Markoos 10 - Kuumeet Sinɔ Tɔɔnuk Ad Majaŋeeroŋk

Ki Gayɛ A Ŋɔŋɔɗi Iɗit A Jarti Nɛɛkiŋ

¹ Ŋaarɓa Yeese saadi nɛ kɛɛ ɗooka Yuudaak a ɗɛɛgasɔ Yordanoosuk. Nɛɓa tolɗiitar joop a ɓɔɔkaaŋ son lak sɛɛnik kɛkar, nɛ rɔɔriy sɛɛg oko sinɛkan goorɛk.

² Wideetarɓa ɛɛk joop Paarisik son lak sɛɛnik, nɛɓa ɗɛyɛr paariita nɛ kɔɔniyar kɛ, "Pɛgɛdɛɛɓa higii kɛnɔ pakakati iɗit a jarti nɛɛkiŋ?"

³ Nɛɓa Yeese tonu sɛɛga kɛ, "Tonuɓa kɔna Muuse agut any sini ɛk?"

⁴ Nɛɓa sɛɛk tonurgeeɗ kɛ, "Pɛgɛdɛɓa Muuse kɛnɔ gaɓɛɛ wargatɛ pakakatoŋk nɔ pakakatiikɛŋ."

⁵ Nɛɓa Yeese jumur sɛɛga kɛ, "Dɛnɛɓa Muuse ɓaŋkawuka ɓayɛtun goŋkuk nɔɓa pɛgɛdɛɛɗ sikiyɛ sigik."

⁶ Mayakana riiɓeɓa Waakoyot tuki nɛɛkɛ mooy a peet.'

⁷ 'Agut sini ŋɔrku iɗit ɛpɛn a ɛmɛs, nɛ lotɛr ɛɛk a jarti nɛɛk,

⁸ sɛɛg ɛɛk omoŋ a getu pɛɛy.' Sɛɛg ɛɛk omoŋ seedi son, ma moko pɛɛy.

⁹ Agut sini kat pakati iɗit any sinɔkan lotɛ Waakoyotuk."

¹⁰ Saaɓa weerikiɗ waak, nɛɓa nomtaana gɛɛnɛ kɔɔniyar Yeesee kɛkar agut any sini.

¹¹ Nɛɓa sɛŋk jumur sɛɛga kɛ, "Iɗit sinɔ pakakati a jarti nɛɛk, nɛ boŋu jarti omk ibiɗikɔ jartii nɛɛkɛ raŋk.

¹² Maɓɔrɛ jarti sinɔ pakakati a baabuy nɛɛk, nɛ waawu baabuya omaltaak nɛkɔ ibiɗiiŋ."

Geeti Yeese Tɔɔmɔk

¹³ Ɗɔkarkiɓa joop tɔɔmɔk son lak Yeeseek kɛnɔ riiɓe sɛɛge ari raŋk, nɛɓa nomtaanak gɛɛnɛ goopar joop sigɛ ɗɔkarki tɔɔmɔkkuŋ.

¹⁴ Yakanaɓa Yeese dɛnɛ sini, nɛ goop nomtaanak gɛɛŋk, nɛ tonu sɛɛga kɛ, "In kurak tɔɔmɔk son lak eetik. Kat ɓaarɗɛ sɛɛg, agut sinɔ ege Burɛ Waakoyotoŋk joop sigɔ rikiter ɛɛk oko sinikik.

¹⁵ Eekeer tona kɔnaaŋ, iɗit sinɔ ki boŋiɗ Burɛ Waakoyotoŋk okokɔ toomoŋk kikoy guugunyɔn saana adaktan."

¹⁶ Nɛɓa gaamku tɔɔmɔk gɛɛŋk kokoma nɛ riiɓe sɛɛge ari nɛɛk raŋk nɛ geeti sɛɛgiŋ.

