Maatiyoos 19 - Kuumeet Sinɔ Tɔɔnuk Ad Majaŋeeroŋk

Rɔɔriyaaɗ Yeese Ɔɔtɛ Waawanoŋk

¹ Saaɓa Yeese toniiɗ any sini nɔɓa ruumek baŋiya, nɛɓa ŋaar Gɛlilaake nɛ kɛɛ ɗooka Yuudaak, sinaana ar ɗeesɔ gɔrɔ Yordanoosuk.

² Nɛɓa nomɛrɗi joop a ɓɔɔkaaŋ, nɛɓa ebɔdɛ sɛɛgiŋ saadi.

³ Widerkiɓa ɛɛk joop Paarisik kɛnɔ paarir, nɛɓa kɔɔniyar kɛ, "Pɛgɛdɛ higii nɔ iɗit omaay pakakati a jarti nɛɛk agut kɛygun any sinɛ ɓɛɛlɛkiŋ?"

⁴ Nɛɓa Yeese jumur sɛɛga kɛ, "Kiirɓa ambabɛɛt kɛ, 'Riiɓeɓa Waakoyot tuki nɛɛkɛ mooy a peet?'

⁵ Kiirɓa ambabɛɛt sinɛɓa tonɛɛ kɛ, 'Agut sini ŋɔrkoy iɗit ɛpɛn a ɛmɛs, nɛ lotɛr ɛɛk a jarti nɛɛk, sɛɛg ɛɛk omoŋ a getu pɛɛy.'

⁶ Sɛɛgkoy ɛɛk omoŋ seedi son, ma mokokoy pɛɛy. Agut sini kat pakati iɗit any sinɔɓa lotɛ Waakoyotuk."

⁷ Nɛɓa sɛɛk tonurgeeɗ kɛ, "Anɛɓa tonu Muuse kɛ in gaɓɛ wargatɛ pakakatoŋk iɗit omaay nɔ pakakati a jarti nɛɛk agut jikon?"

⁸ Nɛɓa Yeese tonu sɛɛga kɛ, "Dɛnɛɓa Muuse ɓaŋkawuka ɓayɛtun goŋkuk. Nɛɓa kɔna pɛgɛdɛ kɛnɔ pakakatiikar a jartiyatɔk goŋk, ma mokoɓa ɓɛɛlɛ tuki nɛɛkɛk oko sinik.

⁹ Yakana tona kɔnaaŋ, iɗit sinɔ pakakati a jarti nɛɛk makɔ kir ɗeegarɔn a mooy omk, nɔ boŋu jarti omk ibiɗiiŋ, ma ɓɔrɛ iɗit sinɛ boŋu jarti sinɛkɔ pakakatiikɛkik ibiɗiiŋ."

¹⁰ Nɛɓa nomtaanak gɛɛnɛ tonur kɛ, "Ɔkɔn ɓɛɛlɛ ɔɔtɛ baabuy a jarti nɛɛkik oko sinikiŋ, nɛ dɔɔs a kɛ boŋɗiit."

¹¹ Yakanaɓa Yeese tonu sɛɛga kɛ, "Kɛɛ iɗit sinɔ oolɛ a boŋu rɔɔriyɔn sinik joope sigaagɛɓa gaɓɛɛ sɛɛgak sɔgɔɔsɔyk.

¹² Ɓartɛɛ joop ɔgɔ a kir oolɛ a boŋɗiiŋ, ma joop ɔgɔ ari sɛɛg iɗit a kir oolɛ a boŋɗiiŋ. Lakɛ joop sigɔ kir boŋɗiitik kɛnɔ oolɛr a ijaagɗi burɛya dariyoŋk. Iɗit sinɔ oolɛ a boŋu pɛɛni sinik in boŋuɗ.

Geeti Yeese Tɔɔmɔk

¹³ Nɛɓa ɗɔkarki joop tɔɔmɔk son lak Yeeseek kɛnɔ riiɓe sɛɛge ari raŋk. Nɛɓa koykoyɛr nomtaanak gɛɛnɛ joop sigɛ ɗɔkarki tɔɔmɔk gɛɛŋkiŋ.

¹⁴ Yakanaɓa tonu sɛɛga Yeese kɛ, "In kurak tɔɔmɔk son lak eetik. Kat ɓaarɗɛ sɛɛg, agut sinɔ ege burɛ dariyoŋk joop sigɔ rikiter ɛɛk oko sinikik."

¹⁵ Nɛɓa riiɓe sɛɛge ari nɛɛk raŋk, nɛ geeti sɛɛg, nɛ ŋaar saadiŋ.

