Markoos 13 - Kuumeet Sinɔ Tɔɔnuk Ad Majaŋeeroŋk

Yaaŋtan Eme Sinɛkoy Pediyaak

¹ Saaɓa Yeese ŋaarkiɗ Godeey sinaanɛ Geetitank walsak, nɛɓa nomtaanakɛ gɛɛnɛ omaay tongeeɗ kɛ, "Rɔɔriytaano, dɛnko Gode sini Geetitank. Lak godeyik sigɔɓa kɛnyɛ a mentaana jɛtik a giɗeek sigɔ boobɛrŋɔŋk."

² Nɛɓa Yeese jumurgeeɗ kɛ, "Dɛnin godeyik sigi boobɛrŋɔŋkuŋ? Godeyik sigi baŋɛ aalɗiikoyŋ. Giɗeek sigi baŋɛ ɗiirtarkoy ɗooka. Ki dakɛ sinɔkoy giɗe kirɗi aalɗit omaay omalte raŋk."

³ Saadi baŋiya beeberɓa Yeese kurkum Dɛbirɛ Jɛytik raŋk sinɛ ar Godey sinaanɛ Geetitank taamɛkɛk. Nɛɓa Petros a Yaykoob, a Yowanis, a Indiriyaas wideetar ɛɛk son lak sɛɛnik sɛɛg mowan nɛɓa kɔɔniyar kɛ,

⁴ "Tonute tina any sini ɓɛɛlɛkoy okoɗ? Saakoy wɔɔŋkuɗuk yaaŋtan nɛɛk jikon?"

⁵ Nɛɓa Yeese jumur sɛɛga kɛ, "In koorɛɛ ɛɛk kɛnɔ mokoy kɔnu ari iɗit omaay a badɛɛriŋ.

⁶ Mɛlɛrkikoy joop a ɓɔɔkaaŋ tiriyaakɛ gaanɛ kɛ, 'Eet Keresee!' Arirkoy joop a ɓɔɔkaaŋ a badɛrŋ.

⁷ Saakoy tiyɛrɗɔ kaarin a ɗooran kaarinɔŋkuk, kat ŋaatɛɛ. Ege sini gidii nɔ ɓɛɛlɛɛɗik, yakana in ki gayɛ pedi nɛɛkɛk.

⁸ Ŋaararkoy joop joope raŋk a maŋgisti maŋgistii raŋk nɛ kaararŋ. Lakɛkoy ŋaawu a yike ɗookoŋk nyonitaakɛ sigɔɔgɛ ɓɛɛlɛr kundiyaakɛk. Ege sini baŋɛ rakatɛ tuktan nɛɛk sinɔ ito suusuwi amɗ ɓartɛɛtoŋk.

⁹ "In koorɛɛ ɛɛk. Gaɓɛrkoy kɔnu joop pirdiya. Ɗiŋerkoy kɔnu sinɔɔnɛ godeyi tolɛɛɗoŋk Ayuuduk. Ɛtɛɛrkoy pirdiya taamɛkɛ ɗumaag ɗookak a suumiyɛɛkoŋk agut eet kɛnɔkoy dakɛɛr a misikiriyɛ.

¹⁰ Ɗɛyɛ jeemɛ a waasɛ Pɛɛni sini Ɓɛlkɛɛstank ɗoo baŋɛ.

¹¹ Saakoy kɔnu gaɓerɗi joop pirdiyak, kat ɓakɛyɗiikari agut any sinɛkɔɔ toniirik. In koy tonɛɛ any sinɛkoy kɔna gaɓɛ Waakoyotuk. Mokokoy tonɗiikari iinak, makoy tonɗi Wɛɛŋa sigɔ Geetitaanakik.

¹² "Gaɓɛkoy iɗit manya reta, gaɓɛkoy iɗit tɔɔn nɛɛk reta. Kirkoy tɔɔmɔk tiiɗit ɛpɛnaakaka a ɛmɛsaakaka arirkoy a ɓokootɛ sɛɛgiŋ.

¹³ Ɓooyurkoy kɔnu joop baŋɛ agut sinɔ nomɛrɗɔ eetik. Mayakana iɗit sinɛkoy nomɛ eete pediyaak bɔdɛkoyŋ.

¹⁴ "Oko sinɛɓa toniiɗ iɗit pɛrkaakoŋk Danielk, saakoyk dɛnɛɛrkoy any sinɔ ŋɛɛwɛnŋɔŋk sinɔ ɓooyu Waakoyotuk a ɛtɛ nyon sinɔɔnɛ kir ɗegerkak. In koɓuku sini iɗit sinɛ ambabɗik. Saakoyk joop sigɛ atu ɗook Yuudaak, inkoy gonar kurkumɛɛka.

¹⁵ Iɗit sinɔkoy ar godeey ajeerantik katkoy worworiiki kɛnɔ boŋu ɓolaatuuruwɛ gɛɛŋk godeey tak.

¹⁶ Iɗit sinɔkoy ar taawoyk, katkoy weeriiki baŋiya kɛnɔ boŋu abii nɛɛk.

¹⁷ Ɗoŋikɛ sigaagɛ duri koy joopa sigaaga laki amtunɛk a joopa sigaaga ŋeŋeetunuk.

¹⁸ In ɗanɗamaakɛ kɛnɔ mokoy togon noŋk ar baŋgii.

