Maatiyoos 26 - Kuumeet Sinɔ Tɔɔnuk Ad Majaŋeeroŋk

Giiman Sinɛɓa Giimɗɛ Yeeseek

¹ Saaɓa Yeese toniiɗ ola sigi baŋɛ nɔ ruumek baŋiya, nɛɓa tonu nomtaanaka gɛɛna kɛ,

² "Ɗegerari kɛ ɗoŋikɛ sigɔɔgɛ pɛɛy baŋiya Ba'aalkɔɔ Ɗoyiɗoŋk, gaɓɛɛkɔɔ Tɔɔn Etoŋk kɛnɔ laalawɛɛ."

³ Saadi baŋiya tolɗiiɓa ɔɗɔweer tapa ŋaadiyɛɛkoŋk a gutarɛyɛ ɗookoŋk woy ɔɗɔwen tapa ŋaadiyɛɛkoŋk sinɛ obiik riyɛ kɛ Kɛyaapaak.

⁴ Waasiɗiiɓa kɛnɔ gaamɛɛ Yeese ɗegeej kɛnɔ ɓokotɛɛ.

⁵ Tonurɓa kɛ, "Kii ijaagɛ waawuy Ba'aalik kɛnɔ mokɔɔ joop boŋurku ooyan."

Buke Jarti Omaay Yeesee Reyaaye

⁶ Saaɓa Yeese arkiɗ Bitaniyaake, woy Simion sinɛɓa lak dɔɔɓɔyk.

⁷ Nɛɓa widik ɛɛk jarti om son lak sɛɛnik a ɗɔku reyaay sinɔ obi gati nɛɛkɛŋɔŋk a ar belkaatii sinɔɔnɛ riyɛ kɛ albastirosuk a enyaaŋ. Nɛɓa gupatɛrgeeɗ ɔɗɔwa ma Yeese beeber nyon ɗamatoŋk.

⁸ Nɛɓa nomtaanak gɛɛnɛ dɛnɛr sinɛ nɛ ŋadir nɛ tonur kɛ, "Sɔɔkɛɛ any sini agut jikon?

⁹ Reyaay sini gunkɔ ɓalɗiiɗɛɛ gati sinɔɔnɛ obiiŋɔŋk nɛ wori nɛɛk gaɓɛɛ sankaanaka."

¹⁰ Ɗegerɓa Yeese sini nɛ tonu sɛɛga kɛ, "Ooɗɛɛr jarti sini agut jikon? Ijaag kɔta any sinɔ mentanŋɔŋk.

¹¹ Sankaanak sɛɛg a iinak agut omoŋ ɓɛɛnyɔwɛ gɛɛŋk baŋɛ, makɔɔ kɛɛ eet a iinak agut omoŋ ɓɛɛnyɔwɛ gɛɛŋk baŋɛ.

¹² Sinɛkɔta gupatkiɗ reyaay sini ɛɛkak ragadikɔ eet tɔkɔwa.

¹³ Eekeer tona kɔnaaŋ, ɗoo tookɛɛta baŋɛ sinɛkoy waasɛɛɗɛ Pɛɛni sini Ɓɛlkɛɛstank kɛygun nyon sinɔɔnɛ eetik, any sinɛkɔ ijaagik waawasɛɛkoy a kokoɓkuɗɛɛ sɛɛn."

Doomɛ Yuuda Gaɓɛ Yeeseek

¹⁴ Saaɓak nomtaanakɛ sigaagɛ aarin a pɛɛyk om sinɛɓa riyɛ kɛ Askorotu Yuudaak kɛɛɓa son lak ɔɗɔweer tapa ŋaadiyɛɛkoŋk.

¹⁵ Nɛɓa tonu sɛɛga kɛ, "Ɔkɔn kɔna gaɓa Yeese nɛɛkiŋ nɛkɔɔta gaɓɛɛr jikon?" Nɛɓa sɛɛk ikomur biriyatɔk a ruumer iɗit a aarin nɛ gaɓɛrgeeɗiŋ.

¹⁶ A tukiɗi saaɓak, warɛɓa Yuuda ɔɔtɛ sinɔ yaageeɗ kɛnɔ gaɓɛ Yeeseek.

Ɗama Ba'aal Ɗoyiɗoŋk

¹⁷ Ɓeny sinaanɛɓa tuktank Ba'aale nasiyoŋk wideetarɓa ɛɛk nomtaanak gɛɛnɛ son lak Yeeseek nɛ tonurgeeɗ kɛ, "Ɗɛyin ana ragadi ɗama Ba'aal Ɗoyiɗoŋk eet?"

