaaŋ." Nɔɓa toniiɗ sinik kurakɓa joop a ɓɔɔkaaŋ son lak sɛɛgik, aɓa aasi kir oolɛ a laŋir ɔɔtɛ sinɔ ɗamiiɗŋɔŋkuŋ.

³² Nɛɓa kaar emɗ soona ɓɛɛlɛ mowank kɛnɔ sɛɛg mowan.

³³ Saaɓa kaarɗik dɛnɛrɓa sɛɛg joop a ɓɔɔkaaŋ nɛ ɗegerar sɛɛgiŋ, nɛ ŋaaŋarark sinɔɔnɛ katamɛɛkoŋk baŋɛ, nɛɓa reerir derakɛ nɛ mɛlɛr sɛɛge ɔɗɔɔkɛ.

³⁴ Saaɓa Yeese worworiikiɗ emɗ nɛɛkɛkik nɛɓa dɛnɛ joop a ɓɔɔkaaŋ a ito jiŋkuyɛ sigɔ kɛɛ sɛɛge irtank, nɛɓa sanɗigeeɗiŋ. Nɛɓa rɔɔriy sɛɛg olaatɛ sigɔɔgɛ ɓɔɔkaaŋɔŋk.

³⁵ Ɛnyɛnyɛɓa ɔɔtɛ nɛɛkɛ a kɔjujururuŋ, nɛɓa nomtaanak gɛɛnɛ wideetar ɛɛk son lak sɛɛnik nɛ tonurgeeɗ kɛ, "Ege nyon nɛɛkɛ paaton, ma ɔɔtɛ nɛɛkɛ kɔjujururuŋ.

³⁶ Toŋoɗar joop sigi nɔ kaar mɛndɛra sineena jɔkuk nɔ ɓalirki ɗama nɔ ɗamar."

³⁷ Yakanaɓa Yeese jumur sɛɛga kɛ, "In gaɓɛɛ sɛɛga any sinɔ ɗamarŋɔŋk sɔɔk." Nɛɓa tonurgeeɗ kɛ, "Anɛ kɛɛɗii ɓalkii kiiwakɔ sigɔ ɗamarŋɔŋk a dinarak ɗibɛɛ pɛɛy nɔ gaɓii sɛɛgaŋ?"

³⁸ Nɛɓa sɛɛga tonu kɛ, "Ma latukari kiiwakɔ a eger? In kɛɛɗɛ dɛnkɛ sɛɛg." Nɛ kaar dɛnɛr nɛ tonurgeeɗ kɛ, "Lakɛ kiiwakɔ a tuul a oltiir a pɛɛy."

³⁹ Saadi tonuɓa Yeese nomtaanaka gɛɛna kɛnɔ kaakasar joop sigɛ ɓɔɔkaak ponyakɔɔkɛ nɔ arir sɛɛg a dokurɗe ŋɔnyikɛ sigɔɔgɛ yoolarŋɔŋk.

⁴⁰ Nɛɓa joop sigɛ ɓɔɔkaak kaakasar ɛɛk a ɗibɛ ɗibɛ a pɔlpɔlɛ joop pɛɛyk aarin pɔlpɔlɛ joop pɛɛy aarin nɛ beeɗirŋ.

⁴¹ Nɛɓa Yeese gaamu kiiwakɔ sigɛ tuulk a oltiir sigɛ pɛɛyk nɛ ɓɔŋgɔɔrɛ taamɛ dariya nɛ geetiŋ, nɛ ŋapati kiiwu nɛɛk, nɛ gaɓɛ nomtaanaka gɛɛna kɛnɔ kaakasar joopa sigaaga ɓɔɔkaak ɛ kaakasar oltiir sigɛ pɛɛyk sɛɛga baŋɛ.

⁴² Nɛɓa ɗami sɛɛg baŋɛ nɛ ɓooɗorarŋ,

⁴³ nɛɓa nomtaanak gɛɛnɛ tolɛr kootaayɔ kiiwakɔ gɛɛŋk a oltiir gɛɛŋkik sigɛɓa ŋayɗiik sɛɛgek a kantɛyɛ aarin a pɛɛy a enyaataŋ.

