Lukaas 23 - Kuumeet Sinɔ Tɔɔnuk Ad Majaŋeeroŋk

Wideer Ɛɛk Yeese Pirdiya Taamɛka Pilatoosuk

¹ Joop sigɛɓa tolɗi saadik baŋɛ ŋaararɓa nɛ diiler Yeesee Pilatoosa.

² Tukerɓa a daariyɗiigeeɗ a tonur kɛ, "Iɗit sini laŋkiikɔ a ari joop gaŋk a babadarŋ. Ɓaariiɗ a katnɔ koyɛ gibiri Keesaara ɛ tonu kɛ, 'Eet ɔɗɔwa naaka Keresee, Tapaɗ.'

³ Nɛɓa Pilatoos kɔɔniy kɛ, "Iin Tapaɗ Ayuuduk?" Nɛɓa Yeese tongeeɗ kɛ, "Ii, oko sinɛ toniiɗink."

⁴ Nɛɓa Pilatoos tonu ɔɗɔweera tapa ŋaadiyɛɛkoŋk a joopa sigaaga ɓɔɔkaak kɛ, "Kii kaa saak ete sineene laŋiiɗ tikiyɛ."

⁵ Yakanaɓa sɛɛk tonur a ɓaŋkawuŋ kɛ, "Iɗit sini rɔririyiikan sinɔɔnɛ ɗoo Yuudaak baŋɛ, a tukiɗi Gɛlilaake nɔ mɛlɛɛɗa seena Yorsaleema, a boŋku joop ooyaana."

Wideer Ɛɛk Yeese Taamɛka Herodisik

⁶ Saaɓa Pilatoos tiyɛɛɗ sinik, nɛɓa kɔɔniya kɛ, "Ege sini iɗit Gɛlilaak?"

⁷ Saaɓa Pilatoos ɗegerɗi kɛ kuskɔ Yeese ɗook Herodisik, nɛɓa wosɛyɛ son lak sɛɛnik saaɓak arɓa sɛŋk Herodis Yorsaleeme.

⁸ Dɛnɛɓa Herodis Yeesee nɛɓa yaageeɗiŋ jɛt, agut sinɔɓa tiitiyɗi ɔɔtɛ nɛɛk, nɛɓa lak ŋaadiyɛ sigɔ ɗɛyɛ a dɛnɛ saa ijaagiɗ sɔɔriyɛɛk.

⁹ Kɔniniyɓa Herodis Yeesee a kɔɔniyɔɔnak ɓɔɔkaaŋ, yakanaɓa sɛŋk kɛɛ any sinɔ jumurgeeɗik.

¹⁰ Ɔɗɔweer tapa ŋaadiyɛɛkoŋk a rɔɔriytaanak higi Muuseek ɛtɛtɛɗarɓa saadi nɛɓa daariyɗigeeɗ a ɓaŋkawuŋ.

¹¹ Herodis a amaasiniyɛ gɛɛŋk daraayɛrɓa ɛ nyɔɔnar. Nɛ gaɓɛrgeeɗ ɛɛka abii eemɛyɔɔnoŋk nɛ wosɛyɛr kɛkar son lak Pilatoosuk.

¹² Herodis a Pilatoos latuɓa jeemɛ ɗaakan kɔɔr, nɛɓa popori ɓeny sinaanɛŋ.

Pɛrɛdɛɛ Yeesee Rer

¹³ Tolɛɓa Pilatoos ɔɗɔweer tapa ŋaadiyɛɛkoŋk a suumiyɛ a joop sigɛ ɓɔɔkaak,

¹⁴ nɛ tonu sɛɛga kɛ, "Ɗɔkarkɔɔkɔ iɗit sini son lak eetik kɛ boŋkunɔ joop anta sinɔɔna ŋɛɛwɛnŋɔŋk. Nɛkɔ mermena iinakɛ taamɛkɛ, nɛ kɛɛ tikiyɛ sigɔ laŋkiɗaak.

