Maatiyoos 14 - Kuumeet Sinɔ Tɔɔnuk Ad Majaŋeeroŋk

Rer Yowanis Sinɛ A'aadiik

¹ Saaɓak Herodis sinɛɓa ɔɗɔwen ɗoo Gɛlilaak, tiyɛɓa ɔɔtɛ Yeeseek,

² nɛɓa tonu nyukuweera gɛɛna kɛ, "Ŋaarkikɔ Yowanis sinɛ A'aadiik ret walasa. Agut sinɔ ijaag sɔɔriyɛ sigi agut sini."

³ Agut sinɔ gaamuɓa Herodis Yowanis nɛ gaɓɛ godeya korkoɗɔɔnoŋk agut jarti manyaak Pilipoosuk Herodiyadaa.

⁴ Agut sinɔ tongeeɗɓa Yowanis kɛ, "Kina higii pɛgɛdɛɛt nɔ boŋun sɛɛn."

⁵ Ɗɛyɛɓa Herodis Yowanis ɓokotiita, yakanaɓa joop sigɛ ɓɔɔkaak dɛnɛr a ito iɗit pɛrkaakoŋk, nɛɓa ɓure joop gɛɛŋkiŋ.

⁶ Saaɓa Herodis eemɛyɗi waawuy nɛɛk ɓartɛɛtoŋkuk, nɛɓa tɔn sinɔ peetik Herodiyadaak duubiye nɛ ari sɛɛn a yaageeɗiŋ.

⁷ Nɛɓa wogoygeeɗ kɛnɔ gageeɗ any sinɛ kɔɔniyɗik baŋɛ.

⁸ Nɛɓa tɔn sinɛ waasiɗi a ɛmɛs, nɛ tongeeɗ kɛ, "Gaɓunta ɔɗɔ Yowanis sinɛ A'aadiik sise a ar lokoy."

⁹ Nɛɓa suumi sinɛ sanɗiŋ, yakana agut wogoy nɛɛk a konan sigɛ sɛɛg a sɛɛnik, nɛɓa tonu kɛnɔ dusangiɗɛɛ kɔɔniyɔn nɛɛk.

¹⁰ Wosɛyɗiiɓa nɛ ar a kɛɛɗɛ yawukɛɛ ɔɗɔ Yowanisik godeey korkoɗɔɔnoŋk.

¹¹ Nɛɓa riiɓer ɔɗɔ sinɛɓa Yowanisik lokoy nɛ gaɓɛr tɔɔna sinaana nɛ boŋu tɔn sinɛ nɛ gaɓɛ ɛmɛsa.

¹² Nɛɓa nomtaanak Yowanisik mɛlɛrki nɛ boŋur buusɛ nɛɛk nɛ kɔwarŋ. Nɛ ŋaarar saadi nɛ kaar tonur any sinɛkɔ ɓɛɛlɛk Yeeseya.

Gije Yeese Ɗama Joop Sigɔ Kumɛɛ Tuulk Ɛdɛɛnak

¹³ Saaɓa Yeese tiyɛɛɗ rer Yowanisik, nɛɓa teeŋɛ emɗa nɛ ŋaar soona ɓɛɛlɛ mowank a sɛɛn mowan. Nɛɓa joop sigɛ ɓɔɔkaak tiyɛr sini, nɛ ŋaararki katamɛɛkɛ sigɔɔgɛ ɓɔɔkaaŋɔŋk nɛ nomɛrɗi derɛ.

¹⁴ Saaɓa Yeese worworiikiɗ emɗ nɛɛkɛkik, nɛɓa dɛnɛ joop sigɔ ɓɔɔkaaŋɔŋk. Nɛ sanɗigeeɗiŋ nɛ ebɔdɛ sɛɛga gortaanak gɛŋk.

¹⁵ Saaɓa kɔjururkuɗuk wideetarɓa ɛɛk nomtaanak gɛɛnɛ son lak sɛɛnik nɛ tonurgeeɗ kɛ, "Ege sini paaton sinɔ kɛɛ any sinɔ laŋiiɗɛɛkik, agut sinɔ waawuy nɛɛkɛ kɔjujururkuɗŋɔŋk. Nɛ toŋoɗar joop sigɛ ɓɔɔkaak nɔ kaar mɛndɛraka nɔ kaar ɓalirki ɗama sinɔ ɗamarŋɔŋk."

¹⁶ Yakanaɓa Yeese tonu sɛɛga kɛ, "Ki gayɛ a ŋaararŋ. In gaɓɛɛ sɛɛga sɔɔk any sinɛ ɗamark."

¹⁷ Nɛɓa nomtaana gɛɛnɛk tonurgeeɗ kɛ, "Lakii kiiwakɔ a tuul a oltiir pɛɛy dakɛɗa."

¹⁸ Nɛɓa Yeese tonu sɛɛga kɛ, "In ɗɔkɛ sinɛ ɓɛɛlɛk son lak eetik."

