Lukaas 18 - Kuumeet Sinɔ Tɔɔnuk Ad Majaŋeeroŋk

Jarti Sinɔ Kiiɗɛ Baabuyk A Iɗit Sinɛ Pɛrɛdɛk Ŋɛɛwɛnŋɔŋk

¹ Tonuɓa Yeese nomtaanaka gɛɛna rɔmɛ sini kɛnɔ in ɗanɗama ɓɛɛnyɔwɛ gɛɛŋk baŋɛ a kat bɔɔla.

² Tonuɓa sɛɛga kɛ, "Lakɛɓa katamɛɛ omalte iɗit pirdiyoŋk sinɔ ŋɛɛwɛnŋɔŋk sinɔɓa ki tuɓur Waakoyo ɛ ki eemɛyɔɔn joopuk.

³ Ɛɓa ɓɔrɛ lakɛ jarti om sinɔɓa kiiɗɛ baabuyk katamɛɛ sinaanɛk. Nɛɓa sɛŋk ɛnyɛnyɛ son lak iɗit sinɛk nɛ tongeeɗ kɛ, 'Taaki tin agut palamɛ sinɔ lakii a kaarin naakik.'

⁴ Nɛɓa iɗit sinɛ ki tɛɛnan boŋiɗ kɛ many. Nɛ saadi baŋiya kɛ koɓu ɓayaay nɛɛkɛ kɛ, 'Kɛygun kaa tuɓur Waakoyoŋ ɛ kɛygun kaa eemɛyɔɔn joopuŋ,

⁵ ma jarti sini kiiɗɛ baabuyk agut sinɔta palamɗiɗŋɔŋk pɛrɛdigiɗaakɔɔŋ. Ma ɔkɔn kɔɔ kiigidaŋ nɛkɔɔ weeweriiki nɛkɔɔtu ooɗɛŋ."

⁶ Nɛɓa Suumii tonu kɛ, "In tiyɛɛ any sinɛkɔ tonu ɔɗɔwen sinɛ moko likik.

⁷ Joop Waakoyotoŋk sigɛ duriyer sɛɛna kaay a waawuyk ki sɛɛg tɔkɔny? Beeɗ Waakoyot kɛ many?

⁸ Tona kɔnaaŋ, kɔnyɛ sɛɛg a gorgorŋ. Mayakana saakoy mɛlkiɗ Tɔn Etoŋkuk laŋkoy ŋaadiyɛ joope ɗookoŋkuŋ yoo?"

Iɗit Paarisik A Iɗit Sinɔ Yayawu Worik

⁹ Joop sigɔ ikomur ɛɛk nɛŋk a ŋaadir kɛ mentaana taamɛkɛ Waakoyotoŋk ma daraayɛr joop ɔgɔɔŋɔŋk, tonuɓa sɛɛga Yeese rɔmɛ sini kɛkar kɛ,

¹⁰ "Kaarɓa joop a pɛɛy ɗanɗamɔɔna Godeya sinaana Geetitank. Egeɓa omaay iɗit Paarisik, ma omaay iɗit sinɔ yayawu worik.

¹¹ Nɛɓa iɗit sinɛ Paarisik ɛtɛ nɛ ɗanɗama agut ɛɛk nɛɛk kɛ, 'Iin Waakoyo, pɔɔsaniŋ agut sinɔ moko sɛŋk eet iɗit sinɔ weeweeliŋɔŋk, ɛ moko eet tikitan, ɛ moko eet iɗit sinɔ ibiɗiiŋɔŋk, ɛ moko ito eet iɗit sini yayawu worik.

¹² Sooma ɗoŋikɛ sigɔɔgɛ tula pɛɛyk agut pɛɛy, boŋka asiraat ant sinaanɛ laŋaakiŋ.'

¹³ "Maɓa sɛŋk iɗit sinɛ yayawu worik ɛtɛ a yowɛɛɗiŋ. Nɛɓa aasi ki ɗɛyɛ a ɓɔŋgɔɔrɛ taamɛ gɛɛŋk rakaayaŋ, mayakanaɓa paaŋi kokom nɛɛk nɛ tonu kɛ, 'Iin Waakoyo, eet sini tikitank, maariyreetik!'

