Markoos 15 - Kuumeet Sinɔ Tɔɔnuk Ad Majaŋeeroŋk

Diilɛɛ Yeesee Son Lak Pilatoosuk

¹ Romiɗ gibi ɔɗɔweer tapa ŋaadiyɛɛkoŋk, a gutarɛyɛ, a rɔɔriytaanak higi Muuseek, a joop sigɔ gaɓɛr woorank baŋɛ lalaŋiiɓa agut omoŋ nɛ waasiɗiiŋ. Nɛɓa korkoɗar Yeese nɛ diiler nɛ kaar gaɓɛr Pilatoosa sinaana ɗumaat ɗookak.

² Nɛɓa Pilatoos kɔɔniy kɛ, "Iin Tapaɗ Ayuuduk?" Nɛɓa Yeese tongeeɗ kɛ, "Ii, oko sinɛ toniiɗiŋk."

³ Ɔɗɔweer tapa ŋaadiyɛɛkoŋk ooɗɛrɓa Yeesee olaatɛ sigɔɔgɛ ɓɔɔkaaŋɔŋk.

⁴ Kɔɔniyɓa Pilatoos kɛ, "Daariiɗina olaatɛ sigɔɔgɛ ɓɔɔkaaŋɔŋk kɛɛ any sinɔ jumurunk?"

⁵ Nɛɓa Yeese kɛɛ any sinɔ jumurk, a reemɗi ɓayɛ Pilatoosuk.

Pɛrɛdɛɛ Yeesee Ret

⁶ Lakɓa iɗit sinɛ ɗumaat ɗookak barɛ sinɔ woorkuɗ korkortan a omoŋ sinɛ kɔɔniyar joopk kɛnɔ sɛɛga woorkɛ Ba'aale Ɗoyiɗoŋk.

⁷ Lakɛɓa joop godeey korkoɗɔɔnoŋk sigɔɓa ŋaaŋarar raŋana koɓiiɗ sinɔɔnɛ ŋɛɛwɛnŋɔŋk nɛɓa ɓokootar joopuk. Joope sigeege egeɓa omaay iɗit sinɔ riyɛ kɛ Bɛrbaanik.

⁸ Nɛɓa joop gɛɛnɛ wideetar ɛɛk son lak Pilatoosuk nɛ kalɛyir kɛnɔ ijaag sɛɛga oko sinɛkan barɛrɗik.

⁹ Nɛɓa Pilatoos kɔɔniy sɛɛg kɛ, "Ɗɛyɛɛr a kɔna woorka Tapaɗ Ayuuduk?"

¹⁰ Ɗegerɓa kɛ ɔɗɔweer tapa ŋaadiyɛɛkoŋk gaɓɛrgeeɗkan Yeesee agut sinɔ porurɗu ɛkan gɛŋkik.

¹¹ Ɔɗɔweer tapa ŋaadiyɛɛkoŋk moyurɓa joop sigɛ ɓɔɔkaak kɛnɔ kalɛyir kɛnɔ sɛɛga woorkɛ Bɛrbaan ɔɔtɛ Yeeseek.

¹² Kɔɔniyɓa Pilatoos joop gɛɛŋk kɛkar kɛ, "Saa woorkuɗa Bɛrbaanik, ma iɗit sini riyari kɛ Tapaɗnɔ Ayuuduk ara ɛk?"

¹³ Nɛɓa sɛɛk ooyɛr kɛ, "Laalawuk!"

¹⁴ Tonuɓa sɛɛga Pilatoos kɛ, "Ijaagkɔ tikiyɛ kɛ jikonak?" Nɛɓa sɛɛk ooyɛr a kaalɛŋ kɛ, "Laalawuk!"

¹⁵ Nɛɓa Pilatoos ɗɛyɛ kɛnɔ yaa joopa gɛɛnaak, nɛ woorku Bɛrbaan nɛ ŋɔɗuruŋ, ma ari Yeesee a ɗiŋɛɛ nɛ gaɓɛ amaasiniyɛɛka Roomuk kɛnɔ laalawar.

Daraayɛr Amaasiniyɛk Yeese

¹⁶ Saaɓak diilerɓa Yeesee amaasiniyɛ gɛɛnɛk keera sinaana ɗumaat ɗookak, nɛɓa amaasiniyɛ gɛɛnɛ baŋɛ tolɗi sɛɛne tookɛɛta.

¹⁷ Gaɓɛrgeeɗɓa ɛɛka abii sinɔ dɛɛŋɔŋk ɛɓa ɓɔrɛ kɛnyargeeɗ dooroy ɓɛynikoŋk nɛ gaɓɛrgeeɗ ɔɗɔwa.

