Maatiyoos 25 - Kuumeet Sinɔ Tɔɔnuk Ad Majaŋeeroŋk

Rɔmɛ Peetak Sigɔ Aarink

¹ "Saakoyk burɛ dariyoŋk gayikoy a peetak sigɔ aarink, sigɔ ŋaararki a latu ola gɛŋk sigɔ ɗaawurŋɔŋk, kɛnɔ boŋur iɗit sinɔ waawuguɗɛɛŋɔŋkuk.

² Sɛɛge peetak sigɛ tuulk gaagɛyɛɓa, ma a tuul ɗegerarɓa ɛɛk.

³ Nɛɓa sigɛ gaagɛyɛk diiler ola gɛŋk sigɔ ɗaawurŋɔŋk ma sɛɛge kɛɛ gaaji sinɔ ŋaaytank.

⁴ Maɓa sigɛ ɗegerar ɛɛkik diiler ola gɛŋk sigɔ ɗaawurŋɔŋk ma latu gaaji sinɔ ŋaaytank ant.

⁵ Saaɓa beeɗirkiɗ iɗit sinɛ waawuguɗɛɛkik nɛɓa latu ɗoŋ sɛɛg baŋɛ nɛ ɗeegararŋ.

⁶ "Nɛɓa kaalt kɔɔr tiyɛr a riyɛ sɛɛg kɛ, 'Mɛlki iɗit sinɛ waawuguɗɛɛk, in ŋaarkɛɛ nɔ kusɛɛ boŋɛɛ.'

⁷ "Saaɓak ŋaararɓa raŋana peetak gɛɛnɛ baŋɛ nɛ ragadir ola gɛŋk sigɔ ɗaawurŋɔŋk.

⁸ Nɛɓa peetak sigɛ gaagɛyɛk tonur sigaaga ɗegerar ɛɛkik kɛ, 'Laararkɔɔ tine ola sigɔ ɗaawurŋɔŋk in tin gijɛɛ gaaji.'

⁹ "Nɛɓa jumurar sɛɛga peetak sigɛ ɗegerar ɛɛkik kɛ, 'Kɛɛ tine gaaji sinɔ gayɛ eteŋka a iinakaak. In kɛɛɗɛɛ sookiya nɔ kɛɛɗɛɛ ɓalkɛɛ gaaji ɛɛka noŋk.'

¹⁰ "Saaɓa kaarɗi ɓaliiɗa gaajiyak, nɛ mɛlki iɗit sinɛ waawuguɗɛɛk, nɛ peetak sigɛɓa atukun ragad ɛɛkoŋkuk kaar guugunyar wɔɔra sinaana waawanoŋk agut omoŋ, nɛ korɛɛ gode nɛɛk tuga nɛɛkiŋ.

¹¹ "Nɛ a balaaŋ mɛlɛrki peetak sigɛkan dakɛrkik nɛ tonur kɛ, 'Suumi naŋk, suumi naŋk, tay tina tuga nɛɛk.'

¹² Yakanaɓa sɛɛga tonu kɛ, 'Eekeer tona kɔnaaŋ, kaa kɔnu ɗegerɔɔn.'

¹³ "Agut sini in koorikuunɛɛ ragad ɛɛkoŋk, agut sinɔ kiir ɗegerɔɔn ɓɛɛnyɔ nɛɛk maŋk sayiti nɛɛk sinɛkoy mɛlkiɗi Tɔn Etoŋkuk.

Rɔmɛ Ijaageer Sigɔ Jiitik

¹⁴ "Kɛkar burɛ Waakoyotoŋk gayi a iɗit sinɔɓa ŋaar ɗooka omaltaak nɛ riy ijaageer gɛɛŋk nɛ sɛɛga gaɓɛ wori nɛɛk kɛnɔ nagadɗiiɗik.

¹⁵ Kaasɛɓa sɛɛga a omoŋ omoŋ oko oolan nɛŋk. Gaɓɛɓa omalta biriyatɔk a kumɛɛ tuul, ma omalta kumɛɛ pɛɛy, ma omalta kumɛ omoŋ nɛ ŋaar ɗooka omalta.

¹⁶ Ŋaarɓa iɗit sinɛɓa boŋu biriyatɔk a kumɛɛ tuulk sisa nɛ nagadɗi sɛɛge nɛ laŋ biriyatɔk ɔgɔ a kumɛɛ tuul.

