Maatiyoos 16 - Kuumeet Sinɔ Tɔɔnuk Ad Majaŋeeroŋk

Ɗɛyɛr Joop Paarisik A Joop Saaduukuk Dɛnɛɗa Sɔɔriyɛ

¹ Joop Paarisik a joop Saaduukuk wideetarɓa ɛɛk son lak Yeeseek, nɛ ɗɛyɛr paariita nɛ kɔɔniyar kɛnɔ sɛɛga yaaŋɛ sɔɔriyɛ dari.

² Nɛɓa jumur sɛɛga Yeese kɛ, "Saa ɗiirirkiɗ waawuyk nɛ toniir kɛ, 'Mentankɔɔ ɓɛɛnyɔ nɛɛkɛ alɛŋ, agut sinɔ dɛɛkiɗi dari nɛɛkɛŋɔŋk.'

³ Ma saa romiɗik, toniir kɛ, 'Ɛɛkɛkɔɔ ɓenyseŋ, agut sinɔ kɔjkuɗ dari nɛɛkɛŋɔŋk.' Dɛnɛɛr pakatiit ɓɛɛlɛt dari nɛɛkik, mayakana kiir oolɛ pakatiit any sinɛ dɛnɛɛ eme nɛɛkɛkik.

⁴ Joop eme sinik sigi ŋɛɛwɛɛŋɔŋk ɛ kir ŋaadiɗiitik ɗɛyɛr sɔɔriyɛ, mayakana kɛɛ koy sɛɛga gaamit sɔɔriyɛ ɔgɔ sɔɔriyɛɛkɛ sigaagɛɓa Yoonaasik sɔgɔɔsɔyk." Nɛɓa Yeese ŋɔr sɛɛg nɛ ŋaarŋ.

In Koorɛɛ Ɛɛk Rɔɔriyɔɔn Joop Paarisik A Joop Saaduukuk

⁵ Saaɓa nomtaanak gɛɛnɛ ekaŋɛrɗi gɔrɔ sinɛ obiiŋɔŋkuk, nɛɓa monɗi a kir diilɛ kiiwu.

⁶ Nɛɓa sɛɛga Yeese tonu kɛ, "In koɓɛɛ, in koorɛɛ ɛɛk irsook joop Paarisik a Saaduukuk."

⁷ Nɛɓa sɛɛg tonur ɛkanɛɛkɛ gɛŋk kɛ "Nɔkɔ toniiɗ oko sinikik, kaɗɛɛŋ agut sinɔ tine kiiɗɛ kiiwuk."

⁸ Yakanaɓa Yeese ɗeger any sinɛɓa tonurk, nɛ sɛɛga tonu kɛ, "Iinak sigi kɔne bitak ŋaadiyɛɛkik. Tonɗiikari ɛkanɛɛkɛ goŋk ɓakɛyɗiikari agut sinɔ kɔne kiiɗɛ kiiwakɔk agut jikon?

⁹ A in kɔna ki mɛlɛ? A in kirkɔ koɓiiɗ kiiwakɔ sigɛkan tuulk gayɛr joopa sigɔɔga kumɛɛ tuulk? Kɛ ŋayɗiikkan nɛkan ɓɔŋgɔɔrɛɛr a kantɛyɛ eger?

¹⁰ Ɛ kiir koɓiiɗ kiiwakɔ sigɛkan tula pɛɛyk sigɛkan gayɛr joopa sigɔɔga kumɛɛ aŋank? Kɛ ŋayɗiikkan nɛkan ɓɔŋgɔɔrɛɛr a kantɛyɛ eger?

¹¹ Kirkɔ koɓiiɗ kɛ moko kɔna tonɗiika agut ɗama ɛk? In koorɛɛ ɛɛk irsook joop Paarisik a Saaduukuk."

¹² Saaɓak mɛlɛɓa sɛɛga sinɔ kɛ moko sɛɛga tonɛɛ irso sinɔ gaɓɛɛ ɗamataak, ma rɔɔriyɔn sinɔ nyonk joop Paarisik a Saaduukuk.

Ŋaadi Petros Kɛ Ege Yeese Kerese Suumi

¹³ Saaɓa Yeese mɛlɛɛɗ ɗooka sinɔɔna riyɛ kɛ Pilipoos Keesaariyaak, nɛɓa kɔɔniy nomtaanak gɛɛŋk kɛ, "Riyar joop Tɔɔn Etoŋk kɛ wooɗ nɔ?"