¹⁸ Nɛɓa sɛŋk tonu sɛɛga kɛ, "In kɛɛɗɛɛ katamɛya waa aniinik nɔ kɛɛɗɛɛ tonguɗɛɛ kɛ, 'Tonu rɔɔriytaan kɛ wɔɔŋku ɔɔtɛ naakɛŋ eet a nomtaanak gaaŋk ɗamiikɔɔ ɗama Ba'aal Ɗoyiɗoŋk nyaki nookɛk.' "

¹⁹ Nɛɓa nomtaanak gɛɛnɛ ijaagir oko sinɛɓa toniiɗ sɛɛga Yeeseek ragadirɓa ɗama Ba'aal Ɗoyiɗoŋkuŋ.

²⁰ Saaɓa kɔjururkuɗuk mɛlɛrkiɓa Yeese a nomtaanak gɛɛŋk sigɛ aarin a pɛɛyk agut omoŋ nyon ɗamatoŋk.

²¹ Saaɓa atukuɗ ɗamatik nɛɓa Yeese tonu sɛɛga kɛ, "Eekeer tona kɔnaaŋ, gaɓɛkɔɔtu iinakɛ iɗit omaayiŋ."

²² Nɛɓa sɛɛk sanɗi jɛt nɛ tonur a omoŋ omoŋ kɛ, "Suumi naŋk anɛ eet yoo?"

²³ Nɛɓa sɛŋk tonu sɛɛga kɛ, "Iɗit sinɛkɔɔtu gaɓɛk sɛɛn sinɛ gaɓii ari lɔkɔya a eet agut omoŋɔŋk.

²⁴ Rɛrkɔɔ Tɔn Etoŋk oko sinɛɓa taapɛɛɗɛ Wargatɛɛ Waakoyotoŋk agut sɛɛnik. Mayakana durikɔɔ eta sinaanakɔɔ gaɓɛ Tɔɔn Etoŋkuk, iɗit sinɛ dɔɔs a gunɓa kɛɛ ɓartɛɛt."

²⁵ Nɛɓa Yuuda sinɛkɔɔ gaɓɛ sɛɛnik tongeeɗ kɛ, "Suumi naakɛ, anɛ eet yoo?" Nɛɓa sɛŋk tongeeɗ kɛ, "Oko sinɛ toniiɗink."

Kiiwu A Tuu Sinɔ Geetitank

²⁶ Saaɓa ɗamiiɗik nɛɓa Yeese ɓɔŋgɔɔrɛ kiiwu nɛɛk nɛ geetiŋ, nɛ ŋapati nɛ gaɓɛ nomtaanaka gɛɛnaak nɛ tonu sɛɛga kɛ, "Iyook, in ɗamɛɛ, ege sini buusɛ naak."

²⁷ Nɛ ɓɔŋgɔɔrɛ tuu nɛɛk nɛ pɔɔsɛ Waakoyo, nɛ gaɓɛ nomtaanaka gɛɛnaak, nɛ uter tuu nɛɛk sɛɛg baŋɛ, nɛ tonu sɛɛga kɛ, "Iyook, in utɛɛ any sini iinak baŋɛ,

²⁸ agut sini ege sini yɛrom naak kuumeetoŋk sinɔ tɔɔnuk, sinɛkɔɔ gupatɗik agut tɔŋɔɗ tikiyɛ joop sigɔ ɓɔɔkaaŋɔŋk.

²⁹ Tona kɔnaaŋ, kaakoy tuu soortan taamɛ sigi wɛynik mɛlɛɛɗa nɔkoy uteeɗa sinɔ tɔɔnuk eet a iinak burɛɛ Baabɛkik."

³⁰ Nɛɓa iiliyar iiliya nɛ kɔtɔɔŋɛr kurkuma Dɛbirɛ Jɛytik.

Tonkun Yeese Ɔɗɔɔkɛ Kɛ Kaadɛkɔɔ Sɛɛn Petrosuŋ

³¹ Saaɓak tonuɓa Yeese nomtaanaka gɛɛna kɛ, "Ŋɔɗari kɔɔtu iinak baŋɛ kaalt sineene ɓenysek. Agut sinɔ taapɛɛɓa Wargatɛɛ Waakoyotoŋk kɛ, 'Malaakoy irtan nɛɛkiŋ, kɛɛtiɗiikoy pony jiŋkuyɛ gɛɛŋkiŋ.'

³² Mayakana saakɔɔ ŋaarkiɗa ret walasak baŋiya, ɗeykuunakɔɔ kɔne ɔɗɔɔkɛ Gɛlilaaka."

