Markoos 14 - Kuumeet Sinɔ Tɔɔnuk Ad Majaŋeeroŋk

Giiman Sinɛɓa Ijaagɛɛ Yeeseek

¹ Ɗoŋikɛ sigɔɔgɛ pɛɛyk baŋiya lakɛɓa Ba'aal Ɗoyiɗoŋk a Nasiyoŋk, nɛɓa ɔɗɔwer tapa ŋaadiyɛɛkoŋk, a rɔɔriytaanak higi Muuseek warɛrɓa gopan sinɔ gaamurɗu Yeesee ɗegeej kɛnɔ ɓokoturk.

² Yakanaɓa tonur kɛ, "Kii ariiɗ waawuy Ba'aalik kɛnɔ mokɔɔ joop boŋurku ooyan."

Buke Jarti Omaay Yeesee Reyaaye

³ Saaɓa Yeese arkiɗ Bitaniyaake, woy Simion sinɛɓa lak dɔɔɓɔyk. Nɛɓa ar nyon ɗamatoŋk, nɛɓa widik ɛɛk jarti om son lak sɛɛnik a ɗɔku reyaay sinɔɓa ijaagɛɛ nardoosuk sinɔ obi gati nɛɛkɛŋɔŋk a ar belkaatii sinɔɔnɛ riyɛ kɛ albastirosuk a enyaaŋ. Nɛɓa ɓadɛyi belkaati nɛɛk nɛ gupatɛɛr reyaay nɛɛk Yeeseya ɔɗɔwa.

⁴ Nɛɓa joop sigɛ atu saadik a omoŋ omoŋ ŋadir agut ijaag sini nɛ tonur ɛkanɛɛkɛ gɛŋk kɛ "Sɔɔkɛɛ reyaay sini sɔkɔn agut jikon?

⁵ Reyaay sini gunkɔ ɓalɗiiɗɛɛ gati sinɔɔnɛ obiiŋɔŋk nɛ wori nɛɛk gaɓɛɛ sankaanaka." Nɛɓa laaganyar jarti sinɛ.

⁶ Tonuɓa sɛɛga Yeese kɛ, "Ooɗɛɛr jarti sini agut jikon? Ijaagkɔta any sinɔ mentanŋɔŋk.

⁷ Sankaanak sɛɛg a iinak agut omoŋ ɓɛɛnyɔwɛ gɛɛŋk baŋɛ, nɛ oolɛɛr a kɔnyɛɛr sɛɛg ɔɔtɛ sinaanɛ ɗɛyɛɛrkiŋ, ma eet kɛɛ kɔɔtu laŋiiɗ a iinak agut omoŋ ɓɛɛnyɔwɛ gɛɛŋk baŋɛ.

⁸ Jarti sini ijaagkɔ any sinɛ oolɛkiŋ bukekɔ buusɛ naak reyaaye a in kɛɛ tɔkɔw.

⁹ Eekeer tona kɔnaaŋ, ɗoo baŋɛ sinɛkoy waasɛɛɗɛ Pɛɛni sini Ɓɛlkɛɛstank kɛygun nyon sinɔɔnɛ eetik, any sinɛkɔ ijaagik waawasɛɛkoy a kokoɓkuɗɛɛ sɛɛn."

Doomɛ Yuuda Gaɓɛ Yeeseek

¹⁰ Nomtaanakɛ sigaagɛ aarin a pɛɛyk om, Askorotu Yuudaa kɛɛɓa son lak ɔɗɔweer tapa ŋaadiyɛɛkoŋkuk kɛnɔ gaɓɛ Yeesee.

¹¹ Saaɓa sɛɛk tiyɛrɗi sinik, nɛɓa yaa sɛɛgaŋ. Gugunyargeeɗɓa kuumiyɛɛka kɛ gaɓɛrgeeɗkɔɔ wori. Agut sini warɛɓa sɛŋk ɔɔtɛ sinɔ yaageeɗ kɛnɔ gaɓɛ Yeeseek.

Ɗama Ba'aal Ɗoyiɗoŋk

¹² Ɓeny sinaanɛɓa ŋɔɔlɛrɗi jiŋkuy Ɗoyiɗoŋk, Ba'aale sinaanɛɓa nasiyoŋk ɓeny sinaanɛɓa tuktank wideetarɓa ɛɛk nomtaanak gɛɛnɛ son lak Yeeseek nɛ kɔɔniyar kɛ, "Ɗɛyin ana kɛɛɗii ragadii ɗama ajigeyoŋk Ba'aal Ɗoyiɗoŋkuk eet?"

