Lukaas 7 - Kuumeet Sinɔ Tɔɔnuk Ad Majaŋeeroŋk

Ebɔdɛ Yeese Ijaagen Ɔɗɔwen Amaasiniyɛ Sigɔ Ɗibɛk

¹ Tonuɓa Yeese any sini baŋɛ joope sigaagɛ ɓɔɔkaak taamɛkɛ nɛ ruume nɛ ŋaar Kipirnahooma.

² Lakɛɓa saadi iɗit Roomuk sinɔ ɔɗɔwen amaasiniyɛ sigɔ ɗibɛk nɛɓa goru ijaagen nɛɛk sinɛ poruk jɛt a ito rɛrŋ.

³ Nɛ saaɓa tiyɛɛɗ ɔɔtɛ Yeeseek, nɛɓa wosɛygeeɗ gutarɛyɛ Ayuuduk a omoŋ omoŋ kɛnɔ kaar kalɛyir nɔ kus ebɔdɛ ijaagen nɛɛk.

⁴ Nɛɓa sɛɛk kaar son lak Yeeseek, nɛ kaar kalɛyir a ɓaŋkawuŋ kɛ, "Ɗegeera a ijaaggiɗin any siniŋ,

⁵ agut sinɔ poru iɗit sini joop gaŋkiŋ, sɛɛn sinɛkan tina kɛny gode tolɛɛɗoŋk Ayuuduk."

⁶ Nɛɓa Yeese kaar a sɛɛg agut omoŋ, nɛ saaɓa wɔɔŋkuɗ nyaka nɛɛkaakik, nɛɓa ɔɗɔwen sinɛ amaasiniyɛ sigɔ ɗibɛk wosɛyki piraakak gɛɛŋk son lak Yeeseek a tonu kɛ, "Suumi naakɛ, moko eet iɗit sinɔ ɗegeera a guugunyun godeya naakaaŋɔŋk, kat kusun son lak eetik.

⁷ Ɛɓɔrɛ eet iɗit sinɔ kaa gayɛɛ a kɔra son lak iinŋɔŋk. Tonu pɛɛni a omoŋ dakɛɗa bɔdɛkɔɔ ijaagen naakɛŋ.

⁸ Tiiɗika ɓɔra ɔɗɔweera gaanaaŋ, laka amaasiniyɛ eete ɗɛɛgaaŋ. Ɔkɔn tona omalta kɛ, 'Makiŋ', nɛ kɛɛŋ, ma ɔkɔn tonguɗa kɛ, 'Waɗiŋ', nɛ kusuŋ. Ɔkɔn tona ijaagenta naaka kɛ, 'Ijaag any siniŋ', nɛ ijaagiŋ."

⁹ Saaɓa Yeese tiyɛɛɗ sinik, nɛɓa reemɗi ɓayɛ nɛɛkɛkiŋ. Nɛɓa kolɛɛnyɛ, nɛ tonu joopa sigaagaɓa nomɛrɗik kɛ, "Tona kɔnaaŋ, inɓa aasi Israeele kiika laŋiiɗ iɗit sinɔ omoŋɔŋk sinɔ lak ŋaadiyɛ sigɔ ɓaŋkaawar oko sinikik."

¹⁰ Weeriiɓa joop sigɛɓa wosɛykɛɛk waa, nɛ kaar laŋirki ijaagen sinɛ a kɔ bɔdukuŋ.

Boŋku Yeese Ret Walasa Tɔɔn Jarti Sinɔɓa Rɛr Baabuy Nɛɛkɛŋɔŋk

¹¹ Saadi baŋiya kɛ gonyuŋ, kɛɛɓa Yeese katamɛya sinɔɔna riyɛ kɛ Nayink, nɛɓa kaar nomtaanak gɛɛnɛ a joop sigɔ ɓɔɔkaaŋɔŋk agut omoŋ.

