Maatiyoos 24 - Kuumeet Sinɔ Tɔɔnuk Ad Majaŋeeroŋk

Yaaŋtan Eme Sinɛkoy Pediyaak

¹ Saaɓa Yeese guugunykuɗ walasa Godeey sinaanɛ Geetitank nɔ ŋaark, nɛɓa nomtaanak gɛɛnɛ wideetar ɛɛk son lak sɛɛnik kɛnɔ yaaŋɛrgeeɗ Gode sinɛ Geetitank a godeyik sigɛ atu sɛɛne tookɛɛtak.

² Yakanaɓa sɛŋk tonu sɛɛga kɛ, "Dɛnɛɛri any sini baŋɛŋ? Eekeer tona kɔnaaŋ, kikoy dakɛ giɗe giɗet raŋk a kir dumamanit nɔ kir aalɗiit, aalɗikoy godeyi baŋɛŋ."

³ Saaɓa Yeese arkiɗ beeɗit kurkum Dɛbirɛ Jɛytik raŋk, nɛɓa nomtaanak gɛɛnɛ wideetar ɛɛk mowan son lak sɛɛnik, nɛ tonurgeeɗ kɛ, "Tonute tina, any sini ɓɛɛlɛkoy okoɗ? Mɛlɛɛ nook a pedi ɗookoŋk yaaŋtan nɛɛk jikon?"

⁴ Nɛɓa Yeese jumur sɛɛga kɛ, "In koorɛɛ ɛɛk kɛnɔ mokoy kɔnu iɗit omaay ari a badɛɛriŋ.

⁵ Mɛlɛrkikoy joop a ɓɔɔkaaŋ tiriyaakɛ gaanɛk kɛ, 'Eet Keresee,' nɛkoy arir joop a ɓɔɔkaaŋ a babadarŋ.

⁶ Tiyɛɛrkoy koŋgoy kaarinoŋk a waasiyɛ kaarinoŋk, agut sinɔ dɛyɛɛɗ a gayɛr ola sigiŋɔŋk, nɛ kat ŋaatɛɛ. In ki gayɛ pedi nɛɛkɛk.

⁷ Ŋaararkoy joop joope raŋk a suumi suumii raŋk, nɛ kaarariŋ, lakɛkoy ŋaawu a yike ɗookoŋk nyonitaakɛ sigɔɔgɛ ɓɛɛlɛr kundiyaakɛk.

⁸ Ege sini baŋɛ, rakatɛ tuktan nɛɛk sinɔ ito suusuwi amɗ ɓartɛɛtoŋk.

⁹ "Saakoyk gaɓɛrkoy kɔnu joop rakatɛya, ɓokootarkoy kɔnuŋ ɓooyurkoy kɔnu joop baŋɛ agut tiriya gaaŋk.

¹⁰ Joop a ɓɔɔkaaŋ kaadɛrkoy ŋaadiyɛ gɛŋk gagaɓikoy ɛkanɛɛkɛ gɛŋk, kaararkoyŋ.

¹¹ Ŋaararkikoy joop pɛrkaakoŋk sigɔ nyonkaanakik a ɓɔɔkaaŋ, joop a ɓɔɔkaaŋ arɗikoy a tikiɗiikɛɛŋ.

¹² Saloorkoy mɛyin joop sigɔ ɓɔɔkaaŋɔŋkuk agut ɓɔɔkaaka tikiyɛɛkoŋk.

¹³ Ma iɗit sinɔkoy ɓaŋkaawur mɛlɛɛɗa pediyaak bɔdɛkoyŋ.

¹⁴ Waasɛɛkoy Pɛɛni sini Ɓɛlkɛɛstank burɛ Waakoyotoŋkuk ɗoo baŋɛ, kɛnɔkoy dakɛ a misikiri joopa ɗookoŋk baŋɛ, nɛkoy ɓaane saadi mɛlki pedtan nɛɛk.

¹⁵ "Oko sinɛɓa toniiɗ iɗit pɛrkaakoŋk Danielk, saakoyk dɛnɛɛrkoy any sinɔ ŋɛɛwɛnŋɔŋk sinɔ ɓooyu Waakoyotuk a ɛtɛ nyon sinɔɔnɛɓa geetɛŋɔŋk." In koɓuku iɗit sinɛ ambabɗik sini.

¹⁶ Saakoyk joop sigɛ atu ɗook Yuudaak, inkoy gonar kurkumɛɛka.

¹⁷ Iɗit sinɔkoy ar godeey nɛɛkɛ ajeerantik katkoy worworiiki kɛnɔ boŋku ɓolaaturu gɛɛŋk godeey tak.

