Lukaas 17 - Kuumeet Sinɔ Tɔɔnuk Ad Majaŋeeroŋk

Ɔɔtɛ Ɗiirin Tikiyɛɛkɛk A Tɔŋɔɗ Ɔɔtɛyoŋk A Ŋaadiyɛ

¹ Ɓeny omalte tonuɓa Yeese nomtaanaka gɛɛna kɛ, "Kikoy dakɛ a kiiki mɛlɛ any sinɔ arɗi a tikiɗikɛɛŋɔŋk, mayakana iɗit sinɛ arɗi a tikiɗikɛɛŋɔŋk duri koy sɛɛna.

² Sigeege temetuŋɔŋk iɗit sinɔ ooɗɛ om ɔɔtɛ tikiyɛɛkoŋkuk, dɔɔsgeeɗ a kurɛygiɗɛ goori ŋɔɗɔka, nɛ oriirɛɛ gɔrɔwa sinɔɔna obiiŋɔŋk ɓukuurŋɔŋk.

³ In koorɛɛ ɛkan goŋk! "Ɔkɔnna tikiɗi, masookooyuŋ goopuk. Nɛ ɔkɔnna tiyɛŋ, tɔŋɔɗarkiɗik.

⁴ Ɔkɔnna tikiɗi waawuy sinɔɔnɛ omoŋɔŋk agut tula pɛɛyiŋ, ɛ kus waawuy sinɔɔnɛ omoŋɔŋk agut tula pɛɛy ɛna toton kɛ, 'Weerikaakɔ tikiyɛɛkɛ gaanɛŋ', nɛ tɔŋɔɗatarkiɗ."

⁵ Tonurɓa nomtaana Suumiya kɛ, "Siipi tina ŋaadiyɛ gaŋk."

⁶ Nɛɓa Suumii tonu sɛɛga kɛ, "Ɔkɔn latukari ŋaadiyɛ sigɔ ito saanoykuŋ ɛ toniir aabɛyta sineena kɛ, 'Monta seedi nɔ ɛtin goroo sinoonɛ obiiŋɔŋk.' Nɛkɔna tiiɗiŋ."

Ijaag Ijaagentoŋk

⁷ "Tonuɓa Yeese kɛkar kɛ, "Ɔkɔn kɔne iɗit omaay lak ijaagen sinɔ ijaag taawak maŋk koorɛ jiŋkuyɛɛk, nɛ saa weerikiɗ ijaagen nɛɛkɛ ijaagik, nɛ sisa tongeeɗ kɛ, 'Waɗiŋ, dokuɗe nɔ ɗamun ɗama?'

⁸ Ma moko tongeeɗ kɛ, 'Ijaagta ɗama naak nɔ ɗamika, tusu ɓeetɔn nook teeɓɛɛ mɛlɛɛɗa nɛkɔɔ ɗamiɗa ɛ utiɗiiɗaak. Nɛkɔɔ ɓaane baŋiya ɗamikin ɛ utiɗiikin?'

⁹ Iɗit sini pɔɔsɛ ijaagen nɛɛk agut sinɔkɔ ijaagiɗ any sinɛkɔ tongeeɗikiŋ?

¹⁰ Oko sinik saa ijaagirɗɔ any sinɛkɔ kɔna tonɛɛk baŋɛk, in tonɛɛ kɛ, 'Eteŋk ijaageer sigɔ kir kɔnyɗiitik. Ijaagiikɔ ijaag naŋk dakɛɗa.' "

Ebɔdɛ Yeese Joop Sigɔ Gorur Dɔɔɓɔyk A Aarin

¹¹ Saadi baŋiya saaɓa Yeese kɛɛɗ Yorsaleemak, nɛɓa ɗoyu sinɔɔnɛ kɛntɛ Sɛmaariyaak a Gɛlilaak.

¹² Nɛ saaɓa mɛlɛɛɗ mɛndɛra omaltaak, nɛɓa laŋirki sɛɛn joop a aarin sigɔɓa sɛɛg gaamu dɔɔɓɔyk. Nɛɓa sɛɛk ɛtɛr a yowɛɛɗiŋ,

¹³ nɛ tonur a ɗooruŋ kɛ, "Iin rɔɔriytan, Yeesee. Maariy tin!"

¹⁴ Nɛɓa Yeese dɛnɛ sɛɛg nɛ tonu sɛɛga kɛ, "In ŋaarɛɛ, nɔ kɛɛɗɛɛ yaaŋɛɛ ɛɛk noŋk tapaaka ŋaadiyɛɛkoŋk." Nɛɓa sɛɛk bɔdɛrki dɔɔɓɔy nɛɛkɛ sisa, ma atu ŋawit nɛɛkɛk.

¹⁵ Saaɓa sɛɛge iɗit omaay dɛnɛɛɗ bɔdɛ nɛɛkik, nɛɓa weeriiki a pɔɔsɛ Waakoyo a ɗooruŋ.

¹⁶ Pɔɔsɛɓa Yeesee a supke tepeen ɗoo derakɛ gɛɛnɛk. Egeɓa sinɛ iɗit Sɛmaariyaak.

¹⁷ Nɛɓa Yeese kɔɔniy sɛɛn kɛ, "Mokokɔto bɔdɛrki joop a aarin baŋɛ? Nɛ atu eet sigɛ tula aŋank?