¹³ Nɛɓa sɛŋk wosɛyɛ nomtaanak gɛɛŋk a pɛɛy kɛ, "In kɛɛɗɛ katamɛya. Kaarkɔɔ laŋirkɔ saadi iɗit sinɔ lak kebet maawoŋk ŋoɗokuk. Nɛ in nomɛɛ sɛɛne.

¹⁴ Nɛ in kɛɛɗɛɛ waa sinaana guugunygeɗik, nɛ tonɛɛ ɗumaata waa kɛ, 'Tonu rɔɔriytaan kɛ, arnɔ eet gode konanoŋk sinɛ gay eetak sinɛkɔɔ ɗamɗii ɗama ajigeyoŋk Ba'aal Ɗoyiɗoŋk a nomtaanak gaaŋkik?'

¹⁵ Yaaŋɛ kɔɔ kɔna sɛŋk pook sinɔ bakaanyŋɔŋk sinɔkan ragadɛ a kan epatɛɛŋɔŋk. Nɛta in ragadɛ saadi."

¹⁶ Ŋaararɓa nomtaanak sigɛ pɛɛyk saadi, nɛ kaar katamɛya nɛ kaar laŋirki oko sinɛkan sɛɛga toniiɗ Yeeseek. Nɛɓa ragadir ɗama ajigeyoŋk Ba'aal Ɗoyiɗoŋk saadi.

¹⁷ Saaɓa kɔjururkuɗuk mɛlɛrkiɓa Yeese a nomtaanak gɛɛŋk sigɛ aarin a pɛɛyk.

¹⁸ Saaɓa atukuɗ ɗamatik, nɛɓa Yeese tonu sɛɛga kɛ, "Eekeer tona kɔnaaŋ, iinakɛ sigeege ɗamikii sisɔ seedik gaɓɛkɔɔtu iɗit omaayiŋ."

¹⁹ Nɛɓa sɛɛk sanɗi agut any sini nɛ tonur a omoŋ omoŋ kɛ, "Anɛ eet yoo?"

²⁰ Nɛɓa Yeese tonu sɛɛga kɛ, "Iinakɛ sigeege aarin a pɛɛyk om, sɛɛn sinɛ gaɓii ari lɔkɔya takana a eet agut omoŋɔŋk.

²¹ Rɛrkɔɔ Tɔn Etoŋk oko sinɛɓa taapɛɛɗɛɛ Wargatɛɛ Waakoyotoŋk agut sɛɛnik. Mayakana durikɔɔ eta sinaanakɔɔ gaɓɛ Tɔɔn Etoŋkuk. Iɗit sinɛ dɔɔs a gunɓa kɛɛ ɓartɛɛt.

Kiiwu A Tuu Sigɔ Geetitank

²² Saaɓa ɗaɗamiiɗik, nɛɓa Yeese ɓɔŋgɔɔrɛ kiiwu nɛɛk nɛ geeti, nɛ ŋapati nɛ gaɓɛ nomtaanaka gɛɛna nɛ tonu sɛɛga kɛ, "Iyook. Ege sini buusɛ naak."

²³ Nɛ ɓɔŋgɔɔrɛ tuu nɛɛk, nɛ pɔɔsɛ Waakoyo nɛ gaɓɛ nomtaanaka gɛɛna, nɛ uter tuu nɛɛk sɛɛg baŋɛ.

²⁴ Nɛɓa tonu sɛɛga kɛ, "Ege sini yɛrom naak kuumeet sinɔ tɔɔnuk, sinɛkɔɔ gupatɗik agut joop sigɔ ɓɔɔkaaŋɔŋk.

²⁵ Eekeer tona kɔnaaŋ, kaakoy tuu kɛkar soortan taamɛ sigi wɛynik mɛlɛɛɗa nɔkoy uteeɗa sinɔ tɔɔnuk Burɛɛ Waakoyotoŋk."

²⁶ Nɛɓa iiliyar iiliya nɛ kɔtɔɔŋɛr kurkuma Dɛbirɛ Jɛytik.