¹⁸ Nɛɓa ɓɔŋgɔrɛrgeeɗ arin a darayɛr kɛ, "Iin Tapaɗ Ayuuduk, digoyna!"

¹⁹ Mamalarɓa ɔɗɔ nɛɛk sombalɛɛkɛ, topɛpɛyargeeɗɓa nɛ ɛtɛr korontunɛ nɛ ugumergeeɗiŋ.

²⁰ Daraayɛrɓa nɛ boŋurkuɗ abii sinɛ dɛɛŋɔŋk, nɛ gaɓɛrgeeɗ ɛɛka abii sinɛɓa nɛɛk, nɛ diiler kɛnɔ kaar laalawar.

Laalawɛɛ Yeesee

²¹ Lakɛɓa iɗit Kɛrenaak sinɔ riyɛ kɛ Simionuk ɛpɛn Aleksandrosa a Ruupoosa. Saaɓa mɛlkiɗ kɛntɛɛk, nɛɓa amaasiniyɛk remɛrgeeɗ kɛnɔ ɓataki laalawutan Yeeseek.

²² Nɛɓa saadi baŋiya diiler Yeesee nyona sinɔɔna riyɛ kɛ Golgotaa ma wooran nɛɛk Ɛmɛɛnan Ɔɗɔwoŋkuk".

²³ Saaɓa mɛlɛrɗi saanak, nɛɓa gaɓɛrgeeɗ ogool wɛynik sigɔɓa lotɛ a any sinɔ riyɛ kɛ kɛrbeek kɛnɔ uteɗ, yakanaɓa kiɗɛyɛ a uteŋ.

²⁴ Nɛɓa laalawar nɛ abiyaka gɛɛna orur ita nɛ kaakasar sɛɛgiŋ.

²⁵ Saaɓa laalawarɗi Yeeseek, egeɓa ɔɔtɛ nɛɛkɛ sayitiyɛ jiit romiiɗoŋk.

²⁶ Taapɛɛɓa taapiyɛ sigɔ yaaŋɛr tikiyɛ gɛɛŋkik kɛ, "Tapaɗ Ayuuduk".

²⁷ Saaɓak laalawɛɛɓa joop sigɔ sɔɔkɛr ɓɛɛlɛtik a pɛɛy a Yeesee agut omoŋ, om goyse ɗiɗikakɛk ma om goyse kantunakɛk.

²⁸ [Dusanɛɛ sineene pɛɛni sinɛɓa tonɛɛ Wargatɛɛ Waakoyotoŋk kɛ, "Ikomɛɛ a joop sigɔ tikitaanakik."]

²⁹ Joop sigɛɓa ɗoyur sinaanɛ jɔkoŋkuk daraayɛrɓa a ŋɛɛŋɛyɛr ɔɗɔɔk nɛ tonurgeeɗ kɛ, "Iin sininɔ aalin Gode sinɛ Geetitank nɛ kɛnyin ɗoŋikɛ sigɔɔgɛ jiitik.

³⁰ Ebɔdutɔ ɛɛk nook! Worworakatɔ laalawutant nɛɛkɛ ɗooka!"

³¹ Ɔɗɔweer tapa ŋaadiyɛɛkoŋk a rɔɔriytaanak higi Muuseek daraayɛrɓa a tonur kɛ, "Ebɔdɛkan joop ɔgɔ, ma ki oolɛ ebɔdɛɛt ɛɛk nɛɛkik.

³² Ɔkɔnɓɔ sɛɛn Keresee, tapaɗ Israeelik, intɔ worworiik sisɔ laalawutant nɛɛkɛ, nɔ dɛnii nɔɓɔre ŋaadii!" Maɓɔrɛ joop sigɛɓa laalawɛɛ sɛɛg a sɛɛn agut omoŋɔŋk nyɔɔnar sɛɛniŋ.

Rɛr Yeesee

³³ Atukiɗi sayitiyɛɛkɛ sigɔɔgɛ tula omk nɔ mɛlɛɛɗa sigɔɔga tula aŋank,

³⁴ ɓɛɛlɛɓa ɗook raŋk baŋɛ a nyuugur, atukiɗi sayitiyɛɛkɛ sigɔɔgɛ tula aŋank duriyeɓa Yeese a ɗooruŋ kɛ, "Elohee, Elohee, lama sɛbɛktanii? "Wooran nɛɛk sini kɛ, "Waakoyo naakɛ, Waakoyo naakɛ, ŋɔɗunkɔtu agut jikonk?"

