Maatiyoos 12 - Kuumeet Sinɔ Tɔɔnuk Ad Majaŋeeroŋk

Palamɗi Joop Paarisik Agut Higi Waawuy Sambatɛyoŋk Ayuuduk

¹ Saaɓak ɗoyuɓa Yeese waawuy Sambatɛyoŋk Ayuuduk sinɔɔnɛ taawa ɗamatoŋk takank, agut sinɔɓa latukuɗ ŋaawuk nomtaanak gɛɛnɛk, nɛɓa kɛtɛrki taawakeer nɛ tuker a ɗamiiŋ.

² Nɛɓa joop Paarisik dɛnɛr sini, nɛ tonurgeeɗ kɛ, "Ijaagir nomtaanak goonɛk any sinɔ kɛɛ pɛgɛdɛɛt nɔ ijaagɛɛ waawuy Sambatɛyoŋkuk."

³ Nɛɓa jumur sɛɛga Yeese kɛ, "Kiirɓa ambabɛɛt any sinɛɓa ijaag Daawit sɛɛn a joop sigɛɓa sɛɛg a sɛɛnik saaɓa latukuɗ ŋaawuk?"

⁴ Guugunyɓa Daawit godeya Waakoyotoŋk, nɛɓa ɗam nasi sinɔ geetitank sinɔɓa pɛgɛdɛɛ kɛnɔ ɗamar tapa ŋaadiyɛɛkoŋk dakɛɗak, nɛɓa ɓɔrɛ gaɓɛ joopa sigaagaɓa sɛɛg a sɛɛnik.

⁵ Maŋk kiirɓa ambabɛɛt sinɛɓa taapɛɛ higii Muuseek kɛ tapa ŋaadiyɛɛkoŋk aalɛr waawuy Sambatɛyoŋk Gode sinɔ Geetitank nɛ sɛɛga kɛɛ ikomiit a tikiyɛɛk?

⁶ Eekeer tona kɔnaaŋ, iɗit sinɔ kaalɛ Gode sinɔ Geetitank ɓɛɛlɛ seedi.

⁷ Ɔkɔnɓa ɗegerari pɛɛni sinɛɓa taapɛɛ kɛ, 'Ɗɛya saak maariyeet, ma moko ɗɛya uduŋeet.' Gunɓa kiir pɛrɛdɛɛt joope sigɔɔgɛ kir ijaagɛ tikiyɛkiŋ.

⁸ Ege Tɔn Etoŋk, Suumi waawuy Sambatɛyoŋkuk."

Ebɔdɛ Yeese Iɗit Sinɔɓa Sɛɛgiya Ari Nɛɛkɛŋɔŋk

⁹ Ŋaarɓa Yeese saadi, nɛ kɛɛ guuguny godeya tolɛɛɗoŋk Ayuuduk.

¹⁰ Lakɛɓa saadi iɗit sinɔɓa sɛɛgiya ari nɛɛkɛŋɔŋk. Ɗɛyɛrɓa joop a omoŋ omoŋ a daariyɗi Yeeseya nɛɓa kɔɔniyar kɛ, "Pɛgɛdɛɛɓa ebɔdɛɛt waawuy Sambatɛyoŋkuŋ?"

¹¹ Nɛɓa tonu sɛɛga Yeese kɛ, "Iinakɛ kɔɔr ɔkɔn lakɛ iɗit sinɔ lak jiŋkuy a omoŋɔŋkuŋ ɛ ɗiirirkiɗ utula waawuy Sambatɛyoŋkuŋ, anɛ kiiki puruuteet nɔ boŋku walasa?

¹² Nɛ iɗit ki kaalɛt jiŋkuy jɛt? Pɛgɛdɛɛɓa ijaag any sinɔ mentanŋɔŋk waawuy Sambatɛyoŋkuŋ."

¹³ Saadi baŋiya tonuɓa Yeese eta sinaana kɛ, "Ker ari nook." Nɛ iɗit sinɛ ker ari nɛɛk, nɛ bɔdɛ a ito ari nɛɛk gɔɔ sinɛ bɔdtank.