¹⁵ Maakɔ ɓɔrɛ Herodis kɛɛ any sinɔ laŋkiɗik nɛkɔ wosɛyki kɛkar son lak eteŋkik. Oko sini dɛnɛrɗɔɔk iɗit sini kɛɛ any sinɔkɔ ijaag a ɗegeera a rɛrgiɗɛɛŋɔŋk.

¹⁶ Agut sini nɛkɔɔ goopa nɛ wooriraaŋ."

¹⁷ [Nɔɓa toniiɗ sinik agut sinɔɓa Ba'aale nɛɛkɛ ɗɛyɛɛɗ a woorkɛ sɛɛga korkortan sinɔ omoŋɔŋk.]

¹⁸ Nɛɓa joop baŋɛ ooyɛr agut omoŋ kɛ, "In ɓokotɛɛ iɗit sini, ma in tina woorkɛɛ Bɛrbaan."

¹⁹ (Bɛrbaan iɗit sinɔɓa korkoɗɛɛ maɓa boboŋku ɗaakan katamɛɛ tak joopaak, ɛɓa ɓokokot joopuk.)

²⁰ Agut sinɔɓa Pilatoos ɗɛyɛɛɗ paariita Yeeseek nɛɓa tonu sɛɛga kɛkar.

²¹ Yakanaɓa sɛɛk ooyɛr kɛ, "Laalawuk! Laalawuk!"

²² Nɛɓa Pilatoos tonu sɛɛga jiiteen nɛɛkɛ kɛkar kɛ, "Jikon? Ijaagkɔ Iɗit sini tikiyɛ kɛ jikonak? Nɛ tonu sɛɛga kɛ 'Kiikiɗakɔ laŋiiɗ tikiyɛ sigɔ ɗegeera a rɛrgiɗɛɛŋɔŋk, Nɛkɔɔ goopa nɛ wooriraaŋ.' "

²³ Yakanaɓa sɛɛk kalɛyir a ɗooruŋ a ɓaŋkawuŋ kɛnɔ laalawɛɛ, ɓaŋkawuɓa ooyan nɛŋkiŋ.

²⁴ Agut sini ruumeɓa Pilatoos any sinɛɓa kalɛyirk kɛnɔ ijaagɛɛ.

²⁵ Woorkuɓa Bɛrbaan sinɛɓa korkoɗɛɛ maɓa boboŋku ɗaakan joopaak ɛɓa ɓokokot joopuk oko sinɛkan kɔɔniyarɗik, ma gaɓɛ sɛɛga Yeesee oko sinɛkan ɗɛyɛrɗik.

Laalawɛɛ Yeesee

²⁶ Saaɓa diilerɗi Yeeseek, nɛɓa laŋirki, iɗit Kɛrenaak sinɔ riyɛ kɛ Simionuk, a kus kɛntɛɛ katamɛya nɛ remɛrgeeɗ laalawutan nɛɛk kɛnɔ ɓataki kɛnɔ nomɛ Yeesee.

²⁷ Nomɛrɗiɓa baŋi joop sigɔ ɓɔɔkaaŋɔŋk, a jartiyatɔk sigɔ kuɗer a paaŋir kokomeerik.

²⁸ Yakanaɓa Yeese kolɛɛnyɛ son lak sɛɛgik nɛ tonu sɛɛga kɛ, "Iinak jartiyatɔk Yorsaleemuk, kat kuɗɛɛ agut eet, ma in kuɗɛɛ agut ɛkan goŋk a tɔɔmɔk goŋk."

²⁹ Mɛlkikɔɔ ɔɔtɛ sinɔkɔɔ tonurɗɔ kɛ, 'Tersikaanak a amtun sigɔɓa kir ɓartɛɛtik, a apatiir sigɔɓa kɛ sɛɛg aapokɔɔnuk geetitaanak.