Iɗit Sinɔ Lak Worik

¹⁷ Saaɓa Yeese tukeeɗ ŋaarink, nɛɓa reerki iɗit om son lak sɛɛnik, nɛ ɛtɛ korontunɛ sɛɛne taamɛkɛ, nɛ kɔɔniy sɛɛn kɛ, "Iin rɔɔriytan sinɛ mentank, ɗɛyɛta a ijaaga jikon nɔkoy laŋiiɗa wɛɛŋa sigɛkoy nokoy nɔkoyk?"

¹⁸ Nɛɓa Yeese tongeeɗ kɛ, "Kɔɔniyinte any sinɔ mentanŋɔŋk agut jikon? Mentan Waakoyo sinɛ omoŋɔŋk dakɛɗa.

¹⁹ Yakana jumurakɔɔna kɔɔniyɔn nookkuŋ. Ɗegerin sekiyɛ gɛɛŋkiŋ. Sɛɛg 'Kat ɓokotɗiikin, kat ibiɗiikin, kat agalɗikin, kat waasin nyon, kat raamɗiikin, eemɛy ɓaaɓa a ŋaaŋa."'

²⁰ Nɛɓa iɗit sinɛ tongeeɗ kɛ, "Rɔɔriytaano, Kooraɓa sekiyɛ sigi baŋɛ a tukiɗi tɔɔnikent naakɛk."

²¹ Nɛɓa mermen Yeese nɛ poruŋ nɛ tongeeɗ kɛ, "Ŋayɗiikanne any a omoŋ. Mak nɔ kɛɛɗin ɓalɗiikin ant sinaanɛ lakink baŋɛ nɔ gaɓun wori nɛɛk sankaanaka. Laŋinkoy wori sinɔɓa tolɛɛŋɔŋk dari. Nɛ saadi baŋiya kusunte nomkun."

²² Saaɓa iɗit sinɛ tiyɛɗ any sinik, nɛɓa sanɗi jɛt, nɛɓa ŋaar, ma ŋadiŋ agut sinɔɓa lakiɗ wori a obiiŋɔŋk.

²³ Nɛɓa Yeese kolɛɛnyɛ nɛ mermena nɛ tonu nomtaanaka gɛɛna kɛ, "Morɛ ɓaŋkawu guugunyɔn Burɛya Waakoyotoŋk joopa sigɔɔga latu worikiŋ."

²⁴ Nɛɓa nomtaanak gɛɛnɛ reemɗi ɓayɛtun gɛŋk agut toni sini. Nɛɓa Yeese jumur sɛɛga kɛ, "Iinak tɔɔmɔk, morɛ ɓaŋkawu guugunyɔn Burɛya Waakoyotoŋkuŋ.

²⁵ Ɔɔtɛ sɔgun guugunyɗu iɗit sinɔ lak worik Burɛya Waakoyotoŋkuk, bala sinɔ guugunyɗu taga sinɔɔnɛ tool marpeyoŋkuk."

²⁶ Nɛɓa nomtaanak gɛɛnɛ reemɗi ɓayɛtun gɛŋk jɛt nɛ tonur ɛkanɛɛkɛ gɛŋk kɛ, "Anɛ oolɛ akoy bɔdɛ wooɗ?"

²⁷ Mermenaɓa Yeese son lak sɛɛgik nɛ tonu sɛɛga kɛ, "Ki gayɛ sini sooy lak iɗitik eekeerɛ, mayakana gayɛ any baŋɛ sooy lak Waakoyok. Gayɛ Waakoyota any baŋɛ."

²⁸ Nɛɓa Petros tongeeɗ kɛ, "Ŋɔrkiikɔ any baŋɛ kɛnɔ nomii iine."

