Maatiyoos 20 - Kuumeet Sinɔ Tɔɔnuk Ad Majaŋeeroŋk

Rɔɔriyaaɗ Yeese Rɔmɛ Ijaageer Taawa Wɛynik

¹ Burɛ dariyoŋk gayi a iɗit sinɔ ŋaarki gibi kɛnɔ daam ijaageer taawa wɛynik.

² Mɛyigeeɗɓa a ijaageer gɛɛŋk kɛnɔ koyu sɛɛga waawuy sinɔɔnɛ omoŋɔŋk koyi waawuy sinɔ omoŋɔŋkuk, nɛ sɛɛg wosɛyɛ taawa sinaana wɛynik.

³ "Nɛ ŋaarki romiɗ ma sayitiyɛ jiit, nɛ laŋki joop ɔgɔ sigɔ kɛɛ sɛɛge ijaagik a ɛtɛtɛɗar nyon gabiyeyoŋk.

⁴ Nɛ tonu sɛɛga kɛ, 'In ɓɔrɔ kɛɛɗɛ ijaagɗikɛ taawoy naakɛ wɛynik koyakɔɔ kɔna koyi sinɔ ɓɛɛlɛ kɛ ɗɔmk.' Nɛɓa sɛɛk kaarŋ.

⁵ Nɛɓa sɛŋk ŋaarki, sayitiyɛɛkɛ sigɔɔgɛ tula om a sigɔɔgɛ tula aŋank, nɛ ijaag oko sinɛkɔŋk.

⁶ Ŋaarkiɓa ɔɔtɛ sinɔɔnɛ sayitiyɛ aarin a omoŋ, nɛ laŋki joop ɔgɔ sigɔ ɛtɛtɛɗar nyon gabiyeyoŋkuk. Nɛ kɔɔniy sɛɛg kɛ, 'ɛtɛtɛɗari waawuy baŋɛ a kɔne kɛɛ ijaag agut jikon?'

⁷ Nɛɓa sɛɛk tonurgeeɗ kɛ, 'Sanii iɗit sinɔ tin daamŋɔŋk.' Nɛɓa tonu sɛɛga kɛ, 'In ɓɔrɔ kɛɛɗɛ ijaagɗikɛ taawoy naakɛ wɛynik.'

⁸ Saaɓa kɔjururkuɗuk, nɛɓa tonu ɗuma sinɛ taawa wɛynik eta sinaana ikomu ijaageer gɛɛŋkik kɛ, Tiri ijaageer baŋɛ a tukiɗi sigaagɛkan mɛlɛrki baŋiyaak, nɔ mɛlɛɛɗa sigaagakan mɛlɛrki tukik nɔ koyun sɛɛga wori nɛŋk.'

⁹ Nɛɓa widerki ɛɛk ijaageer sigɛkan daamɛɛ sɛɛg ɔɔtɛ sinɔɔnɛ sayitiyɛ aarin a omoŋɔŋk, nɛ boŋur koyi waawuy sinɔ omoŋɔŋk baŋɛk sɛɛg a omoŋ omoŋ.

¹⁰ Saaɓa widerkiɗ ɛɛk joop sigɛkan daamɛɛ sɛɛg tukik, koɓurkɛɓa kɛ laŋirkɔɔ koyi sinɔ kaalɛŋɔŋk. Yakanaɓa koyɛ sɛɛga koyi waawuy sinɔ omoŋɔŋk.

¹¹ Saaɓa boŋurɗu wori nɛɛkik, nɛɓa noonoga agut ɗumaat,

¹² a tonurgeeɗ kɛ, 'Joop sigikan daamɛɛ sɛɛg pediyaak ijaagɗikɔ a sayiti omoŋ dakɛɗa, a eteŋk sigikɔ bɔɔlaakii a ijaag waawuy nɛɛk baŋɛk, akɔ toolɛ tin waawuyk anɛ tina koyɗiikin a rɔmaatuŋ ɛk?'

¹³ "Nɛɓa sɛŋk ɗuma tonu ijaagenta sinaana omalta kɛ, 'Tekaan naakɛ, kɛɛ any sinɔ kɔnu tikeeɗak, moko kanto mɛyigiɗii a eet kɛnɔ ijaagɗikin koyiiɗa sinɔɔna waawuy omoŋɔŋk?

¹⁴ Boŋu ɔɔtɛ nook nɔ ŋaarin, ɗɛya a gaɓa eta sinaanakɔ mɛlki pediyaak a ɛtɛ oko sinɛkɔ gaɓa iinak.

¹⁵ Kaa oolɛ a ijaaga worii naakɛ any sinɛ ɗɛyakiŋ? Maŋk agut sinɔ mentankiɗaŋɔŋk, nɛta arin amɗ a ɓukuuruŋ?'

¹⁶ "Agut sini joop sigɛ baŋiyeerk ɔɗɔweerkoy, ma joop sigɛ ɔɗɔweerk baŋiyeer koy."

Tonu Yeese Ɔɔtɛ Rer Nɛɛkik Agut Jiiteen Nɛɛk

¹⁷ Saaɓa Yeese ŋaarɗi Yorsaleemak, nɛɓa boŋu nomtaanak gɛɛŋk sigɛ aarin a pɛɛyk mowan, nɛ tonu sɛɛga gopɛ tak kɛ,

¹⁸ "Sisɔ ŋaari Yorsaleema, gaɓɛɛkɔɔ Tɔɔn Etoŋk ɔɗɔweera tapa ŋaadiyɛɛkoŋk a rɔɔriytaanaka higi Muuseek, nɛkɔɔ sɛɛk pɛrɛdɛrɗi ret.

