Lukaas 19 - Kuumeet Sinɔ Tɔɔnuk Ad Majaŋeeroŋk

Yeesee A Jakiyoos

¹ Mɛlɛɓa Yeese Iyaarkowa nɛɓa ɗoyu a gopan.

² Lakɛɓa saadi iɗit sinɔ riyɛ kɛ Jakiyoosuk. Sɛɛnɓa ɔɗɔwen joop sigɔ yayawar worik, ɛɓa sɛɛn iɗit sinɔ lak worik.

³ Nɛɓa sɛŋk ɗɛyɛ dɛnɛɛɗa Yeesee kɛ sɛɛn won, sɛɛnɓa iɗit sinɔ dinyŋɔŋk, nɛɓa ki oolɛ a dɛnɛɛriŋ agut sinɔɓa ɓɔɔkaakiɗ joopuk.

⁴ Agut sinɔɓa Yeese ɗoyiiɗ sinaanɛk, nɛɓa Jakiyoos ɗoyu joope sigaagɛ ɔɗɔɔkɛ nɛ kɛɛ teeŋɛ rakaaya kɛɛta kɛ aabɛ.

⁵ Saaɓa Yeese mɛlɛɛɗ saanak, nɛɓa ɓɔŋgɔɔrɛ taamɛ rakaaya nɛ tonu Jakiyoosa kɛ, "Iin Jakiyoos, worworaaka ɗooka a gorgor agut sinɔ ɗɛyɛta a kɔɔ arka ɓenyse nyaki nookɛk."

⁶ Nɛɓa sɛŋk worworiiki ɗooka a gorgorŋ nɛ boŋu yaakat.

⁷ Nɛɓa joop sigɛ atu saadik baŋɛ dɛnɛr nɛ laaganyar kɛ, "Guuguny godeya iɗit sinɔ tikitank kɛnɔ wɔɔrɛɛ sɛɛn."

⁸ Yakanaɓa Jakiyoos ɛtɛ nɛ tonu Suumi Yeeseya kɛ, "Suumi naakɛ, gaɓaakɔɔ wori sinɛ lakaak baŋɛ gɔɔ om sankaanaka, ɔkɔn lakɛ wori sinɔkan weela ete nyonɛkiŋ jumurguɗakɔɔ a suɗaktaanak aŋan."

⁹ Nɛɓa Yeese tonu kɛ, "Bɔdɛ ɓenyse godeya sineena agut sinɔ ɓɔrɛ ege iɗit sini komoy Abrahamuk.

¹⁰ Agut sinɔ kusukan Tɔn Etoŋk kɛnɔ warɛ ɛ ebɔdɛ sigɛkan badɛrk."

Rɔmɛ Ijaageer Sigɔ Aarink

¹¹ Saaɓa joop gɛɛnɛ atukuɗ tiyaan any sinik, nɛɓa Yeese tonu rɔmɛ kɛkar, agut sinɔɓa wɔɔŋkuɗ Yorsaleema nɛɓa koɓur joop gɛɛnɛ kɛ yaaŋɛ ɛɛk burɛ Waakoyotoŋk sisa.

¹² Nɛɓa Yeese tonu sɛɛga kɛ, "Lakɛɓa iɗit om sinɔ eemɛyɛɛŋɔŋk sinɔɓa kɛɛ ɗooka sinɔɔna yowɛɛɗŋɔŋk kɛnɔ kɛɛ boŋku ɓaŋkawuka tapaaɗiikeenoŋk nɛ weerikiŋɔŋk.

¹³ Riyiriɓa ijaageerɛ gɛɛnɛ a aarin nɛ gaɓɛ sɛɛga biriyatɔk a ɗibɛ ɗibɛ nɛ tonu sɛɛga kɛ, 'In nagadɗiikɛɛ worii sineene mɛlɛɛɗa nɔkɔɔ mɛlkiɗak.'

¹⁴ Joop sigɛ ɗoo nɛɛkik agut sinɔɓa ɓooyurɗuŋɔŋk nɛɓa wosɛyɛrgeeɗ joop sɛɛne baŋi kɛ, 'Kii ɗɛyɛ iɗit sini a suumi eteŋkɛ raŋ.'

¹⁵ "Nɛɓa iɗit sinɛ weeriki ɗooka nɛɛka a sɛɛn tapaɗ. Nɛɓa riy ijaageer gɛɛŋk kɛnɔ kɔɔniy sɛɛg kɛ nagadɗikan worii sinaanɛkan gaɓɛ sɛɛgak nɛkan laŋir wori om a ɛtɛ ɛk.