²⁹ Nɛɓa Yeese jumur kɛ, "Eekeer tona kɔnaaŋ, iɗit sinɔ ŋɔrku gode maŋk manyaakak maŋk manyaakak sigɛ peetakik maŋk ɛmɛs maŋk ɛpɛn maŋk tɔɔmɔk maŋk taawa nɛɛk, agut eet a Pɛɛni sinɔ Ɓɛlkɛɛstank,

³⁰ eme sineene a epapay agut omoŋ godeyik, a manyaak, a manyaakak sigɛ peetakik a sigɛ moojakik, a ɛmɛsaakak, a tɔɔmɔk, a taawa nɛɛk laŋ sisɔ a suɗaktaanak ɗibɛ. Maɓɔrɛ ɗook sinaanɛkoy mɛlkik laŋkoy wɛɛŋa sigɛkoy nokoy nɔkoyk.

³¹ Mayakana joop a ɓɔɔkaaŋ sigɛ ɔɗɔweerk baŋiyeerkoy, ma joop sigɛ baŋiyeerk ɔɗɔweer koy."

Tonu Yeese Rer Nɛɛk Kɛkar

³² Saaɓa atukuɗ gopɛ sinɔɔnɛ kɛɛɗɛɛ Yorsaleemak, nɛɓa Yeese ŋawite sɛɛge ɔɗɔɔkɛ. Nɛɓa nomtaanak gɛɛnɛ reemɗi ɓayɛtun gɛŋkiŋ ɓuriiɓa joop sigɛɓa nomɛrɗi baŋikiŋ. Nɛɓa widiki nomtaanak gɛɛŋk sigɛ aarin a pɛɛyk son lak sɛɛnik, nɛ sɛɛga yaaŋɛ kɛkar any sinɛkɔɔ laŋki Yorsaleemek.

³³ Tonuɓa sɛɛga kɛ, "Ŋaarii sisɔ Yorsaleema. Gaɓɛɛkɔɔ Tɔɔn Etoŋk ɔɗɔweera tapa ŋaadiyɛɛkoŋk a rɔɔriytaanaka higi Muuseek. Nɛkɔɔ sɛɛk pɛrɛdɛrɗi rer, gaɓɛɛkɔɔ ɓɔrɛ joopa sigaaga moko Ayuuduk.

³⁴ Nɛkɔɔ sɛɛk rɛɛsɛrgeeɗiŋ, topɛpɛyargeeɗkɔɔŋ, ɗiŋerkɔɔ mermeɗ, ɓokoturkɔɔŋ, mayakana ŋaarkikɔɔ ɗoŋikɛ sigɔɔgɛ jiitik ret walasa.

Rɔɔriyaaɗ Yeese Ɔɔtɛ Tɔkɔny Joop Ɔgɔɔk

³⁵ Tɔɔmɔk Jɛbdiyoosuk Yaykoob a Yowanis wideetarɓa ɛɛk son lak Yeeseek nɛ tonurgeeɗ kɛ, "Rɔɔriytaano, ɗɛyii a tina arin any sinɛne kalɛyiik."

³⁶ Nɛɓa sɛŋk tonu sɛɛga kɛ, "Ɗɛyɛɛr a kɔna ara jikon?"

³⁷ Nɛɓa sɛɛk tonurgeeɗ kɛ, "Pɛgɛdi tina kɛnɔ beeɗ iɗit omaay ɗiɗikakɛ goonɛk, ma iɗit om kantunakɛ goonɛk Burɛɛ nookɛ eemɛyɔɔnoŋk."

³⁸ Nɛɓa tonu sɛɛga Yeese kɛ, "Kiir ɗegerɔɔn any sinɛ kalɛyiirik. Oolɛɛr a uteer tuu rakatɛyoŋk sinɛkɔɔ utaakiŋ? Oolɛɛr a kɔnu aadɛɛ aadiit sinaanɛkɔɔtu aadiiɗɛkiŋ?"

³⁹ Nɛɓa sɛɛk tonur kɛ, "Ii, ooliiŋ." Nɛɓa Yeese tonu sɛɛga kɛ, "Eekeerɛ uteerkɔɔ tuu sinɛkɔɔ utaakiŋ, ɛkɔɔ kɔnu aadɛɛ aadiit sinaanɛ kɔɔtu aadiiɗɛkiŋ,

⁴⁰ mayakana moko pɛgɛdiɗiika eet beeɗit ɗiɗikakɛ gaanɛk a kantunakɛ gaanɛkik. Gaɓigiɗɛɛkoy sini joop sigɛɓa ragadɗiigiɗɛɛk dakɛɗa."