¹⁹ Gaɓɛɛkɔɔ joopa sigaaga moko Ayuuduk, nɛkɔɔ rɛɛsɛrgeeɗiŋ, ɛ ɗiŋer mermeɗ, nɛ laalawarŋ. Nɛkɔɔ ŋaarki ɗoŋikɛ sigɔɔgɛ jiitik ret walasa."

Rɔɔriyaaɗ Yeese Ɔɔtɛ Tɔkɔny Joop Ɔgɔɔk

²⁰ Saadi baŋiya wideerɓa ɛɛk ɛmɛsa tɔɔmɔka Jɛbdiyoosuk sɛɛn a tɔɔmɔk gɛɛŋk son lak Yeeseek. Nɛ ugume sɛɛne taamɛkɛ, nɛ kalɛyi kɛnɔ ijaaggeeɗ any a omoŋ.

²¹ Nɛɓa Yeese tongeeɗ kɛ, "Ɗɛyin jikon?" Nɛɓa sɛŋk tongeeɗ kɛ, "Arita tɔɔmɔk gaaŋk sigi moojakik pɛɛyk kɛnɔkoy beeɗ omaay ɗiɗikakɛ goonɛk, ma omaay beeɗ kantunakɛ goonɛk burɛɛ nookɛ."

²² Nɛɓa Yeese tonu sɛɛga kɛ, "Kiir ɗegerɔɔn any sinɛ kalɛyiirik. Oolɛɛr a boŋiir rakatɛ sinɔ ito sinɛkɔɔ laŋkaakiŋ?" Nɛɓa sɛɛk tonurgeeɗ kɛ, "Ooliiŋ."

²³ Nɛɓa Yeese tonu sɛɛga kɛ, "Eekeerɛ oolɛɛr a boŋiir rakatɛyɛ sigɔ ito sigɛkɔɔ laŋka kɛ gonyuŋɔŋkuŋ, mayakana nyon sini gaɓigiɗɛkoy joop sigɛɓa sɛɛga ragadi Baabɛk, ma moko ara joop saak a beeɗir ɗiɗikakɛ gaanɛɛk a kantunakɛ gaanɛɛk."

²⁴ Saaɓa nomtaana sigɛ aarink tiyɛrɗi sinik, nɛɓa ŋadir masiikeenaka sigaaga pɛɛykiŋ.

²⁵ Nɛɓa Yeese riyiri sɛɛg baŋɛ son lak sɛɛnik, nɛ tonu sɛɛga kɛ, "Ɗegerar kɛ suumiyɛ joop sigɛ moko Ayuuduk ɗook raŋk latu ɓaŋkawukaŋ, ɔɗɔweer gɛŋk latu ɓaŋkawuka baŋɛ joope sigaagɛ ɓɔɔkaak raŋk.

²⁶ Yakana iinakɛ kɔɔr ki gayɛ a ɓɛɛlɛ oko sinikiŋ. Iinakɛ kɔɔr iɗit sinɔ kɔne ɗɛyɛ a obiiŋɔŋk in dakɛ a ijaagen noŋk.

²⁷ Iɗit sinɔ kɔne ɗɛyɛ a sɛɛn ɔɗɔwenk, in dakɛ kɔna a ijaagen sinɔ ar ɗook.

²⁸ Kusɓa Tɔn Etoŋk kɛnɔ kɔnyɗi ɛ gaɓɛ wɛɛŋa gɛɛŋk a guma agut joop sigɔ ɓɔɔkaaŋɔŋk, ma mokoɓa kɛnɔ kɔnyɛɛ sɛɛn.

Ebɔdɛ Yeese Motak A Pɛɛy

²⁹ Saaɓa Yeese a nomtaanak gɛɛŋk ŋaararɗi katamɛ Iyaarikook, nɛɓa nomɛrɗi joop a ɓɔɔkaaŋ.

³⁰ Nɛɓa saadi lakɛ motak a pɛɛy sigɔ beebeɗar gopɛ kɛntɛɛk. Saaɓa tiyɛrɗi Yeesee a ɗeyi sinaanɛk, nɛɓa ooyɛr kɛ, "Iin Tɔɔn Daawitik, Suumi naŋk, tɔkɔny tin!"

³¹ Nɛɓa sɛɛk joop sigɛ ɓɔɔkaak koykoyɛr sɛɛg kɛnɔ dakɛr kɛ many. Yakanaɓa sɛɛk ooyɛr a kaalɛŋ kɛ, "Iin Tɔɔn Daawitik, Suumi naŋk, tɔkɔny tin!"

³² Nɛɓa Yeese ɛtɛ nɛ riyiri sɛɛg, nɛ tonu sɛɛga kɛ, "Ɗɛyɛɛr a kɔna ara jikon?"

³³ Nɛɓa sɛɛk tonurgeeɗ kɛ, "Suumi naŋk, ɗɛyii a ɓuukiɗi taamɛ gaŋk."

³⁴ Nɛɓa sanɗi Yeeseya, nɛ kume taamɛ gɛŋk. Nɛ dɛnɗi sisa nɛ nomɛrɗiŋ.