¹⁷ Maɓɔrɛ iɗit sinɛɓa boŋu biriyatɔk a kumɛɛ pɛɛyk nagadɗi nɛ laŋ biriyatɔk ɔgɔ a kumɛɛ pɛɛy.

¹⁸ Mayakana iɗit sinɛɓa boŋu biriyatɔk a kumɛ omoŋɔŋk, ŋaar nɛ kɔwu wori suumi nɛɛkik ɗooka.

¹⁹ "Nɛɓa mɛlki suumi ijaageer gɛɛŋkik saadiɓa kegeeɗik ɔɔtɛ sinɔɔnɛ jeeɗoŋɔŋk baŋiya, nɛ riy ijaageer gɛɛŋk nɛ ikomu wori sinɛɓa gaɓɛ sɛɛgak.

²⁰ Wideerɓa ɛɛk iɗit sinɛɓa boŋu biriyatɔk a kumɛɛ tuulk a lak biriyatɔk ɔgɔ a kumɛɛ tuul nɛ tonu suumiya nɛɛka kɛ, 'Suumi naakɛ, gaɓunkanta biriyatɔk a kumɛɛ tuul isi laŋakan biriyatɔk ɔgɔ a kumɛɛ tuul.'

²¹ "Nɛɓa tongeeɗ suumi nɛɛkɛ kɛ, 'Ijaaginkɔ a liki, iin ijaagen sinɔ mentan ɛ ŋaadɛɛŋɔŋk. Agut sinɔnu ŋaadiɗɛɛ ant sinɔɔnɛ tɛmŋɔŋkuk, suumakɔɔnu ant sinɔɔnɛ obiiŋɔŋk, waɗik guugunyu yaakata suumi nookuk.'

²² "Nɛ wideer ɛɛk iɗit sinɛɓa boŋu biriyatɔk a kumɛɛ pɛɛyk nɛ tongeeɗ kɛ, 'Suumi naakɛ, gaɓunkanta biriyatɔk a kumɛɛ pɛɛy, isi laŋakɔ biriyatɔk ɔgɔ a kumɛɛ pɛɛy.'

²³ "Nɛɓa tongeeɗ suumi nɛɛkɛ kɛ, 'Ijaaginkɔ a liki, iin ijaagen sinɔ mentan ɛ ŋaadɛɛŋɔŋk. Agut sinɔnu ŋaadiɗɛɛ ant sinɔɔnɛ tɛmŋɔŋkuk. Suumakɔɔnu ant sinɔɔnɛ obiiŋɔŋk, waɗik guugunyu yaakata suumi nookuk.'

²⁴ "Nɛ wideer ɛɛk iɗit sinɛɓa boŋu biriyatɔk a kumɛ omoŋɔŋk, nɛ tonu suumiya nɛɛka kɛ, 'Suumi naakɛ, ɗegera kɛ iin iɗit sinɔ kalkalŋɔŋk, ɗootiɗiikin soodiɓa kiiɗin soowuɗitik ɛ tolɗiikin soodiɓa kiiɗin kɛɛtiɗiitik.

²⁵ Agut sini ɓurakanni, nɛkan kɛɛɗa kɔɔwa wori nook ɗooka isi wori nook.'

²⁶ "Nɛɓa jumurgeeɗ suumi nɛɛkɛ kɛ, 'Iin ijaagen sini ŋɛɛwɛnŋɔŋk ɛ dɔɔtɛk, ɔkɔnkan ɗegerin kɛ ɗootiɗiika soodiɓa kiiɗa soowuɗitik ɛ tolɗiika soodiɓa kiiɗa kɛɛtiɗiitikiŋ,

²⁷ gunkan gaɓun wori naak godeya baŋkiyoŋk, nɛ saa mɛlkiɗak gaɓunta a sinɛkan laŋiiɗɛɛk.

²⁸ "In boŋɛɛ wori nɛɛk nɔ gaɓɛɛ eta sinaana lak biriyatɔk a kumɛɛ ɗibɛɛ aarink.

²⁹ Iɗit sinɛ lakik siipigiɗɛkoyŋ ɓɔɔkaageeɗkoyŋ, ma iɗit sinɛ kiiɗɛk boŋkuɗɛɛkoy aasi sinɛ lakikiŋ.

³⁰ In boŋiirɛ ijaagen sini badtank nɛ oriirɛɛ nyuugura sinaana ar walasik, lakɛkoy saadi duri a ɗama ŋedakoŋk.

