Markoos 2 - Kuumeet Sinɔ Tɔɔnuk Ad Majaŋeeroŋk

Ebɔdɛ Yeese Iɗit Sinɔ Nyɔŋtank

¹ Ɗoŋikɛ sigɔɔgɛ tekerŋɔŋk baŋiya, weeriikɓa Yeese Kipirnahooma. Nɛɓa tiyɛɛ ɓɛɛl nɛɛk godeey takikiŋ.

² Tolɗiiɓa joop a ɓɔɔkaaŋ a tokoolur nyon sinɛ ar tugaat nɛɛkɛkik, nɛɓa Yeese waasɛ sɛɛga Pɛɛni Waakoyotoŋk.

³ Saaɓak joop a aŋan diilerkiɓa iɗit om sinɔ nyɔŋtank beeɗi son lak sɛɛnik.

⁴ Ɓɔɔkaaɓa joop aɓa kir oolɛ a wideetar son lak Yeeseekiŋ. Agut sini ɓuurerɓa gode nɛɛk ajeerant saadi epeta a Yeeseek, nɛ gaɓɛɛtar nyɔŋtan nɛɛk a beeɗi nɛɛk.

⁵ Nɛɓa Yeese dɛnɛ ŋaadiyɛ gɛŋk, nɛ tonu nyɔŋtaana saa kɛ, "Iin tɔɔn sini, ranyjɛɛrɛ kɔne tikiyɛ gooŋkuŋ."

⁶ Rɔɔriytaanak higi Muuseek a omoŋ omoŋ sigɛɓa beebeɗar saadik koɓurɓa ɓayɛtunɛɛkɛ gɛŋk kɛ,

⁷ "Tonu iɗit sini oko sinik agut jikon? Ege sigi nyɔɔna tiriya Waakoyotoŋk! Wooɗ sinɛ oolɛ a ranyjɛ tikiyɛɛk Waakoyote sinaanɛ omoŋɔŋk sɔgɔɔsɔyk?"

⁸ Nɛɓa Yeese sisa ɗeger any sinɛ koɓur ɓayɛtunɛɛkɛ gɛŋkik, nɛ tonu sɛɛga kɛ, "Koɓiir any sini ɓayɛtunɛɛkɛ goŋk agut jikon?

⁹ Sini tona nyɔŋtaana sineena kɛ, 'Ranyjɛɛrɛ kɔne tikiyɛ gooŋkŋɔŋk,' a sini kɛ, 'Ŋaari raŋana nɔ boŋun beeɗi nook nɔ ŋaarink.' Bala won?

¹⁰ Mayakana kɛnɔ ɗegerari kɛ, "Lak Tɔn Etoŋk ɗook raŋk ɓaŋkawuka sinɔ ranyjɛɛɗ tikiyɛɛŋɔŋk." Nɛɓa tonu nyɔŋtaana saa kɛ,

¹¹ "Tonaana kɛ, ŋaar raŋana nɔ boŋun beeɗi nook nɔ ŋaarin nyaka nookaak."

¹² Nɛɓa nyɔŋtan sinɛ ŋaar raŋana nɛ ɓataki beeɗi nɛɛk, nɛ ŋaar joope gɛɛnɛ baŋɛ taamɛkɛ. Nɛɓa joop gɛɛnɛ baŋɛ reemɗi ɓayɛtun gɛŋk, nɛ pɔɔsɛr Waakoyo a tonur kɛ, "Inɓa kii taanta any sinɔ ito sinik adaktan."

Riyiri Yeese Leewii Sinɛ Riyɛ Kɛ Maatiyoosuk

¹³ Ŋaarɓa Yeese kɛkar gɔrɔwa sinɔɔna obiiŋɔŋk Gɛlilaak kɛntɛya. Nɛɓa tolɗi joop sigɛ ɓɔɔkaak, nɛ wideetar ɛɛk son lak sɛɛnik. Nɛɓa Yeese rɔɔriy sɛɛgiŋ.

¹⁴ Saaɓa ɗoyiɗ sinaanɛk, dɛnɛɓa tɔɔn Ilpiyoosuk Leewii a beeber nyon sinɔɔnɛ yayawuɗɛ worik, nɛ tongeeɗ kɛ, "Nomate." Nɛɓa sɛŋk ŋaar raŋana nɛ nomɛɗiŋ.

¹⁵ Saaɓa ɗamiiɗi Yeese woy Leewiik. Ɗamiiɓa joop sigɔ yayawar worik a tikitaanak a ɓɔɔkaaŋ a Yeesee a nomtaanak gɛɛŋk agut omoŋ. Nomɛrɓa joop sigɔ ɛtɛr oko sinikik a ɓɔɔkaaŋ Yeesee.