Tonkun Yeese Ɔɗɔɔkɛ Kɛ Kaadɛkɔɔ Sɛɛn Petrosuŋ

²⁷ Tonuɓa Yeese nomtaanaka gɛɛna kɛ, "Taapɛɛɓa Wargatɛɛ Waakoyotoŋk kɛ, 'Malaakoy irtan nɛɛkiŋ, kɛɛtiɗiikoy pony jiŋkuyɛ gɛɛŋkiŋ." Kaadɛɛrkɔɔtu iinak baŋɛ, babadarikɔɔ eeteŋ, ŋɔɗarikɔɔtu nɛɛkɔɔ gonariŋ.

²⁸ Mayakana saakɔɔ ŋaarkiɗa ret walasak baŋiya, ɗoykuunakɔɔ kɔne ɔɗɔɔkɛ Gɛlilaaka."

²⁹ Tonuɓa Petros Yeeseya kɛ, "Kɛygunkɔɔnu kaadɛr joop baŋɛŋ, makɔɔn saak ka kaadɛɛt adaktan."

³⁰ Nɛɓa Yeese tongeeɗ kɛ, "Eekeer tona naaŋ, kaalt sineene ɓenysek kaadin kɔɔtu agut jiit, a inkɔɔ ki ɗooran koogelees agut pɛɛy."

³¹ Nɛɓa Petros tonu a ɓaŋkawuŋ kɛ, "Ɔkɔn kɛ rɛɛrɛkɔɔŋ nɛkɔɔ rɛɛrii a iin agut omoŋ, ma kɔɔnu kaa kaadɛt adaktan." Nɛɓa ɓɔrɛ tonur sigɛ ɔgɔɔk baŋɛ oko sinɛk.

Ɗanɗama Yeese Geetɛsɛmanii

³² Kaarɓa soona riyɛ kɛ Geetɛsɛmaniik, nɛɓaɓɔrɛ Yeese tonu nomtaanaka gɛɛna kɛ, "In beeɗkuunɛ seedi, saa kɛɛɗa ɗanɗamaaɗa soodik."

³³ Kaarɓa a Petros, a Yaykoob, a Yowanis, nɛɓa tuke san jɛt a ɓakɛy.

³⁴ Tonuɓa sɛɛga kɛ, "Sanɗi wɛɛŋa gaanɛ jɛt mɛlɛɛɗa nɔkɔɔ rɛrɗaak, in ɓɛlkuunɛ seedi, a ɓeɗɛɛŋ."

³⁵ Wideɓa sɛɛge ɛɛk a yowɛɛɗ a balaaŋ, nɛ supke tepeen nɛɛkɛ ɗoo nɛ ɗanɗama kɛnɔ ɔkɔn gayɛŋ kɛnɔgun ɗoyiɗ ɔɔtɛ sinɛ rakatɛyoŋk.

³⁶ Tonuɓa kɛ, "Iin Baabɛɛ naak, gayɛ iina any baŋɛ. Widite tuu sini rakatɛyoŋk. Mayakana kat ɓɛɛlɛ oko ɗɛyan naak, ma in ɓɛɛlɛ oko ɗɛyan nook."

³⁷ Saadi baŋiya saaɓa weeriikiɗ son lak nomtaanak gɛɛŋkik, nɛɓa laŋki sɛɛg ma ɗeegararŋ. Nɛɓa tonu Petrosa kɛ, "Iin Simion, ɗeegarin? Kin oolɛ a ɓeɗin a aasi sayiti omoŋ?

³⁸ In ɓeɗɛɛ in ɗanɗamaakɛɛ kɛnɔ mokɔɔ guugunyari paariita. Ɓɛɛlɛr wɛɛŋak tɛkɛɛrɛ, ma sɛŋk bɔɔla buusɛɛŋ."

³⁹ Nɛɓa kɛɛ kɛkar nɛ kɛɛ ɗanɗama a tonu pɛɛni sinɛkɔ jeemɛk.

⁴⁰ Saaɓa weeriikiɗ kɛkar son lak nomtaanak gɛɛŋkik latuɓa ɗoŋ taamɛkɛ nɛɓa laŋki sɛɛg ma ɗeegarariŋ. Nɛɓa kir ɗegerɔɔn kɛ tonurgeeɗ ɛk.

⁴¹ Mɛlkiɓa gut jiiteen nɛɛk son lak sɛɛgik nɛ tonu sɛɛga kɛ, "In ɗegagarari a in imiminyari kɛkar? Wɔɔŋku ɔɔtɛ nɛɛkɛkiŋ. Gaɓɛɛkɔɔ Tɔɔn Etoŋk ariita tikitaanakoŋk.