³⁰ Saakoyk tonurkoy joop kurkumɛɛka kɛ, 'In tina ɗirkɛɛ raŋana!' Tonurkoy jumkuka kɛ, 'In tin dugɛɛ!'

³¹ Sisɔ ɔkɔn ijaagir keet sinɔɔnɛ dodooŋɔŋk oko sinikiŋ, nɛ sinaanɛ paalkik ijaagir jikon?"

³² Diilerɓa joop ɔgɔ a pɛɛy sigɔɓa sɔɔkɛr ɓɛɛlɛtik kɛnɔ kɛɛɗɛɛ ɓokootɛɛ sɛɛg a sɛɛn agut omoŋ.

³³ Saaɓa mɛlɛrɗi soona riyɛ kɛ Kɛraniyook, nɛɓa laalawar Yeeseeŋ. Laalawarɓa ɓɔrɛ joop a pɛɛy sigɛɓa sɔɔkɛr ɓɛɛlɛtik, om ɗiɗikakɛ gɛɛnɛk, ma om kantunakɛ gɛɛnɛk.

³⁴ Nɛɓa Yeese tonu kɛ, "Iin Baabɛɛ, toŋoɗar sɛɛge, agut sinɔ kir ɗegerɔɔn any sinɛ ijaagirk." Nɛɓa sɛɛk kaakasar abii nɛɛk itake.

³⁵ Ɛtɛrɓa joop sigɛ ɓɔɔkaak nɛ mermenarŋ, daraayɛrɓa ɔɗɔwer gɛɛnɛ kɛ, "Ebɔdɛ joop ɔgɔ. Ɔkɔnɓɔ sɛɛn Keresee sinɛɓa daam Waakoyotuk, intɔ ebɔdɛ ɛɛk nɛɛk."

³⁶ Widerkiɓa ɛɛk amaasiniyɛɛk nɛ daraayɛrŋ. Gaɓɛrgeeɗɓa ogool wɛynik sigɔ kowɛrŋɔŋk.

³⁷ Nɛ tonurgeeɗ kɛ, "Ɔkɔn iin Tapaɗ Ayuuduk, ebɔdutɔ ɛɛk nook."

³⁸ Lakɛɓa aɗoy nɛɛkɛ rakaay taapiyɛ sigɔ tonur kɛ, "Ege sini Tapaɗ Ayuuduk."

Laalawɛɛ Joop A pɛɛy Sigɛɓa Sɔɔkɛr Ɓɛɛlɛtik

³⁹ Joop sigɛɓa sɔɔkɛr ɓɛɛlɛtik sigɛɓa laalawɛɛ sɛɛg a Yeesee agut omoŋɔŋk nyɔɔnɓa sɛɛn omaay kɛ, "Moko iin Keresee? Ebɔdutɔ ɛɛk nook a eteŋk."

⁴⁰ Nɛɓa iɗi sinɛɓa sɔɔkɛ ɓɛɛlɛtik omaay koykoyɛ sɛɛn kɛ, "A dɛnin a ɓɔrɛ arkin goopan retoŋk, nɛ aasi kin tuɓur Waakoyo?

⁴¹ Goopɛɛ eteŋk agut tikiyɛ sigɔkan ijaagiiŋɔŋk. Ege goopan naŋk liki, ma iɗit sini kɛɛ any sinɔkan tikek."

⁴² Tonuɓa Yeeseya kɛ, "Iin Yeesee, koɓaakoyreeta saakoy guugunyɗun burɛya Nookaakik."

⁴³ Nɛɓa Yeese tongeeɗ kɛ, "Eekeer tona naaŋ, iinkɔɔ ɓenyse a eet Gɛnɛte."

Rɛr Yeesee

⁴⁴ Arɓa ɔɔtɛ nɛɛkɛ sayitiyɛɛkɛ sigɔɔgɛ tula omk, nɔ mɛlɛɛɗa sayitiyɛɛka sigɔɔga tula aŋank ɓɛɛlɛɛɓa ɗook raŋ baŋɛ a nyuugur.