¹⁶ Rɔɔriytaanak higi Muuseek sigɛɓa komoy joop Paarisik saaɓa dɛnɛrɗi Yeesee a ɗami a joop sigɔ yayawar worik a tikitaanak agut omoŋɔŋk, nɛɓa kɔɔniyar nomtaanak gɛɛŋk kɛ, "A ɗami Yeese a joop sigɔ yayawar worik a tikitaanak agut omoŋ agut jikon?"

¹⁷ Nɛɓa Yeese tiyɛ sini, nɛ tonu sɛɛga kɛ, "Ɗɛyɗigeeɗ akiimi gortaanak, ma moko bɔdtaanak. Kusaakan saak kɛnɔ riyka tikitaanak tikiyɛɛkɛ, ma mokokan kusa kɛnɔ riyka joop sigɔ mentaana taamɛkɛ Waakoyotoŋkuk."

Kɔɔniyɔn Sinɔ Widikɛɛ Agut Soomuk

¹⁸ Soomɛrɓa nomtaanak Yowanisik a joop Paarisikiŋ. Nɛɓa kurak joop a omoŋ omoŋ son lak Yeeseek, nɛ tonurgeeɗ kɛ, "Soomɛr nomtaanak Yowanisik a joop Paarisikiŋ, ma sɛɛk kir soomɛɛt nomtaanak goonɛ agut jikon?"

¹⁹ Nɛɓa Yeese jumur sɛɛga kɛ, "Toortaanak a ar iɗit sinɛ waawuguɗɛɛk sooy lak sɛɛgik nɛ oolɛr a soomɛrŋ? A ar iɗit sinɛ waawuguɗɛɛk sooy lak sɛɛgik nɛ kir oolɛ a soomɛrŋ.

²⁰ Mayakana, mɛlkikɔɔ ɔɔtɛ sinɛkɔɔ pakatiiɗ sɛɛge ɛɛk iɗit sinɛ waawuguɗɛɛkiŋ, nɛkɔɔ soomɛr sisa.

²¹ Kɛɛ iɗit sinɔ ɗɛpoyɛɛr abii sinɔ tɛmŋɔŋk tɔɔnuk abiya sinɔɔna bɔɔlɔŋk raŋanaak, ma ɔkɔn ijaagɛ siniŋ, nɛ abii sinɛ tɛmŋɔŋk tɔɔnuk pɔɔpɔk abii sinɛ bɔɔlɔŋkuŋ nɛ tool nɛɛkɛ bakaanyirŋ.

²² Maɓɔrɛ kɛɛ iɗit sinɔ gaɓɛ ogool wɛynik sigɔ tɔɔmɔkuk kaŋkaloota sinɔɔna bɔɔlɔŋk. Ma ɔkɔn ijaag oko sinikiŋ, nɛ ɓɛrɛ kaŋkalo nɛɛkɛŋ nɛ gupatɗi ogool sigɛ wɛynikiŋ. Nɛ kɛɛ tɔkɔny kaŋkaloote nɛɛkɛ, ma gaɓɛɛ ogool sigɛ wɛynik sigɔ tɔɔmɔkuk kaŋkaloota sinɔɔna tɔɔnuk."

Kɔɔniyɔn Sinɔ Widikɛɛ Agut Waawuy Sambatɛyoŋk Ayuuduk

²³ Ɗoyuɓa Yeese waawuy Sambatɛyoŋk Ayuuduk sinɔɔnɛ taawa ɗamatoŋk takank, nɛɓa ŋawiiter nomtaanak gɛɛnɛ nɛ tuker tɛkɛta taawakeer.

²⁴ Nɛɓa joop Paarisik kɔɔniyar sɛɛn kɛ, "Ijaagir nomtaanak goonɛ any sinɔɓa kɛɛ pɛgɛdɛɛtik waawuy Sambatɛyoŋk agut jikon?"

²⁵ Nɛɓa jumur sɛɛga Yeese kɛ, "Kiirɓa ambabɛɛt any sinɛɓa ijaag Daawit sɛɛn a joop sigɛɓa sɛɛg a sɛɛnik saaɓa latukuɗ ŋaawuk a ŋɔɗɔ ɗamatoŋkuk?

²⁶ Eme sinaanɛɓa Abiyatar ɔɗɔwen tapa ŋaadiyɛɛkoŋkuk, guugunyɓa Daawit Godeya Waakoyotoŋk, nɛɓa ɗam nasi sinɔ Geetitank sinɔɓa pɛgɛdɛɛ kɛnɔ ɗamar tapaak ŋaadiyɛɛkoŋk dakɛɗak, nɛɓa ɓɔrɛ gaɓɛ joopa sigaagaɓa sɛɛg a sɛɛnik."

²⁷ Tonuɓa sɛɛga Yeese kɛkar kɛ, "Riiɓɛɛɓa waawuy Sambatɛyoŋk eta, ma mokoɓa riiɓɛɛ iɗit Sambatɛya.

²⁸ Agut sini ege Tɔn Etoŋk Suumi ɓɔrɛ waawuy Sambatɛyoŋkuk."