¹⁴ Nɛɓa tonurgeeɗ kɛ, "Riyar a omoŋ omoŋ kɛ Yowanis sinɛ A'aadiik, ma ɔgɔɔk riyar kɛ Eliyaas, ma ɔgɔɔk riyar kɛ Ermiyaas maŋk joope pɛrkaakoŋk om."

¹⁵ Nɛɓa jumur sɛɛga kɛ, "Ma sɔɔkti riyar kɛ Eet nɔ wooɗ?"

¹⁶ Nɛɓa Simion Petros jumurgeeɗ kɛ, "Iin Keresee, Tɔɔn Waakoyo sinɛ Wɛɛŋak."

¹⁷ Nɛɓa tongeeɗ Yeese kɛ, "Iin tɔɔn Yoonaak Simion, iin geetitan. Yaaŋɗikɔna any sini Baabɛɛ sinɛ ar darik, ma mokokɔ buusɛ a yɛrom.

¹⁸ Tona naaŋ, iin Petros. Kɛnyakɔɔ gode Sambatɛyoŋk naak talaaɗe sineene raŋk. Kikoy lɔsɛɛɗ ɓaŋkawukaat retoŋk gode sini Sambatɛyoŋk naak.

¹⁹ Gaɓaakoyna kulpiyɛ burɛ dariyoŋk. Any sinɛ korkoɗun ɗook raŋk baŋɛ, nɛ korkortan dari. Any sinɛ woorun ɗook raŋk baŋɛ, nɛ woortan dari."

²⁰ Nɛɓa saadi baŋiya rɔɔrɔk nomtaanaka gɛɛna a ɓaŋkawuŋ kɛnɔ kat lakɛ iɗit sinɔ tonurgeeɗ kɛ sɛɛn Kereseek.

Tonu Yeese Rakatɛ A Rer Sinɛkɔɔ Laŋkik

²¹ A tukiɗi saaɓak tukeɓa Yeese toniiɗa nomtaanaka gɛɛna kɛ, "Ɗɛyɛta a kɛɛɗa Yorsaleema nɛkɔɔ laŋkaa rakatɛ sinɔ obiiŋɔŋk gutarɛyɛɛkɛ, a ɔɗɔweerɛ tapa ŋaadiyɛɛkoŋk, a rɔɔriytaanakɛ higi Muuseek, nɛkɔɔtu ɓokotur nɛkɔɔ ŋaarka ret walasa ɗoŋikɛ sigɔɔgɛ jiitik."

²² Nɛɓa Petros puruute Yeesee kɛntɛya nɛ tongeeɗ kɛ, "Suumi naakɛ, kat laŋkin any sinɔ ito sinik adaktan."

²³ Nɛɓa Yeese kolɛɛnyɛ son lak Petrosuk nɛ tongeeɗ kɛ, "Iin setan, teŋar seedi. Dakinta a gaŋtan koɓun any etoŋk, ma moko Waakoyotoŋk."

²⁴ Saadi baŋiya tonuɓa Yeese nomtaanaka gɛɛna kɛ, "Ɔkɔn lakɛ iɗit sinɔ ɗɛyɛ a nomɛ eeteekiŋ, in kaadɛ ɛɛk nɛɛk, nɔ ragad ɛɛk rakatɛya a reta nɔ nomɛ eete.

²⁵ Iɗit sinɔ ɗɛyɛ a ebɔdɛ wɛɛŋa gɛɛŋkik, sɔɔkɛ sɛɛgiŋ. Mayakana iɗit sinɔ sɔɔkɛ wɛɛŋa gɛɛŋk agut Eetik, ebɔdɛ sɛɛgiŋ.

²⁶ Iɗit ɔkɔn laŋi any sinɛ ar ɗook raŋk baŋɛ, ma ɔkɔn sanɛ wɛɛŋa gɛɛŋkiŋ nɛ kɔnyageeɗ jikon? Maŋk iɗit oolɛ a koyu ɔɔtɛ wɛɛŋa gɛɛŋkik gati kɛ jikon?

²⁷ Tɔɔn Etoŋk mɛlɛrkikoy a wosɛytaanak gɛɛŋk eemɛyɔɔn Ɛpɛnaak, nɛkoy koyu eta a omoŋ omoŋ gati nɛɛk oko ijaag nɛɛk.

²⁸ Eekeer tona kɔnaaŋ, joope sigeege ɛtɛr seedik kɔɔr a omoŋ omoŋ dɛnɛrkoy Tɔɔn Etoŋk saakoy mɛlkiɗ burɛɛ nɛɛkɛkik a in kir rerin."