Iɗit Sinɔ Lak Worik

¹⁶ Saadi wideerɓa ɛɛk iɗit omaay son lak Yeeseek, nɛ kɔɔniy kɛ, "Rɔɔriytano, dɔɔs a ijaaga any sinɔ mentanŋɔŋk kɛ jikon nɔkoy laŋiiɗa wɛɛŋa sigɛkoy nɔkoy nɔkoyk?"

¹⁷ Nɛɓa Yeese tongeeɗ kɛ, "Kɔɔniyinte any sinɔ mentanŋɔŋk agut jikon? Mentan Waakoyo sinɛ omoŋɔŋk dakɛɗa. Ɔkɔn ɗɛyin guugunyɔn wɛɛŋaka sigaagakoy nɔkoy nɔkoykuŋ nɛ kooru sekiyɛ gɛɛŋk."

¹⁸ Nɛɓa iɗit sinɛ kɔɔniy kɛ, "Sekiyɛ wook?" Nɛɓa Yeese tongeeɗ kɛ, "Kat ɓokotɗikin, kat ibiɗiikin, kat agalɗikin, kat waasin nyon,

¹⁹ eemɛy ŋaaŋa a ɓaaɓa, poru iɗit sinɛ beeɗiir jɔkikentik oko sinɛ poriiɗin ɛɛk nookuk."

²⁰ Nɛɓa ateeny sinɛ tongeeɗ kɛ, "Kooraaɓa sekiyɛ sigi baŋɛ, anɛte in ŋayɗi omaay jikon?"

²¹ Nɛɓa Yeese tongeeɗ kɛ, "Ɔkɔn ɗɛyin a iin daktan, mak nɔ kɛɛɗin ɓalɗiikin ant sinaanɛ lakink baŋɛ nɔ gaɓun wori nɛɛk sankaanaka, laŋinkoy gati nɛɛk dari. Nɛ saadi baŋiya, kusun nɔte nomkun."

²² Yakana saaɓa iɗit sinɛ tiyɛɛɗ any sinik, nɛɓa ŋaar ma ŋadiŋ agut sinɔɓa lakiɗ wori a obiiŋɔŋk.

²³ Nɛɓa tonu Yeese nomtaanaka gɛɛna kɛ, "Eekeer tona kɔnaaŋ, morɛ ɓaŋkawu guugunyɔn burɛya dariyoŋk joopa sigɔɔga latu worikiŋ.

²⁴ Tona kɔnaaŋ kɛkar, bala sinɔ guugunyɗu tagak sinɔɔnɛ tool marpeyoŋkuk ɔɔtɛ sinɔɔnɛ gun guugunyɗu iɗit sinɔ lak worik burɛya Waakoyotoŋkuk."

²⁵ Saaɓa nomtaanak gɛɛnɛ tiyɛrɗi sinik, nɛɓa reemɗi ɓayɛtun gɛŋk jɛt, nɛ tonur kɛ, "Anɛkoy oolɛ a bɔdɛ wooɗ?"

²⁶ Nɛɓa Yeese mermen sɛɛg, nɛ tonu sɛɛga kɛ, "Ki gayɛ sini eta, mayakana Waakoyota gayɛ any baŋɛ."

²⁷ Nɛɓa Petros jumurgeeɗ kɛ, "Ŋɔrkiikɔ any baŋɛ, nɛ ne nomiiŋ. Anɛkoy laŋii jikon?"

²⁸ Nɛɓa Yeese tonu sɛɛga kɛ, "Eekeer tona kɔnaaŋ, saakoy dokiiɗiɗe Tɔn Etoŋk barsum nɛɛkɛ eemɛyɔɔnoŋk ɗook sinaanɛkoy mɛlkik tɔɔnuk, nɛkoy ɓɔrɔ dokiirɗe iinak sigɛte nomɛɛrik a iinak suumiyɛ barsumatɔkɛ eemɛyɔɔnoŋk sigɔɔgɛ aarin a pɛɛyk, nɛkoy pɛrɛdɛɛr komoyeerɛ Israeelik sigaagɛ aarin a pɛɛyk.

²⁹ Iɗit sinɛ ŋɔr nyak nɛɛk, a manyaakakik, a manyaakak sigɛ peetakik, a ɛpɛn, a ɛmɛs, a tɔɔmɔk gɛɛŋk maŋk taawa nɛɛk agut eetik baŋɛ laŋkoy a suɗaktaanak ɗibɛ, laŋkoy wɛɛŋa sigɛkoy nɔkoy nɔkoyk.

³⁰ Mayakana joop a ɓɔɔkaaŋ sigɛ ɔɗɔweerk baŋiyeerkoy, ma joop sigɛ baŋiyeerk a ɓɔɔkaaŋ ɔɗɔweer koy."