Lukaas 22 - Kuumeet Sinɔ Tɔɔnuk Ad Majaŋeeroŋk

Giiman Sinɛɓa Ijaagɛɛ Yeeseek

¹ Saaɓak wɔɔŋkuɓa Ba'aal Nasiyoŋk sinɔ riyɛ kɛ ɗoyiɗoŋkuk.

² Nɛɓa ɔɗɔweer tapa ŋaadiyɛɛkoŋk a rɔɔriytaanak higi Muuseek warɛr Yeeseya gopan sinɔ ɓokoturɗu dugeeɗik, agut sinɔɓa ɓurerɗi joopuk.

Doomɛ Yuuda Gaɓɛ Yeeseek

³ Saaɓak nomtaanakɛ sigaagɛ aarin a pɛɛyk a omoŋ, Askorotu Yuudaa guugunygeeɗɓa setan.

⁴ Nɛɓa kɛɛ son lak ɔɗɔweer tapa ŋaadiyɛɛkoŋk a ɔɗɔweer koortaanak Gode sinɛ Geetitank nɛ kaar waasiɗiigeeɗ ɔɔtɛ sinɔ gaɓɛɛɗ sɛɛga Yeeseek.

⁵ Nɛɓa sɛɛga yaa any sinɛ nɛ mɛyigeeɗ ɔɔtɛ sinɔ kɛnɔ gaɓɛrgeeɗ worik.

⁶ Mɛyigeeɗɓa Yuuda a sɛɛg nɛ warɛ gopan sinɔ yaageeɗ kɛnɔ gaɓɛ Yeesee a kir joop sigɛ ɓɔɔkaak taanta.

Ɗama Ba'aal Ɗoyiɗoŋk

⁷ Saadi baŋiya gayɛɓa Ba'aal Nasiyoŋk sinɛɓa ŋɔɔlɛɛɗɛ jiŋkuy Ba'aal ɗoyiɗoŋkuk.

⁸ Nɛɓa Yeese wosɛyɛ Petros a Yowanis kɛ, "In tina kɛɛɗɛ ragadɛ ɗama ajigeyoŋk Ba'aal Ɗoyiɗoŋk nɔkɔɔ ɗamii."

⁹ Nɛɓa sɛɛk tonurgeeɗ kɛ, "Ɗɛyin ana kɛɛɗii ragadii eet?"

¹⁰ Nɛɓa sɛŋk tonu sɛɛga kɛ, "Saakɔɔ mɛlɛrɗɔ katamɛyaak, nɛkɔɔ laŋirkɔɔ iɗit sinɔ lak kebet maawoŋk ŋoɗokuk. Nɛ in nomɛɛɗɛ mɛlɛɛɗa waa sinaana guugunygeɗik,

¹¹ nɛ in tonɛɛ ɗumaata waa kɛ, 'Tonuna rɔɔriytaan kɛ, Arnɔ eet gode konanoŋk sinɛkɔɔ ɗamiɗii Ba'aal Ɗoyiɗoŋk ajigeyoŋk eet a nomtaanak gaaŋk?'

¹² Yaaŋɛkɔɔ kɔna sɛŋk pook sinɔ bakaanyŋɔŋk sinɔkan ragadɛɛ a kan epatɛɛŋɔŋk. Nɛ in tina ragadɛ saadi.' "

¹³ Nɛɓa sɛɛk kaar nɛ kaar laŋirki a ɓɛɛlɛ oko sinɛkɔ sɛɛga toniiɗ Yeeseek, nɛ ragadir ɗama ajigeyoŋk ɗoyiɗoŋk saadi.

Kiiwu A Tuu Sigɔ Geetitaanakik

¹⁴ Saaɓa gayɛɛɗ sayiti nɛɛkɛkik, nɛɓa Yeese beeɗir a nomtaanak gɛɛŋk nyon ɗamatoŋk agut omoŋ.

