Maatiyoos 6 - Kuumeet Sinɔ Tɔɔnuk Ad Majaŋeeroŋk

Rɔɔriyaaɗ Yeese Ɔɔtɛ Tigiyoŋk

¹ "In koorɛ ɛɛk sinɔɔnɛ ijaagirɗɔ any sinɔ mentanŋɔŋk joope taamɛk sinɔɔnɛ kɛ "In tin dɛnɛr sɛɛkik." Ma ɔkɔnkoyŋ, nɛkoy kɛɛ ara gati sinɔkoy laŋiir sooy lak Ɓaaɓa noŋk sinɛ ar darik.

² Iinak saa gijerɗɔ sankaanakik, kat ijaagiir oko sini ijaagirɗi joop sigɔ gayar joop sigɔ mentaanaŋɔŋkuk kɛ ''In sɛɛg dɛnɛr joopk" kɛnɔ eemɛyar sɛɛg, a gotɛr luuri sinɔɔnɛ gopan takank sinɔɔnɛ godeyi tolɛɛɗoŋk Ayuuduk. Eekeer tona kɔnaaŋ boŋurɓa sɛɛk gati nɛŋk jeemɛ.

³ Yakana saa seŋk gijeɗin sankank, kat ɗeger ari nookɛ gɔɔ sinɛ kantik any sinɛ gaɓɛ ari nookɛ gɔɔ sinɛ ɗiɗikik.

⁴ Dɔɔs a gijiɗikin dugeeɗ. Koyukoyna gati ijaag any sinɔ mentanŋɔŋk, Ɓaaɓa sinɛ dɛnɛ any sinɔkɔ ijaagɛ dugeeɗikiŋ.

Rɔɔriyaaɗ Yeese Ɔɔtɛ Ɗanɗamɔɔnoŋk

⁵ "Saa ɗanɗamaaɗɔɔk, kat ɓɛɛlɛɛ oko joop sigɔ gayar joop sigɔ mentaanaŋɔŋk. Ɗɛyɛr sɛɛk ɗanɗamɔn ɛtɛɗɔɔgɛ sinɔɔnɛ godeyi tolɛɛɗoŋk Ayuuduk a sinɔɔnɛ gopan kɛntɛ nɛɛkik, eekeer tona kɔnaaŋ boŋurɓa sɛɛk gati nɛŋk jeemɛ.

⁶ Saa seŋk ɗanɗamaaɗink, guugunyu godeya nooka, nɔ korun tuga nook nɔ ɗanɗamaakin Ɓaaɓa sinaana ar dugeeɗik sinaana kɛ taantaak. Koyukoyna gati nook ijaag any sinɔ mentanŋɔŋkuk Ɓaaɓa sinɛ dɛnɛ any sinɔkɔ ijaagɛ dugeeɗikiŋ.

⁷ "Saa ɗanɗamaaɗɔɔk, kat bɔɔlakar a totopari pɛɛni sinɔ moko ŋaarki ɓayaayk okokɔ joop sigɔ moko Ayuuduk. Koɓur sɛɛk kɛ tiiɗi sɛɛga Waakoyot agut bɔɔlaaka nɛŋkiŋ.

⁸ Kat sɔɔk ɗanɗamaakɛɛ oko sɛɛg, agut sinɔ ɗegerkun Ɓaaɓa noŋk jeemɛ any sinɛ ɗɛyɛ kɔnak a inkɔ kiir kalɛyit.

⁹ "In sɔɔk ɗanɗamaakɛ kɛ, Iin Baabɛɛ naŋk sinɛ arkin darik, in geetitaanak tiriya goonɛk.

¹⁰ In mɛlki Burɛ nookɛk. Oko sinɛ ɗɛyan nook darik. In ɓɔrɛ ɓɛɛlɛ ɗook raŋk oko sinɛk.

¹¹ Tigi tin kiiwu naŋk ɓɛɛnyɔwoŋk ɓenyse.

¹² Toŋoɗar tine tikiyɛ gaŋk oko sinɛ ŋɔɗirkiɗii joope sigaagɛ tin tikerk.

¹³ Kat tin ŋɔɗurun nɔ guugunyii paariita, ebɔda tin ant sinɔɔnɛ ŋɛɛwɛnŋɔŋk. [Ege burɛɛ a ɓaŋkawuka, a eemɛyɔn nook, kɛygun nɔkoy nɔkoyk. Ameen.]

¹⁴ Ɔkɔn ŋɔɗutaarɔ joope tikiyɛ gɛŋkiŋ, nɛkɔɔ ɓɔrɛ kɔne ŋɔɗuru tikiyɛ goŋk Ɓaaɓa noŋk dariyoŋkuŋ.

¹⁵ Ma ɔkɔn kiitaarɔ toŋoɗ joope tikiyɛ gɛŋkiŋ, nɛkɔɔ ɓɔrɛ kɔne kiir toŋoɗ tikiyɛ goŋk Ɓaaɓa noŋk dariyoŋk.

Rɔɔriyaaɗ Yeese Ɔɔtɛ Soomuk

¹⁶ "Saa soomɛrɗɔɔk, kat kɔnu aayɛr ɛɛkan oko joop sigɔ gayar joop sigɔ mentaanaŋɔŋk. Yaaŋɛr sɛɛk ɓɛɛlɛt sanoŋk kɛnɔ ɗegerar joop kɛ soomɛrŋ. Eekeer tona kɔnaaŋ, boŋurɓa sɛɛk gati nɛŋk jeemɛ.