⁴² In ŋaarɛɛ raŋana koy ŋaarii. Ɔsɔ iɗit sinɛkɔɔtu gaɓɛk wɔɔŋkuŋ."

Gaamur Yeesee Gumaaker Gɛɛnɛk

⁴³ Sisa saaɓa Yeese arkiɗ waasiyɛɛkɛk, nɛɓa mɛlki nomtaanakɛ gɛɛnɛ sigaagɛ aarin a pɛɛyk a omoŋ Yuudaa. Sɛɛnɓa a joop a ɓɔɔkaaŋ sigɔ latu gumboyik a aarɛɛk sigɔɓa sɛɛg wosɛykɛɛ sooy lak ɔɗɔweer tapa ŋaadiyɛɛkoŋk, a rɔɔriytaanak higi Muuseek, a gutarɛyɛɛk.

⁴⁴ Gaɓɛɓa sɛɛga Yuudaa sinɛkɔɔ gaɓɛ Yeeseek yaaŋtan sinɔ kɛ, "Iɗit sinɛ ɗɛyɛɛrik sɛɛn sinɛkɔɔ samɓoyaak, nɛ in gaamɛɛ sɛɛn kɛ ɗɔm nɔ diilɛɛ."

⁴⁵ Sisa kɛɛɓa son lak Yeeseek nɛ samɓoy nɛ tongeeɗ kɛ, "Rɔɔriytaano, digoyna."

⁴⁶ Nɛɓa saadi joop gɛɛnɛk gaamur Yeesee nɛ diilerŋ.

⁴⁷ Joop sigɛɓa ɛtɛtɛɗar saadik koyowukuɓa omaay aarɛ nɛɛk nɛ yawuku weena ijaagen sinɛ ɔɗɔwen tapa ŋaadiyɛɛkoŋkuk.

⁴⁸ Tonuɓa sɛɛga Yeese kɛ, "Kurakɔ a aarɛyɛ a gumboyik kɛnɔtu gaamiir a ito gaamɛɛ iɗit sinɔ sɔɔkɛ ɓɛɛlɛtik?

⁴⁹ Ma kanti kiir gaamit saakan rɔririyiɗa ɓɛɛnyɔwɛɛkɛ gɛɛnɛ baŋɛ Godeey sinaanɛ Geetitank, mayakana nɔ ɓɛɛlɛɛɗ sinik kɛnɔ dusanɛɛ sinɛɓa taapɛɛ Wargatɛɛ Waakoyotoŋkuk."

⁵⁰ Ŋɔɗarɓa nomtaanak gɛɛnɛ baŋɛ nɛ gonarŋ.

⁵¹ Lakɛɓa ateeny sinɔɓa lolowu abii sinɔ dɔltank dakɛɗak, nɛɓa nonom Yeeseye. Nɛ saaɓa gaamurɗu joop gɛɛnɛkik,

⁵² nɛɓa oru abii nɛɛk nɛ gon konaan.

Wideerɛ Yeesee Joopa Sigɔɔga Gaɓɛr Woorank

⁵³ Diilerɓa Yeese waa ɔɗɔwen tapa ŋaadiyɛɛkoŋkuk, tolɗiiɓa saadi ɔɗɔwer tapa ŋaadiyɛɛkoŋk, a gutarɛyɛ, a rɔɔriytaanak higi Muuseek agut omoŋ.

⁵⁴ Nonomɗuɓa Petros a yowɛɛɗiŋ mɛlɛɛɗa keera sinaana ɔɗɔwen tapa ŋaadiyɛɛkoŋkuk. Nɛɓa beebeɗar saadi a koortaanak a ɗiiɗiirar maɗ.

⁵⁵ Ɔɗɔweer tapa ŋaadiyɛɛkoŋk a joop sigɔ gaɓɛr woorank baŋɛ warɛrɓa Yeeseya iɗit sinɔ gun sɛɛga waasɛ eekeer gɛɛŋk kɛnɔ in arɛɛ a ɓokotɛɛk. Mayakanaɓa kir laŋiiɗ.

⁵⁶ Joop a ɓɔɔkaaŋ waasɛrɗiɓa pɛɛni nyonoŋk, yakanaɓa pɛɛni nɛŋk ki ɓɛɛlɛt a omoŋ.