¹⁵ Tonuɓa sɛɛga kɛ, "A in kiika laŋiiɗ rakatɛ ɗɛyakɔ jɛt a ɗamii ɗama sini ajigeyoŋk Ɗoyiɗoŋk a iinak agut omoŋ.

¹⁶ Tona kɔnaaŋ, nɔkoy yaaŋɛɛɗɛ any sini dugaaŋɔŋk eekeer gɛɛŋk burɛɛ Waakoyotoŋkuk kaakoy ada kɛkar ɗama sini ajigeyoŋk Ɗoyiɗoŋk."

¹⁷ Boŋuɓa Yeese tuu nɛɛk, nɛ pɔɔsɛ Waakoyo nɛ tonu sɛɛga kɛ, "Iyook any sini, in kaakasɛ nɔ utɛɛ.

¹⁸ Tona kɔnaaŋ, a tukiɗi sisɔ mɛlɛɛɗa nɔkoy mɛlkiɗ burɛ Waakoyotoŋkuk kaakoy tuu kɛkar soortan taamɛ sigi wɛynik."

¹⁹ Nɛɓa ɓɔŋgɔɔrɛ kiiwu nɛɛk, nɛ pɔɔsɛ Waakoyo, nɛ ŋapati, nɛ gaɓɛ sɛɛga nɛ tonu sɛɛga kɛ, "Ege sini buusɛ naak sinɔ gaɓɛɛ iinakaak. In kokoɓkuɗɛ eet."

²⁰ Nɛɓa ɓɔrɛ ɗamat sinaanɛ ajigeyoŋk baŋiya, ɓɔŋgɔɔrɛ tuu nɛɛk, nɛ tonu sɛɛga kɛ, "Tuu sini kuumeet sinɔ tɔɔnuk sinɔ dusanɛɛ agut yɛrom naak, sinɛkɔɔ gupatɗiik agut iinakik.

²¹ Mayakana in dɛnɛɛko iɗit sinɛ kɔɔtu gaɓɛk ari nɛɛk ant ɗamatoŋk a eet agut omoŋ.

²² Tɔɔn Etoŋk oko sinɛɓa toniiɗɛ jeemɛk ŋaarkɔɔ reta, mayakana duri kɔɔ eta sinaanakɔɔ gaɓɛ sɛɛnik."

²³ Nɛɓa sɛɛk nomtaanak gɛɛnɛ kɔniniyi ɛkanɛɛkɛ gɛŋk kɛ, "Eteŋkɛ kɔɔr wooɗ sinɛkɔɔ ijaag any sinik?"

Wooɗ Sinɛ Kaalɗi Joope Baŋɛk?

²⁴ Saadi tukerɓa sɛɛk palamɛ ɛkanɛɛkɛ gɛŋk kɛ, "Wooɗ sinɛ kaalɗi eteŋkɛ baŋɛk?"

²⁵ Nɛɓa Yeese tonu sɛɛga kɛ, "Suumiyɛ ɗoo sinik latu ɓaŋkawuka joope sigaagɛ ɓɔɔkaak raŋk. Suumiyɛ riyɛ sɛɛg kɛ joop sigɔ ijaagir any sinɔ mentanŋɔŋk joopa sigaaga ɓɔɔkaakik.

²⁶ Mayakana iinakɛ kɔɔr kat ɓɛɛlɛ oko sinik, ma iɗit sinɛ obi iinakɛk in ito tɛmŋ, ma iɗit sinɔ ɔɗɔwenk in dakɛ a ito ijaagen.

²⁷ Iɗit sinɔ beeɗ nyon ɗamatoŋkuk a iɗit sinɔ ijaagɗi ɛtɛɗɔɔgɛk kaalɗi wooɗ? Moko iɗit sinɛ beeɗ nyon ɗamatoŋkuk? Mayakana saak ɓɛɛla iinakɛ kɔɔr a ito eet ijaagen om.

²⁸ Rakatɛɛrkɔ sɔɔk a eet agut omoŋ rakatɛɛ naakɛ baŋɛ.