¹⁴ Tona kɔna kɛ sinɛɓa weeri nyaka nɛɛka a mentan taamɛkɛ Waakoyotoŋkuk, iɗit sinɛɓa yayawu worik, ma mokoɓa iɗit sinɛ Paarisik. Iɗit sinɔ ɓɔŋgɔɔrɛ ɛɛk nɛɛk rakaayak arkoy ɗook, ma iɗit sinɔ rikite ɛɛk nɛɛk ɗookak arkoy rakaay."

Geeti Yeese Tɔɔmɔk

¹⁵ Ɗɔkarkiɓa joop tɔɔmɔk son lak Yeeseek kɛnɔ riiɓe sɛɛge ari raŋk. Nɛɓa nomtaanak gɛɛnɛ dɛnɛr joop sigɛ ɗɔkarki tɔɔmɔk gɛɛŋkik, nɛ koykoyɛr sɛɛgiŋ.

¹⁶ Yakanaɓa Yeese riyki tɔɔmɔk gɛɛŋk son lak sɛɛnik nɛ tonu kɛ, "In kurak tɔɔmɔ son lak eetik. Kat ɓaarɗɛ sɛɛg agut sinɔ ege Burɛ Waakoyotoŋk joop sigɔ rikiter ɛɛk oko sinikik.

¹⁷ Eekeer tona kɔnaaŋ, iɗit sinɔ ki boŋiɗ Burɛ Waakoyotoŋk okokɔ toomoŋk kikoy guugunyɔn saana adaktan."

Kɔɔniyɔn Iɗit Sinɔ Lak Worik

¹⁸ Tonuɓa ɔɗɔwen Ayuuduk omaay Yeeseya kɛ, "Iin rɔɔriytan sini mentanŋɔŋk, dɔɔsta a araa jikon? Nɔkoy laŋiiɗa wɛɛŋa sigɛkoy nɔkoy nɔkoyk"

¹⁹ Nɛɓa Yeese tonŋeeɗ kɛ, "Kɔɔniyinte any sinɔ mentanŋɔŋk agut jikon? Sinɛ mentank Waakoyo sinɛ omoŋɔŋk dakɛɗa.

²⁰ Ɗegerin sekiyɛ gɛɛŋkiŋ. Sɛɛg 'Kat ibiɗiikin, kat ɓokotɗikin, kat agalɗikin, kat waasin nyon, eemɛy ɓaaɓa a ŋaaŋa."'

²¹ Nɛɓa iɗit sinɛ tongeeɗ kɛ, "Kooraaɓa sekiyɛ sigi baŋɛ a tukiɗi tɔɔnikent naakɛk."

²² Saaɓa Yeese tiyɛɛɗ any sinik, nɛɓa tongeeɗ kɛ, "Ŋayɗiine sisɔ any a omoŋ. Ɓala ant sinaanɛ lakink baŋɛ, nɔ gaɓun sankaanaka, laŋinkoy gati nɛɛk dari. Nɛ saadi baŋiya, kusun nomkun eete."

²³ Yakana saaɓa iɗit sinɛ tiyɛɗ sinik, nɛɓa sanɗi jɛt agut sinɔɓa lakiɗ wori a obiiŋɔŋk.

²⁴ Nɛɓa Yeese mermen iɗit sinɛ nɛ tonu kɛ, "Morɛ ɓaŋkawu guugunyɔn burɛya Waakoyotoŋk joopa sigɔɔga latu worikiŋ!

²⁵ Ɔɔtɛ sinɔɔnɛ gun guugunyɗu iɗit sinɔ lak worik burɛya Waakoyotoŋkuk bala sinɔ guugunyɗu taga sinɔɔnɛ tool marpeyoŋkuk."

²⁶ Joop sigɛɓa tiyɛr sinik, tonurɓa kɛ, "Anɛkoy oolɛ a bɔdɛ wooɗ?"

²⁷ Nɛɓa Yeese tonu kɛ, "Any sinɔ ki gayɛ etaak gayɛ Waakoyotaŋ."