¹⁹ Nɛ saadi tonu kɛnɔ dokurɗe joop sigɛ ɓɔɔkaak ŋɔnyikɛ raŋk. Nɛ gaamu kiiwakɔ sigɛ tuulk a oltiir sigɛ pɛɛyk, nɛ ɓɔŋgɔɔrɛ taamɛ gɛɛŋk rakaaya nɛ geeti sɛɛgiŋ nɛ ŋapati kiiwu nɛɛk. Nɛ gaɓɛ nomtaanaka gɛɛnaak, nɛ gaɓɛr joopa sigaaga ɓɔɔkaak.

²⁰ Nɛ ɗami baŋɛ nɛ ɓooɗorarŋ, nɛɓa nomtaanak gɛɛnɛ tolɛr kootaayɔ sigɛɓa ŋayɗiikik a kantɛyɛ aarin a pɛɛy a enyaataŋ.

²¹ Joop sigɛɓa ɗamiik atuɓa kumɛɛkɛ sigɔɔgɛ tuulk aɓa kɛɛ ikomiit jartiyatɔk a tɔɔmɔk.

Ŋawiite Yeese Maawɛ Raŋk

²² Sisa tonuɓa nomtaanaka gɛɛnaak kɛnɔ teeŋɛr emɗa nɔ ɗeyirkun ɗɛɛgasɔ, ma sɛŋk dakɛ baŋiya kɛnɔ ŋɔɗur joop sigɛ ɓɔɔkaak.

²³ Saaɓa ŋɔɗurkuɗ joop sigɛ ɓɔɔkaakik baŋiya, nɛɓa kɔtɔɔŋɛ kurkuma raŋana mowan ɗanɗamɔɔna. Saaɓa kɔjururkuɗuk, sɛɛnɓa mowan saadi.

²⁴ Saaɓa arkiɗ emɗ nɛɛkɛ ayowɛɛɗ walasak, nɛɓa gowasa ɛnyɛnyɛgeeɗik ŋaarki yoŋgoy sinɔ ɓaŋkawuŋɔŋk nɛ yike emɗ nɛɛk.

²⁵ Kaalt ɔɔtɛ sineene sayitiyɛ tula aŋank a aarin a pɛɛyk kɔɔr, nɛɓa kus Yeese son lak nomtaanak gɛɛŋkik a ŋawiitik maawɛ raŋk.

²⁶ Saaɓa dɛnɛrɗi nomtaanak gɛɛnɛ a ŋawiitik maawɛ raŋk, nɛɓa ŋatir nɛ ooyɛr ɓɔɔjikent a koɓur kɛ raŋaawo.

²⁷ Nɛɓa tonu sɛɛga Yeese sisa kɛ, "In ɓaŋkaawurɛɛ. Eet, kat ɓuriikɛɛ."

²⁸ Nɛɓa sisa jumurgeeɗ Petros kɛ, "Suumi naakɛ ɔkɔn iiniŋ, nɛta tona nɔ kɔra son lak iinik maawɛ raŋk."

²⁹ Nɛɓa Yeese tonageeɗ kɛ, "Waɗik." Nɛ Petros ŋaarki emɗ nɛɛkɛ, nɛ kɔɔru son lak Yeeseek a ŋawiiteer maawɛ raŋk.

³⁰ Yakana saaɓa dɛnɛɗ ɓaŋkawuka sinɛ yoŋgoy nɛɛkik, nɛɓa ɓuriiŋ, nɛ saaɓa tukeeɗ a liilank, nɛ ooyɛ kɛ, "Suumi naakɛ, ebɔdutik."

³¹ Nɛɓa sisa Yeese ker ari nɛɛk nɛ gaamu nɛ tongeeɗ kɛ, "Iin sinine bitak ŋaadiyɛɛkik, kin ŋaadit agut jikon?"

³² Saaɓa teeŋɛrɗi Yeese a Petros emɗa nɛɛka raŋanaak, nɛɓa yoŋgoy nɛɛkɛ dakɛ kɛ many.

³³ Nɛɓa joop sigɛɓa atu emɗ nɛɛkɛ takik ugumergeeɗ, nɛ tonurgeeɗ kɛ, "Iin Tɔɔn Waakoyotoŋk a eekeeriŋ."

Ebɔdɛ Yeese Gortaanak Gensereete

³⁴ Ekaŋɛrɓa gɔrɔ sinɛ obiiŋɔŋk, nɛ mɛlɛr ɗooka Genseereetik.

³⁵ Saaɓa ɗegerarɗi joop ɗoo sinɛk kɛ Yeeseek, nɛɓa wosaaya nyonitaaka sigaaga atu tookɛɛtak. Nɛ ɗɔkarki joop sigɔ gortaanakik baŋɛ son lak sɛɛnik.

³⁶ Nɛɓa kalɛyir kɛnɔ sɛɛga pɛgɛdɛ nɔ gortaana ɓeesɛr abii nɛɛk kɛntɛ nɛɛk dakɛɗa, joop sigɛɓa kumerk baŋɛ bɔdɛrɓaŋ.