³⁵ Tiyɛrɓa duri nɛɛk joop sigɛɓa ɛtɛtɛɗar saadik a omoŋ omoŋ nɛɓa tonur kɛ, "Riy Eliyaas."

³⁶ Nɛɓa sɛɛge iɗit omaay sisa reeri nɛɛkɛ boŋku abii sinɔ yuuse maawuk, nɛ yuusukuɗ ogool wɛynik sigɔ kowɛrŋɔŋk nɛ rokopɛ sombala, nɛ gaɓɛɛr Yeeseya kɛnɔ uteɗ. Nɛɓa iɗit sinɛ tonu kɛ, "Kat, dɛniikɔɔ saakɔɔ mɛlkiɗ Eliyaas nɔkɔɔ woorkuɗukuŋ!"

³⁷ Nɛɓa Yeese duriye a ɗooruŋ nɛ rɛrŋ.

³⁸ Saaɓak abii sinɛɓa biritɛɛ Godeey sinaanɛ Geetitank pɔɔkiɗiɓa a pɛɛy rakaay mɛlɛɛɗa ɗooka.

³⁹ Ɔɗɔwen amaasiniyɛ sigɔ ɗibɛk sinɛɓa ɛtɛtɛr laalawutant nɛɛkɛ taamɛkɛk saaɓa dɛnɛɗ Yeesee a duriye oko sinik nɛ rɛrŋɔŋk, nɛɓa tonu kɛ, "A egekɔrɔ iɗit sini Tɔɔn Waakoyotoŋk eekeerɛ!"

⁴⁰ Lakɛɓa saadi jartiyatɔk sigɔɓa mermemenik a yowɛɛɗŋɔŋk sɛɛge kɔɔr ɓɛɛlɛrɓa Maariyam Mɛgdooluk, a Maariyam sinɛ ɛmɛs Yaykooba sinaana tɛmk ɛ ɛmɛs Yosaak, a Sɛlomee.

⁴¹ Nonomarɓa sɛɛk Yeeseye a kɔkɔnyar saaɓa arkiɗ Gɛlilaakeek. Lakɛɓa ɓɔrɛ jartiyatɔk ɔgɔ a ɓɔɔkaaŋ sigɔɓa kurak Yorsaleema a Yeesee agut omoŋɔŋk.

Kɔɔwɛɛ Yeesee

⁴² Agut sinɔɓa kɔjururkuɗŋɔŋk egeɓa ɔɔtɛ nɛɛkɛ ragad a isiis waawuya Sambatɛyoŋk Ayuuduk.

⁴³ Saaɓak mɛlkiɓa iɗit Armaatiyaasik sinɔ eemɛyɛɛŋɔŋk sinɔ riyɛ kɛ Yoosepuk sinɔɓa sɛɛn iɗit sinɔ gaɓɛ woorank joopa Ayuuduk. Sɛɛnɓa iɗit sinɔ kookor burɛ Waakoyotoŋk ŋaadiyɛɛkɛk. Nɛɓa kɛɛ diirikent son lak Pilatoosuk nɛ kalɛyiɗ buusɛ Yeeseek kɛnɔ gageeɗ.

⁴⁴ Reemɗiɓa ɓayɛ Pilatoosuk kɛ, "Rɛr a gorgor oko sinik ɛk?" Nɛɓa riyiri ɔɗɔwen amaasiniyɛ sigɔ ɗibɛk nɛ kɔɔniy kɛ, "Rɛrkɔ ɗeeŋkɔŋk eekeerɛ?"

⁴⁵ Nɛɓa tiyɛ rer Yeeseek ɔɗɔwente sinaanɛ amaasiniyɛ sigɔ ɗibɛk nɛ pɛgɛdɛ buusɛ nɛɛk Yoosepa kɛnɔ boŋuɗ.

⁴⁶ Nɛɓa Yoosep ɓali abii ɓuwaanoŋk sinɔ tɔɔnuk, nɛ woorku buusɛ Yeeseek laalawutant nɛɛkɛ, nɛ ɓuwu. Nɛ kɛɛ riiɓeer utula sinɔɔnaɓa kɔɔwɛɛ giɗeek takana, nɛ girgiɗki giɗee sinɔ obiiŋɔŋk, nɛ koriiɗ utul nɛɛk.

⁴⁷ Maariyam Mɛgdooluk, a Maariyam sinɛ ɛmɛs Yosaak mermementarɓa soon kɛ kɔɔwɛɛ Yeesee eetik.