¹⁴ Nɛɓa ŋaararki joop Paarisik, nɛ waasiɗiigeeɗ sinɔ kɛ ɓokotur ɛkik.

Ege Yeese Ijaagen Sinɔɓa Daam Waakoyotuk

¹⁵ Ɗegerɓa Yeese koɓiɗa gɛŋk, nɛ ŋaar saadiŋ. Nɛɓa nomɛrɗi joop a ɓɔɔkaaŋ, nɛɓa ebɔdɛ gortaanak baŋɛ.

¹⁶ Nɛɓa rɔɔrɔk sɛɛga kɛnɔ kat waasɛr agut sɛɛn joopa.

¹⁷ Nɔ ɓɛɛlɛɛɗ sinik, dusanɛɛ pɛrka sigɛɓa tonɛɛ ete pɛrkaakoŋk Isaayase kɛ,

¹⁸ "Ege sini ijaagen naak sinɛɓa daamaak, sɛɛn sinɛ pora ata yaa Sɛɛnek. Riiɓaakoy Wɛɛŋa gaaŋk sɛɛne raŋk, laaganykoy pirdi sinɔ likik joopa sigaaga moko joop Ayuuduk.

¹⁹ Kikoy sɛŋk palamɗiit maŋk kikoy ooyan, kɛɛkoy weenta koŋgoy nɛɛk sinɔɔnɛ gopan takank.

²⁰ Kikoy ŋuulet sombal sinɔɓa jaamɛŋɔŋk, kikoy elaarɛɛt gipoy sinɔ duuŋeŋɔŋk. Ijaag sini mɛlɛɛɗa nɔkoy lɔsiɗiiɗ pirdii sinɔɔnɛ likik.

²¹ Riiɓerkoy joop sigɔ moko Ayuuduk baŋɛ ŋaadiyɛ tiriyaakɛ gɛɛnɛk."

Yeesee A Biel Jebuul

²² Saadi baŋiya diilerkiɓa joop iɗit sinɔɓa gaamur wɛɛŋa sigɔ somkaanakik sinɔ mot ɛ ki tonɗiitik son lak Yeeseek. Nɛɓa sɛŋk ebɔdɛŋ, nɛɓa iɗit sinɛ tonɗi ɛ dɛnɗi.

²³ Nɛɓa reemɗi ɓayɛtun joop sigɛ ɓɔɔkaakik baŋɛ. Nɛ tonur kɛ, "Ege sini tɔɔn Daawitik yoo?"

²⁴ Yakanaɓa tiyɛr joop Paarisik sini nɛ tonur kɛ, "Iɗit sini ɔɔyɛ wɛɛŋa sigɔ somkaanakik ɔɗɔwente sineene wɛɛŋa sigɔ somkaanak, Bieljebuule."

²⁵ Nɛɓa Yeese ɗeger koɓiɗa gɛŋk, nɛ tonu sɛɛga kɛ, "Maŋgisti sinɔ pakakat ɛɛk nɛɛkik baŋɛ ɗiiriŋ, katamɛ maŋk gode sinɔ pakakat ɛɛk nɛɛkik ki ɛtɛɗɔ.

²⁶ Ɔkɔn setan ɔɔyɛ setaniŋ, nɛ pakat ɛɛk nɛɛk. Nɛ ɔkɔn ɓɛɛlɛ oko sinikiŋ, nɛ burɛ nɛɛkɛ oolɛ a ɛtɛ ɛk?

²⁷ Ɔkɔn ɔɔya wɛɛŋa sigɔ somkaanakik Bieljebuuleŋ, anɛ tɔɔmɔk goŋk ɔɔyɛr sɛɛg wooɗe? Agut sini pɛrɛdɛrkoy sɛɛk kɔneeŋ.

²⁸ Mayakana ɔkɔn ɔɔya wɛɛŋa sigɔ somkaanakik Wɛɛŋakɛ Waakoyotoŋkuŋ, nɛ ege sini sinɔ kɛ mɛlkikɔ burɛ Waakoyotoŋk son lak iinakikiŋ.