³³ Tonuɓa Petros Yeeseya kɛ "Kɛygunkɔɔ aasi kaadɛrni joop baŋɛŋ, makɔɔn saak kaa kaadɛt adaktan."

³⁴ Nɛɓa Yeese tongeeɗ kɛ, "Eekeer tona naaŋ, kaadin kɔɔtu agut jiit kaalt sineene ɓenysek a inkɔɔ ki ɗooran koogelees."

³⁵ Nɛɓa Petros tongeeɗ kɛ, "Ɔkɔnkɔɔ ɗɛyɛ a rɛɛrɛŋ nɛkɔɔ rɛɛrii eet a iin agut omoŋ, ma kɔɔnu ka kaadɛɛt adaktan." Nɛɓa ɓɔrɛ tonur nomtaanak sigɛ ɔgɔɔk baŋɛ oko sinɛk.

Ɗanɗama Yeese Geetɛsɛmanii

³⁶ Saadi baŋiya kaarɓa Yeese a nomtaanak gɛɛŋk soona riyɛ kɛ Geetɛsɛmaniik. Saaɓa mɛlɛrɗi saanak, nɛɓa Yeese tonu nomtaanaka gɛɛna kɛ, "In beeɗkuunɛ seedi saa kɛɛɗa ɗanɗamaaɗa soodik."

³⁷ Kaarɓa Yeese a Petros a tɔɔmɔk Jɛbdiyoosuk a pɛɛy nɛɓa tuke san a ɓakɛy.

³⁸ Tonuɓa sɛɛga kɛ, "Sanɗi wɛɛŋa gaanɛ jɛt mɛlɛɛɗa nɔkɔɔ rɛrɗaak, in ɓɛlkuunɛ seedi, a ɓeɗɛɛŋ a eet agut omoŋ."

³⁹ Wideɓa ɛɛk sɛɛge a yowɛɛɗ a balaaŋ, nɛ supke tepeen nɛɛkɛ ɗoo nɛ ɗanɗama kɛ, "Iin Baabɛɛ naak, ɔkɔn gayɛŋ inte ɗeyi tuu sini rakatɛyoŋk, mayakana kat ɓɛɛlɛ oko ɗɛyan naak, ma in ɓɛɛlɛ oko ɗɛyan nook."

⁴⁰ Saadi baŋiya saaɓa weeriikiɗ son lak nomtaanak gɛɛŋkik, nɛɓa laŋki sɛɛg ma ɗeegararŋ, nɛɓa tonu Petrosa kɛ, "Kiir oolɛ a ɓeɗiir a eet agut omoŋ aasi sayitiya sinɔɔna omoŋɔŋkuŋ?

⁴¹ In ɓeɗɛɛ, in ɗanɗamaakɛɛ kɛnɔ mokɔɔ guugunyari paariita, wɛɛŋa etoŋk ɓɛɛlɛr tɛkɛɛrɛ ma bɔɔla buusɛ etoŋkuŋ."

⁴² Kɛɛɓa kɛkar gut pɛɛyeen nɛɛk nɛ kɛɛ ɗanɗama kɛ, "Iin Baabɛɛ naak, ɔkɔn ki gayɛ a ɗeyi a kaa uteeɗ tuu sini rakatɛyoŋkuŋ, nɛ in ɓɛɛlɛ oko ɗɛyan nook."

⁴³ Saaɓa weeriikiɗ kɛkar son lak nomtaanak gɛɛŋkik latuɓa ɗoŋ taamɛkɛ nɛɓa laŋki sɛɛg ma ɗeegararŋ.

⁴⁴ Nɛɓa ŋɔr sɛɛg kɛkar nɛ ŋaar nɛ kɛɛ ɗanɗama jiiteen nɛɛk a tonu pɛɛni sinɛkɔ tukik.

⁴⁵ Saadi baŋiya weeriikɓa son lak nomtaanak gɛɛŋkik nɛ mɛlki nɛ tonu sɛɛga kɛ, "In ɗegagarari a imiminyari kɛkar? Wɔɔŋku ɔɔtɛ nɛɛkɛkiŋ gaɓɛɛkɔɔ Tɔɔn Etoŋk ariita tikitaanakoŋk.

⁴⁶ In ŋaarɛɛ raŋana koy ŋaari ɔsɔ iɗit sinɛkɔɔtu gaɓɛk wɔɔŋkuŋ."