²⁸ Nɛɓa Petros tongeeɗ kɛ, "Ŋɔrkiikɔ any baŋɛ nɛ ne nomiiŋ."

²⁹ Tonuɓa sɛɛga Yeese kɛ, "Eekeer tona kɔnaaŋ, iɗit sinɔ ŋɔr gode nɛɛk maŋk jarti nɛɛk maŋk manyaakak maŋk ɛpɛn a ɛmɛs maŋk tɔɔmɔk gɛɛŋk, agut burɛ Waakoyotoŋkuk, laŋikoy a kaalɛŋ,

³⁰ eme sineene boŋu a suɗaktaanak ɓɔɔkaaŋ, maɓɔrɛ eme sinaanɛkoy mɛlkik laŋkoy wɛɛŋa sigɛkoy nɔkoyk."

Tonu Yeese Ɔɔtɛ Rer Nɛɛkik Kɛkar

³¹ Boŋuɓa Yeese nomtaanak gɛɛŋk sigɛ aarin a pɛɛyk mowan nɛ tonu sɛɛga kɛ, "Sisɔ ŋaarii Yorsaleema. Dusanɛɛkɔɔ any sinɛɓa taapɛr joop pɛrkaakoŋk agut Tɔɔn Etoŋkuk baŋɛ.

³² Gaɓɛɛkɔɔ Tɔɔn Etoŋk joopa sigaaga moko Ayuuduk. Nɛkɔɔ rɛɛsɛrgeeɗiŋ, nyɔɔnarkoyŋ, topɛpɛyargeeɗkoyŋ, ɗiŋerkoyŋ, nɛ ɓokoturŋ.

³³ Nɛkɔɔ sɛŋk ŋaarki ɗoŋikɛ sigɔɔgɛ jiitik ret walasa."

³⁴ Yakanaɓa nomtaana gɛɛnɛ kir ɗegerɔɔn any sinɛ tonuk. Nɛɓa kɛɛ any sinɔ omoŋɔŋk mɛlɛ sɛɛga seedik, dugiɗiiɓa sɛɛge any sinɛ dugaŋɔŋk totonukuŋ.

Ebɔdɛ Yeese Mot Om Iyaarkowe

³⁵ Saaɓa Yeese wɔɔŋkuɗ Iyaarkowaak, nɛɓa mot omaay beeber gopɛ kɛntɛɛ a kalɛlɛyiiŋ.

³⁶ Nɛɓa iɗi sinɛ motuk tiyɛ joop sigɛ ɓɔɔkaak saa ŋawiiterɗik, nɛ kɔɔniya kɛ, "Ege sini jikon?"

³⁷ Nɛɓa sɛɛk tonurgeeɗ kɛ, "Ɗoyu sineene Yeesee kɔ Naajreetik."

³⁸ Nɛɓa ooyɛ kɛ, "Iin Yeesee, Tɔɔn Daawitik, maariytik!"

³⁹ Nɛɓa joop sigɛ ɗoyur ɔɗɔɔkɛk koykoyɛr sɛɛn kɛnɔ dakɛ kɛ many, nɛɓa sɛŋk ooyɛ a kaalɛŋ kɛ, "Iin Tɔɔn Daawitik, maariytik!"

⁴⁰ Nɛɓa Yeese ɛtɛ nɛ tonu kɛnɔ ɗɔkɛ iɗit sinɛ son lak sɛɛnik. Nɛ saaɓa mɛlkiɗ son lak sɛɛnik,

⁴¹ nɛɓa kɔɔniy kɛ, "Ɗɛyin ana ara jikon?" Nɛɓa iɗit sinɛ motuk tongeeɗ kɛ. "Suumi naakɛ, ɗɛyaree dɛnɛ."

⁴² Nɛɓa Yeese tongeeɗ kɛ, "Dɛna. Ebɔdɛr kɔnu ŋaadiyɛ goonɛŋ."

⁴³ Nɛɓa iɗit sinɛ dɛnɗi sisa, nɛ nomɛ Yeesee a eemɛy Waakoyo. Saaɓa joop sigɛ ɓɔɔkaak baŋɛ dɛnɛrɗi any sinik, nɛɓa pɔɔsɛr Waakoyo.