¹² Saaɓa Yeese mɛlɛɛɗ saana wɔɔŋku, saana guugunyɗɛ katamɛya nɛɛkaakik, nɛɓa ŋaarak joop sigɔ beeɗiyerki iɗit sinɔkɔ rɛrŋɔŋkuk katamɛɛ nɛɛkɛk. Tɔɔn sinɛɓa rɛrk sɛɛnɓa ɛmɛse omoŋ, maɓa ɛmɛsa rɛr baabuy nɛɛkɛŋ. Joop sigɛ katamɛ nɛɛkik a ɓɔɔkaaŋ sɛɛgɓa a sɛɛn.

¹³ Nɛɓa dɛnɛ Suumii, nɛ sanɗigeeɗ nɛ tongeeɗ kɛ, "Kat kuɗun."

¹⁴ Nɛɓa wideer ɛɛk nɛ kume beeɗi nɛɛk, nɛ joop sigɛ beeɗiyɗik ɛtɛrŋ. Nɛɓa Yeese tongeeɗ kɛ, "Iin ateeny sini tonaana, kɛ ŋaari raŋana!"

¹⁵ Nɛɓa iɗit sinɛɓa rɛrk ŋaar raŋana nɛ beeɗ kɛ sɛm nɛ tuke waasiyɛ! Nɛɓa Yeese boŋu nɛ gaɓɛ ɛmɛsa.

¹⁶ Nɛɓa joop baŋɛ ɓuri jɛt nɛ pɔɔsɛr Waakoyo a tonur kɛ, "Ŋaarkikɔ eteŋkɛ kɔɔr iɗit pɛrkaakoŋk sinɔ obiiŋɔŋk. Kuskɔ Waakoyot kɛnɔ kɔnyɛ joop gɛɛŋk.

¹⁷ Tiyɛɛɓa ɔɔtɛ sini agut Yeeseek sinɔɔnɛ ɗoo Yuudaak baŋɛ a ɗokan sigɛ ɓɛɛlɛr tookɛɛtak baŋɛ.

Kɔɔniyɔn Yowanis Sinɛ A'aadiik

¹⁸ Nomtaanak Yowanisik kaarɓa tonur Yowanisa any sini baŋɛ. Nɛɓa Yowanis riyiri nomtaanak gɛɛŋk a pɛɛy,

¹⁹ nɛ wosɛyɛ sɛɛg son lak Suumi Yeeseek kɛ in kɛɛɗɛ kɔɔniyɛ kɛ, "Iin iɗit sinɛɓa tonɛɛ kɛ mɛlkikoyŋɔŋk, maŋk in koorii iɗit om?"

²⁰ Nɛɓa sɛɛk kaar son lak Yeeseek nɛ kaar tonurgeeɗ kɛ, "Wosɛyki tin Yowanis sinɛ A'aadiik son lak iinik kɛ, 'In kɛɛɗɛ kɔɔniyɛ kɛ iin iɗit sinɛɓa tonɛɛ kɛ mɛlkikoyŋɔŋk, maŋk in koorii iɗit om?' "

²¹ Nɛɓa Yeese ɔɔtɛ saa ebɔdɛ joop goriɗakɛ a meetanakɛ sigɔɔgɛ ɓɛɛlɛr kundiyaakɛk, ɛɓa ɔɔyku wɛɛŋa sigɔ somkaanakik, tayɗiɓa taamɛ motakoŋk a ɓɔɔkaaŋ.

²² Nɛɓa Yeese jumur sɛɛga kɛ, "In kɛɛɗɛ tonɛɛ Yowanisa any sinɛkɔ dɛnɛɛrik a sinɛkɔ tiyɛɛrik, dɛnɗi motak, ŋawiiter nyɔŋtaanak, bɔdɛr joop sigɔ gorur dɔɔɓɔyk, tiiɗi joop sigɔɓa kir tiiɗitik, ŋaararki joop sigɔɓa rɛrarŋɔŋk ret walasa, waasɛɛ Pɛɛni sinɔ Ɓɛlkɛɛstank sankaanaka.

²³ Geetitan iɗit sinɔ ki toŋoɗ ŋaadiyɛ eeteek."

²⁴ Saaɓa ŋaararɗi nomtaanak Yowanisik, nɛɓa Yeese tuke toniɗa agut Yowanis joopa sigaaga ɓɔɔkaak kɛ, "Ŋaararkɔɔ paatoona kɛnɔ dɛnɛɛr jikon? Iɗit sinɔ weewer koɓi nɛɛk a ito sombal sinɔ yike yoŋgoyk?

