Maatiyoos 3 - Kuumeet Sinɔ Tɔɔnuk Ad Majaŋeeroŋk

Ijaag Yowanis Sinɛ A'aadiik

¹ Saaɓak kusɓa Yowanis sinɛ A'aadiik, nɛɓa rɔririyi paaton Yuudaak kɛ,

² "In weeriikɛ tikiyɛɛkɛ Waakoyota agut sinɔ burɛ dariyoŋk wɔɔŋkuŋ."

³ Tonɛɛɓa ete pɛrkaakoŋk Isaayase agut Yowanis kɛ, "Koŋgoy iɗit sinɔ oo'oy sinɔɔnɛ paatoonoŋk kɛ, 'In isiisɛɛ gopan Suumiyoŋk, in kekemɛɛ gopan nɛɛk.'"

⁴ Abii Yowanisik ijaagɛɛɓa ami tagakoŋk, maɓa tutus ɓeetɔn nɛɛk teeɓɛɛ, maɓa ɗama nɛɛk teŋɔɔniyak a ɛtɛɗ paatoonoŋk.

⁵ Saaɓak kurakɓa joop son lak Yowanisik sinɔɔnɛ katamɛ Yorsaleemuk sinɔɔnɛ ɗoo Yuudaak baŋɛ sinɔɔnɛ Yordanoosuk tookɛɛta baŋɛ.

⁶ Nɛɓa totonar tikiyɛ gɛŋk, nɛɓa aadi sɛɛg Yowanis Goroo Yordanoosuk.

⁷ Saaɓa dɛnɛɛɗ Yowanis joop Paarisik a joop Saaduukuk a ɓɔɔkaaŋ a kurak son lak sɛɛn kɛnɔ sɛɛg aadɛɛk, nɛɓa sɛɛga tonu kɛ, "Iinak sigi ito iinak kookowɛɛk! Wooɗ sinɛkɔ kɔna yaaŋɛ gopan sinɛkoy bɔdɛrɗɔ goopan sinaanɛkoy mɛlkik?

⁸ In ijaagɛ beeɗit noŋk any sinɔ ɗegerɗɛ eekeerɛ kɛ weeriikɔɔkɔ tikiyɛɛkɛ Waakoyotak.

⁹ Kat kɔna gayi oko sinɛ tonurɗɔ kɛ, 'Eteŋk tɔɔmɔk Abrahamuk.' Tona kɔna kɛ Waakoyo oolɛ a ɓɔŋgɔrku giɗekɛ sigeege tɔɔmɔka Abrahamukuŋ.

¹⁰ Sisɔ ragadɛɛkɔ kabi sinɔ yawɛɛɗɛɛ kɛɛn tiltilɛɛkɛ gɛŋkiŋ, nɛ kɛɛt sinɔ ki riiɓɛ taamɛ sigɔ mentaanaŋɔŋkuk baŋɛ yawɛɛkoy nɛ orɛɛ maɗa.

¹¹ "Aada saak kɔnu maawɛ nɔ weeriikɛɛ tikiyɛɛkɛ Waakoyota. Mayakana iɗit sinɛkɔɔ mɛlki eete baŋik aadikɔɔkɔnu Wɛɛŋakɛ sigɔɔgɛ Geetitaanakik a maɗ. Kaalɛ sɛŋk eet jɛt a aasi kaa oolɛ a ɓataka saamɛɛ gɛɛŋkiŋ.

¹² Lak Sɛŋk perɛ nɛɛk ariit kɛnɔkɔɔ pey ɗama nɛɛk, nɛ gaɓɛ ɗama nɛɛk anta, ma moɗɛ pɛtɛɛkak gɛɛŋk maɗ sinaanɛ koy ki laarink."

Aadi Yowanis Yeesee

¹³ Saaɓak kusɓa Yeese Gɛlilaake gɔrɔwa Yordanoosuk kɛnɔ sɛɛn aadi Yowanis.

¹⁴ Nɛɓa sɛɛn ɓaarɗi Yowanis kɛ, "Ɗɛyɛta a guntu aadin iin, nɛ kusun son lak eetik ɛk?"

¹⁵ Nɛɓa jumurgeeɗ Yeese kɛ, "Kat, ɗɛyɛ tina a dusanɛŋ any sinɔ mentan taamɛkɛ Waakoyotoŋk oko sinik." Nɛɓa Yowanis ari kɛ, "Dɔɔs" nɛ aadi Yeesee.

¹⁶ Saaɓa aadiiɗɛ Yeeseek nɔɓa ŋaarki maawɛ gɛɛnɛkik, nɛɓa tayɗi dari, nɛɓa kurak Wɛɛŋa Waakoyotoŋk a ito kulɓeer sɛɛna raŋana.

¹⁷ Nɛɓa tiyɛɛ koŋgoy dari sinɔ tonu kɛ, "Ege sini tɔɔn naak sinɛta yaa sɛɛnek sinɛ poraak."