Maatiyoos 10 - Kuumeet Sinɔ Tɔɔnuk Ad Majaŋeeroŋk

Nomtaanak Sigɛ Aarin A Pɛɛyk

¹ Riykɓa Yeese nomtaanak sigɛ aarin a pɛɛyk son lak sɛɛnik, nɛɓa gaɓɛ sɛɛga ɓaŋkawuka kɛnɔ ɔɔyɛr wɛɛŋa sigɔ somkaanakik, ɛ ebɔdiɗi goriɗakɛ a meetanakɛ baŋɛ.

² Tiriya wosɛytaanak sigɛ aarin a pɛɛyk sɛɛg sigi, tuki nɛɛkɛ Simion sinɛ riyɛ kɛ Petrosuk a manya Indiriyaas, tɔɔmɔk Jɛbdiyoosuk Yaykoob a Yowanis,

³ Pilipoos, Bɛrtɛloomiyos, Toomaas, Maatiyoos sinɛ yayawu worik, tɔɔn Ilpiyoosuk Yaykoob, Taadiyoos,

⁴ Simion sinɛɓa palamɗi agut ɗoo nɛɛkik, Askorotu Yuudaa sinɛɓa gaɓɛ Yeesee gumakeera gɛɛnaakik.

⁵ Wosɛyɛɓa Yeese joop sigi aarin a pɛɛyk a tonu sɛɛga kɛ, "Kat kɛɛɗɛɛ son lak joop sigɛ moko Ayuuduk, kat guugunyɛɛ katamɛya joop Sɛmaariyaak.

⁶ Mayakana in kɛɛɗɛɛ son lak joop Israeelik sigɛ badɛr a ito jiŋkuyɛk.

⁷ Nɛ saa kaarɗɔk in rɔɔriyaakɛɛ a toniir kɛ, 'Wɔɔŋku burɛ dariyoŋkuŋ.'

⁸ In ebɔdɛɛ gortaanak, in ɓɔŋgɔrkɛɛ reteer, in ebɔdɛɛ joop sigɛ gorur dɔɔɓɔyk, in ɔɔykɛɛ wɛɛŋa sigɔ somkaanakik, in gaɓɛɛ any sinɔkɔ boŋiir sɔkɔnk, oko sinɛkɔ boŋurɗɔɔk.

⁹ Kat diilɛɛ worke, maŋk attari, maŋk biri kisikɛ goŋk.

¹⁰ Kat diilɛɛ gopɛ noŋk kosɛ, maŋk abii wonoyɛtoŋk, maŋk saamɛyɛ, maŋk gumboy, agut sinɔ ijaagen ɗɛygeeɗ ɗamaŋ.

¹¹ "Saakɔɔ guugunyarɗɔ katamɛya maŋk mɛndɛra omaltaak, in warɛɛ iɗit sinɔ kɔnu boŋu yaakatik, nɛ in beeɗɛɛ saadi nɔkɔɔ ŋaararɗɔɔk.

¹² Saakɔɔ guugunyarɗɔ godeya nɛɛkaakik, in digoyɗiirɛɛ.

¹³ Ɔkɔn sɛɛk ɗɛyɛr digoy noŋkuŋ, nɛ in mɛlɛ sɛɛga. Ma ɔkɔn sɛɛk kir ɗɛyɛŋ, nɛ in murku iinaka.

¹⁴ Ɔkɔn lakɛ iɗit sinɔ kɔnu ki boŋiiɗkiŋ maŋk ki geleewɛɛt rɔɔriyɔɔna noŋkuŋ, nɛ in tɛntɛŋɛɛrɛ duudur sinɛ latukari derakɛk saa ŋaararkiɗɔ godeey maŋk katamɛɛ sinaanɛk.

¹⁵ Eekeer tona kɔnaaŋ, ɓeny sinaanɛkoy pirdiyoŋk katamɛ sinɛ balaakoy pirdi nɛɛkɛ sinɛɓa ɗoo Sɛdoom a Gɛmooraak.

Rakatɛ Sinɔ Obiiŋɔŋk Sinɛkoy Mɛlkik

¹⁶ "In tiyɛɛko, wosɛya kɔnu okokɔ jiŋkuyɛkoŋk tuwookaka kɔɔra. Agut sini in ɗegerɛɛ ɛɛk oko kooko ɛ in rikitɛɛ ɛɛk oko kulɓeer.

¹⁷ In koorɛɛ ɛɛk, agut sinɔ gaɓɛrkoy kɔnu joop pirdiya godeya pirdiyoŋk ɛkoy kɔnu ɗiŋer sinɔɔnɛ godeyi gɛŋk tolɛɛɗoŋk Ayuuduk.

¹⁸ Diilerkoy kɔnu joop agut eet son lak joop sigɛ lowur ɗook a son lak tapaak. Waasɛɛrkoy ɔɔtɛ naak sɛɛge a joope sigaagɛ moko Ayuuduk taamɛkɛ.

¹⁹ Saakoy kɔnu gaɓɛrɗik, kat ɓakɛyɗiikɛɛ kɛ 'Toniikɔɔ ɛk? Jumuriikɔɔ ɛk?' Gaɓɛɛkoy kɔna saakoyk sisa any sinɛ toniirkiŋ.

²⁰ Tonɗiikoy kɔne Wɛɛŋa Baaɓa noŋkuk, ma moko iinak.

²¹ "Gaɓɛkoy iɗit manya reta, gaɓɛkoy iɗit tɔɔn nɛɛk reta. Kirkoy tiiɗit tɔɔmɔ ɛpɛnaakaka a ɛmɛsakaka arirkoy a ɓokootɛɛ sɛɛgiŋ.