¹⁶ "Nɛɓa ijaagen sinɛ tuktank wideer ɛɛk, nɛ tongeeɗ kɛ, 'Suumi naakɛ, nagadɗiikakan worii kanta gaɓunk. Nɛkan laŋa biriyatɔk a ɗibɛ.'

¹⁷ "Nɛɓa tongeeɗ suumii kɛ, 'Iin ijaagen sinɔ ŋaadɛɛŋɔŋk, ijaaginkɔ a liki! Agut sinɔnu ŋaadiɗɛ ant sinɔɔnɛ tɛmŋɔŋkuk, suumakɔnu katamɛɛkɛ sigɔɔgɛ aarink.'

¹⁸ "Nɛ wideer ɛɛk ijaagen sinɛ pɛɛyeen nɛɛkik nɛ tongeeɗ kɛ, 'Suumi naakɛ, nagadɗiikakan worii kanta gaɓunk. Nɛkan laŋa biriyatɔk a pɔlpɔlɛ joo pɛɛyk a aarin.'

¹⁹ "Nɛɓa suumi nɛɛkɛ tonu eta sinaana kɛ, 'Suumakɔ ɓɔrɛ iin katamɛɛkɛ sigɔɔgɛ tuulk.'

²⁰ "Nɛɓa wideer ɛɛk ijaagen nɛɛk om nɛ tongeeɗ kɛ, 'Suumi naakɛ, isi worikanta gaɓunk. Guunaayakan abiye nɛkan riiɓaaŋ.

²¹ Ɓurakanniŋ agut sinɔ iin iɗit sinɔ kalkalkinŋɔŋk, sinɔ boŋun any sinɔkan kin riiɓɛɛk ɗootun any sinɔkan kin soowɛtik.'

²² "Nɛɓa tongeeɗ suumi nɛɛkɛ kɛ, 'Iin ijaagen sini ŋɛɛwɛnŋɔŋk! Goopaani waasiyɛɛkɛ goonɛk. Ɔkɔnkan, ɗegerin kɛ eet iɗit sinɔ kalkalŋɔŋk sinɔ boŋa any sinɔkan kaa riiɓɛɛk ɛ ɗoota any sinɔkan kaa soowɛtik.

²³ Nɛkan wori naak kin gaamit godeya bankiyoŋk agut jikon, nɛ gun saa mɛlkiɗak, gaɓunta a sinɛkan laŋiiɗɛɛk?'

²⁴ "Nɛɓa suumi nɛɛkɛ tonu joopa sigaagaɓa ɛtɛtɛɗar saadik kɛ, 'In boŋɛɛ biriyatɔk sigi aarink ete sineene, nɔ gaɓɛɛ eta sinaanakɔ laŋi biriyatɔk a ɗibɛk.'

²⁵ "Nɛɓa sɛɛk tonur kɛ, 'Suumi naŋk, lak iɗit sinɛ biriyatɔk a ɗibɛ.'

²⁶ Nɛɓa suumi nɛɛkɛ tonu sɛɛga kɛ, 'Tona kɔnaaŋ, iɗit sinɛ lakik siipigiɗɛɛkoyŋ, ma iɗit sinɛ kiiɗɛk boŋkuɗɛɛkoy aasi sinɛ lakikiŋ.

²⁷ Mayakana gumaakeer gaaŋk sigi kir ɗɛyɛ a eet suumi sɛɛge raŋk, in ɗɔkɛ sɛɛg nɔ ɓokootɛ sɛɛg eete taamɛkɛ.' "

Mɛlɛ Yeese Yorsaleema

²⁸ Saaɓa Yeese toniiɗ sinik baŋiya, nɛɓa ɗoykun Yorsaleema sɛɛge ɔɗɔɔkɛ.

²⁹ Saaɓa woontukuɗ katamɛɛka Beetɛ paage a Bitaniyaak sigaaga atu kurkum Dɛbirɛ Jɛytik jɔkuk, nɛɓa Yeese wosɛyɛ nomtaanak gɛɛŋk a pɛɛy kɛ,

³⁰ "In kɛɛɗɛɛ mɛndɛra sinɔɔna ar kɔne ɔɗɔɔkɛk. Saakɔɔ mɛlɛrɗɔ saanak, nɛkɔɔ laŋirkɔɔ tɔɔn kuroyoŋk sinɔ in kɛɛ iɗit sinɔɓa beeɗiɗik a ar tuseeɗ. Nɛ in woorkɛ nɔ ɗɔkɛ.

³¹ Ɔkɔn lakɛ iɗit sinɔ kɔnu kɔɔniy kɛ, 'Woorurkɔ agut jikonkuŋ?' In tonguɗɛ kɛ, 'Ɗɛyɛ sɛɛg Suumii.' "

³² Nɛɓa kaar joop sigɛɓa wosɛyɛ sɛɛgik nɛ kaar laŋirki oko sinɛkɔ toniiɗ sɛɛgak.