²⁹ Suumakoy kɔnu burɛɛ oko sinɛkanti suumeeɗ Baabɛɛk.

³⁰ Beeɗiirkoy burɛɛ nyon ɗamatoŋk nɛ ɗamikariŋ nɛ utiɗiikariŋ, beeɗiirkoy barsumatɔkɛ raŋk nɛ pɛrɛdɛɛr komoyeerɛ Israeelik sigaagɛ aarin a pɛɛyk."

Tonkun Yeese Ɔɗɔɔkɛ Kɛ Kaadɛkɔɔ Sɛɛn Petrosuŋ

³¹ Tonuɓa Yeese kɛkar kɛ, "Iin Simion, Simion, dɛnko, ɗɛyɛ kɔkɔnu setan peyana oko sini peyɗɛ sindeek.

³² Yakana saak ɗanɗamaaka kɔna kɛnɔ kat badɛr ŋaadiyɛ goonɛk. Saakɔɔ weerikiɗin tikiyɛɛkɛ Waakoyotak baŋiya, ari masookoyak a in ɓaŋkaawurar."

³³ Nɛɓa Simion tongeeɗ kɛ, "Suumi naakɛ, ragadakɔ saak ɛɛk kɛnɔ kɛɛɗii eet a iin godeya korkoɗɔɔnoŋk ɛ kɛnɔ rɛɛra."

³⁴ Yakanaɓa Yeese tongeeɗ kɛ, "Iin Petros, tona naaŋ, ɓenyse a inkɔɔ ki ɗooran koogelees, kaadin kɔɔtu agut jiit kɛ, 'Kaa ɗegerɔɔn."

³⁵ Saadi baŋiya kɔɔniyɓa sɛɛg Yeese kɛ, "Saakan kɔnu wosɛyɛɛɗa a kɔne kɛɛ kosɛ, a wooj, a saamɛyɛk, lakɛ any sinɔkan kɔne bitakɗiiŋɔŋkuŋ?" Nɛɓa sɛɛk jumurargeeɗ kɛ, "Kɛɛ any sinɔkan tine bitakɗiik."

³⁶ Nɛɓa sɛŋk tonu sɛɛga kɛ, "Sisɔ iɗit sinɔ lak kosɛk maŋk woojuk, in gaamuɗ. Iɗit sinɔ kiiɗɛ aarɛk, in ɓalɗi abiye nɛɛkɛ nɔ ɓali aarɛ.

³⁷ Tona kɔnaaŋ, ɗɛyɛ a dusanɛɛ eete any sinɛɓa taapɛɛ Wargatɛɛ Waakoyotoŋk kɛ, 'Ikomɛɛ a joop sigɔ tikitaanakik. Any sinɛɓa taapɛɛ agut eetik gayɛkɔ pedtan nɛɛkɛ eekeerɛ."

³⁸ Nɛɓa nomtaanak gɛɛnɛ tonurgeeɗ kɛ, "Suumi naakɛ, lakɛ seedi aarɛyɛ a pɛɛy.' Nɛɓa sɛŋk tonu sɛɛga kɛ, "Gayɛrŋ."

Ɗanɗama Yeese Dɛbirɛ Jɛyte

³⁹ Ŋaarɓa Yeese oko sinɛɓa barɛɗik nɛ kɛɛ kurkuma Dɛbirɛ Jɛytik, nɛɓa nomtaanak gɛɛnɛ kaar a sɛɛn agut omoŋ.

⁴⁰ Saaɓa mɛlɛrɗi saanak, nɛɓa tonu sɛɛga kɛ "In ɗanɗamaakɛ kɛnɔ mokɔɔ guugunyari paariita."

⁴¹ Nɛɓa sɛŋk sɛɛge wide ɛɛk a yowɛɛɗ a ito baalɗiiɗɛ giɗee, nɛ ɛtɛ korontunɛ nɛ ɗanɗamaaŋ.