Gaamur Yeesee Gumaaker Gɛɛnɛk

⁴⁷ Saaɓa Yeese arkiɗ waasiyɛɛkɛk, mɛlkiɓa nomtaanakɛ gɛɛnɛ sigaagɛ aarin a pɛɛy a omoŋ, Yuudaa sɛɛnɓa a joop a ɓɔɔkaaŋ sigɔ latu gumboyik a aarɛɛk sigɔɓa sɛɛg wosɛykɛɛ sooy lak ɔɗɔweer tapa ŋaadiyɛɛkoŋk a gutarɛyɛ ɗookoŋk.

⁴⁸ Gaɓɛɓa sɛɛga Yuudaa sinɛkɔɔ gaɓɛ Yeeseek yaaŋtan sinɔ kɛ, "Iɗit sinɛ ɗɛyɛɛrik sɛɛn sinɛkɔɔ samɓoyaak, nɛ in gaamɛɛ sɛɛn."

⁴⁹ Sisa kɛɛɓa son lak Yeeseek nɛ samɓoy nɛ tongeeɗ kɛ, "Rɔɔriytaano, digoyna."

⁵⁰ Nɛɓa Yeese tongeeɗ kɛ, "Tekaan naakɛ ijaag any sinɛkɔ kusaagiɗink." Nɛɓa wideetar ɛɛk joop gɛɛnɛk nɛ gaamur nɛ korkoɗarŋ.

⁵¹ Saaɓak joop sigɛɓa sɛɛg a Yeeseek koyowukuɓa omaay aarɛ nɛɛk, nɛ yawuku weena ijaagen sinɛ ɔɗɔwen tapa ŋaadiyɛɛkoŋkuk.

⁵² Nɛɓa Yeese tongeeɗ kɛ, "Jumuru aarɛ nook kokɛya nɛɛkaak, joop sigɔ koyowɛrk aarɛk baŋɛ, rɛrarkoy aarɛ.

⁵³ Koɓun kɛ ɔkɔn ɗɛyɛŋ ɛ kalɛya Baabɛɛ naakiŋ kɛ kiikita wosɛyɛɛt wosɛytaanak sigɔ kumɛɛ ɓɔɔkaaŋɔŋk?

⁵⁴ Nɛ ɔkɔn ɓɛɛlɛ oko sinikiŋ, nɛ dusanɛɛ pɛɛni sinɛɓa taapɛɛ Wargatɛɛ Waakoyotoŋk kɛ laŋkikoy rakatɛk ɛk?"

⁵⁵ Saaɓak tonuɓa Yeese joopa sigaaga kɛ, "Kurakɔ a aarɛɛ a gumboyik kɛnɔtu gaamiir a ito gaamɛɛ iɗit sinɔ sɔɔkɛ ɓɛɛlɛtik? Ma kanti kiir gaamit saakan rɔririyiɗa ɓɛɛnyɔwɛ gɛɛŋk baŋɛ Godeey sinaanɛ Geetitank.

⁵⁶ Mayakana nɔ ɓɛɛlɛɛɗ sini baŋɛk kɛnɔ dusanɛɛ sinɛɓa waasɛr joop pɛrkaakoŋk Wargatɛɛ Waakoyotoŋk." Saaɓak ŋɔɗarɓa nomtaanak gɛɛnɛ baŋɛ nɛ gonarŋ.

Wideerɛɛ Yeesee Joopa Sigɔɔga Gaɓɛr Woorank

⁵⁷ Saadi baŋiya, diilerɓa Yeesee joop sigɛɓa gaamur sɛɛnik son lak Kɛyaapaa sinɛ ɔɗɔwen tapa ŋaadiyɛɛkoŋkuk sinɛ obiik, tolɗiiɓa saadi rɔɔriytaanak higi Muuseek a gutarɛyɛ.

⁵⁸ Nonomɗuɓa Petros a yowɛɛɗiŋ mɛlɛɛɗa keera sinaana ɔɗɔwen tapa ŋaadiyɛɛkoŋkuk, nɛɓa guuguny takana nɛ beebeɗar a koortaanak kɛnɔ dɛnɛ ɔɔtɛ pedtan nɛɛkik.

⁵⁹ Ɔɗɔweer tapa ŋaadiyɛɛkoŋk a joop sigɔ gaɓɛr woorank baŋɛ, warɛrɓa Yeeseya pɛɛni nyonoŋk sinɔ arirɗi kɛnɔ ɓokotɛɛk.

