Maatiyoos 17 - Kuumeet Sinɔ Tɔɔnuk Ad Majaŋeeroŋk

Mɛɛyɛ Ɛɛk Yeeseek

¹ Ɗoŋikɛ sigɔɔgɛ tula omk baŋiya, diileɓa Yeese Petros, a Yaykoob, a manya Yaykooba Yowanis mowan, nɛ kɔtɔɔŋɛr kurkuma sinɔɔna jeeɗoŋɔŋk.

² Nɛɓa saadi mɛɛyɛ ɛɛk Yeeseek sɛɛge taamɛkɛ. Ɗaawurɓa taamɛ gɛɛnɛ a ito waawuy, nyaalɛɓa abii nɛɛkɛ a tupeeny a ito pɛɗɛrka.

³ Saaɓak kɛ gonyuŋ dɛnɛɛɓa Muusee a Eliyaas, a waawasi a Yeesee.

⁴ Nɛɓa tonu Petros Yeeseya kɛ, "Suumi naakɛ, mentan tina beeɗit seediŋ. Nɛ ɔkɔn ɗɛyin, in kɛnyii paapɛyɛ a jiit, nɛ omaay nook, ma omaay Muuseek, ma omaay Eliyaasik."

⁵ Saaɓa waasiɗiiɗi Petros sɛɛgak, nɛɓa sɛɛg miinye gumoy sinɔ ɗaawuŋɔŋk, nɛɓa gumoy nɛɛkɛ tak tiyɛɛ koŋgoy sinɔ ɗooru kɛ, "Tɔɔn naak sinɛta yaa sɛɛnek sinɛ poraak sɛɛn sini. In geleewɛɛ sɛɛna."

⁶ Saaɓa nomtaanak gɛɛnɛ tiyɛrɗi sinik nɛɓa ŋaatir jɛt, nɛ supker ɔɗɔɔkɛ gɛŋk ɗoo.

⁷ Nɛɓa Yeese widiki ɛɛk nɛ kume sɛɛg nɛ tonu sɛɛga kɛ, "In ŋaarɛɛ raŋana, kat ɓuriikɛɛ."

⁸ Nɛɓa ɓɔŋgɔɔrɛr ɛɛk nɛ mermena, nɛ kɛɛ iɗit sinɔ dɛnɛr Yeesee sɔgɔɔsɔyk.

⁹ Saaɓa ɓurɓuɗiikiɗ kurkum nɛɛkɛkik, nɛɓa Yeese tonu sɛɛga agut ɛɛk nɛɛk kɛ, "Kat lakɛ iɗit sinɔ tonurguɗɔ any sinɛkɔ dɛnɛɛrik, nɔkoy ŋaarkiɗ Tɔn Etoŋk ret walasak."

¹⁰ Nɛɓa kɔɔniyar nomtaanak gɛɛnɛ kɛ, "Nɛ rɔɔriytaanak higi Muuseek tonur kɛ dɔɔs a tɛɛnan mɛlki Eliyaas agut jikon?"

¹¹ Nɛɓa sɛŋk jumur sɛɛga kɛ, "Eekeerɛ mɛlkikoy ɔɗɔɔkɛ Eliyaas nɛkoy isiise any baŋɛ.

¹² Tona kɔnaaŋ, mɛlkiɓa Eliyaas, yakanaɓa kir ɗegerɔɔn, nɛɓa ijaagirɗi any sinɛɓa ɗɛyɛrkiŋ. Ɛkoy Tɔn Etoŋk laŋki sɛɛge rakatɛ ariit."

¹³ Saaɓak mɛlɛɓa nomtaanaka gɛɛna kɛ tonɗi sɛɛga Yeese agut Yowanis sinɛ A'aadiik."

Ebɔdɛ Yeese Tɔɔn Sinɔɓa Gaamur Wɛɛŋa Sigɔ Somkaanakik

¹⁴ Saaɓa mɛlɛrkiɗ son lak joop sigɛ ɓɔɔkaakik, nɛɓa iɗit omaay kus son lak Yeeseek. Nɛ ɛtɛ korontunɛ sɛɛne taamɛkɛ.

