Markoos 1 - Kuumeet Sinɔ Tɔɔnuk Ad Majaŋeeroŋk

Laaganyɔn Yowanis Sinɛ A'aadiik

¹ Ege sini tuktan Pɛɛni Sinɔ Ɓɛlkɛɛstank, Tɔɔn Waakoyotoŋkuk Yeeseek.

² Oko sinɛɓa taapɛɛɗɛ ete pɛrkaakoŋk Isaayase kɛ, "Wosɛyɛɛrakoy wosɛytan naak iine ɔɗɔɔkɛ, sinɔkoy isiise gopan iine ɔɗɔɔkɛk.

³ Koŋgoy iɗit sinɔ oo'oy sinɔɔnɛ paatoonoŋk kɛ, 'In isiisɛɛ gopan Suumiyoŋk, in kekemɛɛ gopan nɛɛk'"

⁴ Kusɓa Yowanis sinɛ A'aadiik paaton nɛɓa waawas kɛ, "In kɔnu aadɛɛ nɔ weeriikɔ tikiyɛɛkɛ Waakoyota, nɔkɔɔ laŋiir tɔŋɔɗ tikiyɛɛkoŋk."

⁵ Joop ɗoo Yuudaak a katamɛ Yorsaleemuk baŋɛ, kurakɓa son lak sɛɛnik, nɛɓa totonar tikiyɛ gɛŋk, nɛɓa aadi sɛɛg Yowanis Goroo Yordanoosuk.

⁶ Lakɓa Yowanis abii sinɔɓa ijaagɛ ami tagakoŋkuk, maɓa tutus ɓeetɔn nɛɛk teeɓɛɛ tarmantoŋk, maɓa ɗaɗam teŋɔɔniyak a ɛtɛɗ paatoonoŋk.

⁷ Waasɛɓa kɛ, "Mɛlkikɔɔ eete baŋi iɗit sinɔ kaalɛ eetik, kaa oolɛ a ruuɗa ɛɛk nɔ woora melti saamɛyɛ gɛɛŋkiŋ.

⁸ Aada saak kɔnu maawɛ, mayakana sɛŋk aadikɔɔkɔnu Wɛɛŋakɛ sigɔɔgɛ Geetitaanakik."

Aadi Yeeseek A Paariit Nɛɛk

⁹ Saaɓak ŋaarkiɓa Yeese katamɛɛ Naajreetik sinaanɛ ar ɗook Gɛlilaak, nɛɓa aadi Sɛɛn Yowanis Goroo Yordanoosuk.

¹⁰ Saaɓa Yeese ŋaarkiɗ maawɛ gɛɛnɛkik, nɛɓa tayɗi dari nɛɓa dɛnɛ a kurak Wɛɛŋa sigɔ Geetitaanakik, a ito kulɓeer sɛɛna raŋana.

¹¹ Nɛɓa tiyɛɛ koŋgoy dari sinɔ tonu kɛ, "Iin Tɔɔn naak sinɛ poraak, yaataa iine."

¹² Nɛɓa sisa arir Wɛɛŋa sigɔ Geetitaanakik Yeesee kɛnɔ kɛɛ paatoona,

¹³ nɛɓa beeɗ paaton a wawuyk pɔlpɔlɛ joop pɛɛyk a kaayetun pɔlpɔlɛ joop pɛɛyk, nɛɓa paari sɛɛn setan kɛnɔ gun ijaag tikiyɛ. Ɛɓa ɓɔrɛ Sɛɛn a keegu, nɛɓa Sɛɛn kɔnyɛr wosɛytaanak Waakoyotoŋk.

Riyiri Yeese Konditaanak Oltiiroŋk A Aŋan

¹⁴ Saaɓa korkorɗɛɛ Yowanisik baŋiya, nɛɓa Yeese weeri Gɛlilaaka a waawas Pɛɛni sinɔ Ɓɛlkɛɛstank Waakoyotoŋk.

¹⁵ Tonuɓa kɛ, "Gayɛkɔɓɔ ɔɔtɛ nɛɛkɛŋ. Wɔɔŋku burɛ Waakoyotoŋkuŋ. In weeriikɛɛ tikiyɛɛkɛ Waakoyota, ɛ in ŋaadɛɛ Pɛɛni sini Ɓɛlkɛɛstank."

