Markoos 11 - Kuumeet Sinɔ Tɔɔnuk Ad Majaŋeeroŋk

Mɛlɛ Yeese Yorsaleema Eemɛyɔɔn

¹ Saaɓa Yeese a nomtaanak gɛɛŋk woontukuɗ Yorsaleemak, nɛɓa mɛlɛr mɛndɛra Beetɛ paagek a Bitaniyaak sigaaga atu kurkum Dɛbirɛ Jɛytik. Nɛɓa Yeese wosɛyɛ nomtaanak gɛɛŋk a pɛɛy,

² tonuɓa sɛɛga kɛ, "In ɗoykuunɛ mɛndɛra sinɔɔna ar kɔne ɔɗɔɔkɛk. Nɛ saakɔɔ mɛlɛrɗɔ saanak laŋirkɔkɔɔ tɔɔn kuroyoŋk sinɔ in kɛɛ iɗit sinɔ dokiiɗ ɗeek.

³ Nɛ ɔkɔn lakɛ iɗit sinɔ tonu kɔna any omoŋɔŋkuŋ, nɛ in tonguɗɛɛ kɛ, 'Agut sinɔ ɗɛyɛɛɗ Suumiik, nɛkɔɔ jumurku kɛ gonyuŋ.' "

⁴ Nɛɓa sɛɛk kaar nɛ kaar laŋirki tɔɔn sinɛ kuroyoŋk gopɛ kɛntɛɛ, a ar tuseeɗ godeey tugaat walas. Nɛɓa kaar woorurkuŋ.

⁵ Nɛ joop sigɛɓa ɛtɛtɛɗar saadik a omoŋ kɔɔniyarɓa sɛɛg kɛ, "Woorurkɔ tɔɔn sini kuroyoŋk agut jikon?"

⁶ Nɛɓa sɛɛk tonur sɛɛga any sinɛɓa sɛɛga tonu Yeeseek, nɛɓa sɛɛk dakɛr kɛ many.

⁷ Nɛɓa nomtaanak gɛɛnɛ ɗɔkarki tɔɔn sinɛ kuroyoŋkuŋ nɛ epatar abiyak gɛŋk toomoy sinaanɛ kuroyoŋk raŋk, nɛ dokiiɗiɗe Yeese.

⁸ Epatarɓa joop a ɓɔɔkaaŋ abiyak gɛŋk gopan takan, ma ɔgɔɔk kɛtɛrki rɛkɛnak kɛɛnoŋk nɛ epatar sɛɛg gopan takan.

⁹ Ooyɛrɓa joop sigɛɓa ɗeyir sɛɛne ɔɗɔɔkɛk a sigɛɓa nomɛrɗi baŋik kɛ, "In dakɛr pɔɔsiyɛɛk Waakoyota! Iɗit sinɔ kus tiriyaakɛ Suumiyoŋkuk geetitan!

¹⁰ Burɛ ɔrɛ naŋk Daawitik sinɛkɔɔ mɛlkik geetitan! In dakɛr pɔɔsiyɛɛk Waakoyota sinaana ar darik!"

¹¹ Saaɓa Yeese mɛlɛɛɗ Yorsaleemak, nɛɓa guuguny Godeya sinaana Geetitank. Nɛɓa mermen ola sigɛ atukuɗ tookɛɛtak baŋɛ. Agut sinɔɓa kɔjururkuɗŋɔŋk, ŋaararkiɓa a nomtaanak gɛɛŋk sigɛ aarin a pɛɛyk Yorsaleeme nɛ kaar Bitaniyaaka.

Kɛɛt Bɛlɛɛsik Sinɔ Kiiɗɛ Taamɛk

¹² Saaɓa ŋaararkiɗ Bitaniyaake alɛ nɛɛkɛ gibik, nɛɓa Yeese lak ŋaawu.

¹³ Nɛɓa dɛnɛɛr kɛɛt bɛlɛɛsik sinɔ lak peeŋɔkuk a yowɛɛɗiŋ nɛ koɓu kɛ kaɗɛɛŋ laŋiiɗɛɛ taamɛŋ, nɛ kɔrurgeeɗiŋ. Yakana kɛɛ any sinɔɓa laŋiɗik. Lakɓa peeŋɔk dakɛɗa, agut sinɔ mokoɓa ɛyɛn sinɔ aaɗorarɗi bɛlɛɛsak.

¹⁴ Nɛɓa Yeese tonu kɛɛta sinaana bɛlɛɛsik kɛ, "A tukiɗi sisɔ kat lakɛ iɗit sinɔkoyne ɗam taamɛk nɔkoy nɔkoyk." Nɛɓa tiyɛr nomtaanak gɛɛnɛ saa toniiɗ any sinikiŋ.

Ɔɔyɛ Yeese Joop Sigɔ Nagadɗi Godeey Sinaanɛ Geetitank

¹⁵ Saaɓa mɛlɛrɗi Yorsaleemak, nɛɓa Yeese guuguny Godeya sinaana Geetitank nɛ ɔɔyku joop sigɔ ɓalɛɛ sɛɛge ɓolaatuuruwɛ ɛ ɓalɗi ɓolaatuuruwɛɛkɛk baŋɛ. Kɛɛtɛɓa tarbesɛyɛ joop sigɔ wonooyar komoyeer woriyoŋkuk a ola beeɗitoŋk joop sigɔ ɓalɗi kulɓeerakɛk.

