Lukaas 2 - Kuumeet Sinɔ Tɔɔnuk Ad Majaŋeeroŋk

Ɓartiyɛ Yeeseek

¹ Saaɓak tonuɓa suumi Roomuk Awugistoos Keesaar, kɛnɔ ikomɛɛ joop sigɛ atu ɗook Roomuk baŋɛ.

² Ege sini ikomiit joopoŋk tuki nɛɛk sinɛɓa ijaagɛɛ saaɓa ege Kerenewoos suumi ɗoo Sooriyaak.

³ Nɛɓa joop baŋɛ kaar ɗokanɛɛka sigaagaɓa ɓartɛɛɗɛɛ sɛɛgik kɛnɔ ikomɛɛ sɛɛg.

⁴ Agut sinɔɓa Yoosep ɓartiyɛɛkɛ sɛɛn komoy Daawitik, nɛɓa ŋaar katamɛɛ Naajireetik sinaanɛ ar ɗook Gɛlilaak nɛ kɛɛ Beeteleheema katamɛya Daawitik sinaana ar ɗook Yuudaak.

⁵ Kaarɓa saana ikomiiɗɛɛ sɛɛnik a mɛyii nɛɛk Maariyam, lakiiɓa mɛyii nɛɛk amɗ.

⁶ Saaɓa atukuɗ saadik, nɛɓa gaygeeɗ ɔɔtɛ ɓartɛɛtoŋk.

⁷ Nɛɓa saadi ɓartɛ tɔɔn nɛɛk sinɔ mooyk sinɛ tekaayink. Nɛɓa miinye abiye ŋɔnɔkoŋk nɛɓa riiɓe ant ɗamatoŋk tɔgikoŋk tak agut sinɔɓa kiiɗɛ gode sinɔ imiinyerɗik.

Irtaanak a Wosɛytaanak Waakoyotoŋk

⁸ Lakɛɓa irtaanak sigɔ koorɛr jiŋkuyɛ gɛŋk walas aytaak ɗook sinaanɛ.

⁹ Nɛɓa mɛlki wosɛytan Suumiyoŋk a gorgorŋ nɛ ɛtɛ sɛɛge jɔk, nɛɓa ɗaawu sɛɛge eemɛyɔn Suumiyoŋk tookɛɛta. Nɛɓa ɓuriiŋ jɛt,

¹⁰ yakanaɓa wosɛytan nɛɛkɛ tonu sɛɛga kɛ, "Kat ɓuriikɛɛ. Ɗɔkakɔ Pɛɛni sinɔ Ɓɛlkɛɛstank sinɔ dakɛ a yaaka sinɔ obiiŋɔŋk joopa baŋɛk.

¹¹ Ɓartɛɛkɔ kɔna ɓenyse iɗit sinɔ ebɔdiɗiŋɔŋk katamɛɛ Daawitik, sɛɛn Suumi Keresee.

¹² Ɗegerarikɔɔ sini oko sinik, laŋirkɔɔkɔɔ sasalɛ a kɔ miinyɛɛ abiye ŋɔnɔkoŋk, akɔ ɗegarɛɛ ant ɗamatoŋk tɔgikoŋk."

¹³ Nɛɓa dɛnɛɛ a gorgorŋ wosɛytaanak dariyoŋk a ɓɔɔkaaŋ jɛt a lalaŋi a wosɛytan sinɛ agut omoŋ, nɛɓa pɔɔsɛr Waakoyo kɛ,

¹⁴ "In dakɛ eemɛyɔɔn Waakoyota dari, in dakɛ a bɔdɛ joopa sigaaga poru sɛɛg Waakoyotuk ɗookuk."

¹⁵ Saaɓa ŋaaraɗi wosɛytaana gɛɛnɛk dariyaak baŋiya, nɛɓa tonur irtaana gɛɛnɛ ɛkanɛɛkɛ gɛŋk kɛ, "Koy kɛɛɗii Beeteleheema nɔ kɛɛɗii dɛnii any sinɛkɔɔ ɓɛɛlɛk a any sinɛkɔtina yaaŋɛ Waakoyotuk."

¹⁶ Nɛɓa sɛɛk kaar a gorgorŋ, nɛɓa laŋirki Maariyam a Yoosep a sasalɛ nɛɛk a ɗuɗuŋɗe ant ɗamatoŋk tɔgikoŋk tak.

¹⁷ Saaɓa dɛnɛrɗik baŋiya, nɛɓa waasɛr any sinɛɓa sɛɛga tonu wosɛytan nɛɛkɛ agut sasalɛ nɛɛk.

¹⁸ Reemɗiɓa ɓayɛtun joop sigɛɓa tiyɛr any sinik baŋɛ saaɓa sɛɛga tonurɗu irtaana gɛɛnɛkiŋ.

