Markoos 3 - Kuumeet Sinɔ Tɔɔnuk Ad Majaŋeeroŋk

Ebɔdɛ Yeese Iɗit Sinɔɓa Sɛɛgiya Ari Nɛɛkɛŋɔŋk

¹ Guugunyɓa Yeese godeya tolɛɛɗoŋk Ayuuduk kɛkar, maɓa saadi lakɛ iɗit sinɔɓa sɛɛgiya ari nɛɛkɛŋɔŋk.

² Joop sigɛɓa ɗɛyɛr Yeesee ooɗɛtak, koorɛrɓa a tonur kɛ dɛniikɔɔ saakɔɔ ebɔdɛɛɗ waawuy Sambatɛyoŋk Ayuudukuŋ.

³ Nɛɓa sɛŋk tonu eta sinaanaɓa sɛɛgiya ari nɛɛkɛkik kɛ, "Ŋaari raŋana nɔ ɛtin joope sigeegekɔ tolɗiik kɔɔr."

⁴ Nɛɓa Yeese tonu sɛɛga kɛ, "Liki won ijaag any sinɔ mentanŋɔŋkuk waawuy Sambatɛyoŋk Ayuuduk, maŋk any sinɔ ŋɛɛwɛnŋɔŋk? Ebɔdɛɛt wɛɛŋakoŋk, maŋk sɔɔkiyɛ? Nɛɓa sɛɛk dakɛr kɛ many.

⁵ Sanɗiɓa Yeese agut kilarɔn ɓayɛtun gɛŋkik, nɛ mermen joop sigɛ atukuɗ tookɛɛtak goopɛ, nɛ tonu eta sinaana kɛ, "Ker ari nook." Nɛɓa ker ari nɛɛk, nɛ bɔdɛŋ.

⁶ Ŋaararkiɓa joop Paarisik nɛ waasiɗiigeeɗ a joop Herodisik sinɔ kɛ ɓokotur ɛkik.

Nomɛr Joop A ɓɔɔkaaŋ Yeesee

⁷ Kaarɓa Yeesee a nomtaanak gɛɛŋk gɔrɔwa sinɔɔna obiiŋɔŋk Gɛlilaak, nɛɓa nomɛrɗi joop a ɓɔɔkaaŋ sigɔɓa kurak Gɛlilaakeek, a Yuudaakeek.

⁸ Nomɛrɗiɓa ɓɔrɛ joop a ɓɔɔkaaŋ sigɔɓa kurak Yuudaake, a Yorsaleeme, a Edomiyase, a ɗook sinaanɛ ar ɗeesɔ Yordanoosuk a ɓɔrɛ sinɔɔnɛ Tiiroosuk a Sidoonaak. Kurakɓa joop sigɔ ɛtɛr oko sinikik, agut sinɔɓa tiyɛrɗi any sinɛɓa ijaag Yeese baŋɛk.

⁹ Tonuɓa nomtaanaka gɛɛna kɛnɔ ragadirgeeɗ emɗ sinɔ tɛmŋɔŋk, kɛnɔ mo enya joop sigɛɓa tolɛr ɛɛkik.

¹⁰ Ebɔdɛɓa joop a ɓɔɔkaaŋ goriɗakɛ. Agut sini joop sigɛɓa rakatɛr goriɗakɛk baŋɛ remɛɛtarɓa ɛɛk Yeeseya a ɗɛyɛr a kumerŋ.

¹¹ Saaɓa joop sigɛɓa gaamur wɛɛŋa sigɔ somkaanakik, dɛnɛrɗi Yeeseek nɛɓa ɗiirar sɛɛne taamɛkɛ, nɛ ooyɛr a tonurgeeɗ kɛ, "Iin Tɔɔn Waakoyotoŋk."

¹² Nɛɓa sɛɛga rɔɔrɔk jɛt kɛnɔ kat waasɛr agut sɛɛn joopa.

Daam Yeese Wosɛytaanak Sigɛ Aarin A Pɛɛyk

¹³ Kɔtɔɔŋɛɓa Yeese kɛkar kurkuma raŋana nɛ riyiri joop sigɛ ɗɛyɛ sɛɛgik, nɛɓa sɛɛk kurak son lak sɛɛnik.

¹⁴ Nɛɓa daam joop sigɛ aarin a pɛɛyk kɛnɔ sɛɛg a sɛɛn, kɛnɔ sɛɛg wosɛyɛ rɔɔriyɔɔna, riyɓa sɛɛg kɛ wosɛytaanak.

¹⁵ Gaɓɛɓa sɛɛga ɓaŋkawuka kɛnɔ ɔɔyɛrki wɛɛŋa sigɔ somkaanakik.