⁴⁴ Joop sigɛɓa ɗamar kiiwakɔ gɛɛŋkik moojak egeɓa ɓɔɔkaaka nɛŋk kumɛɛ tuul.

Ŋawite Yeese Maawɛ Raŋk

⁴⁵ Sisa tonuɓa nomtaanaka gɛɛnak kɛnɔ teeŋɛr emɗa nɔ ɗeyirkun ɗɛɛgasɔ Beetɛsaydaa, ma sɛŋk dakɛ baŋiya kɛnɔ ŋɔɗur joop sigɛ ɓɔɔkaak.

⁴⁶ Nɛɓa saadi pakati sɛɛge ɛɛk, nɛ kɔtɔɔŋɛ kurkuma ɗanɗamɔɔna.

⁴⁷ Saaɓa kɔjururkuɗuk arɓa emɗ nɛɛkɛ goroo sinaanɛ obiiŋiŋk kɔɔr, maɓa sɛŋk ar walas sɛɛn mowan.

⁴⁸ Dɛnɛɓa nomtaanak gɛɛŋk a sanɗi a ooɗɛ sɛɛg kɛɛwɛɛt, agut yoŋgoy sinɛ yoŋgoyɛ sɛɛge ɔɗɔɔkɛk. Kaalt sayitiyɛɛkɛ sigɔɔgɛ tula aŋank kusɓa son lak sɛɛgik a ŋawiitik maawɛ raŋk. Gunɓa ɗoyu sɛɛge takan,

⁴⁹ yakanaɓa dɛnɛr sɛɛn a ŋawite maawɛ raŋk, nɛ koɓur kɛ raŋawo nɛ duriyerŋ.

⁵⁰ Dɛnɛrɓa sɛɛg baŋɛ nɛ ŋaatirŋ. Yakanaɓa sɛŋk sisa tonu sɛɛga kɛ, "Kat ŋaatɛɛ eet, kat ɓuriikɛɛ."

⁵¹ Teeŋɛɓa sɛŋk emɗa nɛɛka raŋana nɛ sɛɛn a sɛɛg agut omoŋ, nɛɓa nyɛyɛ yoŋgoy nɛɛkɛŋ. Nɛɓa nomtaanak gɛɛnɛ reemɗi ɓayɛtun gɛŋk jɛt.

⁵² Kirkiɓa koɓiiɗ rɔɔriyɔn sɔɔriyɛ sigɛɓa kiiwakɔ sigɛɓakik, agut sinɔɓa kilararɗ ɓayɛtun gɛŋk nɛ kir ŋaadiɗiitik.

Ebɔdɛ Yeese Gortaanak Gensereete

⁵³ Ekaŋɛrɓa gɔrɔ sinɛ obiiŋɔŋk, nɛ mɛlɛr ɗooka sinɔɔna riyɛ kɛ Gensereetik, nɛ widetar emɗ nɛɛk nɛ tuserŋ.

⁵⁴ Saaɓa orurkuɗ ɛɛk emɗ nɛɛkɛkik, nɛɓa joop ɗegertar Yeesee sisa,

⁵⁵ rereriɓa sɛɛk ɗook sinaanɛ baŋɛ nɛ ɗɔkarki gortaanak beeɗiyɛɛkɛ saana arkiɗ sɛŋkik.

⁵⁶ Saagiyakɛɓa kaargeeɗik baŋɛ mɛndɛre a katamɛɛ a kɛntɛɛ ɗɔkarkiɓa joop gortaanak soona bakaanyŋɔŋk. Nɛɓa kalɛyir kɛnɔ aasi kumer gortaanak gɛɛnɛ abii nɛɛk kɛntɛ nɛɛk, nɛɓa bɔdɛr joop sigɛɓa kumerk baŋɛ.