¹⁸ Kɛɛ joop sigɔkɔ weeriik nɔ pɔɔsɛr Waakoyok ete sineene moko Ayuuduk sɔgɔɔsɔyk?"

¹⁹ Nɛɓa tonu eta sinaana kɛ, "Teŋaraŋana nɔ ŋaarin. Ebɔdɛr kɔnu ŋaadiyɛ goonɛŋ."

Mɛlɛɛ Burɛ Waakoyotoŋkuk

²⁰ Kɔɔniyarɓa joop Paarisik Yeesee kɛ, "Mɛlkikoy burɛ Waakoyotoŋk okoɗ?" Nɛɓa sɛŋk jumur sɛɛga kɛ, "Mokokoy mɛlki burɛ Waakoyotoŋk oko sinɛ koorɛrɗi joopk.

²¹ Kirkoy joop oolɛ a tonur kɛ, 'Ɓɛɛlɛ seedi' maŋk kɛ, 'Ɓɛɛlɛ sooy, agut sinɔ ɓɛɛlɛ burɛ Waakoyotoŋk iinakɛ kɔɔr."

²² Tonuɓa Yeese nomtaanaka gɛɛna kɛkar kɛ, "Mɛlkikoy ɔɔtɛ sinɔkoy ɗɛyɛrɗɔ a gun dɛnɛɛr ɓɛɛnyɔwɛkɛ Tɔɔn Etoŋkuk sinɔ omoŋɔŋk, yakana kiirkoy taanta.

²³ Ɔkɔnkoy kɔna tonur joop kɛ, 'Ɔsɔ sɛɛn sooyuk!' maŋk kɛ, 'Isii sɛɛn seeyik!' Nɛ yakana kat ŋaadɛɛ any sinɛ kɔna tonurk ɛ kat nomɛɛ sɛɛge.

²⁴ Oko sini dɛnɛɛɗɛ nyaalan dari a nyaalɛ kɛntɛɛ mɛlɛɛɗa kɛntɛyak, ɓɛɛlɛkoy ɓɔrɛ ɓenysaakoy mɛlkiɗ Tɔn Etoŋkuk oko sinɛk.

²⁵ Yakana a in ki gayɛ sini ɗɛyɛ Tɔɔna Etoŋk a laŋki rakatɛ sinɔ ɓaŋkawuŋɔŋk a daraayɛɛ ɛ laaganyɛɛ joope eme sinik.

²⁶ "Oko sinɛɓa ɓɛɛlɛɛɗ eme Noohk, ɓɛɛlɛkoy ɓɔrɛ eme Tɔɔn Etoŋkuk oko sinɛk.

²⁷ Ɗamiɓa joop ɛ utiɗi ɛ boboŋi ɛ wawawar, mɛlɛɛɗa ɗoŋika sigaagaɓa guugunyɗu Nooh emɗa sinɔɔna obiiŋɔŋkuk. Nɛɓa mɛlki yeeye nɛ jɔɔlɛyɛɛr sɛɛg baŋɛ.

²⁸ "Ɓɛɛlɛɓa ɓɔrɛ eme Lootuk oko sinɛk, ɗamiɓa joop ɛ utiɗi, ɛ ɓalɗi ɛ ɓaɓali ɓolaatuuruwɛkɛ, ɛ waayɗi ɛ kɛnyar godeyik.

²⁹ Ɓeny sinaanɛɓa Loot ŋaarkiɗ Sɛdoomek, ɛɛkikiɓa maɗ a koon dari nɛɓa moɗɛɛr sɛɛg baŋɛ.

³⁰ "Ɓeny sinaanɛkoy ɓɔrɛ yaaŋɛɗ ɛɛk Tɔn Etoŋkuk ɓɛɛlɛkoy oko sinɛk.

³¹ Ɓeny sinaanɛkoyk iɗit sinɔkoy ar godeey nɛɛkɛ ajeerantik katkoy worworiiki kɛnɔ boŋku ɓɔlaaturuwɛ gɛɛŋk godeey. Maɓɔrɛ iɗit sinɔkoy ar taawoyk katkoy weeriki baŋiya.

³² In koɓukɛɛ jartiɓa Lootuk!

³³ Iɗit sinɔ ɗɛyɛ a ebɔdɛ wɛɛŋa gɛɛŋkik sɔɔkɛ sɛɛgiŋ, mayakana iɗit sinɔ oru wɛɛŋa gɛɛŋkik ebɔdɛ sɛɛgiŋ.

³⁴ Tona kɔnaaŋ, kaalt sinaanɛkoy joop a pɛɛy ɗeegararkoy a bɛɛroy omoŋ, nɛkoy boŋɛɛ om, ma omaay dakɛŋ.

³⁵ Jartiyatɔk a pɛɛy atukoy giyɛ agut omoŋ, nɛkoy boŋɛɛ om, ma omaay dakɛŋ."

³⁶ ["Joop a pɛɛy atukoy ijaag taawoy tak agut omoŋ, nɛkoy boŋɛɛ om, ma omaay dakɛŋ."]

³⁷ Nɛɓa nomtaanak gɛɛnɛk kɔɔniyar Yeesee kɛ, "Suumi naŋk, boŋɛɛkoy sɛɛg etena?" Nɛɓa sɛŋk jumur sɛɛga kɛ, "Tolɗi sɔɔlilaŋɛɛk soodi, lakiɗɛ any sinɔkɔ rɛrŋɔŋkuk."