¹⁶ Kiɓa pɛgɛdɛɛt a ɗoyu iɗit omaay sinaanɛ Gode sinɛ Geetitank a diile any omoŋ.

¹⁷ Rɔɔriyɓa sɛɛg kɛ, "Taapɛɛɓa Wargatɛɛ Waakoyotoŋk kɛ, 'Riyɛ gode naak kɛ Gode ɗanɗamɔɔnoŋk joop sigɛ ɓɔɔkaak.' Yakana, sɔɔk aiir a nyon dugeeɗoŋk agaltiiroŋk."

¹⁸ Tiyɛrɓa ɔɗɔwer tapa ŋaadiyɛɛkoŋk a rɔɔriytaanak higi Muuseek saa toniiɗ sinikiŋ, nɛɓa warɛrgeeɗ gopan sinɔ ɓokoturɗuŋɔŋk. Yakanaɓa ɓurerŋ, agut sinɔɓa reemɗiɗ ɓayɛtun joop sigɛ ɓɔɔkaak agut rɔɔriyɔn nɛɛkik.

¹⁹ Saaɓa kɔjururkuɗuk, nɛɓa Yeese a nomtaanak gɛɛŋk ŋaararki katamɛɛ nɛɛkɛŋ.

Paalor Kɛɛt Sinɛɓa Bɛlɛɛsik

²⁰ Saaɓa ɗoyurɗu gopɛ sinaanɛ gibik, nɛɓa dɛnɛr kɛɛt sinɛɓa bɛlɛɛsik a kan paalor a tiltilɛ gɛɛŋk.

²¹ Nɛɓa Petros koɓuku any sinɛkank nɛ tonu Yeeseya kɛ, "Rɔɔriytaano, apaalorkɔre bɛlɛɛs kɔ lamunkuŋ."

²² Nɛɓa Yeese tonu sɛɛga kɛ, "In ŋaadiɗiikɛ Waakoyote.

²³ Eekeer tona kɔnaaŋ. Kɛygun wooɗ oolɛ a tonu kurkuma sineena kɛ, 'Ŋaari seedi nɔ orun ɛɛk gɔrɔwa sinɔɔna obiiŋɔŋk.' Nɛ ɔkɔn ŋaadi ɛ kiiɗɛ koɓiɗak a pɛɛy ɓayaayi nɛɛkɛkiŋ ijaaggeeɗkɔɔ Waakoyotuŋ.

²⁴ Agut sini any sinɛ kalɛyiir ɗanɗamɔɔnuk, in ŋaadɛɛ kɛ laŋiir kɔɔŋ. Any sinɛ kalɛyiirik baŋɛ, gaɓɛɛkɔɔ kɔnaaŋ.

²⁵ Saa ɛtɛrɗɔ ɗanɗamɔɔnaak, ɔkɔn lakin any sinɔkɔ ŋadiɗin eta omaltaakiŋ, nɛ toŋoɗar sɛɛne. Ɔkɔnkɔɔ arin oko sinikiŋ, ŋɔɗurkɔɔne tikiyɛ goŋk Ɓaaɓa sinɛ ar darikiŋ."

²⁶ ["Mayakana, ɔkɔnkɔɔ kiitaarɔ ŋɔɗit joopeŋ, nɛkɔɔ kɔne kiir toŋoɗ tikiyɛ goŋk Ɓaaɓa noŋk sinɛ ar darik."]

Kɔɔniyɔn Agut Ɓaŋkawuka Yeeseek

²⁷ Mɛlɛrkiɓa Yeese a nomtaanak gɛɛŋk Yorsaleema kɛkar. Saaɓa Yeese ŋawuwurɗu Godeey sinaanɛ Geetitank takik, ɔɗɔweer tapa ŋaadiyɛɛkoŋk, a rɔɔriytaanak higi Muuseek, a gutarɛyɛ kurakɓa son lak sɛɛnik.

²⁸ Nɛ kɔɔniyar kɛ, "Ijaagin ola sigi ɓaŋkawukaat jikoŋk? Wooɗ sinɛkanna gaɓɛ ɓaŋkawuka sinɛ ijaagiiɗin ola sigik?"

²⁹ Nɛɓa Yeese jumur sɛɛga kɛ, "Kɔɔniya ɓɔra kɔnu kɔɔniyɔɔn a omoŋ. Nɛ ɔkɔn kɔɔta jumurariŋ, nɛ kɔɔɓɔra kɔna tona kɛ ijaaga ola sigi ɓaŋkawukaat jikoŋkuŋ.

³⁰ Aadi sinɛɓa aadiɗiiɗ Yowanisik kusɓa eet? Dari maŋk joope?

³¹ Nɛɓa sɛɛk tonɗi ɛkanɛɛkɛ gɛŋk kɛ, "Ɔkɔnkɔɔ tonii kɛ, 'Dariŋ', nɛkɔɔ tina tonu kɛ, 'Nɛ kiir ŋaadit agut jikon?'

³² Ma ɔkɔnkɔɔ tonii kɛ, 'Joopeŋ', nɛ ɓurii joop sigɛ ɓɔɔkaak, agut sinɔ ŋaadirɗi joop baŋɛ Yowanis kɛ iɗit pɛrkaakoŋkuk."

³³ Agut sini jumurarɓa Yeeseya kɛ, "Kii ɗegerɔɔn." Nɛɓa sɛŋk tonu sɛɛga kɛ, "Kaa ɓɔra kɔna toniiɗ kɛ ijaaga ola sigi ɓaŋkawukaat jikoŋk."