¹⁷ Saa seŋk soomɛɗink, aadi taamɛ gooŋk ɛ ɗonya diikuy.

¹⁸ In ɗegeera soomɛt nook Ɓaaɓa sinɛ ar dugeeɗik dakɛɗa, mayakana duga joopeŋ, koyukoyna gati nook Ɓaaɓa sinɛ dɛnɛ any sinɔkɔ ijaagɛɛ dugeeɗkiŋ.

Rɔɔriyaaɗ Yeese Ɔɔtɛ Wori Dariyoŋk

¹⁹ "Kat tolɛɛ wori ɛɛka noŋk ɗook sineene ɗamɗu kuukut ɛ uutek ɛ oolɛ nɔ ŋuule agalt gode nɔ agalik.

²⁰ Ma in tolɛɛ wori ɛɛka noŋk dari soodi kiiɗi ada kuukut ɛ kiiɗi uutank ɛ kiiɗi oolɛ agalt nɔ ŋuule gode nɔ agalik.

²¹ Ar ɓayɛ noŋk saadi, arkiɗ wori noŋkuk.

Rɔɔriyaaɗ Yeese Ɔɔtɛ Ɗaawan Ɛɛkoŋk

²² "Ɗaawan ɛɛk nookuk taama nook. Ɔkɔn taama nookɛ bɔdtan, nɛ ɛɛk nookɛ baŋɛ ɓɛɛlɛ a pɛɗɛrka.

²³ Ma ɔkɔn taama nookɛ gortan, nɛ ɛɛk nookɛ baŋɛ ɓɛɛlɛ a nyuugur. Ɔkɔn pɛɗɛrka sinɛ lakink nyuugurŋ, anɛ nyuugur taŋɛ a ɛtɛ ɛk?

Rɔɔriya Yeese Kɛnɔ Kat Ɓakɛyɗiikɛɛ Agut Beeɗit

²⁴ "Kɛɛ iɗit sinɔ oolɛ a ijaagɗi suumiyɛɛka sigɔɔga pɛɛyk agut omoŋɔŋk. Ɓooyu om, ma poru omuŋ. Maŋk wideer ɛɛk omalta, ma daraayɛ omuŋ. Iɗit sinɔ ijaagɗi woriyaak ki gayɛ a ijaagen Waakoyotoŋkuŋ.

²⁵ "Agut sini tona kɔnaaŋ, kat ɓakɛyɗiikɛɛ agut beeɗit noŋk kɛ, 'Ɗamiikɔɔ jikon?' maŋk kɛ, 'Utiikɔɔ jikon? maŋk kɛ, 'Kadiikɔɔ jikon?' Wɛɛŋa kaalɛr ɗama, ma ɛɛk kaalɛ abiyak.

²⁶ In dɛnɛɛ teetɔ dariyoŋko. Kir soowuɗit, kir ɗootiɗiit, kir gaɓiit palɛya. Mayakana gije sɛɛg ɗama Ɓaaɓa noŋk dariyoŋkuŋ. A moko kaalɛɛr sɛɛg jɛt?

²⁷ Wooɗ sinɛ iinakɛ ɓakɛyɗi nɛ oolɛ a siipiki jeeɗokaata nɛɛka ɗunɗumtan a omoŋɔŋk?

²⁸ "Ɓakɛyɗiikari agut abiyak agut jikon? In dɛnɛɛ makasɛ ɗookoŋko saa ɓɔlɔɔrɛrɗik. Kir bɔɔlaat ijaag, ɛ kir tekeny abiyak.

²⁹ Yakana tona kɔnaaŋ. Salamoon aasi sinɛɓa lak eemɛyɔn sinɔ obiiŋɔŋk sinɔ ito sinik baŋɛ, kiɓa kadiiɗ abii sinɔ mentanŋɔŋk oko makasɛkɛ sigeege omk.

³⁰ Ɔkɔn kadiɗi Waakoyot makasɛka ɗookoŋk sigeega dɛnɛɛ sɛɛg ɓeny sineene, makɔɔ alɛ orɛɛ sɛɛg maɗak oko sinikiŋ, anɛ iinak sigi kɔne bitak ŋaadiyɛɛkik! Ki kɔna kadiɗit a kaalɛŋ ɛk?

³¹ Agut sini kat ɓakɛyɗiikɛɛ kɛ 'Ɗamiikɔɔ jikon?' maŋk kɛ, 'Utiikɔɔ jikon?' maŋk kɛ, 'Kadiikɔɔ jikon?'

³² Joop sigɔ moko Ayuuduk ɗɛyɛr a laŋir ola sigiŋ, agut sinɔ ɗeger Ɓaaɓa noŋk dariyoŋk kɛ ɗɛyɛ kɔna ola sigi baŋɛŋ.

³³ Iinak in jeemɛ ɗɛyɛ burɛ Waakoyotoŋk a any sinɔ mentan taamɛkɛ Gɛɛnɛkik, ola sigɛ ŋayɗiikik baŋɛ siipiɗikkɔɔ kɔnaŋ.

³⁴ Ɓakɛy sinɛkɔɔ alaayoŋk gayɛkɔɔ alaayaŋ, nɛ kat ɓakɛyɗiikɛɛ agut alaay, waawuy a omoŋ omoŋ lak rakatɛ ɔɗɔwa nɛɛkaaŋ.