⁵⁷ Ŋaararɓa ɔgɔɔk raŋana nɛ waasɛrɗi nyon kɛ,

⁵⁸ "Tiyiikan a tonu kɛ, 'Aalakɔɔ Gode sini Geetitank sinikan kɛnyɛɛ ariitik, nɛkɔɔ kɛnya om ɗoŋikɛ sigɔɔgɛ jiitik sinɔkan moko kɛnyɛɛ ariitik.' "

⁵⁹ Ɓɛɛlɛɓa oko sinik nɛɓa waasiyɛ gɛŋk kir ɓɛɛlɛt a omoŋ.

⁶⁰ Nɛɓa ɔɗɔwen sinɛ tapa ŋaadiyɛɛkoŋk ŋaar raŋana nɛ kɔɔniy Yeesee kɛ, "Kɛɛ any sinɔ jumurun anta sineena waasɛr joop sigik baŋɛk? Tonur joop sigi eekeer?"

⁶¹ Yakanaɓa Yeese dakɛ kɛ many kɛɛ any sinɔɓa jumurk ara. Kɔɔniyɓa sɛɛn ɔɗɔwen sinɛ tapa ŋaadiyɛɛkoŋk kɛ, "Iin Keresee, Tɔɔn Waakoyo sinɛ Geetitank?"

⁶² Nɛɓa Yeese jumurgeeɗ kɛ, "Ii, eet Sɛɛn. Dɛnɛɛrkoy Tɔɔn Etoŋk a dokuɗe ɗiɗikakɛ Waakoyo sinɛ lak ɓaŋkawukaak ɛkoy dɛnɛɛr saakoy mɛlkiɗ dari a ar gumoyk."

⁶³ Nɛɓa ɔɗɔwen sinɛ tapa ŋaadiyɛɛkoŋk ŋadiŋ. Nɛ pɔɔpɔk abii nɛɛk, nɛ tonu sɛɛga kɛ, "Ɗɛyɛ tina sisɔ waasiyɛ ɔgɔ kɛ jikonak?

⁶⁴ Tiyɛɛrkɔ saa nyɔɔnɗu Waakoyokuŋ. Gayi kɔna a jikon?" Nɛɓa tonur sɛɛg baŋɛ kɛ, "Dɔɔs a rɛrŋ!"

⁶⁵ Topɛpɛyargeeɗɓa ɔgɔɔk nɛ miinyer taamɛ gɛɛŋk abiye nɛ bibitar a tonurgeeɗ kɛ, "Ɔkɔnɓɔ iin iɗit pɛrkaakoŋk, ɗegeritɔ iɗit sinɛni bitek." Diilerɓa a ɔgɔɔk papaŋariŋ.

Kaadɛ Petros Yeesee

⁶⁶ Arɓa Petros godeey ɔɗɔwen sinɛ tapa ŋaadiyɛɛkoŋkuk goysɔ ɗeek keer nɛɛkɛ tak. Nɛɓa mɛlki peet om sinɔ ijaagen ɔɗɔwen sinɛ tapa ŋaadiyɛɛkoŋkuk.

⁶⁷ Nɛɓa dɛnɛ Petros a ɗiiɗir maɗ nɛ mermen nɛ tongeeɗ kɛ, "Iin kɔɓɔrɛ a Yeesee kɔ Naajreetik."

⁶⁸ Nɛɓa sɛŋk kaadɛ kɛ, "Kaa ɗegerɔɔn any sinɛ tonunk." Tonuɓa sini nɛ ŋaariri tugaata. Nɛ sisa ɗooru koogele.

⁶⁹ Nɛɓa peet sinɛ dɛnɛ Petros nɛ tonu joopa sigaaga ɛtɛtɛɗar saadik kɛ, "Ege iɗit sini tekaan nɛŋk."

⁷⁰ Nɛɓa sɛŋk kaadɛ kɛkar. Nɛ beeɗ a balaaŋ nɛ joop sigɛɓa ɛtɛtɛɗar saadik a omoŋ omoŋ tonur Petrosa kɛ, "Agut sinɔ iin iɗit Gɛlilaak, iin tekaan nɛŋk eekeerɛ."

⁷¹ Nɛɓa sɛŋk tonu a lamɛ ɛɛk nɛɛk a wogoyɛ kɛ, "Kaa ɗegerɔɔn iɗit sinɛ toniirik."

⁷² Nɛ sisa ɗooru koogele gut pɛɛyeen nɛɛk. Nɛɓa Petros koɓuku pɛɛni sinɛɓa tongeeɗ Yeese kɛ, "A in koogelees ki ɗooran agut pɛɛy kaadin kɔɔtu agut jiit." Nɛɓa kuɗe jɛt.