²⁹ Maŋk oolɛ iɗit ɛk a guuguny godeya iɗit sinɔ ɓaŋkawuŋɔŋk nɔ weelɛ ɓolaatuuru gɛɛŋk makɔ tɛɛnan ki korkoɗɛɛk? Nɛkɔɔ ɓaane saadi weelɛ ɓolaatuuru gɛɛŋk.

³⁰ Iɗit sinɔ moko eet a sɛɛnik ɓooyutuŋ, joop sigɔ kir tolɗiit a eetik kɛɛtiɗiikoyŋ.

³¹ Tona kɔnaaŋ, ijaag tikiyɛɛkoŋk a nyɔɔna baŋɛ, ŋɔɗurɛɛkoy sɛɛg joopeŋ. Mayakana iɗit sinɔ nyɔɔn Wɛɛŋa sigɔ Geetitaanakik kir kiɗɛɛkoy toŋoɗ.

³² Iɗit sinɔ tonu any sinɔ ŋɛɛwɛnŋɔŋk Toomoy Etoŋk raŋk ŋɔɗurkuɗɛɛkoyŋ. Mayakana iɗit sinɔ tonu any sinɔ ŋɛɛwɛnŋɔŋk Wɛɛŋakɛ sigɔɔgɛ Geetitaanakik raŋk, kɛygun eme sineene kɛygun eme sinaanɛkoyk kir kiɗɛɛkoy toŋoɗ.

Ɗegerɛɛ Kɛɛt Taamɛkɛ Gɛɛnɛk

³³ Ɗegerɛɛ kɛɛt taamɛkɛ gɛɛnɛkik in aarɛɛ ɛɛk a kɛɛt sinɔ mentanŋɔŋk, kɛnɔkɔɔ laŋiir taamɛ sigɔ mentaanaŋɔŋk. Ma ɔkɔn ariir ɛɛk a kɛɛt sinɔ ŋɛɛwɛnŋɔŋk, laŋiirkɔɔ taamɛ sigɔ ŋɛɛwɛɛŋɔŋk.

³⁴ Iinak sigi ŋɛɛwɛkari a ito iinak kookok! Saa iinak joop sigɔ ŋɛɛwɛɛŋɔŋk, oolɛɛr a toniir any sinɔ mentanŋɔŋk ɛk? Agut sinɔ tonu iɗit ad nɛɛkɛ any sinɛkɔ enyɛɛri ɓayaay nɛɛkɛkik.

³⁵ Iɗit sinɔ mentanŋɔŋk ŋaarkiɗi ɓayaay nɛɛkɛ sinaanɛ mentanŋɔŋk any sinɔ mentanŋɔŋk, ma iɗit sinɔ ŋɛɛwɛnŋɔŋk ŋaarkiɗi ɓayaay nɛɛkɛ sinaanɛ ŋɛɛwɛnŋɔŋk any sinɔ ŋɛɛwɛnŋɔŋk.

³⁶ "Tona kɔnaaŋ, pɛɛni sinɛ tonur joop baŋɛ, kɔɔniygiɗɛɛkoy sɛɛg waawuy saakoy pirdiyoŋkuŋ.

³⁷ Any sinɛ ŋaarki pɛɛni nookɛkik mentankinkoy taamɛkɛ Waakoyotoŋk, any sinɛ ŋaarki pɛɛni nookɛkik pɛrɛdɛɛkoyneŋ."

Rɔɔriyaaɗ Yeese Sɔɔriyɛ Yoonaasik

³⁸ Tonurɓa rɔɔriytaanak higi Muuseek a omoŋ omoŋ a joop Paarisik Yeeseya kɛ, "Rɔɔriytano, ɗɛyii a dɛnii saa ijaagiɗin sɔɔriyɛkiŋ."