⁴¹ Saaɓa nomtaanak sigɛ aarink tiyɛrɗi sinik, nɛɓa ŋadir Yaykooba a Yowanisaŋ.

⁴² Nɛɓa Yeese riyiri sɛɛg baŋɛ son lak sɛɛnik nɛ tonu sɛɛga kɛ, "Ɗegerari kɛ suumiyɛ joop sigɛ ɓɔɔkaak moko Ayuuduk ɗook raŋk latu ɓaŋkawuka ɔɗɔweer gɛŋkiŋ, latu ɓaŋkawuka baŋɛ joope sigaagɛ ɓɔɔkaak raŋk.

⁴³ Mayakana kat ɓɛɛlɛ iinakɛ kɔɔr oko sinik. Iɗit sinɔ ɗɛyɛ a obi iinakɛ kɔɔrk, dɔɔs a sɛɛn ijaagen noŋk.

⁴⁴ Maɓɔrɛ iɗit sinɔ kɔne ɗɛyɛ a sɛɛn ɔɗɔwenk, in kɔna dakɛ a ijaagen sinɔ ar ɗookuk.

⁴⁵ Kusɓa aasi Tɔn Etoŋk kɛnɔ kɔnyɗi, ɛ gaɓɛ wɛɛŋa gɛɛŋk a guma agut joop sigɔ ɓɔɔkaaŋɔŋk, ma mokoɓa kɛnɔ kɔnyɛɛ sɛɛn."

Ebɔdɛ Yeese Taamɛ Mot Sinɔ Kɛ Bɛrtimewosuk

⁴⁶ Saadi baŋiya mɛlɛrkiɓa katamɛya Iyaarikook. Saaɓa Yeese a nomtaanak gɛɛŋk a joop sigɔ ɓɔɔkaaŋɔŋk ɔgɔ ŋaararɗi katamɛɛ Iyaarikook, nɛɓa tɔn Timewoosuk mot sinɔ kɛ Bɛrtimewoosuk beeberɓa gopɛ kɛntɛɛ. Sɛɛnɓa kalɛytan.

⁴⁷ Nɛ saaɓa tiyɛɛɗi a ɗoyu Yeesee Naajreetik, nɛɓa ooyɛ kɛ, "Iin Tɔɔn Daawitik, maariytik!"

⁴⁸ Nɛɓa joop a ɓɔɔkaaŋ koykoyɛr kɛ, "Dak kɛ many." Yakanaɓa sɛŋk ooyɛ a kaalɛŋ kɛ, "Iin Tɔɔn Daawitik, maariytik!"

⁴⁹ Nɛɓa Yeese ɛtɛ nɛ tonu kɛ, "In riyirɛ nɛ kusuɗ." Nɛɓa sɛɛk riyitar iɗit sinɛ motuk. Nɛ tonurgeeɗ kɛ, "Inna yaa. Ŋaari raŋana riyni Yeesee."

⁵⁰ Nɛɓa sɛŋk oru abii nɛɛk, nɛ utaalɛ raŋana, nɛ kus son lak Yeeseek.

⁵¹ Nɛɓa Yeese kɔɔniy kɛ, "Ɗɛyin ana ara jikon?" Nɛɓa iɗit sinɛ motuk tongeeɗ kɛ, "Rɔɔriytaano, ɗɛyare dɛnɛ."

⁵² Nɛɓa Yeese tongeeɗ kɛ, "Ŋaarik. Ebɔdɛrkɔnu ŋaadiyɛ goonɛŋ." Nɛɓa iɗit sinɛ dɛnɗi sisa, nɛ nomɛ Yeesee gopɛ nɛɛkɛk.