¹⁹ Yakanaɓa sɛŋk Maariyam gaamu any sini baŋɛ ɓayaay nɛɛkɛ nɛ kokoɓ kɛ lɔt.

²⁰ Saaɓa irtaana gɛɛnɛ baŋɛ dɛnɛrɗi ɛ tiyɛrɗi a ɓɛɛlɛ oko sinɛkɔ sɛɛga toniiɗ wosɛytan sinɛk, nɛɓa weeri nyonitaaka gɛŋk a eemɛyar ɛ pɔɔsɛr Waakoyo.

Diilɛɛ Yeesee Godeya Sinaana Geetitank

²¹ Saaɓa ɓartɛɛɗɛɛ sasalɛ nɛɛkik, ɗoŋikɛ sigɔɔgɛ tula jiitik baŋiya, nɛ saaɓa gayɛɛɗ ɔɔtɛ sinɛ yawɛɛɗɛɛ sasalɛ nɛɛkik, nɛɓa riyɛ kɛ Yeesee tiriyaakɛ sigaagɛɓa riyɗi wosɛytan nɛɛkɛ a inɓa kɛɛ gamɛɛɗik.

²² Saaɓa gayɛɛɗ ɔɔtɛ sinɔ guugunyarɗ mentankaata oko higi Muuseek, nɛɓa Yoosep a Maariyam diiler sasalɛ nɛɛk Yorsaleema kɛnɔ kaar wideetar Suumiya.

²³ Nɔɓa ijaagirɗi oko sinikik oko sinɛɓa taapɛɛɗɛ higii Waakoyotoŋk kɛ, "Tɔɔn sinɔ mooyk sinɔ tekaayin gaɓɛɛ Waakoyota kɛnɔ dakɛ a nɛɛk."

²⁴ Maɓɔrɛ higii Waakoyotoŋk lakɛɓa sekiyɛ sigɔ kɛ, "Ɗɛyɛ a wideerɛ a uduŋeet lɛɛraanak a pɛɛy maŋk nyawukak kulɓeerik a pɛɛy."

²⁵ Saaɓak lakɛɓa iɗit om Yorsaleeme sinɔ riyɛ kɛ Simionuk. Sɛɛnɓa sɛŋk iɗit sinɔ mentan taamɛkɛ Waakoyotoŋk a ŋaadi a ɓaŋkawuŋɔŋk. Kookorɓa sɛŋk ɔɔtɛ sinɛkoy Waakoyot ebɔdɛɛɗ joop Israeelik atuɓa Wɛɛŋa sigɔ Geetitaanakik sɛɛne raŋk.

²⁶ Yaaŋɛrɓa sɛɛna Wɛɛŋa sigɔ Geetitaanakik kɛ kikoy rerin makɔɔ ki taanta Keresee Suumiyoŋk.

²⁷ Enyɛɛriɓa saaɓak Wɛɛŋa sigɔ Geetitaanakik nɛ diiler sɛɛn Godeya sinaana Geetitank, nɛɓa Yoosep a Maariyam diiler sasalɛ nɛɛk Yeesee Godeya sinaana Geetitank kɛnɔ kaar ruumer any sinɛɓa tonɛɛ higiik.

²⁸ Nɛɓa Simion boŋu sasalɛ nɛɛk, nɛ gaamku kokoma nɛ pɔɔsɛ Waakoyo kɛ,

²⁹ "Suumi naakɛ, eet ijaagen nook, inɓɔ rɛɛra yaakat, agut sinɔkɔ dusanɛɛɗɛ any sinɛɓata kuumɗigiɗink.

³⁰ Dɛnakɔ ebɔdɛɛt nookuŋ,

³¹ sinɛɓa ragadin joope baŋɛ taamɛkɛkiŋ.

³² Yaaŋɛ iɗit sini pɛɗɛrka sini joopa sigaaga moko Ayuuduk, ɗɔku eemɛyɔn joopa goonaak Israeelik."

³³ Reemɗiɓa ɓayɛtun Yoosep a Maariyamuk agut any sinɛɓa toniiɗɛ sasalɛ nɛɛkik.

³⁴ Geetiɓa sɛɛg Simion, nɛ tonu ɛmɛsa Maariyama kɛ, "Dɛnko, sasalɛ sini daamɛɛkɔ joopa sigɔɔga ɓɔɔkaaŋɔŋk Israeele, kɛnɔ dakɛ joopa ɔgɔɔka a ɗiirin ma ɔgɔɔka ŋaarin raŋanaak. Ɛɓɔrɛ dakɛkɔɔ a rɔmɛ joopa sigaaga tonur a ŋɛɛwɛnŋɔŋk.