²⁵ Maŋk ŋaararkɔɔ kɛnɔ dɛnɛɛr jikon? Iɗit sinɔkan kadi abiyak sigɔ obi gati nɛɛkɛŋɔŋk, joop sigɔkan kadir abiyak sigɔ obi gati nɛɛkɛŋɔŋk a beeɗir a yaaŋɔŋk, ɓɛɛlɛr godeey tapaakoŋkuŋ.

²⁶ Ŋaararkɔɔkan kɛnɔ dɛnɛɛr jikon? Iɗit pɛrkaakoŋk? Ii, tona kɔnaaŋ, iɗit sinɔ kaalɛ iɗit pɛrkaakoŋkuk.

²⁷ Taapɛɛɓa Wargatɛɛ Waakoyotoŋk agut sɛɛn kɛ, 'Wosɛyɛɛrakoy wosɛytan naak iine ɔɗɔɔkɛ, sinɔkoy isiise gopan nook iine ɔɗɔɔkɛ.'

²⁸ Tona kɔnaaŋ, joope sigaagɛɓa ɓartɛɛ sɛɛg peetek kɔɔr, kɛɛ iɗit sinɔ kaalɛ Yowanisik. Mayakana Burɛɛ Waakoyotoŋk iɗit sinɛ bala joope baŋɛk kaalɗiŋ."

²⁹ Joop sigɛkan tiyɛr pɛɛni sini Yeeseek baŋɛ, a aasi kir dakɛ joop sigɔ yayawar worik, aadiɓa sɛɛg Yowanis nɛ ŋaadir kɛ ege gopan Waakoyotoŋk eekeer.

³⁰ Mayakana joop Paarisik a joop sigɔ ɗegerar higi Muuseek kiɓa sɛɛg Yowanis aadi, nɛ kir boŋiiɗ any sinɛ sɛɛga tonu Waakoyotuk.

³¹ Tonuɓa Yeese kɛkar kɛ, "Joop eme sinik rɔɔma sɛɛg a jikon? Gayi a jikon?

³² Gayi a tɔɔmɔk sigɔ beebeɗar nyon gabiyeyoŋk, nɛ ririyi ɛkanɛɛkɛ gɛŋk kɛ, 'Gotii kɔna seetɛɛ, nɛ kiir duubiyeet. Ariikɔna googiyoo, nɛ kiir wuɗaat.'

³³ Agut sinɔ kusaakɛɓa Yowanis sinɛ A'aadiik a ki ada ɗama ɛ ki tuu ogool wɛynik, nɛɓa joop tonur kɛ, 'Lak nɔ wɛɛŋa sigɔ somkaanakik.'

³⁴ Kusɓa Tɔn Etoŋk a ɗami ɛ utiɗi ogool wɛynik, nɛɓa joop baŋɛ tonur kɛ, 'Ɗami a boobɛŋ ɛ utiɗi a boobɛŋ, poru joop sigɔ yayawar worik a tikitaanak. [Ɗegerɛ ɗegerɔn etoŋk ant sinaanɛ laŋɛɛ ijaagik.']

³⁵ Ɗegerɛ ɗegerɔn ɛɛkoŋkuk sooy lak tɔɔmɔk gɛɛŋkik baŋɛk."

Buke Jarti Omaay Yeesee Reyaaye

³⁶ Wɔɔrɛɓa iɗit omaay Paarisik Yeesee kɛnɔ ɗamar ɗama agut omoŋ. Kɛɛɓa sɛŋk waa iɗit sinɛ Paarisik, nɛ beeɗ nyon ɗamatoŋk.

³⁷ Lakɛɓa jarti om sinɔ tikitank sinɔɓa beeɗ katamɛɛ sinaanɛk, nɛ saaɓa tiyɛɛɗ ɓɛɛlɛt Yeeseek woy iɗit Paarisik nyon ɗamatoŋkuk, nɛɓa kus a ɗɔku reyaay sinɔ obi gati nɛɛkɛŋɔŋk belkaatii.