¹⁶ Saaɓa Yeese ɗoyiɗ sinɔɔnɛ Gɔrɔ sinɔ obiiŋɔŋk Gɛlilaak jɔkoŋk, nɛɓa dɛnɛɛr Simion a manya Indiriyaas a o'ortar any nɛŋk kondiyeetoŋk gɔrɔwa sinɔɔna obiiŋɔŋk, agut sinɔɓa sɛɛg joop sigɔ kondidiŋɔŋkuk.

¹⁷ Nɛɓa tonu sɛɛga Yeese kɛ, "In kusɛɛ nɔte nomkɛɛ. Arakɔɔ kɔnu a ɗɔkarkɔɔ joop son lak Waakoyok oko sinɛ kondiyerɗɔ oltiirk."

¹⁸ Nɛɓa sɛɛk sisa ŋɔɗar any nɛŋk kondiyeetoŋk, nɛ nomɛrɗi Sɛɛn.

¹⁹ Nɛ saaɓa kaalɛɗ a balaaŋɔŋk, nɛ dɛnɛɛr masiikeenak a pɛɛy tɔɔmɔk Jɛbdiyoosuk, Yaykoob a manya Yowanis a atu emɗ nɛŋk raŋk, a ɓɔrɛ isisisar any nɛŋk kondiyeetoŋk.

²⁰ Nɛɓa riyiri sɛɛg sisa, nɛ ŋɔɗar ɛpɛn nɛŋk Jɛbdiyoos a ijaageer gɛɛŋk agut omoŋ, emɗ nɛɛkɛ raŋk, nɛ nomɛrɗi Sɛɛn.

Bɔduku Iɗit Sinɔ Lak Wɛɛŋa Sigɔ Somkaanakik

²¹ Mɛlɛrɓa Yeese a nomtaanak gɛɛŋk Kipirnahooma, nɛɓa Yeese guuguny godeya tolɛɛɗoŋk Ayuuduk sisa, Waawuy Sambatɛyoŋk Ayuuduk, nɛ tuke rɔɔriyɔn.

²² Nɛɓa joop sigɛ ɓɔɔkaak reemɗi ɓayɛtun gɛŋk rɔɔriyɔɔn nɛɛkɛŋ, agut sinɔ mokoɓa rɔɔriya oko rɔɔriytaanak higi Muuseek, maɓa rɔɔriy sɛɛg oko iɗit sinɔ lak ɓaŋkawuka suumiikeenoŋkuk.

²³ Saaɓak godeey nɛŋk tolɛɛɗoŋk Ayuuduk, lakɛɓa iɗit sinɔ lak wɛɛŋa sigɔ somkaanakik,

²⁴ nɛɓa sɛŋk ooyɛ kɛ, "Iin Yeese Naajireetik, ooɗun tin agut jikon? Kusunkɔ kɛnɔ tin sɔɔkun? Ɗegerii kɛ Iin Geetitan Waakoyotoŋk."

²⁵ Nɛɓa Yeese lamɛ sɛɛg kɛ, "In dakɛɛ kɛ many, in ŋaarɛ ete sineene!"

²⁶ Nɛɓa wɛɛŋa sigɛ somkaanakik arir iɗit sinɛ a dirkiya, nɛ ooyɛ a ɗooruŋ, nɛ ŋaarar ete sinaanɛŋ.

²⁷ Nɛɓa joop gɛɛnɛ baŋɛ reemɗi ɓayɛtun gɛŋk, nɛ kɔniniyi ɛkanɛɛkɛ gɛŋk kɛ, "Ege sini jikon? Ege sini rɔɔriyɔn sinɔ tɔɔnuk sinɔ lak ɓaŋkawukaak. Tonɗi wɛɛŋaka sigɔɔga somkaanakik, nɛ tiiɗigeeɗiŋ."

²⁸ Nɛɓa sisa tiyɛɛ ɔɔtɛ Yeeseek nyonitaakɛ sinɔɔnɛ Gɛlilaak tookɛɛta baŋɛ.

Ebɔdɛ Yeese Gortaanak A Ɓɔɔkaaŋ

²⁹ Saaɓak ŋaarkiɓa Yeese godeey tolɛɛɗoŋk Ayuuduk, sɛɛn a Yaykoob a Yowanis, nɛ kaar guugunyar waa Simion a Indiriyaasik.

³⁰ Keerɛɛk Simionuk goruɓa moɗɛ ɛɛkoŋk a ɗuɗuŋɗe, nɛɓa sisa joop tonurgeeɗ ɔɔtɛ gori nɛɛkik.