¹⁸ Iɗit sinɔkoy ar taawoyk, katkoy weeriik baŋiya kɛnɔ boŋu abii nɛɛk.

¹⁹ Durikoy ɗoŋikɛ sigaagɛ joopa sigaaga laki amtunɛk a joopa sigaaga ŋeŋeetunuk.

²⁰ In ɗanɗamaakɛɛ kɛnɔ mokoy ar togon noŋk baŋgii maŋk waawuy Sambatɛyoŋk.

²¹ Saakoyk lakɛkoy rakatɛ sinɔ obiiŋɔŋk sinɔ inɓa kɛɛ a tukiɗi saaɓa riiɓeeɗ Waakoyot ɗook nɔ mɛlɛɛɗa ɓɛɛnyɔwasek, ɛkoy ɓɔrɛ ɔɗɔɔka kɛɛ sinɔ ito sɛɛnik.

²² Ɔkɔnkoy ɗoŋ sigɛ kir dinykaŋ, gunkoy kɛɛ iɗit sinɔ bɔdɛk. Yakanakoy dinyatuŋ ɗoŋi sigɛŋ agut joop sigɛɓa daam Waakoyotuk.

²³ Saakoyk ɔkɔnkoy kɔna tonu iɗit omaay kɛ, 'Isi Keresee seedik!' Maŋk 'Ɔsɔ sooy!' kat ŋaadɛɛ.

²⁴ Agut sinɔ ŋaararkikoy Kereseyak sigɔ nyonkaanakik a joop pɛrkaakoŋk sigɔ nyonkaanakik. Ɔkɔn gayɛ sɛɛgaŋ, arir a tikiɗi joop sigɛɓa daamɛɛkiŋ, ijaagir sɔɔriyɛ a ola sigɔ reemɗigeeɗ ɓayaayk sigɔ boobɛrŋɔŋk.

²⁵ In dɛnɛɛko, tonaɓa kɔna jeemɛ any baŋɛŋ.

²⁶ "Ɔkɔnkoy kɔna tonɛɛ kɛ, 'Ɔsɔ Keresee ar paatonk,' nɛ kat kɛɛɗɛɛ, ɔkɔnkoy kɔna tonɛɛ kɛ, 'Ɔsɔ Keresee ar nyon sinɔɔnɛ dugaaŋɔŋk,' nɛ kat ŋaadɛɛ.

²⁷ Oko sini dɛnɛɛɗɛɛ nyaalan dari a nyaalɛ goyse mɛlkiɗ waawuyk mɛlɛɛɗa gɔɔtaase ɗiirirgeeɗ waawuyk ɓɛɛlɛkoy ɓɔrɛ mɛlɛ Tɔɔn Etoŋkuk oko sinɛk.

²⁸ Tolɗi sɔɔliilaŋɛk soodi lakiɗɛ any sinɔkɔ rɛrŋɔŋkuk.

²⁹ "Sisa ɗoŋikɛ sigaagɛkoy rakatɛyoŋk baŋiya, kɔjurkukoy waawuy kikoy gaamit ɛyɛn pɛɗɛrka, ɗiirarkikoy maryɔ dari, yikiɗiikoy ɓaŋkawukaata sigɛ atu darikiŋ.

³⁰ "Saakoyk dɛnɛɛkoy sɔɔriyɛ Tɔɔn Etoŋkuk dari, kuɗerkoy joop ɗookoŋk baŋɛ, dɛnɛrkoy Tɔɔn Etoŋk saakoy mɛlkiɗi dari gumoy ɓaŋkawukaat a eemɛyɔɔn sinɔɔnɛ obiiŋɔŋkuŋ.

³¹ Sɛɛn wosɛykikoy wosɛytanaak gɛɛŋk a ɗooran luuri sinɔ obiiŋɔŋkuk, tolɛrkoy joop sigɛɓa daamɛɛ sɛɛgik gɔɔteerɛɛ sigaagɛ aŋank dari kɛntɛɛ goy omalte nɔ mɛlɛɛɗa kɛntɛya gɔɔta omalta.

³² "In kɔna dakɛ kɛɛt bɛlɛɛsik a rɔmɛ a rɔɔriyɔn. Saa beetiyerɗi rɛkɛnak gɛɛnɛkik, ɛ ligimerɗi peeŋɔk gɛɛnɛkik nɛ sisa ɗegerari kɛ wɔɔŋku baŋgi.