³⁵ Yaaŋɛkɔɔ koɓi sinɔ dugaaŋɔŋk sinɔ latu joop sigɔ ɓɔɔkaaŋɔŋk ɓayɛtunɛɛkɛk. Ɛkɔɔ laal ɓayɛ nook ɓakɛɛy a ito aarɛ."

³⁶ Lakɛɓa ɓɔrɛ saadi iɗit pɛrkaakoŋk sinɔ komoy Aseerik, tɔɔn Paanueelik sinɔ riyɛ kɛ Haanaak. Sɛɛnɓa jarti sinɔ bɔɔlɔŋ jɛtik. Beeɗirɓa a baabuy nɛɛk sinɛɓa boŋu sɛɛn peetiikentik a emeyi tula pɛɛy. Nɛɓa saadi baŋiya rɛr baabuy nɛɛkɛŋ.

³⁷ Beeɗɓa nɔ emeyi gɛɛnɛ pɔlpɔlɛ joop aŋank a aŋan. A kir pakakatiit a Gode sinɛ Geetitank waawuy a kaay ijaagɗiɓa Waakoyota soome a ɗanɗamɔɔn.

³⁸ Saaɓak kusɓa nɛ pɔɔsɛ Waakoyo, tonɗiiɓa joopa sigaaga koorɛr kuumeet bɔdɛɗoŋkuk baŋɛ Yorsaleemuk agut sasalɛ nɛɛkiŋ.

Murun Yeeseek Naajireetak

³⁹ Saaɓa ruumerɗi Yoosep a Maariyam any sinɛɓa tonu higi Waakoyotoŋkuk baŋiya, nɛɓa weeri katamɛya nɛŋk Naajireeta sinaana ar ɗook Gɛlilaak.

⁴⁰ Ɓaŋkaawurɓa Yeesee a ɓɔlɔɔrɛŋ enyɛɛriɓa ɗegerɔn ɛɛkoŋk atuɓa geetiyɛ Waakoyotoŋk sɛɛne raŋk.

Yeesee Godeey Sinaanɛ Geetitank

⁴¹ Ɛnyɛnyɛkarɓa emeyikɛ Yoosep a Maariyam Ba'aala ɗoyiɗoŋk Yorsaleema.

⁴² Saaɓa Yeese emeyi gɛɛnɛ aarin a pɛɛyk, nɛɓa kaar Ba'aala oko sinɛkan barɛrɗik.

⁴³ Nɛɓa ruumer Ba'aal nɛɛk, nɛɓa weeri nyaka nɛŋk. Nɛɓa Yeese dakiki Yorsaleeme, maɓa Yoosep a Maariyam kir ɗegerɔɔn kɛ dakikikɔŋ.

⁴⁴ Koɓurkɛɓa kɛ sɛɛn a joop koyowɛyoŋk, nɛɓa ŋawiiter waawuy baŋɛ. Nɛɓa saadi warɛr sinɔɔnɛ lak tekaaneer gɛɛŋkik a saakomak gɛɛŋk takank.

⁴⁵ Nɛɓa kir laŋiiɗ, nɛ weeri Yorsaleema a wawarar sɛɛn.

⁴⁶ Nɛɓa kaar laŋirki ɗoŋikɛ sigɔɔgɛ jiitik baŋiya, Godeey sinaanɛ Geetitank tak, a beeber rɔɔriytaanakɛ kɔɔr, a gelelewu sɛɛga nɛ kɔniniy sɛɛgiŋ.

⁴⁷ Joop sigɛɓa tiyɛrk baŋɛ reemɗiɓa ɓayɛtun gɛŋk agut ɗegerɔn nɛɛk a jumuran nɛɛk.

⁴⁸ Saaɓa dɛnɛrɗi ɛpɛna a ɛmɛsik, nɛɓa reemɗi ɓayɛtun gɛŋk, nɛɓa ɛmɛsa tongeeɗ kɛ, "Tɔn naakɛ, arin tin oko sinik agut jikon? Sanɗikiikɔ jɛt eet a ɓaaɓa ani wariiŋ!"

⁴⁹ Nɛɓa sɛŋk tonu sɛɛga kɛ, "Warɛɛrti agut jikon? Kiir ɗegerɔɔn kɛ ɗɛyɛta ati laŋɛɛ godeey Baabɛɛkiŋ?"

⁵⁰ Yakanaɓa sɛɛga ki mɛlɛ any sinɛ tonu sɛɛgak.

⁵¹ Nɛɓa saadi ŋaarar agut omoŋ Naajireeta, tiiɗiɓa sɛɛgaŋ. Koorɛɓa ɛmɛsa any sini baŋɛ ɓayaay nɛɛkɛk.

⁵² Nɛɓa Yeese ɓɔlɔɔrɛ ɗegerɔɔn ɛɛkoŋk a eek nɛɛkɛ, a porɛ taamɛkɛ Waakoyotoŋk a joopoŋk.