⁶⁰ Kɛygunɓa widakaayɛ pɛɛniyɛ nyonoŋk a ɓɔɔkaaŋ, nɛɓa kiikiɗɛ laŋiiɗ pɛɛni sinɔ ɗegeera a rɛrgiɗɛɛŋɔŋk. Pediya widerkiɓa ɛɛk joop a pɛɛy,

⁶¹ nɛ tonur kɛ, "Tonukɔ iɗit sini kɛ, 'Aalakɔɔ Gode sini Geetitank Waakoyotoŋk nɛkɔɔ kɛnya ɗoŋikɛ sigɔɔgɛ jiitik.' "

⁶² Nɛɓa ɔɗɔwen sinɛ tapa ŋaadiyɛɛkoŋk ŋaar raŋana nɛ tongeeɗ kɛ, "Kɛɛ any sinɔ jumurun anta sinaana waasɛr joop sigik baŋɛk? Tonur joop sigi eekeer?"

⁶³ Yakanaɓa Yeese dakɛ kɛ many, nɛɓa ɔɗɔwen sinɛ tapa ŋaadiyɛɛkoŋk tongeeɗ kɛ, "Toniina tiriyaakɛ Waakoyo sinɛ Wɛɛŋak. Ɔkɔn iin Keresee Tɔɔn Waakoyotoŋk, ton tina."

⁶⁴ Nɛɓa Yeese jumurgeeɗ kɛ, ɓɛɛlɛ oko sinɛ toniiɗink. Dɛnɛɛrkoy Tɔɔn Etoŋk a beeɗ ɗiɗikakɛ Waakoyo sinɛ lak ɓaŋkawukaak ɛkoy dɛnɛɛr saakoy mɛlkiɗ dari a ar gumoyk."

⁶⁵ Nɛɓa ɔɗɔwen sinɛ tapa ŋaadiyɛɛkoŋk ŋadiŋ. Nɛ pɔɔpɔk abii nɛɛk, nɛ tonu sɛɛga kɛ, "Nyɔɔnkɔ Waakoyo! ɗɛyɛ tina sisɔ waasiyɛ ɔgɔ jikoŋk? Tiyɛɛrkɔ saa nyɔɔnɗu Waakoyokuŋ.

⁶⁶ Gayi kɔna a jikon?" Nɛɓa sɛɛk jumurar kɛ, "Tikiɗiikɔŋ, nɛ dɔɔs a rɛrŋ."

⁶⁷ Saaɓak topɛpɛyarɓa Yeeseya taamɛka ɛ bibitar ɛ joop ɔgɔɔk papaŋar.

⁶⁸ Nɛ tonurgeeɗ kɛ, "Iin Keresee paaŋini wooɗ? Tontɔ tina pɛrka.

Kaadɛ Petros Yeesee

⁶⁹ Saadi baŋiya beeberɓa Petros keer sinaanɛ ɔɗɔwen tapa ŋaadiyɛɛkoŋk sinɛ obiik tak, nɛɓa widik ɛɛk peet om sinɔ ijaagenk son lak sɛɛnik nɛ tongeeɗ kɛ, "Iinkɔ ɓɔrɛ a iɗit Gɛlilaak Yeesee agut omoŋ."

⁷⁰ Nɛɓa sɛŋk kaadɛ sɛɛge baŋɛ taamɛkɛ kɛ, "Kaa ɗegerɔɔn any sinɛ tonunk."

⁷¹ Nɛɓa kɔru tugaata sinaana keer nɛɛkik nɛ dɛnɛ sɛɛn peet om kɛkar sinɔ ijaagenk, nɛ tonu joopa sigaaga atu saadik kɛ, "Sɛɛnkɔ iɗit sini a Yeesee kɔ Naajireetik agut omoŋ."

⁷² Nɛɓa sɛŋk kaadɛ kɛkar a wogoygeeɗ kɛ, "Kaa ɗegerɔɔn iɗit sinɛ."

⁷³ Ɔɔtɛ sinɔɔnɛ dinyŋɔŋk baŋiya wideetarɓa ɛɛk joop sigɛɓa ɛtɛtɛɗar saadik nɛ tonur Petrosa kɛ, "Ɗegerɛɛni waasiyɛɛkɛ goonɛk joope sigaagɛ ege omaay iin eekeerɛ."

⁷⁴ Nɛɓa sɛŋk tonu sɛɛga a wogoygeeɗ a lamɛ ɛɛk nɛɛk kɛ, "Kaa ɗegerɔɔn iɗit sinɛ." Nɛ sisa ɗooru koogele.

⁷⁵ Nɛɓa koɓuku Petros any sinɛɓa tongeeɗ Yeese kɛ, "Kaadin kɔɔtu agut jiit a in ki ɗooran koogeleesik." Nɛɓa ŋaariri walasa nɛ kuɗe jɛt.