³³ Nɛ ɓɔrɛ saakoy dɛnɛrɗɔ ola sigi baŋɛk, in ɗegerɛɛ kɛ wɔɔŋku, ɔɔtɛ sinɛkoy mɛlkiɗ Tɔn Etoŋkuk jɛt a ar tugaat.

³⁴ Eekeer tona kɔnaaŋ, nɔkoy dusanɛɛɗɛ sini baŋɛ joop sigi ɓɛɛlɛr sisɔk kirkoy badɛ baŋɛ.

³⁵ Ɗeyirkoy ɗook a dariŋ, mayakana Pɛɛni naak kikoy ɗeyi adaktan.

³⁶ "Kɛɛ iɗit sinɔkoy ɗeger ɓɛɛnyɔ sinɛkoyk a sayiti sinɛkoyk, kɛygun wosɛytaanak dariyoŋk kɛygun Tɔɔn nɛɛk ɗegeerakoy Ɛpɛn dakɛɗa.

³⁷ Oko sinɛɓa ɓɛɛlɛɛɗ eme Noohk, ɓɛɛlɛkoy ɓɔrɛ eme Tɔɔn Etoŋkuk oko sinɛk.

³⁸ Eme sinaanɛɓa yeeyeyoŋk ɔɗɔɔkɛ mɛlɛɛɗa ɗoŋika sigaagaɓa Nooh guugunyɗu emɗa sinɔɔna obiiŋɔŋkuk, joop ɗamiiɓa ɛ utiɗi, boboŋiɓa ɛ wawawar.

³⁹ Kirɓa ɗegerɔɔn kɛ ɓɛɛlɛkɔɔ ɛk nɔ mɛlɛɛɗa nɔɓa sɛɛg gaalirɗi nɔɓa sɛɛg diilerɗik baŋɛk, ɓɛɛlɛkoy ɓɔrɛ mɛlɛ Tɔɔn Etoŋkuk oko sinɛk.

⁴⁰ Saakoyk joop a pɛɛy atukoy taawoy, nɛkoy boŋɛɛ om ma omaay dakɛŋ.

⁴¹ A jartiyatɔk a pɛɛy atukoy giyɛ, nɛkoy boŋɛɛ om ma omaay dakɛŋ.

⁴² Agut sini "In koorɛɛ, agut sinɔ kirɗɔ ɗegerɔɔn ɓɛɛnyɔ sinɛkoy mɛlkiɗ Suumi noŋkuk.

⁴³ In koɓɛɛ sini. Ɔkɔn ɗeger ɗuma godeya kɛ mɛlkikɔɔ agalt kaalt sayitii sineeneŋ, gun ɓeɗi nɛ koorɛ gode nɛɛk kɛnɔ kat ŋuulɛɛ.

⁴⁴ Agut sini in ɓɛlkuunɛɛ ragad ɛɛkoŋk. Mɛlkikoy Tɔn Etoŋk sayitii sinɔɔnɛkɔ kiir koɓiiɗik.

⁴⁵ "Ijaagen kɛ wooɗ sinɔ ŋaadɛɛŋɔŋk ɛ ɗeger ɛɛkik, sinɛkoy daam suumi nɛɛkɛ ijaageerɛ gɛɛnɛk kɛnɔ sɛɛga gaɓɛ ɗama nɛŋk ɔɔtɛ nɛɛkɛkik?

⁴⁶ Ijaagen sinɔkoy mɛlki suumi nɛɛkɛ, nɛ dɛnɛ a kɔ ijaag oko sinɛkik geetitan.

⁴⁷ Eekeer tona kɔnaaŋ, daamkoy suumi nɛɛkɛ ijaagen sinɛ worii nɛɛkɛ baŋɛ raŋk.

⁴⁸ Mayakana ijaagen sinɛ ɔkɔn ŋɛɛwɛnŋ ɛ tonu ɓayaay nɛɛkɛ kɛ, 'Beeɗiirkɔɔ suumi naakɛŋ,'

⁴⁹ ɛ tuke tiɗiŋa saakomak gɛɛŋk ɔgɔ sigɔ ijaageerk ɛ ɗami ɛ utiɗi a tɔpɔytaanakiŋ,

⁵⁰ sɛɛn mɛlkikoy suumi nɛɛkɛ ɓɛɛnyɔ sinɔɔnɛkɔ ki koɓiiɗik a sayitii sinɔɔnɛkɔ ki koɓiiɗik.

⁵¹ Goopkoy ijaagen sinɛ a ɓaŋkawuŋ, milkikoy nɛɛk a joop sigɔ gayar joop sigɔ mentaanaŋɔŋkuk, lakɛkoy saadi duri a ɗama ŋedakoŋk.