¹⁹ Saakoyk lakɛkoy rakatɛ sinɔ obiiŋɔŋk, sinɔ inɓa kɛɛ a tukiɗi saaɓa riiɓeeɗ Waakoyot ɗook nɔ mɛlɛɛɗa ɓɛɛnyɔwasek. Ɛkoy ɓɔrɛ ɔɗɔɔka kɛɛ sinɔ ito sɛɛnik.

²⁰ Ɔkɔnkoy Waakoyot ki ariiɗ ɗoŋi sigɛ a dinyatuŋ, gunkoy kɛɛ iɗit sinɔ bɔdɛk ara. Yakanakoy dinyatu ɗoŋi sigɛŋ agut joop sigɛɓa daamɛɛ sɛɛgik.

²¹ Saakoyk ɔkɔnkoy kɔna tonu iɗit omaay kɛ, 'Isi Keresee seedi!', maŋk 'Ɔsɔ sooyk!', kat ŋaadɛɛ.

²² Agut sinɔ ŋaararkikoy Kereseyak sigɔ nyonkaanakik a joop pɛrkaakoŋk sigɔ nyonkaanakik. Ɔkɔn gayɛ sɛɛgaŋ arir a tikiɗi joop sigɛɓa daamɛɛkiŋ, ijaagir sɔɔriyɛ a ola sigɔ reemɗigeeɗ ɓayaayk sigɔ boobɛrŋɔŋk.

²³ In koorɛɛ ɛɛk, tonaɓa kɔna any baŋɛ jeemɛŋ.

²⁴ "Saakoyk ɗoŋikɛ sigaagɛkoy rakatɛyoŋk baŋiya, kɔjurkukoy waawuyuŋ, kikoy ɛyɛn gaamit pɛɗɛrka.

²⁵ Ɗiirarkikoy maryɔ dari, yikiɗiikoy ɓɔrɛ ɓaŋkawkaata sigɛ atu darikiŋ.

²⁶ "Saakoyk dɛnɛɛkoy Tɔɔn Etoŋk saakoy mɛlkiɗi gumoy ɓaŋkawukaat a eemɛyɔɔn sinɔɔnɛ obiiŋɔŋkuk.

²⁷ Wosɛykikoy wosɛytaanak gɛɛŋk, nɛkoy tolɛr joop sigɛɓa daamɛɛ sɛɛg sɛɛnak gɔɔteerɛ sigeege aŋank a tukiɗi kɛntɛɛ ɗookoŋk nɔ mɛlɛɛɗa kɛntɛya dariyoŋk.

²⁸ "In kɔna dakɛ rɔmɛ kɛɛt bɛlɛɛsik a rɔɔriyɔn. Saa beetiyerɗi rɛkɛnak gɛɛnɛkik ɛ ligimerɗi peeŋɔk gɛɛnɛkik, nɛ sisa ɗegerari kɛ wɔɔŋku baŋgi.

²⁹ Nɛ saakoy ɓɔrɛ dɛnɛrɗɔ ola sigi baŋɛk, in ɗegerɛ kɛ wɔɔŋku jɛt a ar tugaat ɔɔtɛ sinɛkoy mɛlkiɗ Tɔn Etoŋkuk.

³⁰ Eekeer tona kɔnaaŋ, nɔkoy dusanɛɛɗɛ ola sigi baŋɛk joop sigi ɓɛɛlɛr sisɔk kirkoy badɛ baŋɛ.

³¹ Ɗoyurkoy ɗook a dariŋ, mayakana kikoy ɗoyi pɛɛni Naakɛ adaktan.

³² "Kɛɛ iɗit sinɔkoy ɗeger ɓɛɛnyɔ a sayiti sinɛkoyk, kɛygun wosɛytaanak dariyoŋk kɛygun Tɔɔn nɛɛk. Mayakana, ɗegeerakoy Ɛpɛn dakɛɗa.

³³ In koorɛɛ ɛɛk, in ɓaŋkaawurɛɛ, agut sinɔ kiir ɗegerɔɔn ɔɔtɛ nɛɛk kɛ okoɗkoy.

³⁴ Gayi sini a iɗit sinɔkan ŋɔr gode nɛɛk nɛ ŋaar ɗooka sinɔɔna yowɛɛɗŋɔŋk. Kaasɛ ijaageera gɛɛna a omoŋ omoŋ ijaagaak sigɔ ɓɛɛlɛr kundiyaakɛk, tonu koortaana kɛnɔ koorii a ɓaŋkawuŋ.

³⁵ Agut sini kiir ɗegerɔɔn ɔɔtɛ sinɛkoy mɛlkiɗ ɗuma godeyak nɛ in koorɛɛ ɛɛk, ka ɗɛɛŋ mɛlkikoy ajigeya, maŋk kaalt kɔɔr, maŋk ɔɔtɛ sineene ɗooriiɗ kogeleesik, maŋk romiɗ kuleet.

³⁶ In ɓaŋkaawurɛɛ kɛnɔ mokoy mɛlki a gorgor nɔkoy kɔnu laŋki ma ɗeegarariŋ.

³⁷ Oko sinɛkɔ kɔna toniiɗaak, tona ɓɔrɛ joopa ɔgɔɔka baŋɛ kɛ in ɓaŋkaawurɛɛ."