³⁸ Nɛɓa ɛtɛ Yeeseye baŋi derakɛ gɛɛnɛ jɔk, nɛ kuɗe nɛ sawɛ derak gɛɛŋk pileetakɛ gɛɛnɛk. Nɛ poosɛ amikɛ gɛɛnɛk, nɛ samɓoy derak gɛɛŋk nɛ buke reyaaye.

³⁹ Saaɓa dɛnɛɛɗ iɗit Paarisik sinɛɓa wɔɔrɛ sɛɛnik any sinik, nɛɓa koɓu ɓayaay nɛɛkɛ kɛ, "Ɔkɔn iɗit sini iɗit pɛrkaakoŋk, gun ɗeger jarti sinɛkɔ kume sɛɛnik kɛ wooɗ, ɛ gun ɓɔrɛ ɗeger kɛ iɗit sinɔ tikitank sinɔ ɓɛɛlɛ ɛkik!"

⁴⁰ Nɛɓa Yeese tongeeɗ kɛ, "Iin Simion, lakɛ any sinɔɔna tonaŋɔŋk." Nɛɓa sɛŋk jumurgeeɗ kɛ, "Rɔɔriytaano, tonuta."

⁴¹ Nɛɓa Yeese tongeeɗ kɛ, "Lakɛɓa joop a pɛɛy sigɔɓa masɛr wori ete sinɔɔnɛ gaɓɛ masɛ woriyoŋkuk. Nɛɓa omaay lakiɗ biriyatɔk a ɗibɛɛ tuul, ma pɛɛyeen nɛɛkɛ, lakiɗ biriyatɔk a pɔlpɔlɛ joop pɛɛyk a aarin.

⁴² Agut sinɔɓa sanɛrɗ wori sinɛ koyɗiiɗiŋɔŋk, nɛɓa ŋɔɗur sɛɛge gati nɛŋk a getu pɛɛy. Nɛ joope sigaagɛɓa masiɗiik pɛɛyk sɛɛn won sinɛ poru sɛɛn a kaalɛŋɔŋk?"

⁴³ Nɛɓa Simion jumurgeeɗ kɛ, "Koɓa kɛ iɗit sinɛɓa ŋɔɗurkuɗ gati a obiiŋɔŋk." Nɛɓa Yeese jumurgeeɗ kɛ, "Jumurunkɔ a liki."

⁴⁴ Nɛɓa kolɛɛnyɛ jartiya sinaana nɛ tonu Simiona kɛ, "Dɛnin jarti siniŋ? Guugunyakɔ godeya nookaaŋ, nɛkɔ aasiti kin tigii maawu sigɔ aadiiɗa derakik, maakɔ sɛŋk sawɛ derak gaaŋk pileetakɛ gɛɛnɛ nɛ poosɛ amikɛ gɛɛnɛk.

⁴⁵ Kinkɔ seŋkti samɓoyɛ, maakɔ sɛŋk ki nyɛyɛ samɓoyɔn derak gaaŋkik a tuke saakɔ guugunykuɗak.

⁴⁶ Kinkɔ seŋk toɗony ɔɗɔ naak diikuy, maakɔ sɛŋk buke derak gaaŋk reyaaye.

⁴⁷ Agut sini tona naaŋ, porutuŋ jɛt ranyjɛɛkɔ tikiyɛ gɛɛŋk a ɓɔɔkaaŋ. Mayakana iɗit sinɔ ranyjɛɛɗɛ tikiyɛ gɛɛŋk a tɛmŋɔŋk porɛɛ a balaaŋ."

⁴⁸ Nɛɓa Yeese tonu jartiya sinaana kɛ "Ranyjɛɛ kɔne tikiyɛ gooŋkuŋ."

⁴⁹ Nɛɓa koɓur joop sigɛɓa beeɗir nyon ɗamatoŋk agut omoŋɔŋk ɓayɛtunɛɛkɛ gɛŋk kɛ, "Wooɗ sini aasi ranyjɛ tikiyɛɛk?"

⁵⁰ Nɛɓa sɛŋk tonu jartiya sinaana kɛ, "Ebɔdɛr kɔnu ŋaadiyɛ goonɛŋ. Ŋaari digoya."