Pirdi Sinɛkoy Pedi Ɗookoŋk

³¹ "Saakoy mɛlkiɗ Tɔn Etoŋk sɛɛn a wosɛytaanak gɛɛŋk baŋɛ eemɛyɔɔn nɛɛkɛk, nɛkoy dokuɗe barsum nɛɛkɛ eemɛyɔɔnoŋk.

³² Nɛkoy tolɗi joop ɗookoŋk baŋɛ Sɛɛne taamɛkɛ, nɛkoy sɛŋk pakati joop sigɔ ɓɔɔkaaŋɔŋk oko sini pakatiiɗ irtaan jiŋkuyɛ a kemtek.

³³ Arikoy a ɛtɛr jiŋkuyɛ gɛɛnɛ ɗiɗikakɛ gɛɛnɛk ma kemte gɛɛŋk kantunakɛ gɛɛnɛk.

³⁴ "Saakoyk tonukoy suumi nɛɛkɛ joopa sigaaga atu ɗiɗikakɛ gɛɛnɛkik kɛ, 'Iinak sigɛɓa kɔnu geeti Baabɛɛk, in kusɛɛ, nɔ moonɛɛ burɛ sinɛɓa kɔna ragadɛɛ a tukiɗi saaɓa riiɓeeɗɛɛ ɗook.

³⁵ Agut sinɔ lakaɓa ŋaawu nɛɓati gijeer ɗamaŋ, lakaɓa paar nɛɓati gijeer maawuŋ, eetɓa koonat nɛɓati boŋiiriŋ.

³⁶ Ɓɛɛlaɓa konaan nɛɓata kadiɗikariŋ, goraɓa nɛɓati igoriiriŋ, korkoɗɛɛɓati nɛɓati lɛɛwɛɛriŋ.'

³⁷ "Tonurgeeɗkoy joop sigɛ mentaana taamɛkɛ Waakoyotoŋk saakoyk kɛ, 'Suumi naŋk, lakinɓa ŋaawu nɛɓani dɛnii nɔɓani gijii ɗama okoɗ? Maŋk lakinɓa paar nɛɓani dɛnii nɔɓani gijii maawu okoɗ?

³⁸ Iinɓa koonat nɛɓani dɛnii nɔɓani boŋii okoɗ? Maŋk ɓɛɛlinɓa konaan nɛɓani dɛnii nɔɓana kadiɗikii okoɗ?

³⁹ Maɓɔrɛ gorunɓa maŋk korkoɗɛɛɓani nɛɓani dɛnii nɔɓani lɛɛwii okoɗ?'

⁴⁰ "Jumurkoy sɛɛga suumi nɛɛkɛ kɛ, 'Eekeer tona kɔnaaŋ, any sinɛɓa ijaagiir manyaakaka eeta sigeega balaatuŋɔŋk omaltaak itoɓa ijaagiir eeta.'

⁴¹ "Saadi baŋiya tonukoy joopa sigaaga atu kantunakɛ gɛɛnɛkik kɛ, 'Iinak koonykaanak inte wideerɛɛ ɛɛk sɔ. In kɛɛɗɛɛ maɗa sinaanakoy nɔkoy nɔkoyk sinaanaɓa ragadɛɛ setana a wosɛytaanak gɛɛŋkik.

⁴² Agut sinɔ lakaɓa ŋaawu nɛɓati kiir tigii ɗama, lakaɓa paar nɛɓati kiir tigii maawu.

⁴³ Eetɓa koonat nɛɓati kiir boŋiiɗ, ɓɛɛlaɓa konaan nɛɓata kiir kadiɗiit, goraɓa ɛ ɓati korkoɗɛ nɛɓati kiir lɛɛwɛɛt.'

⁴⁴ "Jumurargeeɗkoy sɛɛk kɛ, 'Suumi naŋk lakinɓa ŋaawu maŋk lakinɓa paar, iinɓa koonat maŋk ɓɛɛlinɓa konaan, gorunɓa maŋk korkoɗɛɛɓani nɛɓani dɛnii nɔɓani kii tokony okoɗ?'

⁴⁵ "Saakoyk tonukoy sɛŋk sɛɛga kɛ, 'Eekeer tona kɔnaaŋ, any sinɛɓa kiir ijaagɛ manyaakaka eeta sigeega balaatuŋɔŋk omaltaak itoɓa kiir ijaagɛ eeta.'

⁴⁶ "Kaarkoy sigi goopana sinaanakoy nɔkoyk ma joop sigɛ mentaana taamɛkɛ Waakoyotoŋkuk kaar wɛɛŋaka sigaagakoy nɔkoy nɔkoyk."