¹⁶ Wosɛytaanak sigɛ aarin a pɛɛyk sigɛɓa daam sɛɛgik sɛɛg sigi, Simion sinɛɓa riy kɛ Petrosuk,

¹⁷ Yaykoob a Yowanis sigɛɓa tɔɔmɔk Jɛbdiyoosuk. Riyɓa sɛɛg Yeese kɛ Tɔɔmɔk Talaloŋk.

¹⁸ Indiriyaas, Pilipoos, Bɛrtɛloomiyos, Maatiyoos, Toomaas sinɔɓa tɔɔn Ilpiyoosuk, Yaykoob, Taadiyoos, Simion sinɛɓa kus ɗook Kɛnɛaanik,

¹⁹ a ɓɔrɛ Yuudaa Keriyootuk sinɛɓa gaɓɛ Yeeseek.

Yeesee A Biel Jebuul

²⁰ Saadi baŋiya guugunyɓa Yeese godeya, nɛɓa tolɗiitar joop a ɓɔɔkaaŋ kɛkar aɓa aasi ooɗɛ Yeesee a nomtaanak gɛɛŋk ɗama.

²¹ Tiyɛrɓa tekaaner gɛɛnɛ a tonɛɛ kɛ, Maratɛkɔnɔŋ, nɛɓa kurak son lak sɛɛnik kɛnɔ gaamur.

²² Rɔɔriytaanak higi Muuseek sigɛɓa kurak Yorsaleemek tonurɓa kɛ, "Lak Biel jebuul. Sinɛ ɔɔykuɗ wɛɛŋa sigɔ somkaanakik, agut sinɔ ɔɔykɛ wɛɛŋa sigɔ somkaanakik ɔɗɔwente sineene seetanɛɛkoŋk."

²³ Nɛɓa Yeese riyki sɛɛg son lak sɛɛnik, nɛ tonu sɛɛga rɔmɛɛɗ kɛ, "Oolɛ setan a ɔɔyku setan ɛk?

²⁴ Maŋgisti sinɔ pakakat ɛɛk nɛɛkik ki oolɛ a ɛtɛŋ.

²⁵ Ma joop wɛy sinɔ omoŋɔŋkuk sigɔ pakakatar ɛɛk nɛŋkik, kir oolɛ a beeɗirŋ.

²⁶ Nɛ ɔkɔn setan manɗi a ɛɛk nɛɛkiŋ ɛ pakar ɛɛkiŋ, nɛ ki oolɛ a ɛtɛŋ nɛɓɔ mɛlki pedi nɛɛk.

²⁷ Mayakana kɛɛ iɗit sinɔ guuguny godeya iɗit sinɔ ɓaŋkawuŋɔŋk nɔ weelɛ ɓolaatuuruwɛ gɛɛŋk, makɔ tɛɛnan ki korkoɗɛ iɗit sinɛ ɓaŋkawuŋɔŋkuk. Nɛkɔɔ ɓaane saadi weelɛ ɓolaatuuruwɛ gɛɛŋk.

²⁸ Eekeer tona kɔnaaŋ. Tikiyɛ sigɛ ijaagir sɛɛg joopk a nyɔɔna sigɛ nyɔɔnaaɗik baŋɛ, ŋɔɗurɛɛkoy sɛɛgeŋ.

²⁹ Mayakana, iɗit sinɔ nyɔɔn Wɛɛŋa sigɔ Geetitaanakik baŋɛ, kirkiɗɛkoy toŋoɗ tikiyɛ gɛɛŋk adaktan, dakgeeɗkoy a gati tikiyɛɛkoŋk nɔkoy nɔkoyk."

³⁰ Nɔɓa Yeese toniiɗ sinik agut sinɔɓa tonurɗu kɛ, "Lak wɛɛŋa sigɔ somkaanakik."

Ɛmɛs Yeeseya A Manyaakak

³¹ Saaɓak kurakɓa ɛmɛsa a manyaakak sigɛ moojakik son lak sɛɛnik, nɛɓa ɛtɛr walas nɛ wosɛyɛr iɗit nɛ riyirɛɛŋ.

³² Nɛ joop sigɛɓa beeɗirɗi tookɛɛtak tonurgeeɗ kɛ, "Atu ŋaaŋa a masookoyak sigɛ moojakik a sigɛ peetakik walas a ɗɛyɛr iin."

³³ Nɛɓa sɛŋk jumur kɛ, "Indii wooɗ? Ma manyaakak eeta wooɗak?"

³⁴ Nɛ kolɛɛnyɛ son lak joop sigɛ atukuɗ tookɛɛtak, nɛ tonu sɛɛga kɛ, "Indiiyak a manyaakak eeta sɛɛg sigi."

³⁵ Ege iɗit sinɛ ijaag ɗɛyan Waakoyotoŋk manya eeta sinɔ mooyk ɛ manya eeta sinɔ peetik ɛ indii."