³¹ Nɛɓa Yeese widiki ɛɛk son lak sɛɛnik kɛnɔ kɔnyɛɗ, nɛ gaamu ari nɛɛk nɛ ɓɔŋgɔɔrɛŋ. Nɛɓa sɛɛn ŋɔr moɗɛ sinɛ ɛɛkoŋk sisa, nɛ ŋaar raŋana nɛ wɔɔrɛ sɛɛgiŋ.

³² Saaɓa ɗiirirkiɗ waawuy nɔ kɔjururkuɗuk, ɗɔkarkiɓa joop gortaanak a joop sigɔɓa sɛɛg gaamur wɛɛŋa sigɔ somkaanakik son lak Yeeseek.

³³ Tolɗiiɓa joop sigɛ katamɛ nɛɛkik baŋɛ tugaat.

³⁴ Nɛɓa Yeese ebɔdɛ joop sigɔɓa gorur goriɗak sigɔ ɓɛɛlɛr kundiyaakɛk a ɓɔɔkaaŋ, ɔɔykuɓa wɛɛŋa sigɔ somkaanakik a ɓɔɔkaaŋ. Ɗegerarɓa sɛɛn wɛɛŋa sigɛ somkaanakiŋ, yakanaɓa sɛɛga ki pɛgɛdɛɛt kɛnɔ tonɗi.

Rɔɔriya Yeese Gɛlilaake

³⁵ A inɓa kiiki aayirɔn kuleet, ŋaarkiɓa Yeese, nɛ kɛɛ ɗanɗamɔɔna soona ɓɛɛlɛ mowank.

³⁶ Simion a joop sigɛɓa sɛɛg a sɛɛnik nomɛrɗiɓa a warɛr Yeesee.

³⁷ Nɛ saaɓa laŋirɗik, nɛɓa tonurgeeɗ kɛ, "Warɛrni joop baŋɛ."

³⁸ Nɛɓa sɛŋk tonu sɛɛga kɛ, "Koy ŋaarii mɛndɛraka ɔgɔɔka sigeega atu jɔkuk. Nɔ kɛɛɗa rɔɔriyaaka saadi, kusaakan agut sini."

³⁹ Agut sini weeweriiɓa sinɔɔnɛ Gɛlilaak baŋɛ, a rɔririyi sinɔɔnɛ godeyi gɛŋk tolɛɛɗoŋk Ayuuduk a ɔɔyku wɛɛŋa sigɔ somkaanakik.

Ebɔdɛ Yeese Iɗit Sinɔ Goru Dɔɔɓɔyk

⁴⁰ Kusɓa iɗit omaay sinɔ goru dɔɔɓɔyk son lak Yeeseek nɛ ɛtɛ korontunɛ sɛɛne taamɛkɛ, nɛ kalɛyi kɛ, "Ɔkɔn ɗɛyin, oolun a ebɔduntuŋ."

⁴¹ Nɛɓa sanɗi Yeeseya, nɛ ker ari nɛɛk nɛ ɗaaɗapɛ nɛ tongeeɗ kɛ, "Ɗɛyaaŋ, bɔduk."

⁴² Nɛɓa iɗit sinɛ bɔduku dɔɔɓɔy nɛɛkɛ sisa.

⁴³ Ŋɔɗurɓa Yeese ma tongeeɗ a ɓaŋkawuŋ kɛ,

⁴⁴ "Kooru ɛɛk a kat lakɛ iɗit sinɔ tonguɗun any sinik, mayakana mak nɔ kɛɛɗin yaaŋin ɛɛk nook tapaɗa ŋaadiyɛɛkoŋk, kɛnɔkoy dakɛ a misikiri joopa baŋɛ, mak nɔ kɛɗin widikin uduuŋeet sinɛɓa tonu Muuse agut bɔdɛ nookuk."

⁴⁵ Yakanaɓa, ŋaarki iɗit sinɛ saadi nɛ waasɛ any sini joopa baŋɛ. Agut sini kiɓa Yeese oolɛ kɛkar a mɛlɛ katamɛya sinaana ɓɛɛlɛk a ɗegerɛɛŋ. Beeɗɓa katamɛɛ nɛɛkɛ walas soodi kiiɗɛ joopuk, ɛnyɛnyɛkarkiɓa joop nyonitaakɛ son lak sɛɛnik.