⁴² Ɗanɗamaaɓa kɛ, "Iin Baabɛɛ naak, ɔkɔn ɗɛyan nookuŋ, widite tuu sini rakatɛyoŋk. Mayakana in ɓɛɛlɛ oko ɗɛyan nook, ma kat ɓɛɛlɛ oko ɗɛyan naak."

⁴³ [Nɛɓa yaaŋageeɗ ɛɛk wosɛytaan rakaay nɛ ari sɛɛn a ɓaŋkaawurŋ.

⁴⁴ Ɓakɛyɗiɓa jɛt, nɛɓa ɗanɗama a ɓaŋkawuŋ, tamkuɓa tɔkiyan nɛɛkɛ ɗooka a ito yɛrom.]

⁴⁵ Nɛɓa ŋaarki ɗanɗamɔɔn nɛ kus son lak nomtaanak gɛɛŋkik, nɛɓa laŋki sɛɛg a ɗeegararŋ agut sinɔɓa sanɗiɗ a ɓaŋkawŋɔŋk.

⁴⁶ Nɛɓa tonu sɛɛga kɛ, "Ɗeegarari agut jikon? In ŋaarɛ raŋana nɔ ɗanɗamaakɛ kɛnɔ mokɔɔ guugunyari paariita."

Gaamur Yeesee Gumaaker Gɛɛnɛk

⁴⁷ Saaɓa Yeese arkiɗ waasiyɛɛkɛk, nɛɓa mɛlɛrki joop a ɓɔɔkaaŋ, ɗɔkiikɓa sɛɛg Yuudaa, nomtaanakɛ sigaagɛɓa aarin a pɛɛyk om, nɛɓa wideer ɛɛk son lak Yeeseek kɛnɔ samɓoy.

⁴⁸ Yakanaɓa Yeese tongeeɗ kɛ, "Iin Yuudaa, gaɓun Tɔɔn Etoŋk samɓoyɔɔn?"

⁴⁹ Nomtaanak gɛɛŋk ɔgɔ sigɛɓa sɛɛg a Yeeseek mermenarɓa ɔɔtɛ nɛɛk, nɛ tonurgeeɗ kɛ, "Suumi naakɛ, kɛkɛtii sɛɛg aarɛyɛkɛɛŋ?"

⁵⁰ Nɛɓa sɛɛge iɗit omaay kɛtɛ nɛ yawuku weena ijaagen sinɛ ɔɗɔwen tapa ŋaadiyɛɛkoŋkuk gɔɔ sinɛ ɗiɗikik.

⁵¹ Nɛɓa Yeese tonu kɛ, "Kat, kat ijaagɛ kɛkar oko sinik!" Nɛɓa kume weena sinɛ iɗit sinɛk nɛ ebɔdɛŋ.

⁵² Saadi baŋiya ɔɗɔweer tapa ŋaadiyɛɛkoŋk a ɔɗɔweer Gode sinɛ Geetitank a gutarɛyɛ sigɛɓa kurak kɛnɔ gaamur Yeeseek tonuɓa sɛɛga kɛ, "Kurakɔɔ a aarɛyɛ a gumboyiik kɛnɔtu gaamiir a ito gaamɛ iɗit sinɔ sɔɔkɛ ɓɛɛlɛtik?"

⁵³ Saakan eet a iinak agut omoŋ ɓɛɛnyɔwɛ gɛɛŋk baŋɛ Godeey sinaanɛ Geetitank, nɛ kanti kiir ɓeesɛ. Yakanaɓɔ sisɔ ɔɔtɛ noŋk, a ɔɔtɛ ɓaŋkawuka nyuuguroŋk."

Kaadɛ Petros Yeesee

⁵⁴ Saadi baŋiya gaamurɓa Yeesee nɛ diilerŋ nɛɓa kaar gaɓɛɛtar keera sinaana ɔɗɔwen tapa ŋaadiyɛɛkoŋk. Maɓa Petros nonomɗu baŋi a yowɛɛɗiŋ.

