Markoos 16 - Kuumeet Sinɔ Tɔɔnuk Ad Majaŋeeroŋk

Ŋaarki Yeese Ret Walasa

¹ Saaɓa ɗoyiɗ waawuy Sambatɛyoŋk Ayuuduk baŋiya, Maariyam Mɛgdooluk a Sɛlomee a Maariyam sinɛ ɛmɛs Yaykoobak, ɓalirɓa reyaay sinɔ ŋaa yagaark kɛnɔ buker buusɛ Yeeseek.

² Ɓɛɛnyɔ Sambatɛyoŋk romiɗ gibi ɔɔtɛse mɛlkiɗ waawuyk kaarɓa saana lak pii nɛɛkik.

³ Ɛynɛynɛkarɓa ma totonar raŋan kɛ, "Anɛkɔɔ tina girgiɗki giɗee nɛɛk pii nɛɛkɛ ad wooɗ?"

⁴ Saaɓa kolɛnyɛtarkiɗiik, nɛɓa dɛnɛɛtar giɗee sinɛɓa obiiŋɔŋk a kɔ girgiɗi ad nɛɛkɛŋ.

⁵ Nɛɓa kɔtar piya nɛɛka nɛɓa sisa dɛnɛr ateeny sinɔ lak abii sinɔ tupeenyŋɔŋk a beeber goyse ɗiɗikakaak nɛ ŋaatirŋ.

⁶ Yakanaɓa iɗit sinɛ tonu sɛɛga kɛ, "Kɛɛ any kat ŋaatɛ. Ɗɛyɛɛr Yeese kɔ Naajireetik sinɛkɔ laalawɛɛk, kɛɛ seedi ŋaarkikɔŋ in dɛnɛɛ saan kɔ riiɓeeɗɛɛk.

⁷ In kɛɛɗɛ tonɛɛ nomtaanaka gɛɛna a Petrosa kɛ 'Ɗoykunkɔɔ kɔne ɔɗɔɔkɛ Gɛlilaaka kaarkɔɔ dɛnɛɛr sooy, oko sinɛkan kɔna toniiɗ Yeese jeemɛk."'

⁸ Nɛɓa jartiyatɔk sigɛ ŋaararki pii nɛɛkɛ a ɓuri a piiɗerŋ nɛ gonarŋ, agut sinɔɓa ɓuriiɗŋɔŋk nɛ kɛɛ iɗit sinɔɓa tonurgeeɗ any sinɔ balaaŋɔŋkuk.

Yaaŋɛ Yeese Ɛɛk Maariyama Mɛgidooluk

⁹ [Saaɓa Yeese ŋaarkiɗ ret walasa waawuy Sambatɛyoŋk gibik nɛɓa tuki nɛɛkɛ yaaŋɛ ɛɛk Maariyama Mɛgdooluk sinaanaɓa ɔɔykuɗ wɛɛŋa somkaanakik a tula pɛɛyk.

^10-11 Nɛɓa sɛŋk ŋaar nɛ tonu nomtaanaka gɛɛna ɓɛɛl nɛɛk wɛɛŋakɛk. Sanɗiɓa sɛɛk a wuɗaaŋ. Tonuɓa sɛɛga kɛ, "Ŋaarkikɔ Yeese ret walasa nɛ ɓɛɛlɛ wɛɛŋakɛ dɛnakɔ taamt naakɛk." Yakanaɓa sɛɛk kir ŋaadit.

Yaaŋɛ Yeese Ɛɛk nomtaanaka Sigɔɔga Pɛɛyk

¹² Saadi baŋiya nomtaanak gɛɛŋk a pɛɛy sigɛɓa kaar kɛntɛyak yaaŋɛɓa sɛɛga Yeese ɛɛk a ɓɛɛlɛ gɔɔ om.

¹³ Nɛɓa sɛɛk weeriik nɛ kurak yaaŋɛr nomtaanaka sigaagakan dakɛrk any sini, nɛ ɓɔrɛ kir ŋaadit joop sigɛ.

Yaaŋɛ Yeese Ɛɛk Nomtaanaka Gɛɛna Sigɔɔga Aarin A Omoŋɔŋk

¹⁴ Yaaŋɛɓa Yeese ɛɛk nomtaanaka gɛɛna sigɔɔga aarin a pɛɛyk, saaɓa atukuɗ ɗamatik. Goopɓa sɛɛg agut sinɔɓa ŋaadirɗi a balaaŋɔŋk. Kilararɓa ɓayɛtun gɛŋk nɛ kir ŋaadiit any sinɛɓa sɛɛga tonur joop sigɛkan dɛnɛrkik.

¹⁵ Tonuɓa sɛɛga kɛ, "In kɛɛɗɛ ɗoo baŋɛ, nɔ kɛɛɗɛ waasɛ Pɛɛni sini Bɛlkɛɛstank joopa baŋɛ.

¹⁶ Iɗit sinɔ ŋaadiɗi ɛ aadɛɛk bɔdɛkoyŋ, mayakana iɗit sinɔ ki ŋaadiɗiitik pɛrɛdɛɗɛɛkoyŋ.

¹⁷ Joop sigɛ ŋaadiɗiik, latukoy ɓaŋkawuka sinɔ ijaagirɗi sɔɔriyɛ sigik, ɔɔyɛrkikoy wɛɛŋa sigɔ somkaanakik tiriyaakɛ gaanɛk, tonɗiikoy ad sinɔɔnɛ tɔɔnuk.

¹⁸ Kɛygunkoy gaamur kookowɛ kɛygunkoy uter any sinɔ rɛɛrɛŋɔŋk kirkoy rerin, riiɓerkoy arin gɛŋk gortaanakɛ raŋk nɛ bɔdɛrŋ."

Ŋaar Yeese Rakaaya

¹⁹ Saaɓa Suumi Yeese toniiɗ sɛɛga sinik baŋiya, nɛɓa ŋaar rakaaya nɛ kɛɛ dokuɗe ɗiɗikakɛ Waakoyotoŋk.

²⁰ Kaarɓa nomtaanak gɛɛnɛ rɔɔriya nyonitaak baŋɛ nɛɓa ijaagɗi Suumii a sɛɛg agut omoŋ. Ɓaŋkaawurɓa any sinɛ tonurk sɔɔriyɛɛkɛ sigɔɔgɛ ɓɔɔkaaŋɔŋk.]