⁴⁵ Miinyɗiiɓa pɛɗɛrka waawuyoŋkuŋ. Abii sinɛɓa biriitɛɛ Godeey sinaanɛ Geetitank pɔɔkiɗiɓa nɛ pakat ɛɛk a pɛɛy.

⁴⁶ Nɛɓa Yeese duriye a ɗooruŋ kɛ, "Iin Baabɛɛ! Gaɓana wɛɛŋa gaaŋk ariita!" tonuɓa oko sinɛk nɛ rɛrŋ.

⁴⁷ Ɔɗɔwen sinɛ amaasiniyɛɛkoŋk saaɓa dɛnɛɛɗ any sinik, nɛɓa pɔɔsɛ Waakoyo kɛ, "Iɗit sini mentankɔ taamɛkɛ Waakoyotoŋk eekeerɛ."

⁴⁸ Joop sigɛɓa tolɗiik nyonitaakɛ kɛnɔ dɛnɛr any sinik baŋɛ, saaɓa mermenarɗi any sinɛɓa ɓɛɛlɛkik, nɛɓa weeri a paaŋir kokomeer gɛŋk.

⁴⁹ Ma joop sigɛɓa ɗegerar Yeesee jɔkuk baŋɛ, a jartiyatɔk sigɛɓa nonomarɗi a tukiɗi Gɛlilaakeek, ɛtɛtɛɗarɓa a yowɛɛɗiŋ nɛ mermemenarki any sini.

Kɔɔwɛɛ Yeesee

⁵⁰ Lakɛɓa iɗit om sinɔ riyɛ kɛ Yoosepuk. Sinɔɓa beeɗ Armaatiyaase katamɛɛ joop Ayuuduk. Sɛɛnɓa iɗit sinɔ mentanŋɔŋk ɛ mentan taamɛkɛ Waakoyotoŋkuk. Sɛɛnɓa ɓɔrɛ iɗit Ayuuduk sinɔ gaɓɛ woorank.

⁵¹ Kiɓa sɛŋk kɔnyɗiit waasiyɛɛkɛ sigaagɛ toniiɗɛɛ Yeesee kɛnɔ ɓokotɛɛk. Sɛɛnɓa iɗit sinɔ kookor burɛ Waakoyotoŋk ŋaadiyɛɛkɛk.

⁵² Iɗit sini wideerɓa ɛɛk son lak Pilatoosuk nɛ kalɛyiiɗ buusɛ Yeeseek kɛnɔ gageeɗ.

⁵³ Nɛɓa woorku buusɛ nɛɛk laalawutant nɛɛkɛ nɛ ɓuwu abiye sinɔɔnɛ kɛwukɛwuŋɔŋk. Nɛɓa riiɓe kaakaak nɛɛkɛk sinɔɔnɛ kɛɛ iɗit sinɔɓa riiɓeeɗɛkik sinɔɔnɛɓa ragadɛɛ aɓa kɔɔwɛɛ talaaɗɛk.

⁵⁴ Egeɓa ɓɛɛnyɔ nɛɛkɛ sinɔ ragadiiɗɛɛ ɛɛk waawuya Sambatɛyoŋk Ayuuduk.

⁵⁵ Jartiyatɔk sigɛɓa kurak a Yeesee agut omoŋ Gɛlilaakeek nomɛrkiɗɓa nɛ dɛnɛr pii nɛɛk, nɛɓa mermenar kɛ riiɓɛɛkɔ buusɛ nɛɛk ɛk.

⁵⁶ Nɛɓa weeri nɛ kaar ragadir reyaay a diikuy agut buusɛ nɛɛk. Nɛɓa imiinyer waawuy Sambatɛyoŋk Ayuuduk oko sinɛɓa sekɛɛɗɛɛ higii Muuseek.