³⁹ Nɛɓa jumur sɛɛga Yeese kɛ, "Joop eme sinik sigi ŋɛɛwɛɛŋɔŋk a kir ŋaadiɗiitik ɗɛyɛr a dɛnɛr sɔɔriyɛ. Yakana kɛɛkoy sɛɛga gaamit sɔɔriyɛ ɔgɔ sɔɔriyɛɛkɛ sigaagɛɓa iɗit pɛrkaakoŋkuk Yoonaasik sɔgɔɔsɔyk.

⁴⁰ Oko sinɛɓa ɗeegarirkiɗ Yoonaas amɗa olt sinɔ obiiŋɔŋkuk a wawuyk jiit a kaayetun jiitik, nɛɓɔrɛ ɗeegarirkoy Tɔn Etoŋk ɗooka takana a wawuyk jiit a kaayetun jiit.

⁴¹ Waawuy sinaanɛkoy pirdiyoŋk joop Nɛnɛweek ŋaararkikoy raŋana a joop eme sinik nɛ pɛrɛdɛr sɛɛneŋ, weeriikɓa tikiyɛɛkɛ Waakoyota laaganyɔɔn Yoonaasikiŋ. Ɓɛɛlɛ seedi iɗit sinɔ kaalɛ Yoonaasik.

⁴² Waawuy sinaanɛkoy pirdiyoŋk suumi Saabaa ŋaararkikoy raŋana a joop eme sinik nɛ pɛrɛdɛr sɛɛneŋ, agut sinɔ kusɓa kɛntɛɛ ɗookoŋk kɛnɔ tiyɛ ɗegerɔn ɛɛkoŋk Salamoonuk. Ɓɛɛlɛ seedi iɗit sinɔ kaalɛ Salamoonuk.

Weeri Wɛɛŋa Sigɔ Somkaanakik Eta Takana

⁴³ "Saa ŋaararkiɗ wɛɛŋa sigɔ somkaanakik etek, nɛ weeweri a warɛr nyon imiinyoŋk sinɔɔnɛ kiiɗɛ maawuk yakana kir laŋiiɗ.

⁴⁴ Nɛ saadi tonur kɛ, 'Koy muurii godeya sinaanakan arkiɗiik.' Nɛ murarki nɛ laŋirki gode nɛɛk a ɓɛɛlɛ sɔkɔn a kan a gaalɛɛ a ŋaɗɛɛŋ.

⁴⁵ Nɛ ŋaarar saadi nɛ kaar ɗɔkarki wɛɛŋa sigɔ somkaanakik a tula pɛɛy sigɔ kaalɛr sɛɛgik. Nɛ guugunyar eta sinaana nɛ beeɗirŋ. Nɛ ɔɔtɛ ɓɛɛlɛt iɗit sinɛk kaalɛ sinɛkan jeemɛk, agut sinɔ ɓɛɛlɛkoy ɓɔrɛ ɓartiyɛɛkɛ sigeege ŋɛɛwɛɛŋɔŋk raŋk oko sinɛk."

Manyaakak Yeeseya A Ɛmɛs

⁴⁶ Saaɓa Yeese arkiɗ waasiyɛɛkɛ joopa sigaaga ɓɔɔkaakik, nɛɓa ɛtɛr ɛmɛsa a manyaakak walas a ɗɛyɛr a waasiɗiiŋ.

⁴⁷ Nɛɓa iɗit omaay tongeeɗ kɛ, "Ɛtɛtɛɗar ŋaaŋa a masookoyak walas a ɗɛyɛr a waasiɗiikariŋ."

⁴⁸ Nɛɓa Yeese jumurgeeɗ kɛ, "Indii wooɗ? Ma manyaakak eeta wooɗak?

⁴⁹ Ijoopɗiɓa son lak nomtaanak gɛɛŋkik, nɛ tonu sɛɛga kɛ, "Indii a manyaakak eeta sɛɛg sigi.

⁵⁰ Ege iɗit sinɛ ijaag ɗɛyan Baabɛɛ sinɛ ar darik manya eeta sinɔ mooyk ɛ manya eeta sinɔ peetik ɛ indii."