³³ Nɛɓa ɗuma dɛnɛr saa woorurkuɗ tɔɔn sinɛ kuroyoŋkuk, nɛ tonur sɛɛga kɛ, "Woorurkɔ agut jikon?"

³⁴ Nɛɓa sɛɛk tonur kɛ, "Ɗɛyɛ Suumiya."

³⁵ Nɛɓa sɛɛk ɗɔkarki tɔɔn sinɛ kuroyoŋk Yeeseya, epatarɗiɓa abiyak gɛŋk raŋk nɛ arir a beeɗ Yeese kuroy nɛɛkɛ raŋk.

³⁶ Epatarɓa joop abiyak gɛŋk gopɛ sinaanɛ kɛɛɗik.

³⁷ Saaɓa woontukuɗ gopana sinaana ɓurɓuɗiikiɗɛ kurkum Dɛbirɛ Jɛytik, nɛɓa nomtaanak gɛɛnɛ sigɔ ɓɔɔkaaŋɔŋk yaa sɛɛga agut sɔɔriyɛ sigɛɓa dɛnɛrk baŋɛ, nɛɓa pɔɔsɛr Waakoyo a ɗooruŋ kɛ,

³⁸ "Tapaɗ sinɔ kus tiriyaakɛ, Waakoyotoŋkuk geetitan! In yaaka dari, in dakɛr pɔɔsiyɛk Waakoyota sinaana ar darik!"

³⁹ Joop Paarisik a omoŋ omoŋ sigɛɓa atu joope sigaagɛ ɓɔɔkaak kɔɔrk tonurɓa Yeeseya kɛ, "Rɔɔriytaano, koykoyte nomtaanak gooŋk."

⁴⁰ Nɛɓa sɛŋk tonu sɛɛga kɛ tona kɔnaaŋ, "Ɔkɔn nomtaanak gaanɛ dakɛr kɛ many, nɛ aasi ooyɛr giɗeek."

Kuɗe Yeese Agut Katamɛ Yorsaleemuk

⁴¹ Saaɓa Yeese wɔɔŋkuɗ Yorsaleemak, nɛɓa dɛnɛ katamɛ nɛɛk nɛ kuɗugeeɗiŋ.

⁴² Tonuɓa kɛ, "Iin gunkɔ aasi ɓenyse ɗegerin any sinɛ ɗɛyɛ bɔdɛɛɗa nookaakiŋ, yakana kɔne any sini dugiɗi taamɛkɛŋ.

⁴³ Mɛlkikoy ɔɔtɛ sinɔkoy gumaaker goonɛ ijaagirɗine isɛ tookɛɛta nɔnu tookɛr gɔɔ baŋɛ nɔnu ooɗɛrɗiŋɔŋkuŋ.

⁴⁴ Iin a tɔɔmɔk gooŋk sigɛ beeɗiir sɛɛg isɛ nookɛ takik repɛɛkoy sɛɛg a ɗoo. Kɛɛ aasi giɗee sinɔ omoŋɔŋk sinɔkoy dakɛ a ki aalɗiitik, agut sinɔ kiiɗin ɗegerɔɔn ɔɔtɛ sinɛ kɔɔnu lɛɛwukuɗ Waakoyot nɔ kɔɔnu ebɔdɛɛɗik."

Ɔɔyɛ Yeese Joop Sigɔ Nagadɗi Godeey Sinaanɛ Geetitank

⁴⁵ Guugunyɓa Yeese Godeya sinaana Geetitank, nɛ tuke ɔɔyɛta joop sigɛ nagadɗi saadik.

⁴⁶ Tonuɓa sɛɛga kɛ, "Taapɛɛɓa Wargatɛɛ Waakoyotoŋk kɛ, 'Ege koy Gode Naakɛ gode ɗanɗamɔɔnoŋk.' Yakana sɔɔk ariir a nyon dugeeɗoŋk agaltiiroŋk."

⁴⁷ Rɔririyiiɓa Yeese ɓɛɛnyɔwɛ gɛɛŋk baŋɛ Godeey sinaanɛ Geetitank. Ɔɗɔweer tapa ŋaadiyɛɛkoŋk, a rɔɔriytaanak higi Muuseek, a ɔɗɔweer tapa ŋaadiyɛɛkoŋk ɔgɔ ɗɛyɛrɓa ɓokotiita.

⁴⁸ Yakanaɓa kir ɗegerɔɔn kɛ ijaagir jikon nɔ ruumerɗi any sinik, agut sinɔɓa joop baŋɛ lalaŋiɗ a sɛɛn nɛ nomɛrɗi any sinɛ rɔɔriyaaɗikik.