⁵⁵ Adirɓa joop gɛɛnɛ maɗ keer nɛɛkɛ tak nɛ beeɗir agut omoŋ, nɛɓa mɛlki Petros nɛ beeɗir agut omoŋ maɗ ad.

⁵⁶ Saaɓa Petros beeberɗi maɗ adik, nɛɓa dɛnɛɛr sɛɛn peet om sinɔ ijaagenk. Nɛɓa mermen nɛ tonu kɛ, "Iɗit sini sɛɛnkɔ a Yeesee."

⁵⁷ Yakanaɓa sɛŋk Petros kaadɛ kɛ, "Iin jarti sini, kaa ɗegerɔɔn!"

⁵⁸ Nɛ a balaaŋ dɛnɛɛr sɛɛn iɗit om nɛ tongeeɗ kɛ, "Ege sɛɛge omaay iin." Yakanaɓa Petros tonu kɛ, "Iin iɗit sini, moko eet!"

⁵⁹ Nɛ beeɗir a sayiti omoŋ nɛ iɗit omaay tonu a ɓaŋkawuŋ kɛ, "Ege sini iɗit Gɛlilaak. Sɛɛnkɔ a sɛɛn eekeerɛ."

⁶⁰ Yakanaɓa Petros kaadɛ kɛ, "Iin iɗit sini, kaa ɗegerɔɔn any sinɛ tonunk!" A inɓa ar toniiɗ any sinik, nɛ sisa ɗooru koogele.

⁶¹ Nɛɓa Suumi Yeese kolɛɛnyɛ nɛ mermen Petros. Koɓukuɓa Petros sisa any sinɛkɔ tongeeɗ Suumi Yeese kɛ, "Ɓenyse a in ki ɗooran koogelees, kaadin kɔɔtu agut jiit."

⁶² Nɛɓa ŋaariri walasa nɛ kuɗe jɛt.

⁶³ Joop sigɛɓa gaamur Yeeseek daraayɛrɓa sɛɛn nɛ bibitarŋ.

⁶⁴ Miinyerɓa taamɛ gɛɛŋk nɛ kɔɔniyar kɛ, "Waasitɔ pɛrka paaŋini wooɗ?"

⁶⁵ Nyɔɔnarɓa olaatɛ sigɔɔgɛ ɓɔɔkaaŋɔŋk.

Wideerɛɛ Yeesee Joopa Sigɔɔga Gaɓɛr Woorank

⁶⁶ Saaɓa aayirkiɗik, tolɗiiɓa gutarɛyɛ joop sigɔ gaɓɛr woorank a ɔɗɔweer tapa ŋaadiyɛɛkoŋk a rɔɔriytaanak higi Muuseek agut omoŋ nɛɓa ɗɔkarki Yeesee taamɛka joop sigɔ gaɓɛr woorank.

⁶⁷ Nɛɓa tonurgeeɗ kɛ, "Ton tina. Iin Keresee?" Nɛɓa sɛŋk tonu sɛɛga kɛ, "Kɛygunkɔna tonkaayaaŋ, nɛti kiir ŋaaɗiit.

⁶⁸ Kɛygunkɔnu kɔɔniykaayaaŋ, nɛta kiir jumureet.

⁶⁹ Mayakana a tukiɗi sisɔ, Tɔɔn Etoŋk beeɗkɔɔ ɗiɗikakɛ Waakoyotoŋk nyon sinaanɛ lak ɓaŋkawukaak."

⁷⁰ Nɛɓa sɛɛg baŋɛ kɔɔniyar kɛ, "Anɛ iin Tɔɔn Waakoyotoŋk?" Nɛɓa sɛŋk tonu sɛɛga kɛ, "Eet sɛɛn oko sinɛ tonurɗɔɔk."

⁷¹ Nɛɓa sɛɛk tonur kɛ, "Ɗɛyɛ tina sisɔ waasiyɛ ɔgɔ kɛ jikonak? Tiyiikɔ pɛɛni sinɛkɔ tonu ad nɛɛkɛkiŋ."