²² Ɓooyurkoy kɔnu joop baŋɛ agut sinɔ nomɛrɗɔ eetik. Mayakana iɗit sinɛkoy nomɛ eete pediyaak bɔdɛkoyŋ.

²³ Saakoy kɔnu epayɗɛ katamɛɛ omalteek, in gonɛɛ katamɛya omalta. Eekeer tona kɔnaaŋ. Kiir koy rɔmɛɛɗ katamɛɛ Israeelik baŋɛ mɛlɛɛɗa nɔkoy mɛlkiɗ Tɔn Etoŋkuk.

²⁴ "Ki kaalɛɛt bartaan rɔɔriytan nɛɛk, ki kaalɛɛt ijaagent suumi nɛɛk.

²⁵ Ɔkɔn gayi bartaan a rɔɔriytan nɛɛkiŋ ma ijaagen a suumi nɛɛkiŋ gaygeeɗiŋ. Ɔkɔn riyar ɗumaat kɛ ɔɗɔwen wɛɛŋa sigɔ somkaanakik sinɔ riyɛ kɛ Biel jebuulkiŋ, nɛ joop wɛy nɛɛkik kir tirii oko sinik a kaalɛŋ ɛk?

In Ɓurɛɛ Waakoyo

²⁶ "Kat ɓurɛɛ joop. Any sinɔɓa miinyɛɛŋɔŋk ki dakɛ a koy kɛɛ yaaŋɛɛt. Any sinɔɓa dugɛɛŋɔŋk ki dakɛ a koy kɛɛ ɗegerɔɔn.

²⁷ Any sinɛ kɔna tona nyuugurk, in waasɛɛ pɛɗɛrkaat. Any sinɛ tiyɛɛr yɛɛyɛgɛɛtik, in laaganyɛɛ soodi pɛɗɛɛɗŋɔŋk.

²⁸ Kat ɓurɛɛ joop sigɛ ɓokotur buusɛ ma kir oolɛ a ɓokotur wɛɛŋaŋɔŋk. Ma in ɓurɛɛ Waakoyo sinɛ oolɛ a sɔɔkɛ wɛɛŋa a buusɛ siioolek.

²⁹ Wesiyak a pɛɛy mokoto ɓalɗiiɗɛɛ a tɛm gati nɛɛkɛŋ? kiiki sɛɛge ɗiirin ɗooka sinɔ omoŋɔŋk a kiiɗɛ ɗɛyan Ɓaaɓa noŋkuk.

³⁰ Ikomtaanak aasi ami goŋk ɔɗɔwoŋk baŋɛ a kɛɛ sinɔ dakɛ omoŋɔŋk.

³¹ Kat ɓuriikɛɛ. Kaalɛɛr wesiyak sigɔ ɓɔɔkaaŋɔŋkuŋ.

³² "Iɗit sinɔ waasɛ eet joope taamɛkɛk, waasaakoy ɓɔra sɛɛn taamɛkɛ Baabɛɛ sinɛ ar darikiŋ.

³³ Ma iɗit sinɔ kaaɗɛ eet taamɛkɛ joopoŋkuk, kaaɗakoy ɓɔra sɛɛn taamɛkɛ Baabɛɛ sinɛ ar darikiŋ.

³⁴ "Kat koɓiir kɛ kusaakan a yaaka ɗooka raŋana. Kusaakan saak a kaarn, ma moko yaaka.

³⁵ Kusaakan kɛnɔ pakata iɗit a ɛpɛn, ma ɓɔrɛ tɔɔn sinɔ peetik a ɛmɛs, ma ɓɔrɛ jarti a keerɛɛk nɛɛk.

³⁶ Dakɛrkoy eta joop wɛy nɛɛkik a gumaakeer.

³⁷ "Ki gayɛ eeta, iɗit sinɔ poru ɛpɛn maŋk ɛmɛs a kaalɛ eetik. Ki gayɛ a nomtan naak, iɗit sinɔ poru tɔɔn nɛɛk sinɔ mooyk, maŋk sinɔ peetik a kaalɛ eetik.

³⁸ Ki gayɛ eeta iɗit sinɔ ki ragadɛ ɛɛk rakatɛya a reta, nɔ nomɛ eeteekiŋ.

³⁹ Iɗit sinɔ kol wɛɛŋa gɛɛŋkik sɔɔkɛ sɛɛgiŋ. Mayakana iɗit sinɔ sɔɔkɛ wɛɛŋa gɛɛŋk agut eetik laŋkoy sɛɛgiŋ.

⁴⁰ "Iɗit sinɔ boŋu kɔnu yaakatik boŋu eet. Iɗit sinɔ boŋu eet yaakatik boŋu Baabɛɛ sinɛkanti wosɛykik.

⁴¹ Iɗit sinɔ boŋu iɗit pɛrkaakoŋk tiriyaakɛ iɗit pɛrkaakoŋkuk, laŋkoy gati iɗit pɛrkaakoŋkuk. Iɗit sinɔ boŋu iɗit sinɔ mentanŋɔŋk tiriyaakɛ iɗit sinɔ mentanŋɔŋkuk, laŋkoy gati iɗit sinɔ mentanŋɔŋkuk.

⁴² Eekeer tona kɔnaaŋ. Iɗit sinɔ gaɓɛ maawu sigɔ salowɛrŋɔŋk a gɔtɛ omoŋɔŋk joope sigeege temetuŋɔŋk omaltaak agut sinɔ sɛɛn nomtan naakik, kikoy sanɛɛɗ gati nɛɛk."