¹⁵ Nɛ tongeeɗ kɛ, "Suumi naakɛ, tɔkɔnyreeta tɔɔn naak, goru jɛt a rakatɛŋ jɛt. Ɗiiɗiririre maɗa ɛ ɗiiɗiriri gɔrɔwa ɓɛɛnyɔwɛ gɛɛŋk baŋɛ.

¹⁶ Ɗɔkakaayakɔ nomtaanaka goonak, yakanakɔ kir oolɛ a ebɔdɛriŋ."

¹⁷ Nɛɓa Yeese tonu sɛɛga kɛ, "Iinak joop sigi kir ŋaadiɗiitik, beeɗiikoy Eet a iinak agut omoŋ nɔkoy okoɗak? Ɓaŋkaawurakoy kɔna oolaan nɔkoy okoɗak? In ɗɔkɛ tɔɔn nɛɛk seena."

¹⁸ Nɛɓa saadi Yeese lamɛ wɛɛŋa sigɛ somkaanakik, nɛ ŋaarar toomoy nɛɛkɛŋ. Nɛɓa tɔn nɛɛkɛ bɔdɛ a tukiɗi ɔɔtɛ sinaanɛ.

¹⁹ Nɛɓa nomtaanak gɛɛnɛ wideetar ɛɛk mowan son lak Yeeseek nɛ kɔɔniyar kɛ, "Nɔ seek kiiɗi oolɛ a ɔɔyii wɛɛŋa sigɔ somkaanakŋɔŋk agut jikon?"

²⁰ Nɛɓa sɛɛga Yeese tonu kɛ, "Eekeer tona kɔnaaŋ, agut sinɔ tekerkiɗ ŋaadiyɛ goŋkuk, ɔkɔn latukari ŋaadiyɛ sigɔ ito taama saanoykuŋ, ɛ toniir kurkuma sineena kɛ, 'Ŋaari seedi nɔ kɛɛɗin soonaŋ,' nɛ kɛɛŋ. Oolɛɛr any baŋɛ."

²¹ [Mayakana sinɔ ito sinik, ŋaarki ɗanɗamɔɔn dakɛɗa."]

²² Saaɓa atukuɗ tolɛɛɗ Gɛlilaakeek, tonuɓa sɛɛga Yeese kɛ, "Gaɓɛɛkɔɔ Tɔɔn Etoŋk ariita joopoŋk

²³ ɓokoturkoyŋ, nɛkoy ŋaarki ɗoŋikɛ sigɔɔgɛ jiitik ret walasa." Nɛɓa nomtaanak gɛɛnɛ ɓakɛyɗiiŋ jɛt.

Koyi Gibiri Gode Sinɛ Geetitank

²⁴ Saaɓa Yeese a nomtaanak gɛɛŋk mɛlɛrɗi Kipirnahoomak, nɛɓa joop sigɛ boboŋar gibiri Gode sinɛ Geetitank, wideetar ɛɛk son lak Petrosuk nɛ kɔɔniyar kɛ, "Koyusu Rɔɔriytan noŋk, gibiri Gode sinɛ Geetitankiŋ?"

²⁵ Nɛɓa sɛŋk tonu sɛɛga kɛ, "Koyuŋ." Saaɓa Petros guugunyɗu godeyak, nɛɓa tuki nɛɛkɛ Yeese tonu kɛ, "Iin Simion Petros, gayina a suumiyɛ ɗookoŋk boŋur gibiri joope gɛŋk maŋk joope ɗoo omuk?"

²⁶ Nɛɓa Petros tongeeɗ kɛ, "Boŋur joope ɗoo omuk." Nɛɓa Yeese tonu kɛ, "Sisɔ kir koyɗiit joop gɛŋk.

²⁷ Yakana kɛnɔ mokɔɔ arii a sɔɔkiɗiŋ kalbiyɛ gɛŋk, mak gɔrɔwa sinoona obiiŋɔŋk nɔ oriirin kondi nook. Nɛ gaamun olt sinɛ boŋkun tuki nɛɛkɛkik, saakɔɔ ɓuukeɗin ato nɛɛkik laŋinkɔɔ wori. Nɛ boŋkun nɛ koyɗiiɗin gibiri sɛɛga agut eet a iin."